Read Akha Ja ceuˬ 118 Bible Online

Ja ceuˬ 118 - Akha bible

Ja ceuˬ 118

¹Sahˬpaˬ Miˬyehˇ muiˬ-euˬ jaˬ-eu miˇ neh, aˬ yawꞈ-euˬ guiˬ lahˬ-ahˇ ja ceuˬ-awˬ. Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh.

²Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ meh lehˇ, Iˇsaˬleˬlaˆ tsawˇ haˬ deuˬ bi ehˇ-awˬ.

³Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ meh lehˇ, Miˬyehˇ-euˬ piˇ ma deuˬ bi ehˇ-awˬ.

⁴Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ meh lehˇ aˬ yawꞈ-ahˇ uˬ duˬ kʼaˇ tahˬ-eu deuˬ bi ehˇ-awˬ.

⁵Ngaˇ nui ma cawˆ-awˇ Sahˬpaˬ Miˬyehˇ-ahˇ kuˇ ngeh, aˬ yawꞈ naˇ haˬ-awˇ bi buˬ-iˇ laꞈ-euˬ meh.

⁶Sahˬpaˬ Miˬyehˇ ngaˬ nehˬ-ehˇ jawˇ-eu miˇ neh, ngaˇ maˬ guˆ. Aˬ suˇ gʼaˬ ngaˬ-ahˇ aˬ jeˬ paˇ jahˇ laˇ nya ta.

⁷Ngaˬ nehˬ-ehˇ jawˇ-eu gʼaˬ Sahˬpaˬ Miˬyehˇ meh. Ngaˬ-ahˇ muiˇ-eu deuˬ coˬ-iˇ gaˇ ngaˇ haw ma.

⁸Tsawˇ haˬ zaˬ-ahˇ gʼoe-eu naˆ maˬ tseˇ, Miˬyehˇ-ahˇ laꞈ jeuˬ shaˇ-eu muiˬ dzehˬ meh.

⁹Sahˬ paˬ sahˬ ma deuˬ-ahˇ nui kʼaˬ tsmˬ-eu naˆ maˬ tseˇ, Miˬyehˇ-ahˇ tahˬ shaˇ-eu muiˬ dzehˬ meh.

¹⁰Muiˇ-eu deuˬ ngaˬ-euˬ tiˬ jawˬ jawˇ luꞈ kʼawꞈ, Sahˬpaˬ Miˬyehˇ-euˬ baoˬ-ahˇ ngaˇ gʼoe-awˇ, aˬ yawꞈ maꞈ-ahˇ laˆ cawˆ nehˬ-euˬ ma.

¹¹Yawˬ pyawˬ na luꞈ aˬ yawꞈ maꞈ jawˇ jawˬ jiˇ taˬ kʼawꞈ, Sahˬpaˬ Miˬyehˇ-euˬ baoˬ-ahˇ ngaˇ gʼoe-awˇ, aˬ yawꞈ maꞈ-ahˇ laˆ cawˆ nehˬ-euˬ ma.

¹²Byaˬ baˬ maꞈ loꞈ-ehˇ ngaˬ-euˬ tiˬ jawˬ aˬ yawꞈ maꞈ uˇ le kʼawꞈ, aˬ gah baw duˆ-ahˇ miˬ dzaˬ puiˆ-eu loꞈ-ehˇ, tiˬ kʼehˇ laˇ kʼehˬ laꞈ kʼoeˇ bi puiˆ dzeh jiˇ-eu meh. Sahˬpaˬ Miˬyehˇ-euˬ baoˬ-ahˇ ngaˇ gʼoe-awˇ, aˬ yawꞈ maꞈ-ahˇ laˆ cawˆ nehˬ-euˬ ma.

¹³Aˬ yawꞈ maꞈ ngaˬ-ahˇ yaw kʼaˆ-ehˇ deuˆ le-awˇ, ngaˬ-ahˇ deuˆ gʼaˬ luꞈ kʼawꞈ, Sahˬpaˬ Miˬyehˇ ngaˬ-ahˇ caw ba le-euˬ meh.

¹⁴Sahˬpaˬ Miˬyehˇ ngaˬ-ahˇ gʼaˬ bi kʼaˆ laˇ-awˇ, ngaˬ-ahˇ ka kʼoꞈ nehˬ laꞈ-euˬ meh.

¹⁵Sahˬpaˬ Miˬyehˇ-euˬ tsawˇ haˬ deuˬ-euˬ sehˬ gʼawˆ-ahˇ, guiˇ deuˆ gʼaˬ-awˇ guˇ luꞈ gaˇ naˇ haˬ sheˇ. Sahˬpaˬ Miˬyehˇ-euˬ baoˬ neh deuˆ gʼaˬ-euˬ meh.

¹⁶Aˬ yawꞈ-euˬ baoˬ baˬ da neh aˬ dui gʼaˬ leˇ-euˬ ma. Aˬ yawꞈ-euˬ huiˬ-eu baoˬ aˬ dui nehˬ-ehˇ guiˇ deuˆ-euˬ meh lehˇ guˇ-eu meh.

¹⁷Ngaˇ maˬ shiˇ byoˆ ni dehꞈ-awˇ, Sahˬpaˬ Miˬyehˇ neh mˇ-euˬ jeˬ gaˇ kawˆ ja ma.

¹⁸Aˬ yawꞈ ngaˬ-ahˇ yaw kʼaˆ-ehˇ kʼehˬ nehˬ laꞈ-euˬ kʼawꞈ, shiˇ gaˇ maˬ bi keuˆ-a.

¹⁹Ngaˬ-ahˇ Uˬ duˬ tahˬ nymˇ nymˇ ma laˇ gʼoˆ pah nehˬ laꞈ. Ngaˇ uˇ leˇ-awˇ Sahˬpaˬ Miˬyehˇ-euˬ guiˬ lahˬ-ahˇ ja ceuˬ ma.

²⁰Heu-aˬ, Sahˬpaˬ Miˬyehˇ-euˬ laˇ gʼoˆ pyeuꞈ-awˇ, yaw tsaˬ yaw dawˇ tsawˇ haˬ tehꞈ-ehˇ le uˇ nya-eu meh.

²¹Ngaˬ-euˬ shaˇ dawˬ-ahˇ nawˇ naˇ haˬ-euˬ uˬ taꞈ, guiˇ deuˆ-euˬ bi gʼaˬ leˇ laꞈ-euˬ miˇ neh, nawˬ-ahˇ ngaˇ ja ceuˬ-eu ma.

²²Nymˇ tsoˆ-eu deuˬ neh tseˇ dzeh-euˬ kʼaˬ lo tsaˬ byaˆ, laꞈ coeˇ-ahˇ gawˬ gaˇ zmˬ-eu, aˇ poeˬ kʼaˆ dzehˬ-eu kʼaˬ lo pyeuꞈ laˇ-euˬ meh.

²³Sahˬpaˬ Miˬyehˇ neh heu loꞈ-ehˇ bi pyeuꞈ laˇ-euˬ, aˬ dui haw ngeh aˇ naˆ ni ya zahˬ leˇ-eu nga.

²⁴Iˬ nah-aˬ, Sahˬpaˬ Miˬyehˇ gʼaˬ leˇ-euˬ aˇ nah meh. Aˬ dui laˬ kʼaˬ cehˇ-awˇ bawˬ-iˬ gʼeh kaˇ-euˇ.

²⁵Sahˬpaˬ Miˬyehˇ-oˇ, nga maꞈ-ahˇ ka kʼoꞈ nehˬ laꞈ lehˇ shaˇ-eu ma. Nga maꞈ nawˬ-ahˇ shaˇ-eu ma. Sahˬpaˬ Miˬyehˇ-oˇ, nga maꞈ neh noeˬ-euˬ loꞈ-ehˇ mˇ pyeuꞈ nya-eu guiˬ lahˬ biꞈ laꞈ.

²⁶Sahˬpaˬ Miˬyehˇ-euˬ tsawˇ myahˇ uˬ moˆ uˇ laˇ-eu tsawˇ haˬ guiˬ lahˬ huiˬ luꞈ-uˇ. Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ, nga maꞈ nawˬ-ahˇ guiˬ lahˬ biꞈ-eu ma.

²⁷Sahˬpaˬ Miˬyehˇ-aˬ, Miˬyehˇ pyeuꞈ-eu meh. Aˬ dui-ahˇ aˬ yawꞈ yaw shehꞈ biꞈ laꞈ-euˬ meh. Naw maꞈ-euˬ aˬ laꞈ-ahˇ aˇ bawˇ uˬ pyaˬ tuˆ tehˬ-eu laꞈ kʼoeˇ, bawˬ-iˬ gʼeh-eu aˇ dahˬ beh-awˇ, lawˇ duˬ jawˬ jawˬ-ehˇ cah-awˬ.

²⁸Nawˇ ngaˬ-euˬ Miˬyehˇ pyeuꞈ-awˇ, nawˬ-euˬ guiˬ lahˬ-ahˇ ngaˇ ja ceuˬ-eu ma. Nawˇ huiˬ dui mahˇ dui dui-eu gaˇ kawˆ ngaˇ ja ma.

²⁹Sahˬpaˬ Miˬyehˇ-aˬ, muiˬ dui jaˬ dui dui-awˇ, aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu miˇ neh, aˬ yawꞈ-euˬ guiˬ lahˬ-ahˇ ja ceuˬ-awˬ.