Read Akha Yawˇbaˆ 4 Bible Online

Yawˇbaˆ 4 - Akha bible

Yawˇbaˆ 4

¹DAWˬ JA JA-EUˬ YAW BEH DEUˆ Kʼoeˇ naˇ, Teˬmaˬ meuˬ-ahˇ jawˇ-eu Eˇliˇpaˬ gʼaˬ ehˇ-eu,

²“Yawˇbaˆ-oˇ, ngaˇ dawˬ ngehˬ gaˇ, nawˇ maˬ naˇ haˬ nahˇ-eu maˬ siˬ. Ehˇ kʼawꞈ, ngaˇ dawˬ maˬ ngehˬ-ehˇ, maˬ paˇ dzahˬ tehˬ coeˇ miˇ-a.

³Tsawˇ haˬ gʼawˬ mya gʼaˬ-ahˇ nawˇ mehˬ nehˬ tsoˆ nehˬ haw-awˇ, gʼaˬ byehˆ byehˆ-eu deuˬ-ahˇ gʼaˬ biꞈ haw-euˬ meh.

⁴Tsawˇ haˬ tiˬ gʼaˬ na sahˬ tiꞈ tiꞈ-eu miˇ neh, gʼaˬ byehˆ byehˆ-awˇ gʼaˬ doeˇ doeˇ ngeh, nawˬ-euˬ dawˬ gaˬ-awˇ gʼaˬ ahˇ-eu laꞈ kʼoeˇ yawꞈ ziꞈ nya-eu meh.

⁵Nymˬ-mˇ poˆ jawˇ nawˇ gʼaˬ shaˬ-eu zahˬ-eu jeˬ ya tahˬ puˬ-awˇ, nawˇ maˬ daˬ coeˇ gaˇ duˇ-eu meh.

⁶Miˬyehˇ-ahˇ nawˇ uˬ duˬ tahˬ-awˇ, iˬ baˇ maˬ mˇ ni dehꞈ-euˬ meh. Kʼoeˇ miˇ neh nawˇ nui ma kʼaˬ duˬ ni taˬ-awˇ, noeˬ tmˬ-eu jeˬ bi jaˆ-eu tsaˬ meh.

⁷Dzeuˇ laˇ-euˬ gaˇ kawˆ-ahˇ paˇ shaˇ noeˬ haw sheˇ. Yaw tsaˬ yaw dawˇ tsawˇ haˬ tiˬ gʼaˬ na, shaˬ-eu zahˬ-eu jeˬ-ahˇ ya tahˬ puˬ haw-euˬ jaˆ ta loˇ.

⁸Tsawˇ haˬ zaˬ maˬ muiˬ maˬ jaˬ-eu deh ma tsehˬ-awˇ, haiˬ-eu siˬ yoeˬ sehˬ-eu laꞈ kʼoeˇ, yaw haiˬ jeˬ hawˇ-eu maˬ muiˬ maˬ jaˬ-eu aˇ nuiˆ deuˬ aˬ yawꞈ maꞈ yehˬ uiˬ diˬ uiˬ luꞈ meh.

⁹Miˬyehˇ nui ma pehˇ-eu laꞈ kʼoeˇ jaˬ lehˇ lehˇ ma baw-eu loꞈ-ehˇ aˬ yawꞈ maꞈ-ahˇ laˆ cawˆ-eu meh.

¹⁰Haiˬ dui dui-eu tsawˇ haˬ kʼoeˇ deuˬ, aˇ laˬ jaˬ shiˇ loꞈ-ehˇ joeˬ kʼawꞈ, Miˬyehˇ neh seuˬ bi diˬ juˆ-awˇ, ciˬ cuˇ ni bi pyeuꞈ-iˇ-eu meh.

¹¹Kawꞈ sehꞈ dzaˬ-eu jeˬ nym le-awˇ, aˇ laˬ jaˬ shiˇ shiˇ-eu loꞈ-ehˇ, aˬ yawꞈ maꞈ ya shiˇ gaˇ keuˆ-awˇ, zaˬ deuˬ ya cehˆ byaˆ jiˇ-euˬ meh.

¹²Tiˬ poˆ-aˬ, ngaˇ jawˇ gaˇ bi gaˬ le-euˬ dawˬ, ciˬ cuˇ ni keuˆ le-euˬ meh. Ciˬ cuˇ ni keuˆ le-euˬ miˇ neh aˬ za za-ehˇ tehꞈ-ehˇ gaˬ laˇ-eu meh.

¹³Dawˬ kʼoeˇ ngaˇ yuꞈ luꞈ gaˇ nehꞈ zuiˆ zuiˆ-eu loꞈ-ehˇ laˆ bahˬ le-euˬ meh.

¹⁴Ngaˇ guˆ-awˇ yaw dzuˬ dzuˬ-euˬ ma. Guˆ-eu miˇ neh gʼawˇ mawˇ mawˇ lah-ehˇ nyeh nyeh-ehˇ yaw dzuˬ dzuˬ-euˬ ma.

¹⁵Ngaˬ-euˬ myaˆ pyawˬ-ahˇ yaw shehꞈ tiˬ hmˬ oe tsehˆ leꞈ ngeh, ngaˇ tsawˬ guˆ-iˇ-awˇ uˬ duˬ tsehˇ kahˇ tsawˬ tuˇ tuˇ laˇ-euˬ miˇ-a.

¹⁶Kʼoeˇ gaˇ tiˬ jeˬ paˬ yawꞈ luꞈ gaˇ ngaˇ mawˇ-euˬ ma. Ngaˇ yaw muiˬ paˬ-ehˇ haw kʼawꞈ maˬ haw duˬ nya nya. Kʼoeˇ ngeh, ciˬ cuˇ ni gʼeh gaˇ teˇ saˇ heu loꞈ-ehˇ gaˬ doˆ laˇ-euˬ meh.

¹⁷“Tsawˇ haˬ zaˬ Miˬyehˇ mehˬ shi yaw tsaˬ yaw dawˇ dawˇ-ehˇ dehꞈ nya meh loˇ. Beh-euˬ yaw sahˇ mehˬ shi shawˇ jehˆ ni dehꞈ nya meh loˇ.

¹⁸Mˬ kʼoeˇ taˆ jawˇ-eu aˬ yawꞈ-euˬ zaˬ kʼaˆ deuˬ-ahˇ Miˬyehˇ maˬ jah-a. Mˬ taˆ gʼaˬ kʼehˇ deuˬ kʼawꞈ yaw lehˬ mˇ gaˇ aˬ yawꞈ ya mawˇ-euˬ meh.

¹⁹Shaˬ jehˆ yuˇ-awˇ tehˆ taˬ-euˬ deuˬ-ahˇ aˬ yawꞈ jah coeˇ tehꞈ-a lehˇ nawˇ noeˬ te loˇ. Miˇ tsaˬ neh jahˇ taˬ-awˇ aˇ lu ciˇ teuˆ loꞈ-ehˇ bi nyehꞈ pyehˆ nya-eu jeˬ-ahˇ aˬ yawꞈ jah coeˇ tehꞈ-a loˇ.

²⁰Tsawˇ haˬ tiˬ gʼaˬ uˬ shawˬ paw dehꞈ luꞈ kʼawꞈ, uˬ ciꞈ maˬ ciꞈ le mi naˆ-ehˇ tiˬ gʼaˬ-iˬ maˬ ya siˬ ni shiˇ nya-eu meh.

²¹Aˬ yawꞈ kʼaˇ jaˆ-eu jeˬ bi yuˇ byoˆ gʼeh jiˇ-awˇ, tsawˇ gahˇ maˬ ahˇ ni ya shiˇ kʼaˆ-eu meh.”