Read Akha Yawˇbaˆ 39 Bible Online

Yawˇbaˆ 39 - Akha bible

Yawˇbaˆ 39

¹Lo guˇ-ahˇ jawˇ-eu yaˬ deuˬ zaˬ gʼaw-eu aˇ yamˬ nawˇ siˬ nya ma loˇ. Kʼaˬ tsehˆ zaˬ puˬ-eu nawˇ mawˇ haw maˬ loˇ.

²Aˬ yawꞈ maꞈ uˬ maˆ laˬ kʼoeˇ ba la aˇ myaˆ siˬ zaˬ pi-eu nawˇ siˬ nya-awˇ, aˬ yawꞈ maꞈ zaˬ puˬ-eu aˇ yamˬ nawˇ toꞈ nya ma loˇ.

³Aˬ yawꞈ maꞈ daˇ tsuiꞈ mˇ ku-awˇ, zaˬ tsahˇ doˆ leꞈ-eu aˇ yamˬ nawˇ siˬ nya ma loˇ.

⁴Aˬ yawꞈ maꞈ-euˬ zaˬ deuˬ bawˇ tsahˬ-ahˇ huiˬ laˇ gʼahˇ laˇ-awˇ, tiˬ jawˇ-iˬ maˬ paˇ gʼoꞈ doˆ laˇ ni iˇ byoˆ-eu meh.

⁵Bawˇ tsahˬ mahˬ tahˬ laˆ-ahˇ aˬ suˇ gʼaˬ neh pyehˬ-awˇ bi jawˇ taˬ. Aˬ suˇ gʼaˬ neh aˇ caˆ pyehˬ-awˇ bi gaˆ taˬ.

⁶Bawˇ tsahˬ bawˇ dahˇ-ahˇ aˬ yawꞈ maꞈ-euˬ nymˇ bi pyeuꞈ-awˇ, saˬ deuꞈ deh ga-ahˇ aˬ yawꞈ maꞈ-ahˇ bi jawˇ-euˬ ma.

⁷Bahˬ gʼa lawꞈ gʼa-eu meuˬ-ahˇ gaˇ mahˇ kaˬ gaˇ aˬ yawꞈ maꞈ jawˇ-awˇ, tsawˇ haˬ tiˬ gʼaˬ-iˬ aˬ yawꞈ maꞈ-ahˇ laˆ yah-awˇ maˬ kʼehˇ dzaˬ nya-a.

⁸Aˬ yawꞈ maꞈ gaˆ dzaˬ duˬ gawˬ jawˬ-ahˇ jaˆ-awˇ, dzaˇ nyoeˇ kʼaˇ dehꞈ gaˇ aˬ yawꞈ maꞈ poˆ dzaˬ-eu meh.

⁹Nehꞈ nyoˬ-ahˇ nawˇ kʼehˇ dzaˬ nya te loˇ. Nawˬ-euˬ mawˇ neˇ kuˆ laꞈ kʼoeˇ tiˬ miˇ uˇ bya nehˬ laꞈ tehꞈ-a loˇ.

¹⁰Nehꞈ nyoˬ-ahˇ nawˇ aˇ caˆ paꞈ-awˇ deh yaˇ tsehˬ nya te loˇ. Maˬ ngeuˇ naˇ jehˆ kaˆ bi kaˆ nya te loˇ.

¹¹Aˬ yawꞈ-euˬ huiˬ-eu gʼaˬ-ahˇ gʼoe-awˇ nawˬ-euˬ gʼaˇ duˬ myawˬ kʼaˆ bi mˇ-eu lehˇ noeˬ tmˬ nya te loˇ.

¹²Cehˇ bymˇ saˬ kʼawꞈ-ahˇ jaˆ-eu nawˬ-euˬ cehˇ-ahˇ, cehˇ jiˇ-ahˇ tawˬ ahˇ nehˬ laꞈ tehꞈ-a lehˇ noeˬ tmˬ nya te loˇ.

¹³Law taw aˇ jiˇ dahˇ diˬ diˬ kawˇ nya kʼawꞈ, uiˇ dzoeˬ loꞈ-ehˇ maˬ zaw nya-a.

¹⁴Law taw aˇ jiˇ miˇ tsaˬ-ahˇ ya uˆ ka dzeh-awˇ, miˇ tsaˬ yaw saꞈ neh yaw lmˇ bi uˆ lmˇ-eu meh.

¹⁵Aˬ cawˬ neh bi nawˬ pyehˆ-awˇ, bawˇ tsahˬ jeˬ zaˬ neh bi laˆ paˆ kʼawꞈ aˬ yawꞈ maˬ siˬ nya-a.

¹⁶Ya uˆ kʼoeˇ deuˬ aˬ yawꞈ-euˬ maˬ ngeuˇ-eu loꞈ-ehˇ aˬ yawꞈ jawˇ-awˇ, aˬ yawꞈ neh mˇ taˬ-euˬ jeˬ yawꞈ ngehꞈ-ehˇ pyeuꞈ-iˇ gaˇ aˬ yawꞈ kʼahˬ maˬ lahˇ-a.

¹⁷Aˬ yawꞈ aˬ byahˬ byahˬ-awˇ zaˬ siˬ tsawˇ gahˇ maˬ ahˇ ni jahˇ nehˬ-euˬ gʼaˬ ngaˇ ma.

¹⁸Ehˇ kʼawꞈ, aˬ yawꞈ tsawˬ tuˇ-awˇ ya cehˆ laˇ naˇ, mahˬ hawˇ-eu mahˬ dziˬ luꞈ-eu tsawˇ haˬ-ahˇ uiˇ uiˇ-ehˇ cehˆ dzeuˇ-eu meh.

¹⁹“Yawˇbaˆ-oˇ, mahˬ deuˬ-ahˇ gʼaˬ bi tsoꞈ-awˇ, lahˇ byoe gʼawˬ mahˇ ni ga gʼeu ni jahˇ-euˬ gʼaˬ nawˇ te loˇ.

²⁰Aˬ yawꞈ maꞈ nyehˇ bahˇ loꞈ-ehˇ teuˆ gahˇ nya-awˇ, tsawˇ haˬ zaˬ tsawˬ guˆ-iˇ paˬ-ehˇ naˇ mehˇ baw mahˇ nya ni nawˇ jahˇ nehˬ taˬ teˬ loˇ.

²¹Deh ga miˇ tsaˬ-ahˇ aˬ yawꞈ maꞈ laꞈ tsehˬ tsehˬ-awˇ, gʼaˬ kʼaˇ jaˆ-eu shaˇ-awˇ guiˇ deuˆ gaˇ coeˬ uˇ gʼeh-eu meh.

²²Guˆ-eu jeˬ-ahˇ aˬ yawꞈ maꞈ maˬ siˬ nya-ehˇ, aˬ yawꞈ maꞈ naˇ kʼah paw cehˆ gʼoꞈ ni mi cehˇ neh maˬ teh pyawˇ nya-a.

²³Aˬ yawꞈ maꞈ-ahˇ dziˬ luꞈ-eu tsawˇ haˬ deuˬ yuˇ luꞈ-eu guiˇ deuˆ-eu keu ka deuˬ, shoe loe shuiˇ luiˇ-ehˇ mahˇ mahˇ-ehˇ guiˇ nyiˬ ni jaˆ-eu meh.

²⁴Aˬ yawꞈ maꞈ nui ma daˆ laˇ-awˇ yaw dzuˬ dzuˬ-eu laꞈ kʼoeˇ mehˬ hu paw cehˆ coeˬ coeˬ-eu meh. Daˇ heh teˇ saˇ mahˇ laˇ ngeh aˬ yawꞈ maꞈ maˬ jawˇ tehˬ coeˇ-a.

²⁵Daˇ heh teˇ saˇ aˬ yawꞈ teˇ yawꞈ kʼaˇ mahˇ laˇ ngeh aˬ yawꞈ maꞈ naˇ mehˇ baw-eu meh. Guiˇ deuˆ duˬ maˬ keuˆ le mi naˆ-ehˇ guiˇ-euˬ yaw saꞈ aˬ yawꞈ maꞈ siˬ nya-awˇ, guiˇ maꞈ-ahˇ uˆ lahˇ-eu yaw huiˬ yaw mahˇ deuˬ dawˬ biꞈ-awˇ guˇ gaˇ aˬ yawꞈ maꞈ gaˬ nya-eu meh.

²⁶“Kʼaˬ dzeˇ pyawˆ aˬ dahˇ mˇ pyeh-awˇ laꞈ oˆ paw zaw gʼeh-eu kʼoeˇ aˬ joˆ-ehˇ ya zaw-eu nawˇ mehˬ nehˬ teˬ loˇ.

²⁷Gawˬ jawˬ yaw goˇ-ahˇ kʼaˬ dzeˇ dzeˇ ma bahˬ bahˬ-eu kʼoeˇ, nawˬ-euˬ ehˇ dawˬ naˇ haˬ-awˇ mˇ ta loˇ.

²⁸Lo guˇ mˬ gʼmˬ-ahˇ aˬ yawꞈ nymˇ tsoˆ-awˇ ceh taˆ ni gʼeh-eu lo guˇ uˬ dzo aˬ yawꞈ-euˬ taˆ meh.

²⁹Kʼoeˇ gaˇ nuiˇ-awˇ dawˬ peh gaˇ mahˇ doe ni haw-awˇ, aˬ yawꞈ tsuˆ sehꞈ dzaˬ-eu jeˬ-ahˇ poˆ luꞈ-eu meh.

³⁰Tsuˆ sehꞈ taˬ-euˬ aˇ mawˇ dawˬ peh aˬ yawꞈ maꞈ ga uiˬ-awˇ, kʼaˬ dzeˇ dzeˇ zaˬ deuˬ shiˬ dawˇ-eu meh.”