Read Akha Yawˇbaˆ 41 Bible Online

Yawˇbaˆ 41 - Akha bible

Yawˇbaˆ 41

¹Byaˆ yahˬ-ahˇ nawˇ ngaˬ juiꞈ neh juiꞈ paꞈ nya-awˇ, aˬ yawꞈ-euˬ mehˬ laˇ-ahˇ aˇ caˆ neh paꞈ cuꞈ nya te loˇ.

²Byaˆ yahˬ-ahˇ nawˇ naˇ kaˬ smˇ nya-awˇ, mehˬ law-ahˇ kuˆ seuˬ tahˇ byoe nya te loˇ.

³Aˬ yawꞈ-ahˇ pyehˬ nehˬ laꞈ-awˬ lehˇ nawˬ-ahˇ shaˇ-awˇ, gʼawˬ shaˬ gaˬ nehˬ laꞈ-awˬ lehˇ shaˇ ju tehꞈ-a loˇ.

⁴Aˬ yawꞈ nawˬ nehˬ-ehˇ ja tsaˬ geuꞈ-awˇ, maˬ shiˇ tiˬ ziˇ nawˬ-euˬ zaˬ kʼaˆ geuꞈ ma lehˇ saˇ jaˇ dzaˬ tehꞈ-a loˇ.

⁵Aˇ jiˇ jiˇ zaˬ-ahˇ paꞈ-eu loꞈ-ehˇ aˬ yawꞈ-ahˇ paꞈ taˬ-awˇ, nawˬ-euˬ zaˬ miˬ zaˬ zaˬ kʼaˆ deuˬ bi haw niˇ gʼa-eu loˇ.

⁶Ngaˬ shaˬ poˆ-eu tsawˇ haˬ deuˬ aˬ yawꞈ-ahˇ zeuˇ-eu lehˇ aˇ poeˬ ja haw tehꞈ-a loˇ. Baw gaꞈ deuˬ aˬ yawꞈ-ahˇ pyaˆ ahˬ tehꞈ-a loˇ.

⁷Ngaˬ shaˬ-ahˇ tsawˆ-eu gahˬ neh aˬ yawꞈ-euˬ baˆ kʼoˆ-ahˇ nawˇ tsawˆ byoe jiˇ nya-awˇ, ngaˬ shaˬ-ahˇ beuˆ-eu kaˆ myaˬ neh aˬ yawꞈ-euˬ uˬ duˬ beuˆ byoe nya te loˇ.

⁸Aˬ yawꞈ-ahˇ nawˇ tiˬ poˆ laˆ ciˆ haw gʼaˬ naˇ, tiˬ jawˇ-iˬ maˬ paˇ laˆ ciˆ peuˬ-aˇ. Aˬ yawꞈ-ahˇ tiˬ poˆ ceh haw naˇ, nawˬ-euˬ tiˬ ziˇ maˬ paˇ ngehˇ leˇ coeˇ-aˇ.

⁹Byaˆ yahˬ-ahˇ kʼaˇ ya mawˇ-euˬ tsawˇ haˬ, laˇ baˇ-iˇ-awˇ coˬ dzeh-iˇ-eu meh.

¹⁰Aˬ yawꞈ-ahˇ nui ma laˆ pehˇ naˇ, guˆ dui dui laˇ paˬ-ehˇ gʼeh-awˇ, aˬ yawꞈ mehˬ shi tsawˇ haˬ tiˬ gʼaˬ-iˬ maˬ yawꞈ tehˬ peuˬ-a.

¹¹Aˬ yawꞈ-ahˇ ceh leˇ-eu tsawˇ haˬ yaw dehꞈ-ehˇ ya jawˇ tehꞈ-a loˇ. Miˇ tsaˬ kʼoeˇ taˆ jawˇ-eu tsawˇ haˬ tiˬ gʼaˬ-iˬ kʼoeˇ loꞈ-ehˇ maˬ jahˇ nya-a.

¹²Ngaˇ nawˬ-ahˇ byaˆ yahˬ-euˬ aˬ kuiˇ gaˇ kawˆ ja mehˬ-awˇ, aˬ yawꞈ huiˬ-eu mahˇ-eu gaˇ kawˆ hawˇ-eu gʼaˬ kʼaˆ dui dui-eu gaˇ kawˆ dzawˇ nehˬ nyaˇ.

¹³Aˬ yawꞈ-euˬ baˆ kʼoˆ tiˬ gʼaˬ-iˬ maˬ yawˆ nya-ehˇ, gʼahˇ dui dui-eu aˬ yawꞈ-euˬ baˆ kʼoˆ-ahˇ tiˬ gʼaˬ-iˬ maˬ tsawˆ byoe nya-a.

¹⁴Guˆ dui dui laˇ paˬ-ehˇ gʼeh-eu seuˬ tiˬ byah tsoꞈ-eu aˬ yawꞈ-euˬ mehˬ law-ahˇ aˬ suˇ gʼaˬ ngawˬ nga nya nmˇ.

¹⁵Aˬ yawꞈ-euˬ dahˇ teˇ-ahˇ dehˬ daˬ duˬ teuˇ geuˆ ni tsoꞈ-awˇ, kʼaˬ lo loꞈ-ehˇ gʼahˇ-eu meh.

¹⁶Dehˬ daˬ duˬ kʼoeˇ tiˬ hmˬ tiˇ hmˬ tawꞈ leˇ taˬ-euˬ miˇ neh, jaˬ lehˇ iˇ doˆ kʼaˇ maˬ za-a.

¹⁷Aˬ yawꞈ maꞈ tiˬ hmˬ tiˇ hmˬ myahˬ leˇ taˬ-euˬ miˇ neh, tiˬ jeˬ neh-iˬ maˬ gʼeu yawˆ nya-a.

¹⁸Aˬ yawꞈ aˇ ceuˬ ceuˬ ngeh miˬ dzaˬ bya doˆ laˇ-awˇ, aˬ yawꞈ-euˬ myaˆ nuiˆ nahˇ ma doˆ dahˬ beh laˇ ngeh loꞈ-ehˇ neˇ-eu meh.

¹⁹Aˬ yawꞈ-euˬ kʼaˬ meh-ahˇ miˬ dzaˬ miˬ lmˇ doˆ laˇ-awˇ, miˬ dzaˬ miˬ dzuiꞈ poˬ poˬ-ehˇ jaˆ-eu meh.

²⁰Oeˬ lahˬ ciˬ dahˇ taˬ-euˬ uˬ moˆ jaˆ guˆ jaˆ meuˬ gʼoˆ doꞈ taˬ-euˬ loꞈ-ehˇ, aˬ yawꞈ-euˬ naˇ mehˇ-ahˇ uˬ kʼoeˬ doˆ-eu meh.

²¹Aˬ yawꞈ saꞈ gʼawˇ ngeh miˬ dzaˬ doꞈ laˇ-awˇ, aˬ yawꞈ-euˬ kʼaˬ meh-ahˇ miˬ dzaˬ miˬ lmˇ doˆ-eu meh.

²²Aˬ yawꞈ-euˬ kawˬ lahˇ-ahˇ baoˬ ahˇ-awˇ, aˬ yawꞈ-ahˇ kʼaˇ tahˬ puˬ-eu deuˬ guˆ dui dui-eu meh.

²³Aˬ yawꞈ-euˬ shaˬ jiˇ shmˇ loꞈ-ehˇ gʼahˇ-awˇ, yaw byehˆ tiˬ tsahˇ-iˬ maˬ jaˆ-a.

²⁴Kʼaˬ lo loꞈ-ehˇ gʼahˇ-eu aˬ yawꞈ-euˬ nui ma, guˆ-eu tiˬ pawꞈ-iˬ maˬ ahˇ-ehˇ, lo lehˬ loꞈ-ehˇ gʼahˇ dui dui meh.

²⁵Aˬ yawꞈ tuˇ laˇ ngeh, gʼaˬ huiˬ dui dui-eu deuˬ kʼawꞈ guˆ-iˇ-eu meh. Aˬ yawꞈ maꞈ guˆ dui dui-awˇ jawˇ tehˬ tsaˬ maˬ siˬ-a.

²⁶Aˬ yawꞈ-ahˇ deuˆ tahˬ nya-eu mi cehˇ maˬ jaˆ-ehˇ, kaˆ myaˬ hawˇ-eu gahˬ neh aˬ yawꞈ-ahˇ maˬ laˆ deuˬ nya-a.

²⁷Aˬ yawꞈ-euˬ gʼaˇ duˬ shmˇ gʼeh gʼoˆ yoeˬ loꞈ-ehˇ duˇ-awˇ, guiˬ shuiˇ gʼeh duˬ peuˬ-ahˇ duˇ-eu meh.

²⁸Kaˆ myaˬ neh aˬ yawꞈ-ahˇ maˬ teh luˆ nya-a. Aˬ yawꞈ-ahˇ kʼaˬ lo neh biˬ kʼawꞈ, gʼoˆ yoeˬ sehˆ muˆ neh biˬ gaˇ duˇ-eu meh.

²⁹Daˇ kawˬ-aˬ aˬ yawꞈ mehˬ shi gʼoˆ yoeˬ aˇ kahˬ loꞈ-ehˇ pyeuꞈ-awˇ, tsawˇ haˬ zaˬ aˬ yawꞈ-ahˇ gahˬ neh joeˬ gaˇ aˬ yawꞈ uiˇ-eu meh.

³⁰Aˬ yawꞈ-euˬ uˬ maˆ-ahˇ tsoꞈ-eu ngaˬ gʼaw deuˬ-aˬ, taˆ ngoꞈ ni gʼeh-eu ciˬ cuˇ cuˇ pyehˬ-ahˇ duˇ-awˇ, nyoˬ tsehˬ loꞈ-ehˇ miˇ tsaˬ-ahˇ tsehˬ paˆ nya-eu meh.

³¹Iˬ ma laˆ shaˆ-ahˇ iˇ buiˇ buiˇ-eu loꞈ-ehˇ laˆ pyeuꞈ nya-awˇ, tsiˇ oeˬ lahˬ loꞈ-ehˇ boeˇ loeˇ laˆ loeˇ nya-eu meh.

³²Aˬ yawꞈ iˇ-euˬ gaˇ kawˆ yaw shehꞈ bya yaꞈ-awˇ, iˬ ma laˆ shaˆ-ahˇ pyuˇ deuˬ ni sheu kawˆ yaꞈ-eu meh.

³³Aˬ yawꞈ-aˬ, guˆ-eu nui ma tiˬ pawꞈ-iˬ maˬ ahˇ-eu jeˬ pyeuꞈ-awˇ, miˇ tsaˬ kʼoeˇ taˆ aˬ yawꞈ-ahˇ duˇ-eu tiˬ jeˬ-iˬ maˬ jawˇ-a.

³⁴Nui ma huiˬ-eu mahˇ-eu jeˬ zaˬ deuˬ-ahˇ aˬ yawꞈ taˬ nyiˇ dui dui-awˇ, haiˬ-eu jeˬ zaˬ dawˬ tawˆ luꞈ kʼoeˇ taˆ aˬ yawꞈ sahˬ paˬ pyeuꞈ-eu meh.”