Read Akha Yawˇbaˆ 5 Bible Online

Yawˇbaˆ 5 - Akha bible

Yawˇbaˆ 5

¹Yawˇbaˆ-oˇ, nawˇ kuˇ haw sheˇ, oˬ toˬ nehˬ laꞈ-eu jawˇ meh loˇ. Nawˇ tahˬ shaˇ leˇ paˬ-ehˇ gʼeh-eu, mˬ taˆ gʼaˬ kʼehˇ jawˇ meh loˇ.

²Shiˇ gaˇ keuˆ ni noeˬ shaˬ-eu-aˬ, tsawˇ uˬ deuˬ mˇ-eu gaˇ meh.

³Tsawˇ uˬ ziꞈ dah ni dehꞈ luꞈ gaˇ, ngaˇ ya puˬ ya mawˇ haw-euˬ ma. Ehˇ kʼawꞈ, aˬ yawꞈ maꞈ-euˬ nymˇ-ahˇ ngaˇ yaˬ kʼehˇ yaˬ-euˬ ma.

⁴Aˬ yawꞈ maꞈ-euˬ aˬ li deuˬ tahˬ shaˇ duˬ maˬ poˆ mawˇ nya-a. Yaˇ kʼaˬ daˇ-eu nymˇ-ahˇ aˬ yawꞈ maꞈ paw pyawˬ-eu gʼaˬ maˬ jawˇ-a.

⁵Mehꞈ-eu shuꞈ-eu tsawˇ haˬ deuˬ tsawˇ uˬ-euˬ dzaˬ la gʼo cehˇ yehˬ dzaˬ tehꞈ-a. Aˬ gah baw duˆ yaw kaˬ-ahˇ dehꞈ gaˇ kʼawꞈ yehˬ dzaˬ tehꞈ-a. Maˬ jaˆ-eu tsawˇ haˬ deuˬ aˬ yawꞈ-euˬ pyuˇ shuiˇ myawˬ gahˬ-ahˇ mehˇ juiˇ juiˇ tehꞈ-a.

⁶Yaw haiˬ jeˬ miˇ tsaˬ-ahˇ maˬ dehꞈ-a. Shaˬ-eu zahˬ-euˬ jeˬ kʼawꞈ miˇ tsaˬ-ahˇ dehꞈ doˆ laˇ-eu maˬ ngeuˇ-a.

⁷Miˬ dzaˬ miˬ dziꞈ kʼoeˇ taˆ paw poˬ daˆ-eu yaw duˬ baw-eu loꞈ-ehˇ, yawˬ ha kʼoeˇ taˆ shaˬ zahˬ keuˆ le ni tsawˇ haˬ zaˬ yawˬ haˇ yawˬ ha mˇ-eu yaw duˬ baw-eu meh.

⁸“Ngaˬ-euˬ gʼawˇ mawˇ nawˇ pyeuꞈ law nmˇ-aˬ, Miˬyehˇ jawˇ paw ciˬ pyawˇ-awˇ gaˇ kawˆ heu aˬ yawꞈ-ahˇ a nehˬ ma.

⁹Aˬ yawꞈ neh mˇ-euˬ huiˬ-eu gaˇ deuˬ-ahˇ aˬ dui maˬ siˬ duˬ nya-a. Aˬ yawꞈ neh mˇ-euˬ zahˬ leˇ paˬ-ehˇ gʼeh-eu jeˬ maˬ gui jiˇ coeˇ ni jaˆ-eu meh.

¹⁰Miˇ tsaˬ kʼoeˇ taˆ uˬ yehˇ biꞈ-awˇ, deh yaˇ-ahˇ iˇ cuꞈ shehˬ-eu meh.

¹¹Nui nahˬ nui yu -ahˇ ciˬ huiˬ-awˇ, Ngoeˇ-eu deuˬ laˬ kʼaˬ ya cehˇ ni, caw ba nehˬ-eu gʼaˬ Miˬyehˇ meh.

¹²Nui ma laꞈ gʼoꞈ baw-eu deuˬ-euˬ nui noeˬ-ahˇ aˬ yawꞈ laˆ cawˆ-awˇ kʼaˇ noeˬ-euˬ loꞈ-ehˇ maˬ mˇ pyeuꞈ nya ni jahˇ nehˬ-eu meh.

¹³Tsawˇ gahˇ gahˇ dzaˬ-eu tsawˇ haˬ deuˬ noeˬ-euˬ loꞈ-ehˇ maˬ mˇ pyeuꞈ nya-eu gʼaˇ duˬ, aˬ yawꞈ maꞈ-ahˇ aˬ yawꞈ lahˇ ju kʼmˇ-eu meh.

¹⁴Nah gʼahˇ nah gaˆ-ahˇ zahˇ tsui ni gʼeh-eu jeˬ keuˆ le-awˇ, nah loˆ ceh ngeh laꞈ sawˆ sawˆ sawˆ-ehˇ cah-eu meh.

¹⁵Ehˇ kʼawꞈ, shaˬ-eu tsawˇ haˬ deuˬ maˬ ya shiˇ ni Miˬyehˇ ka kʼoꞈ-awˇ, iˇ shaˬ zaˬ deuˬ-ahˇ maˬ bi kʼehˬ ni aˬ yawꞈ dah teˬ-eu meh.

¹⁶Yaw shaˬ zaˬ deuˬ gʼaˇ duˬ noeˬ tmˬ duˬ bi jaˆ-awˇ haiˬ-eu tsawˇ haˬ deuˬ-euˬ kʼaˬ meh-ahˇ paꞈ tsoeˬ tsoeˬ-eu meh.

¹⁷“Miˬyehˇ neh bi tsiˬ shawˇ-euˬ tsawˇ haˬ guiˬ lahˬ huiˬ-eu meh. Kʼoeˇ miˇ neh aˬ yawꞈ lawˬ haw-eu jeˬ-ahˇ nui ma taˬ pehˇ.

¹⁸Miˬyehˇ laˆ tahˬ laˆ naˇ-euˬ gaˇ Miˬyehˇ kaꞈ uꞈ-eu meh. Aˬ yawꞈ-euˬ aˬ laꞈ neh laˆ naˇ-awˇ, aˬ yawꞈ-euˬ aˬ laꞈ neh paˇ laˆ taˬ nehˬ-eu meh.

¹⁹Shaˬ-eu zahˬ-eu jeˬ laꞈ kʼoeˇ tiˬ poˆ saˇ-i tiˬ poˆ aˬ yawꞈ nawˬ-ahˇ ka kʼoꞈ tehꞈ-a.

²⁰Mehꞈ ngeh shuꞈ ngeh aˬ yawꞈ nawˬ-ahˇ bi dehꞈ dzeuˇ-awˇ, guiˇ deuˆ ngeh aˬ yawꞈ nawˬ-ahˇ haw piˇ tehꞈ-a.

²¹Aˬ cawˬ ja doeˇ-eu jeˬ laꞈ kʼoeˇ Miˬyehˇ nawˬ-ahˇ ka kʼoꞈ tehꞈ-a. Luˬ-iˇ seˇ-iˇ-eu jeˬ keuˆ le ngeh aˬ yawꞈ nawˬ-ahˇ haw piˇ tehꞈ-a.

²²Haiˬ-eu jeˬ hawˇ-eu mehꞈ-eu shuꞈ-eu jeˬ-ahˇ nawˇ uiˇ haw-awˇ, haiˬ-eu bawˇ tsahˬ jeˬ zaˬ deuˬ-ahˇ nawˇ maˬ guˆ ni ya dehꞈ tehꞈ-a.

²³Kʼaˬ lo maˬ ahˇ-eu deh yaˇ-ahˇ nawˇ ya tsehˬ-awˇ, haiˬ-eu bawˇ tsahˬ jeˬ zaˬ deuˬ nawˬ-ahˇ tiˬ jawˇ-iˬ maˬ muiˇ-aˇ.

²⁴Nawˬ-euˬ yaˇ cmˇ laꞈ kʼoeˇ saˇ lehˆ ni nawˇ ya jawˇ-awˇ, nawˬ-euˬ yawˇ deuˬ-ahˇ nawˇ haw gʼeh ngeh, maˬ byoˆ maˬ laˆ ni jawˇ gaˇ ya mawˇ tehꞈ-a.

²⁵Nawˬ-euˬ zaˬ nawˬ-euˬ uˆ deuˬ deh ga-ahˇ dehꞈ-eu yaˇ moꞈ loꞈ-ehˇ myaˬ laˇ behˇ laˇ tehꞈ-a.

²⁶Cehˇ yehˬ ngeh yamˬ-ahˇ myah laˇ-euˬ cehˇ loꞈ-ehˇ, mawˬ-iˇ ngeh keuˆ ni nawˇ ya dehꞈ tehꞈ-a.

²⁷Yawˇbaˆ-oˇ, aˇ kʼoꞈ aˇ la gʼawˬ myahˇ ni nga maꞈ shaˇ sawˇ haw-awˇ heu loꞈ-ehˇ sawˇ duˬ taˬ-eu ma. Kʼoeˇ miˇ neh ngaˇ ehˇ-eu gaˇ kawˆ heu tsaˬ meh lehˇ nawˇ ha geuꞈ-eu tsaˬ tehꞈ-a.”