Read Akha Ja ceuˬ 111 Bible Online

Ja ceuˬ 111 - Akha bible

Ja ceuˬ 111

¹Sahˬpaˬ Miˬyehˇ-ahˇ ja ceuˬ-awˬ. Sahˬpaˬ Miˬyehˇ-euˬ tsawˇ haˬ deuˬ uiˬ laˇ taˬ-euˬ mehˬ shi, ngaˬ-eu nui ma gʼawˇ mawˇ dawˬ tawˆ luꞈ, Sahˬpaˬ Miˬyehˇ-ahˇ ja ceuˬ ma.

²Sahˬpaˬ Miˬyehˇ neh mˇ-euˬ gaˇ deuˬ aˇ naˆ ni zahˬ leˇ paˬ-ehˇ gʼeh-eu nga. Nui ma keuˆ-eu tsawˇ haˬ dawˬ tawˆ luꞈ, gaˇ kawˆ kʼoeˇ siˬ mawꞈ meh.

³Aˬ yawꞈ neh kʼaˇ mˇ-euˬ jeˬ dawˬ tawˆ luꞈ baoˬ yaw shehꞈ jaˆ-awˇ, taˬ huiˬ taˬ mahˇ dui dui paˬ-ehˇ gʼeh-eu meh. Aˬ yawꞈ-euˬ yaw tsaˬ yaw dawˇ jeˬ mˬ maˬ maˬ byaˆ zaˇ ziˇ ziꞈ-eu meh.

⁴Aˬ yawꞈ neh mˇ-euˬ kʼaˆ jeˬ-ehˇ gʼeh-eu gaˇ deuˬ gaˇ kawˆ, Sahˬpaˬ Miˬyehˇ aˬ dui-ahˇ maˬ bi ngehˇ laꞈ-a. Aˬ yawꞈ-aˬ, gʼawˬ shaˬ gaˬ nya dui dui-eu meh.

⁵Aˬ yawꞈ-ahˇ taˬ huiˬ-eu deuˬ-ahˇ aˬ yawꞈ bi dzaˬ bi dawˇ dehˆ-awˇ, aˬ yawꞈ-euˬ dawˬ ma saˇ jaˇ-ahˇ aˬ yawꞈ maˬ ngehˇ-a.

⁶Aˬ cawˬ tsawˇ jeuˬ-euˬ miˇ kʼahˬ biꞈ nehˬ-eu laꞈ kʼoeˇ, aˬ yawꞈ-euˬ tsawˇ haˬ deuˬ-ahˇ aˬ yawꞈ-euˬ baoˬ biꞈ nehˬ-eu meh.

⁷Aˬ yawꞈ kʼaˇ mˇ-euˬ jeˬ saˇ jaˇ ziꞈ-awˇ sui-eu dawˇ-eu meh. Aˬ yawꞈ-eu dawˬ deuˬ tiˬ jawˇ-iˬ maˬ lehˬ-a.

⁸Dawˬ kʼoeˇ deuˬ yaw tsaˬ yaw dawˇ laꞈ kʼoeˇ ziꞈ-awˇ, mˬ maˬ maˬ byaˆ zaˇ ziˇ gmˬ-eu meh.

⁹Aˬ yawꞈ-eu tsawˇ haˬ deuˬ-ahˇ aˬ yawꞈ bi buˬ-iˇ-awˇ, mˬ maˬ maˬ byaˆ zaˇ ziˇ ziꞈ-eu saˇ jaˇ dzaˬ taꞈ-euˬ meh. Aˬ yawꞈ-aˬ, muiˬ-eu shawˇ-eu gʼaˬ hawˇ-eu baoˬ huiˬ-eu gʼaˬ meh.

¹⁰Sahˬpaˬ Miˬyehˇ-ahˇ guˆ-eu jeˬ-aˬ, zaˬ siˬ tsawˇ gahˇ-euˬ dawˬ pehˬ duˬ puˇ meh. Aˬ yawꞈ-euˬ dawˬ-ahˇ naˇ haˬ-eu deuˬ-ahˇ, aˬ yawꞈ yaw muiˬ-ehˇ mehˬ nehˬ tsoˆ nehˬ-eu meh. Mˬ maˬ maˬ byaˆ zaˇ ziˇ aˬ yawꞈ-ahˇ ja ceuˬ-eu tsaˬ meh.