Read Akha Yawˇbaˆ 9 Bible Online

Yawˇbaˆ 9 - Akha bible

Yawˇbaˆ 9

¹Kʼoeˇ naˇ, Yawˇbaˆ ehˇ-eu,

²“Gaˇ kawˆ kʼoeˇ deuˬ dawˬ tawˆ luꞈ ngaˇ siˬ nya ma. Ehˇ kʼawꞈ, tsawˇ haˬ zaˬ Miˬyehˇ-ahˇ aˬ joˆ-ehˇ ja gʼaˬ nya nmˇ.

³Aˬ suˇ gʼaˬ aˬ yawꞈ nehˬ-ehˇ ja dzaˬ peuˬ nmˇ. Tsawˇ haˬ zaˬ maˬ ehˇ kʼoꞈ nya-eu dawˬ deuˬ, aˇ heˇ dawˬ aˬ yawꞈ naˇ haˬ nya meh.

⁴Miˬyehˇ-aˬ, tsawˇ gahˇ ahˇ dui dui-awˇ baoˬ huiˬ-eu meh. Tsawˇ haˬ zaˬ tiˬ gʼaˬ-iˬ aˬ yawꞈ-ahˇ maˬ ciˬ daˬ peuˬ-a.

⁵Maˬ siˬ laˇ mi naˆ-ehˇ gawˬ jawˬ-ahˇ aˬ yawꞈ ciˬ jiˆ-awˇ, nui ma pehˇ-eu laꞈ kʼoeˇ laˆ cawˆ nehˬ-eu meh.

⁶Aˬ yawꞈ miˇ luˆ bi luˆ-awˇ miˇ tsaˬ-ahˇ sheu nyeh-eu meh. Miˇ tsaˬ-ahˇ toˆ tehˬ taˬ-euˬ kʼawˇ zeuˇ-ahˇ aˬ yawꞈ ngawˬ nyeh-eu meh.

⁷Nahˇ ma maˬ bi doˆ laˇ ni aˬ yawꞈ laˆ naˬ nya-awˇ, uˬ ciꞈ paw aˬ guiˇ maˬ bi tsehˬ ni jahˇ nya-eu meh.

⁸Miˬyehˇ mˬ sheu taw-awˇ laˆ shaˆ byaˆ yahˬ-euˬ dahˇ teˇ ahˇ tsawˬ nawˬ nawˬ ngeh, tiˬ gʼaˬ-iˬ maˬ caw ba nehˬ-aˬ.

⁹Mˬ taˆ jaˆ-eu aˬ guiˇ deuˬ pyeuꞈ-eu, ciꞈ muiˇ, shawˬ muiˇ, aˬ guiˇ koꞈ la koꞈ dzahˬ hawˇ-eu laꞈ oˆ pyawˬ aˬ guiˇ deuˬ-ahˇ Miˬyehˇ neh beh taˬ-euˬ meh.

¹⁰Aˬ yawꞈ neh mˇ-euˬ huiˬ-eu gaˇ deuˬ-ahˇ aˬ dui maˬ siˬ duˬ nya-a. Aˬ yawꞈ neh mˇ-euˬ zahˬ leˇ paˬ-ehˇ gʼeh-eu jeˬ maˬ gui jiˇ coeˇ ni jaˆ-eu meh.

¹¹“Miˬyehˇ ngaˬ-euˬ dawˬ peh oe tsehˆ gʼeh kʼawꞈ, aˬ yawꞈ-ahˇ ngaˇ maˬ mawˇ nya-a.

¹²Aˬ yawꞈ kʼaˇ mawꞈ-eu jeˬ yuˇ geuꞈ gʼeh kʼawꞈ, laˆ tsoeˬ nya-eu tiˬ gʼaˬ-iˬ maˬ jawˇ-a. Nawˇ aˬ jeˬ jahˇ te lehˇ aˬ yawꞈ-ahˇ naˇ haˬ peuˬ-eu tiˬ gʼaˬ-iˬ maˬ jawˇ-a.

¹³Miˬyehˇ nui ma pehˇ-eu jeˬ maˬ byoˆ-iˇ nya-a. Iˬ ma laˆ shaˆ byaˆ yahˬ Laˬhaˇ-ahˇ caw ba le-eu aˬ yawꞈ-ahˇ muiˇ-eu deuˬ-ahˇ aˬ yawꞈ deh pyehˆ-eu meh.

¹⁴Kʼoeˇ miˇ neh aˬ joˆ-ehˇ gʼeh-eu dawˬ yuˇ doˆ-awˇ, Miˬyehˇ-ahˇ ngaˇ ya ngehˬ kʼoꞈ nmˇ.

¹⁵Ngaˇ iˬ baˇ mˇ taˬ-euˬ maˬ jaˆ kʼawꞈ, ngaˬ-ahˇ yaˇ kʼaˬ daˇ-eu ngaˬ-euˬ Miˬyehˇ-ahˇ tahˬ shaˇ-eu tiˬ kahˇ dahˇ-eu tehꞈ miˇ-a.

¹⁶Aˬ yawꞈ ngaˬ-ahˇ dawˬ bi ngehˬ laꞈ law hawˇ kʼawꞈ, ngaˬ-euˬ dawˬ-ahˇ aˬ yawꞈ naˇ haˬ tehꞈ-a lehˇ maˬ jah nya.

¹⁷Ngaˇ tiˬ jeˬ-iˬ jahˇ taˬ-euˬ maˬ jaˆ gaˇ, aˬ yawꞈ jaˬ lehˇ lehˇ ma pyehˬ gʼeh leꞈ-awˇ, ngaˬ-ahˇ laˆ tahˬ laˆ naˇ nehˬ laꞈ-euˬ meh.

¹⁸Aˬ yawꞈ ngaˬ-ahˇ saꞈ maˬ bi gʼawˇ dah ni, nui ma naˇ-eu jeˬ tiˬ byah ni bi keuˆ le-euˬ meh.

¹⁹Gʼaˬ-ahˇ gʼoe-awˇ aˬ yawꞈ nehˬ-ehˇ ngaˇ dawꞈ ceh ceh-eu loˇ. Aˬ yawꞈ nehˬ-ehˇ yaˇ kʼaˬ daˇ-eu nymˇ-ahˇ iˇ ni aˬ suˇ gʼaˬ laˆ luˆ peuˬ nmˇ.

²⁰Ngaˇ-aˬ, iˬ baˇ maˬ mˇ-ehˇ saˇ jaˇ ziꞈ-eu tsawˇ haˬ pyeuꞈ kʼawꞈ, ngaˬ-euˬ dawˬ bahˬ leˇ-euˬ meh. Ngaˇ kʼaˇ ngehˬ kʼaˇ tmˇ-eu yawˬ jeˬ na luꞈ ngaˬ-euˬ kʼoeˇ taˆ yaw lehˬ yaw ca bi keuˆ le gaˇ duˇ-eu meh.

²¹Ngaˇ iˬ baˇ maˬ-ahˇ. Ehˇ kʼawꞈ, yawˬ ngehꞈ meh. Yaw dehꞈ maˬ paˇ dehꞈ nahˇ miˇ-a.

²²Iˬ baˇ ahˇ-eu maˬ ehˇ, maˬ ahˇ-eu maˬ ehˇ, Miˬyehˇ laˆ cawˆ gaˇ ya daˬ-eu nga.

²³Iˬ baˇ maˬ ahˇ-eu tsawˇ haˬ tiˬ gʼaˬ ja pyuˬ ni shiˇ ngeh, Miˬyehˇ uiˇ-eu meh.

²⁴Miˬyehˇ haiˬ-eu tsawˇ haˬ-ahˇ miˇ kʼahˬ bi dzaˬ-awˇ, yaˇ kʼaˬ daˇ-eu tsawˇ haˬ dawˬ tawˆ luꞈ-ahˇ myaˆ behꞈ bi behꞈ iˇ-eu meh. Miˬyehˇ maˬ ngeuˇ-ehˇ aˬ suˇ gʼaˬ kʼoeˇ loꞈ-ehˇ jahˇ nmˇ.

²⁵Ngaˬ-euˬ aˇ nah deuˬ-aˬ, cehˆ ceh ceh-eu deuˬ naˆ maˬ tseˇ dzeuˇ-iˇ-eu kawˇ-awˇ, nah muiˬ tiˬ nah-iˬ maˬ ahˇ-a.

²⁶Ngaˬ-euˬ aˇ nah aˇ yamˬ, lawˬ heu-eu naˆ maˬ tseˇ kawˇ-awˇ, lahˬ-ahˇ tsuˆ-eu lehˇ ga le-eu kʼaˬ dzeˇ naˆ ni kawˇ-eu meh.

²⁷Ngaˬ-euˬ shaˬ zahˬ naˇ gawˇ dawˬ tawˆ luꞈ-ahˇ ngaˇ byehˇ dzeh-awˇ, nui ma saˇ lehˆ ni jawˇ ma lehˇ ngaˇ ehˇ ngeh,

²⁸Miˬyehˇ ngaˬ-ahˇ iˬ baˇ ahˇ meh lehˇ sawˇ-eu ngaˇ siˬ nya-awˇ, ngaˬ-euˬ naˇ gawˇ dawˬ tawˆ luꞈ ngaˇ jawˇ gaˇ paˇ gʼoꞈ kʼoꞈ laˇ-eu meh.

²⁹Ngaˬ-ahˇ iˬ baˇ ahˇ meh lehˇ sawˇ taˬ gʼaˬ-euˬ-aˬ, ngaˇ aˬ jeˬ lehˇ paˇ teuˆ nmˇ.

³⁰Ngaˬ-euˬ iˬ baˇ-ahˇ shaˇ byaˬ neh aˬ joˆ-ehˇ tsiˬ shawˇ nmˇ.

³¹Jawꞈ dui dui-eu duˬ kʼahˬ laꞈ kʼoeˇ Miˬyehˇ ngaˬ-ahˇ biˬ ahˇ-awˇ, ngaˬ-euˬ mehˬ tsoeˬ kʼawꞈ ngaˬ-ahˇ nui daˆ daˆ-eu meh.

³²Miˬyehˇ tsawˇ haˬ zaˬ pyeuꞈ law nmˇ-aˬ, aˬ yawꞈ-ahˇ ngaˇ ehˇ nehˬ nya ma. Yaˇ kʼaˬ daˇ duˬ-ahˇ le-awˇ, nga nyaꞈ-euˬ gaˇ kawˆ ja duˬ nya ma.

³³Ehˇ kʼawꞈ, nymˬ-mˇ nga nyaꞈ yaw kaˬ-ahˇ tsawˇ kaˬ maˬ jawˇ-a. Miˬyehˇ hawˇ-eu ngaˬ-ahˇ yaˇ kʼaˬ daˇ nehˬ-eu gʼaˬ maˬ jawˇ-a.

³⁴Miˬyehˇ-oˇ, ngaˬ-ahˇ taˬ paˇ kʼehˬ nehˬ laꞈ. Ngaˬ-ahˇ taˬ paˇ laˆ guˆ nehˬ laꞈ.

³⁵Ngaˇ maˬ guˆ ni dawˬ ngehˬ ma. Aˬ jeˬ miˇ neh ehˇ naˇ, ngaˬ-euˬ nui ma-ahˇ ngaˇ siˬ nya ma.