Read Akha Ja ceuˬ 106 Bible Online

Ja ceuˬ 106 - Akha bible

Ja ceuˬ 106

¹Sahˬpaˬ Miˬyehˇ-ahˇ ja ceuˬ-awˬ. Aˬ dui kʼoeˇ taˆ aˬ yawꞈ muiˬ-eu miˇ neh, Sahˬpaˬ Miˬyehˇ-euˬ guiˬ lahˬ-ahˇ ja ceuˬ-awˬ. Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh.

²Aˬ yawꞈ neh mˇ-euˬ huiˬ dui dui-eu gaˇ deuˬ-ahˇ aˬ suˇ gʼaˬ ja jiˇ coeˇ ta. Aˬ suˇ gʼaˬ aˬ yawꞈ-ahˇ ja ceuˬ jiˇ coeˇ ta.

³Aˬ yawꞈ-euˬ dawˬ-ahˇ naˇ haˬ geuꞈ-awˇ, aˬ myah luꞈ yaw tsaˬ yaw dawˇ jeˬ mˇ-eu deuˬ, guiˬ lahˬ huiˬ tehꞈ-a.

⁴Sahˬpaˬ Miˬyehˇ-oˇ, nawˬ-euˬ tsawˇ haˬ deuˬ-ahˇ nawˇ ngehˬ gʼeh ngeh, ngaˬ-ahˇ taˬ ngehˇ nehˬ laꞈ. Aˬ yawꞈ maꞈ-ahˇ nawˇ ka kʼoꞈ ngeh, ngaˬ-ahˇ taˬ byehˇ dzeh nehˬ laꞈ.

⁵Nawˬ-euˬ tsawˇ haˬ deuˬ baw le za le gaˇ ngaˬ-ahˇ bi mawˇ laꞈ-awˇ, nawˬ-euˬ tsawˇ jeuˬ nehˬ-ehˇ laˬ kʼaˬ caw cehˇ-eu laꞈ kʼoeˇ, nawˬ-ahˇ taꞈ-eu tsawˇ haˬ deuˬ loꞈ-ehˇ kʼahˬ sehˇ bi za nehˬ laꞈ.

⁶Nga maꞈ-euˬ aˬ poeˬ aˬ bawˇ deuˬ loꞈ-ehˇ nga maꞈ iˬ baˇ mˇ-awˇ, yaw haiˬ jeˬ laꞈ kʼoeˇ dehꞈ-euˬ ma.

⁷Iˇjiˇtuˆ miˇ kʼahˬ-ahˇ jawˇ-euˬ nga maꞈ-euˬ aˬ poeˬ aˬ bawˇ deuˬ, Miˬyehˇ neh mˇ-euˬ kʼaˆ jeˬ-ehˇ gʼeh-eu jeˬ-ahˇ maˬ siˬ nya-a. Aˬ yawꞈ-euˬ gʼoeˇ-eu gaˬ-eu jeˬ tiˬ poˆ saˇ-iˬ tiˬ poˆ mehˬ nehˬ-euˬ gaˇ aˬ yawꞈ maꞈ ngehˇ-awˇ, Iˬ ma laˆ shaˆ yaw neˇ-euˬ lawˇ deh-ahˇ, Huiˬ dui mahˇ dui dui-eu Miˬyehˇ-ahˇ puiˬ-euˬ meh.

⁸Ehˇ kʼawꞈ aˬ yawꞈ neh saˇ jaˇ dzaˬ taˬ-euˬ loꞈ-ehˇ, aˬ yawꞈ maꞈ-ahˇ ka kʼoꞈ nehˬ-awˇ, aˬ yawꞈ-euˬ huiˬ-eu baoˬ pah mehˬ-euˬ meh.

⁹Iˬ ma laˆ shaˆ yaw neˇ-ahˇ aˬ yawꞈ dawˬ biꞈ-awˇ, gui coˇ ni bi pyeuꞈ-iˇ-eu laꞈ kʼoeˇ, aˬ yawꞈ-euˬ tsawˇ haˬ deuˬ-ahˇ sheuˬ doˆ gʼeh-euˬ meh.

¹⁰Aˬ yawꞈ maꞈ-ahˇ bye-eu deuˬ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ muiˇ-eu deuˬ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ ka kʼoꞈ-euˬ meh.

¹¹Ehˇ kʼawꞈ muiˇ-eu deuˬ iˇ cuꞈ-ahˇ ga nuiꞈ-awˇ, tiˬ gʼaˬ-iˬ maˬ dzeuˇ-iˇ ni shiˇ jiˇ-euˬ meh.

¹²Kʼoeˇ ngeh, aˬ yawꞈ-euˬ tsawˇ haˬ deuˬ aˬ yawꞈ-euˬ saˇ jaˇ-ahˇ jah-awˇ, aˬ yawꞈ-ahˇ ja ceuˬ-awˇ caˇ-euˬ meh.

¹³Ehˇ kʼawꞈ, aˬ yawꞈ neh mˇ nehˬ-euˬ jeˬ-ahˇ, tiˬ kʼehˇ laˇ kʼehˬ laꞈ kʼoeˇ aˬ yawꞈ maꞈ ngehˇ jiˇ-awˇ, aˬ yawꞈ mehˬ nehˬ gaˇ maˬ dawˬ keuˆ ni dehꞈ-euˬ meh.

¹⁴Kʼaˇ shuiꞈ deh-ahˇ jawˇ ngeh aˬ yawꞈ maꞈ shaˬ jiˇ mehꞈ laˇ-awˇ, Miˬyehˇ-ahˇ lawˬ haw-euˬ meh.

¹⁵Kʼoeˇ ngeh, aˬ yawꞈ maꞈ kʼaˇ shaˇ-eu jeˬ biꞈ-euˬ meh. Ehˇ kʼawꞈ, guˆ laˇ paˬ-ehˇ gʼeh-eu naˇ gawˇ biꞈ caw nehˬ-euˬ meh.

¹⁶Sahˬpaˬ Miˬyehˇ-euˬ muiˬ-eu shawˇ-eu zaˬ kʼaˆ pyeuꞈ-eu Moˇseˬ hawˇ-eu Aˬloˬ-ahˇ, kʼaˇ shuiꞈ deh yaˇ laꞈ kʼoeˇ aˬ yawꞈ maꞈ myaˆ naˆ-euˬ meh.

¹⁷Kʼoeˇ ngeh, miˇ tsaˬ kʼaˬ meh mˇ nga laˇ-awˇ, Daˬtaˬ-ahˇ myoꞈ ahˇ-awˇ, Aˬbiˇlamˬ hawˇ-eu aˬ yawꞈ-euˬ miˬ sawˇ zaˬ deuˬ-ahˇ pymˬ tehˬ-euˬ meh.

¹⁸Aˬ yawꞈ maꞈ-euˬ mehˬ nah caw teh-eu deuˬ kʼoeˇ taˆ miˬ dzaˬ ga le-awˇ, haiˬ-eu tsawˇ haˬ kʼoeˇ deuˬ-ahˇ puiˆ dzeh-euˬ meh.

¹⁹Siˇnaˆ gawˬ jawˬ-ahˇ shuiˇ mawˇ neˇ mawˇ kawˇ tehˆ-awˇ, aˬ yawꞈ maꞈ uˬ duˬ tahˬ-euˬ meh.

²⁰Yaˇ moꞈ dzaˬ-eu jeˬ zaˬ pyeuꞈ-eu mawˇ neˇ-euˬ mawˇ kawˇ neh, Miˬyehˇ-euˬ yaw shehꞈ kʼahˬ sehˇ aˬ yawꞈ maꞈ paˇ dzeh-euˬ meh.

²¹Iˇjiˇtuˆ miˇ kʼahˬ-ahˇ kʼaˆ jeˬ-ehˇ gʼeh-eu jeˬ mˇ-eu laꞈ kʼoeˇ, aˬ yawꞈ maꞈ-ahˇ ka kʼoꞈ-euˬ Miˬyehˇ-ahˇ, aˬ yawꞈ maꞈ ngehˇ-euˬ meh.

²²Kʼoeˇ gaˇ aˬ yawꞈ neh mˇ-euˬ jeˬ aˇ naˆ ni gamꞈ leˇ paˬ-ehˇ gʼeh-eu nga. Iˬ ma laˆ shaˆ yaw neˇ dawˬ peh aˬ yawꞈ neh jahˇ-euˬ jeˬ, aˇ naˆ ni zahˬ leˇ paˬ-ehˇ gʼeh-eu nga.

²³Aˬ yawꞈ-euˬ tsawˇ jeuˬ-ahˇ laˆ cawˆ ma lehˇ Miˬyehˇ ehˇ ngeh, nui ma pehˇ-eu laꞈ kʼoeˇ tsawˇ haˬ kʼoeˇ deuˬ-ahˇ maˬ bi laˆ cawˆ-eu gʼaˇ duˬ, aˬ yawꞈ neh tseˇ doˆ-euˬ zaˬ kʼaˆ pyeuꞈ-eu Moˇseˬ, aˬ yawꞈ mehˬ shi yawꞈ daˬ leˇ-euˬ meh.

²⁴Miˬyehˇ-euˬ saˇ jaˇ-ahˇ maˬ jah-euˬ miˇ neh, nui saˇ oꞈ-eu miˇ kʼahˬ maˬ ya geuꞈ-aˬ.

²⁵Sehˬ gʼawˆ-ahˇ uˇ-awˇ toˇ toˇ-ehˇ jawˇ-eu laꞈ kʼoeˇ, Sahˬpaˬ Miˬyehˇ-euˬ ehˇ dawˬ maˬ naˇ haˬ-a.

²⁶Kʼoeˇ miˇ neh, aˬ yawꞈ maꞈ-ahˇ aˬ yawꞈ yaw kʼaˆ-ehˇ mehˬ nehˬ-awˇ, kʼaˇ shuiꞈ deh-ahˇ bi shiˇ jiˇ ma lehˇ ehˇ nehˬ-euˬ meh.

²⁷Aˬ yawꞈ maꞈ-euˬ zaˬ deuˬ aˬ cawˬ tsawˇ jeuˬ yaw kaˬ-ahˇ bi jawˇ byoˆ-awˇ, aˬ cawˬ-euˬ miˇ kʼahˬ-ahˇ bi shiˇ jiˇ ma lehˇ ehˇ nehˬ-euˬ meh.

²⁸Miˬyehˇ-euˬ tsawˇ haˬ deuˬ Peˬoˇ meuˬ-ahˇ, Baˬlaˇ miˬ yehˇ-ahˇ uˬ duˬ tahˬ-awˇ, yaw dehꞈ maˬ dehꞈ-eu miˬ yehˇ-ahˇ lawˇ-euˬ dzaˇ, aˬ yawꞈ maꞈ dzaˬ-euˬ meh.

²⁹Aˬ yawꞈ maꞈ mˇ-euˬ gaˇ Sahˬpaˬ Miˬyehˇ-ahˇ nui ma bi pehˇ laˇ-awˇ, guˆ laˇ paˬ-ehˇ gʼeh-eu naˇ gawˇ aˬ yawꞈ maꞈ kʼoeˇ taˆ keuˆ le-euˬ meh.

³⁰Ehˇ kʼawꞈ Piˇnaˬhaˇ tuˇ laˇ-awˇ iˬ baˇ ahˇ-eu deuˬ-ahˇ kʼehˬ ngeh, naˇ gawˇ byoˆ-iˇ-euˬ meh.

³¹Aˬ yawꞈ neh mˇ-euˬ muiˬ-eu gaˇ kʼoeˇ-ahˇ aˬ cawˬ maˬ ngehˇ ni, tseˇ ziˇ yaˇ ziˇ keuˆ ni noeˬ mawˇ tehꞈ-a.

³²Tsawˇ haˬ kʼoeˇ deuˬ Meˬliˇbaˬ lawˇ gawˆ dawˬ peh, Sahˬpaˬ Miˬyehˇ nui ma pehˇ ni mˇ-awˇ, aˬ yawꞈ maꞈ baˬ da neh Moˇseˬ shaˬ zahˬ naꞈ-euˬ meh.

³³Aˬ yawꞈ nui ma naˇ dui dui ni aˬ yawꞈ maꞈ jahˇ-awˇ, maˬ shaˇ noeˬ ni dawˬ kʼaˆ ngehˬ dzeuˇ-euˬ meh.

³⁴Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, aˬ cawˬ tsawˇ jeuˬ-ahˇ aˬ yawꞈ maꞈ maˬ sehꞈ-a.

³⁵Ehˇ kʼawꞈ kʼoeˇ deuˬ nehˬ-ehˇ sheuˬ dahˬ dzaˬ taꞈ-awˇ, aˬ cawˬ-euˬ zahˇ sahˇ kʼoꞈ-ahˇ caw teh-euˬ meh.

³⁶Miˬyehˇ-euˬ tsawˇ haˬ deuˬ tahˬ pahˬ aˬ ma mawˇ kawˇ-ahˇ uˬ duˬ tahˬ-awˇ, aˬ yawꞈ maꞈ ya luˬ ya seˇ-iˇ-eu gaˇ kawˆ laˆ doˆ-euˬ meh.

³⁷Kaˬnaˬ miˇ kʼahˬ-ahˇ jaˆ-eu tahˬ pahˬ aˬ ma mawˇ kawˇ deuˬ-ahˇ, yawˬ ha-euˬ aˬ buˇ aˬ li lawˇ nehˬ-euˬ meh.

³⁸Iˬ baˇ maˬ ahˇ-eu aˬ buˇ aˬ li kʼoeˇ deuˬ-ahˇ sehꞈ-euˬ miˇ neh, miˇ kʼahˬ kʼoeˇ kʼahˬ-ahˇ aˬ yawꞈ maꞈ laˆ jawꞈ-euˬ meh.

³⁹Aˬ yawꞈ maꞈ maˬ muiˬ-eu jeˬ mˇ-euˬ baˬ da neh, yawˬ haˇ yawˬ ha maˬ shawˇ ni laˆ pyeuꞈ-awˇ, Miˬyehˇ-ahˇ saˇ jaˇ puiˬ-euˬ meh.

⁴⁰Kʼoeˇ miˇ neh, aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ-awˇ, aˬ yawꞈ maꞈ-ahˇ nui daˆ daˆ-euˬ meh.

⁴¹Aˬ cawˬ tsawˇ jeuˬ-euˬ aˬ laꞈ laꞈ kʼoeˇ aˬ yawꞈ maꞈ-ahˇ byehˇ dzeh nehˬ-awˇ, muiˇ-eu deuˬ neh bi uˆ lahˇ-euˬ meh.

⁴²Muiˇ-eu deuˬ neh bi kʼehˬ bi kʼaˆ-awˇ, aˬ cawˬ neh kʼaˇ jahˇ nehˬ-euˬ jeˬ ya daˬ-euˬ meh.

⁴³Aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ gʼawˬ mya poˆ ka kʼoꞈ kʼawꞈ, aˬ yawꞈ-ahˇ puiˬ mawꞈ-eu nui ma jaˆ-eu miˇ neh, iˬ baˇ ngehˬ jawˇ ngehˬ naꞈ-euˬ meh.

⁴⁴Ehˇ kʼawꞈ, aˬ yawꞈ maꞈ kʼaˇ kuˇ ngeh Sahˬpaˬ Miˬyehˇ naˇ haˬ nehˬ-awˇ, aˬ yawꞈ maꞈ-ahˇ gʼawˬ shaˬ haw gaˬ-euˬ meh.

⁴⁵Aˬ yawꞈ maꞈ-euˬ gʼaˇ duˬ dawˬ ma saˇ jaˇ-ahˇ noeˬ keuˆ nehˬ-awˇ, aˬ yawꞈ-euˬ huiˬ-eu gʼoeˇ-eu gaˬ-eu jeˬ baˬ da neh, aˬ yawꞈ nui ma juˆ-iˇ-eu laꞈ kʼoeˇ,

⁴⁶kʼehˬ-eu kʼaˆ-eu tsawˇ haˬ deuˬ aˬ yawꞈ maꞈ-ahˇ gʼawˬ shaˬ haw gaˬ ni, aˬ yawꞈ laˆ saˆ nehˬ-euˬ meh.

⁴⁷Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nga maꞈ-ahˇ ka kʼoꞈ nehˬ laꞈ. Nga maꞈ nawˬ-ahˇ guiˬ lahˬ huiˬ-awˇ, muiˬ-eu shawˇ-eu nawˬ-euˬ tsawˇ myahˇ-ahˇ ja ceuˬ nya ni, tsawˇ jeuˬ teu myaˆ ni gʼeh-eu yaw kaˬ-ahˇ jawˇ luꞈ-eu, nga maꞈ-ahˇ sheuˬ kʼoꞈ doˆ nehˬ laꞈ.

⁴⁸Iˇsaˬleˬlaˆ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Nymˬ-mˇ hawˇ-eu mˬ maˬ maˬ byaˆ zaˇ ziˇ ja ceuˬ-awˬ. Tsawˇ haˬ yawˬ gʼaˬ na luꞈ “Aˬ miˬ” lehˇ ehˇ-awˬ. Sahˬpaˬ Miˬyehˇ-ahˇ ja ceuˬ-awˬ.