Read Akha Yawˇbaˆ 42 Bible Online

Yawˇbaˆ 42 - Akha bible

Yawˇbaˆ 42

¹Kʼoeˇ naˇ, Sahˬpaˬ Miˬyehˇ-ahˇ Yawˇbaˆ heu loꞈ-ehˇ ehˇ kʼoꞈ nehˬ-eu meh.

²“Sahˬpaˬ Miˬyehˇ-oˇ, nawˇ baoˬ dawˬ tawˆ luꞈ jaˆ-awˇ, kʼaˇ mˇ mawꞈ-eu jeˬ mˇ nya meh lehˇ ngaˇ siˬ nya ma.

³Ngaˬ-euˬ tsawˇ gahˇ-ahˇ teh ngehˬ laˇ-eu tsawˇ gahˇ tiˬ pawꞈ-iˬ maˬ ahˇ-eu tsawˇ haˬ heu gʼaˬ aˬ suˇ gʼaˬ-a lehˇ, nawˇ ngaˬ-ahˇ naˇ haˬ-eu meh. Ngaˬ-euˬ gʼaˇ duˬ zahˬ dui dui leˇ paˬ-ehˇ gʼeh-eu ngaˇ maˬ siˬ nya-eu gaˇ kawˆ deuˬ-ahˇ ngaˇ ngehˬ dzeuˇ tmˇ dzeuˇ-euˬ ma.

⁴Nawˇ ngehˬ-eu gaˇ kawˆ-ahˇ naˇ haˬ-awˇ, nawˬ neh kʼaˇ naˇ haˬ-euˬ jeˬ ehˇ kʼoꞈ-awˬ lehˇ, nawˇ ngaˬ-ahˇ ehˇ-eu meh.

⁵Dzeuˇ laˇ ngeh nawˬ-euˬ gaˇ kawˆ aˬ cawˬ ja gaˇ tehꞈ-ehˇ ngaˇ ya gaˬ haw-euˬ kʼawꞈ, nymˬ-mˇ ngaˬ-euˬ myaˆ nuiˆ neh nawˬ-ahˇ ya mawˇ duˬ-euˬ ma.

⁶Kʼoeˇ miˇ neh ngaˬ neh kʼaˇ ngehˬ kʼaˇ tmˇ dzeuˇ-euˬ jeˬ-ahˇ ngaˇ shaꞈ dawˇ-eu laꞈ kʼoeˇ, kʼaˬ puiˬ kʼaˬ lehˇ tsahˬ-ahˇ jawˇ-awˇ iˬ baˇ noeˬ poˆ-eu ma.”

⁷Sahˬpaˬ Miˬyehˇ Yawˇbaˆ-ahˇ dawˬ ngehˬ cawˬ gʼaˬ ngeh, Eˇliˇpaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Nawˇ hawˇ-eu nawˬ-euˬ cawˬ kʼoeˇ nyiˬ gʼaˬ-ahˇ ngaˇ nui ma pehˇ nya. Aˬ jeˬ miˇ neh ehˇ naˇ, ngaˬ-euˬ zaˬ kʼaˆ Yawˇbaˆ loꞈ-ehˇ ngaˬ-euˬ gaˇ kawˆ yaw tsaˬ yaw dawˇ dawˇ-ehˇ naw maꞈ maˬ ehˇ-a.

⁸Nymˬ-mˇ, mawˇ neˇ mawˇ gaw shiꞈ mawˇ hawˇ-eu yawˇ aˬ buˬ shiꞈ mawˇ Yawˇbaˆ jawˇ gaˇ tsahˇ gʼeh-awˇ, naw maꞈ-euˬ gʼaˇ duˬ lawˇ-awˬ, shehˇ-awˬ. Naw maꞈ gʼaˇ duˬ Yawˇbaˆ guiˬ lahˬ shaˇ gaˇ ngaˇ naˇ haˬ-awˇ, naw maꞈ-ahˇ geuˇ-eu loꞈ-ehˇ shaꞈ dawˇ-eu jeˬ ngaˇ maˬ bi keuˆ le. Naw maꞈ-aˬ, Yawˇbaˆ loꞈ-ehˇ ngaˬ-euˬ gaˇ kawˆ yaw tsaˬ yaw dawˇ dawˇ-ehˇ maˬ ehˇ-a.”

⁹Eˇliˇpaˬ, Biˇlaˬdaˇ, Zoˇpaˬ aˬ ha smˇ gʼaˬ-aˬ, Sahˬpaˬ Miˬyehˇ neh kʼaˇ ehˇ nehˬ-euˬ loꞈ-ehˇ mˇ-awˇ, Yawˇbaˆ-euˬ guiˬ lahˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-euˬ meh.

¹⁰Kʼoeˇ naˇ, aˬ yawꞈ-euˬ cawˬ kʼoeˇ smˇ gʼaˬ gʼaˇ duˬ Yawˇbaˆ guiˬ lahˬ shaˇ gʼaˬ ngeh, Sahˬpaˬ Miˬyehˇ neh aˬ yawꞈ-ahˇ baw le za le-eu guiˬ lahˬ paˇ biꞈ nehˬ-awˇ, yaw beh myaˆ maˬ tseˇ nyiˬ bymˇ paˇ bi jaˆ dzehˬ laˇ-euˬ meh.

¹¹Yawˇbaˆ-euˬ mehˇ nmˇ deuˬ, dmˇ ma deuˬ hawˇ-eu cawˬ deuˬ aˬ yawꞈ jawˇ gaˇ dawˬ deh gʼa laˇ-awˇ, aˬ yawꞈ-euˬ nymˇ laꞈ kʼoeˇ aˬ yawꞈ nehˬ-ehˇ dzaˬ taꞈ dawˇ taꞈ-euˬ meh. Sahˬpaˬ Miˬyehˇ neh aˬ yawꞈ kʼoeˇ taˆ bi keuˆ le-euˬ shaˬ zahˬ dawˬ tawˆ luꞈ gʼaˇ duˬ, aˬ yawꞈ maꞈ aˬ yawꞈ-ahˇ gʼawˬ shaˬ gaˬ-euˬ gaˇ kawˆ ja doˆ-awˇ, aˬ yawꞈ-ahˇ gʼaˬ biꞈ-euˬ meh. Yawˬ gʼaˬ yawˬ na luꞈ, pyuˇ ui cuiˆ hawˇ-eu shuiˇ laꞈ behˬ tiˬ behˬ aˬ yawꞈ-ahˇ biꞈ-euˬ meh.

¹²Yawˇbaˆ-euˬ ziˇ aˇ dahˬ beh ngeh naˆ maˬ tseˇ, aˇ saˬ saˬ le ngeh Sahˬpaˬ Miˬyehˇ guiˬ lahˬ biꞈ myaˬ dzehˬ-euˬ meh. Yawˇ tiˬ muiˇ oeˬ heˇ mawˇ, law taw koꞈ heˇ mawˇ, mawˇ neˇ nyiˬ heˇ mawˇ hawˇ-eu mahˬ tahˬ laˆ tiˬ heˇ mawˇ jawˇ-eu meh.

¹³Aˬ yawꞈ-aˬ, aˬ li shiꞈ li hawˇ-eu aˬ buˇ smˬ buˇ-euˬ aˬ da meh.

¹⁴Aˬ buˇ aˬ yuiꞈ gʼaˬ-ahˇ Yeˬmiˬma, aˬ gʼahˇ gʼaˬ-ahˇ Geˬziˇ, aˬ nyiˇ gʼaˬ-ahˇ Geˬleˬhaˬboˆ lehˇ aˬ yawꞈ kuˇ-euˬ meh.

¹⁵Miˇ tsaˬ dawˬ tawˆ luꞈ kʼoeˇ taˆ, Yawˇbaˆ-euˬ aˬ buˇ kʼoeˇ deuˬ loꞈ-ehˇ aˬ gʼehˇ muiˬ-eu zaˬ miˬ zaˬ maˬ jawˇ-a. Aˬ yawꞈ maꞈ-euˬ aˬ da-aˬ, aˬ yawꞈ maꞈ-euˬ aˬ mahˇ aˬ da deuˬ-ahˇ jeˬ biˇ biˇ nehˬ-euˬ loꞈ-ehˇ, aˬ yawꞈ maꞈ-ahˇ kʼawꞈ biˇ nehˬ-euˬ meh.

¹⁶Yawˇbaˆ-aˬ, kʼoeˇ sahˇ miˇ tsa tiˬ yaˇ oeˬ tseˇ kʼoꞈ paˇ dehꞈ-awˇ, oeˬ paˬ oeˬ ma deuˬ uˬ taꞈ, oeˬ lehˬ deuˬ-ahˇ kʼawꞈ mawˇ yaꞈ-euˬ meh.

¹⁷Kʼoeˇ naˇ, aˬ yawꞈ tsawˇ mawˬ mawˬ dui dui laˇ gʼaˬ miˇ tsa, ziˇ jiˇ-euˬ meh.