Akha bible online

Ja ceuˬ 119

¹Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ caw teh-awˇ, iˬ baˇ taˬ kʼaˇ maˬ za ni dehꞈ-eu deuˬ guiˬ lahˬ huiˬ luꞈ-uˇ.

²Nui ma gʼawˇ mawˇ dawˬ tawˆ luꞈ aˬ yawꞈ-ahˇ poˆ-awˇ, aˬ yawꞈ-euˬ dawˬ naˇ haˬ geuꞈ-eu tsawˇ haˬ deuˬ guiˬ lahˬ huiˬ luꞈ-uˇ.

³Sahˬpaˬ Miˬyehˇ-euˬ gaˇ ma-ahˇ aˬ yawꞈ maꞈ cah-awˇ, yaw lehˬ jeˬ maˬ mˇ-a.

⁴Sahˬpaˬ Miˬyehˇ-oˇ, nawˇ nga maꞈ-ahˇ nawˬ-euˬ zahˇ dawˬ kʼoꞈ dawˬ biꞈ laꞈ-awˇ, saˇ jaˇ ziꞈ-awˇ caw teh nya ni mehˬ nehˬ tsoˆ nehˬ laꞈ-euˬ meh.

⁵Nawˬ neh mehˬ nehˬ tsoˆ nehˬ laꞈ-euˬ dawˬ-ahˇ, ngaˇ saˇ jaˇ ziꞈ-awˇ caw teh ma.

⁶Nawˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ ngaˇ haw tsoˆ taˬ ngeh, ngaˇ daˬ maˬ ga ni ya dehꞈ tehꞈ-a.

⁷Nawˇ yaw tsaˬ yaw dawˇ dawˇ-ehˇ yaˇ kʼaˬ daˇ-euˬ gaˇ kawˆ ngaˇ ya siˬ ngeh, nui ma shawˇ jehˆ ni nawˬ-ahˇ ja ceuˬ ma.

⁸Nawˬ-euˬ zahˇ dawˬ kʼoꞈ dawˬ-ahˇ ngaˇ caw teh ma. Ngaˬ-ahˇ taˬ byehˇ dzeh nehˬ laꞈ.

⁹Zaˬ guˬ tiˬ gʼaˬ yaw muiˬ yaw shawˇ shawˇ-ehˇ aˬ joˆ-ehˇ ya dehꞈ nmˇ lehˇ ehˇ ngeh, nawˬ-euˬ zahˇ dawˬ kʼoꞈ dawˬ-ahˇ caw teh-awˇ ya dehꞈ-eu meh.

¹⁰Ngaˬ-euˬ nui ma gʼawˇ mawˇ dawˬ tawˆ luꞈ nawˬ-ahˇ saˇ jaˇ ziꞈ ma. Nawˬ-euˬ zahˇ dawˬ kʼoꞈ dawˬ-ahˇ ngaˇ maˬ ya byehˇ dzeh ni caw ba nehˬ laꞈ.

¹¹Nawˬ-ahˇ ngaˇ maˬ ya mˇ bahˬ ni, nawˬ-euˬ zahˇ dawˬ kʼoꞈ dawˬ nui ma laꞈ kʼoeˇ pi ma.

¹²Sahˬpaˬ Miˬyehˇ-oˇ, nawˬ-ahˇ ngaˇ ja ceuˬ ma. Nawˬ-euˬ gaˇ ma ngaˬ-ahˇ mehˬ laꞈ.

¹³Nawˬ neh biꞈ laꞈ-euˬ zahˇ dawˬ kʼoꞈ dawˬ dawˬ tawˆ luꞈ, ngaˇ gui poˆ poˆ ma.

¹⁴Pyuˇ shuiˇ myawˬ gahˬ-ahˇ gaˬ-eu naˆ maˬ tseˇ, nawˬ-euˬ zahˇ dawˬ kʼoꞈ dawˬ-ahˇ ngaˇ gaˬ ma.

¹⁵Nawˇ mehˬ-eu tsoˆ-eu dawˬ-ahˇ ngaˇ dzaw geuꞈ-awˇ, nawˬ-euˬ gaˇ ma-ahˇ ngaˇ shaˇ sawˇ ma.

¹⁶Nawˬ-euˬ zahˇ dawˬ kʼoꞈ dawˬ-ahˇ ngaˇ laˬ kʼaˬ cehˇ-awˇ, nawˬ-euˬ dawˬ-ahˇ ngaˇ maˬ ngehˇ.

¹⁷Nawˬ-euˬ dawˬ-ahˇ naˇ haˬ-awˇ dehꞈ nya ni, nawˬ-euˬ zaˬ kʼaˆ-ahˇ guiˬ lahˬ biꞈ nehˬ laꞈ.

¹⁸Nawˬ-euˬ zahˇ dawˬ kʼoꞈ dawˬ laꞈ kʼoeˇ ahˇ-eu zahˬ leˇ paˬ-ehˇ gʼeh-eu yaw tsaˬ yaw dawˇ jeˬ mawˇ nya ni, ngaˬ-euˬ myaˆ nuiˆ-ahˇ pah nehˬ laꞈ.

¹⁹Ngaˇ miˇ tsaˬ kʼoeˇ taˆ tiˬ kʼehˇ laˇ kʼehˬ dehꞈ-eu tehꞈ ma. Nawˬ-euˬ zahˇ dawˬ kʼoꞈ dawˬ taˬ yuˇ zaꞈ nehˬ laꞈ.

²⁰Nawˇ yaˇ kʼaˬ daˇ-euˬ jeˬ-ahˇ siˬ mawꞈ mawˇ mawꞈ-eu nui kʼahˇ, ngaˬ-euˬ nui ma laꞈ kʼoeˇ aˬ myah luꞈ jaˆ luꞈ ma.

²¹Nui ma huiˬ-eu mahˇ-eu deuˬ-ahˇ nawˇ byehˇ dzeh-eu meh. Nawˬ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ-eu deuˬ yaˬ kʼehˇ yaˬ gaˇ ya daˬ luꞈ-uˇ.

²²Nawˬ-euˬ zahˇ dawˬ kʼoꞈ dawˬ-ahˇ ngaˇ caw teh-eu miˇ neh, tsawˇ haˬ kʼoeˇ deuˬ-euˬ dawˬ doeˇ maˬ ya daˬ ni, ngaˬ-ahˇ bi buˬ-iˇ laꞈ.

²³Sahˬ paˬ sahˬ ma deuˬ ngaˬ-ahˇ yaw doeˇ jahˇ-eu lehˇ mehˬ bawˬ mˇ kʼawꞈ, nawˬ-euˬ zahˇ sahˇ kʼoꞈ-ahˇ ngaˇ dzaw geuꞈ ma.

²⁴Nawˇ mehˬ-eu tsoˆ-eu dawˬ deuˬ ngaˬ-ahˇ bi noeˬ gahˇ-awˇ, dawˬ kʼoeˇ deuˬ-ahˇ ngaˇ laˬ kʼaˬ cehˇ-eu ma.

²⁵Ngaˇ noeˬ dui-awˇ kʼaˬ lehˇ tsahˬ-ahˇ ga luꞈ-eu ma. Nawˬ neh saˇ jaˇ dzaˬ taˬ-euˬ loꞈ-ehˇ gʼaˬ yaw shuiꞈ biꞈ laꞈ-awˬ.

²⁶Ngaˬ-euˬ yaw lehˬ dawˬ tawˆ luꞈ ngaˇ pah mehˬ ngeh, nawˇ naˇ haˬ geuꞈ nehˬ laꞈ-euˬ meh. Nawˬ-euˬ zahˇ sahˇ kʼoꞈ ngaˬ-ahˇ mehˬ nehˬ laꞈ-awˬ.

²⁷Nawˬ-euˬ zahˇ dawˬ kʼoꞈ dawˬ-ahˇ ngaˇ gʼoˆ geuꞈ nya ni caw ba nehˬ laꞈ. Nawˬ neh mehˬ nehˬ tsoˆ nehˬ laꞈ-euˬ zahˬ leˇ paˬ-ehˇgʼeh-eu dawˬ-ahˇ, ngaˇ gʼaˬ shaˇ ma.

²⁸Ngaˇ noeˬ shaˬ noeˬ zahˬ dui dui-eu ma. Nawˬ neh saˇ jaˇ dzaˬ taˬ-euˬ loꞈ-ehˇ gʼaˬ biꞈ lahˬ laꞈ-awˬ.

²⁹Yaw lehˬ jeˬ maˬ ya mˇ ni ngehˬ gʼeh nehˬ laꞈ-awˇ, nawˬ-euˬ muiˬ-eu jaˬ-eu jeˬ baˬ da neh, nawˬ-euˬ zahˇ dawˬ kʼoꞈ dawˬ mehˬ nehˬ laꞈ-awˬ.

³⁰Nawˬ-euˬ dawˬ-ahˇ naˇ haˬ-eu jeˬ-ahˇ ngaˇ tseˇ geuꞈ-eu ma. Nawˬ neh yaˇ kʼaˬ daˇ-euˬ dawˬ-ahˇ ngaˇ tuˆ tehˬ luꞈ-eu ma.

³¹Sahˬpaˬ Miˬyehˇ-oˇ, nawˇ mehˬ-eu tsoˆ-eu dawˬ-ahˇ ngaˇ caw teh luꞈ-eu ma. Ngaˬ-ahˇ daˬ taˬ bi ga laꞈ.

³²Nawˬ-euˬ zahˇ dawˬ kʼoꞈ dawˬ-ahˇ ngaˇ nui ma keuˆ-awˇ naˇ haˬ geuꞈ-eu ma. Aˬ jeˬ miˇ neh ehˇ naˇ, nawˇ ngaˬ-ahˇ noeˬ siˬ noeˬ mawˇ nya-eu guiˬ lahˬ biꞈ laꞈ tehꞈ-a.

³³Sahˬpaˬ Miˬyehˇ-oˇ, nawˬ-euˬ zahˇ dawˬ kʼoꞈ dawˬ-euˬ dawˬ tsuiꞈ mehˬ nehˬ laꞈ. Dawˬ kʼoeˇ deuˬ-ahˇ ngaˇ aˬ myah luꞈ caw teh ma.

³⁴Nawˬ-euˬ zahˇ dawˬ kʼoꞈ dawˬ-ahˇ ngaˇ caw teh-awˇ, nui ma gʼawˇ mawˇ laꞈ kʼoeˇ juiˇ taˬ nya-eu gʼaˇ duˬ, ngaˇ gʼoˆ shaw nya ni mehˬ nehˬ laꞈ.

³⁵Ngaˬ-euˬ laˬ kʼaˬ cehˇ duˬ zahˇ dawˬ kʼoꞈ dawˬ laꞈ kʼoeˇ jaˆ-eu miˇ neh, dawˬ kʼoeˇ deuˬ-ahˇ naˇ haˬ geuꞈ nya ni caw ba nehˬ laꞈ.

³⁶Pyuˇ shuiˇ myawˬ gahˬ-ahˇ mehˇ juiˇ juiˇ-eu naˆ maˬ tseˇ, nawˬ-euˬ zahˇ dawˬ kʼoꞈ dawˬ-ahˇ mehˇ juiˇ juiˇ ni, ngaˬ-ahˇ ngehˬ gʼeh nehˬ laꞈ.

³⁷Gaˇ dahˇ maˬ tsoeˬ-eu jeˬ-ahˇ ngaˇ nui kʼahˇ maˬ ya jaˆ ni caw ba nehˬ laꞈ-awˇ, nawˬ neh saˇ jaˇ dzaˬ taˬ-euˬ loꞈ-ehˇ yaw muiˬ jeˬ biꞈ nehˬ laꞈ.

³⁸Nawˬ-euˬ ehˇ dawˬ naˇ haˬ-eu deuˬ kʼoeˇ taˆ bi jaˆ-euˬ nawˬ-euˬ saˇ jaˇ nawˬ-euˬ zaˬ kʼaˆ pyeuꞈ-eu ngaˬ-euˬ kʼoeˇ taˆ bi jaˆ laꞈ.

³⁹Ngaˇ guˆ-eu dawˬ doeˇ-ahˇ maˬ ya daˬ ni haw piˇ nehˬ laꞈ. Nawˬ neh yaˇ kʼaˬ daˇ-eu jeˬ aˇ naˆ ni zahˬ leˇ paˬ-ehˇ gʼeh-eu nga.

⁴⁰Nawˬ-euˬ zahˇ dawˬ kʼoꞈ dawˬ-ahˇ ngaˇ naˇ haˬ geuꞈ mawꞈ-eu ma. Nawˬ-euˬ yaw tsaˬ yaw dawˇ jeˬ laꞈ kʼoeˇ ngaˇ yaw dehꞈ dehꞈ-eu yaw shuiꞈ beˬ paˇ nehˬ laꞈ.

⁴¹Sahˬpaˬ Miˬyehˇ-oˇ, nawˇ ngaˬ-ahˇ aˇ naˆ ni gaˬ-eu bi siˬ laꞈ-awˇ, nawˬ neh saˇ jaˇ dzaˬ taˬ-euˬ loꞈ-ehˇ ngaˬ-ahˇ ka kʼoꞈ nehˬ laꞈ.

⁴²Kʼoeˇ naˇ, nawˬ-euˬ dawˬ-ahˇ ngaˇ jah-eu miˇ neh, ngaˬ-ahˇ dawˬ doeˇ ngehˬ-eu deuˬ-ahˇ ngaˇ ngehˬ kʼoꞈ tmˇ kʼoꞈ nehˬ nya ma.

⁴³Nawˇ yaˇ kʼaˬ daˇ-eu jeˬ-ahˇ ngaˇ noeˬ tmˬ luꞈ-eu miˇ neh, aˬ myah luꞈ tsaˬ-eu dawˇ-eu dawˬ ngehˬ nya ni caw ba nehˬ laꞈ.

⁴⁴Nawˬ-euˬ zahˇ dawˬ kʼoꞈ dawˬ-ahˇ tiˬ jawˇ-iˬ maˬ byehˇ ni, mˬ maˬ maˬ byaˆ zaˇ ziˇ ngaˇ caw teh ma.

⁴⁵Nawˇ mehˬ nehˬ tsoˆ nehˬ-euˬ dawˬ-ahˇ ngaˇ leh jeh-awˇ caw teh-eu miˇ neh, kʼahˬ lahˇ kʼaˇ maˬ za ni ngaˇ dehꞈ ma.

⁴⁶Sahˬ paˬ sahˬ ma deuˬ-ahˇ nawˬ-euˬ zahˇ dawˬ kʼoꞈ dawˬ ngaˇ ja mehˬ-awˇ, shaꞈ dawˇ duˬ maˬ jaˆ ni dehꞈ ma.

⁴⁷Nawˬ-euˬ zahˇ dawˬ kʼoꞈ dawˬ-ahˇ ngaˇ gaˬ-eu miˇ neh, kʼoeˇ-euˬ laꞈ kʼoeˇ ngaˇ laˬ kʼaˬ cehˇ-eu ma.

⁴⁸Nawˬ-euˬ zahˇ dawˬ kʼoꞈ dawˬ-ahˇ ngaˇ gaˬ-awˇ yaw zeu baw ma. Nawˇ mehˬ-eu tsoˆ-eu dawˬ-ahˇ ngaˇ gʼaˬ shaˇ ma.

⁴⁹Nawˬ-euˬ zaˬ kʼaˆ-ahˇ biꞈ taˬ-euˬ nawˬ-euˬ saˇ jaˇ-ahˇ taˬ ngehˇ nehˬ laꞈ. Ngaˬ-euˬ noeˬ tmˬ duˬ kʼoeˇ gaˇ jaˆ-eu ma.

⁵⁰Nawˬ-euˬ saˇ jaˇ baˬ da neh ngaˇ ya dehꞈ-eu loꞈ-ehˇ, shaˬ zahˬ naꞈ ngeh nui saˇ za duˬ jaˆ-eu ma.

⁵¹Huiˬ-eu mahˇ-eu deuˬ aˬ myah luꞈ ngaˬ-ahˇ dawˬ doeˇ ngehˬ kʼawꞈ, nawˬ-euˬ zahˇ dawˬ kʼoꞈ dawˬ-ahˇ ngaˇ maˬ byehˇ dzeh.

⁵²Sahˬpaˬ Miˬyehˇ-oˇ, aˇ hu nawˬ neh yaˇ kʼaˬ daˇ-euˬ gaˇ ngaˇ noeˬ keuˆ-awˇ, ngaˇ nui saˇ za-eu ma.

⁵³Haiˬ-eu tsawˇ haˬ deuˬ nawˬ-euˬ zahˇ dawˬ kʼoꞈ dawˬ-ahˇ puiˬ ngeh, ngaˇ nui ma maˬ saˇ nya.

⁵⁴Miˇ tsaˬ kʼoeˇ taˆ ngaˇ tiˬ kʼehˬ tiˬ yamˬ ya jawˇ ngeh, nawˬ-euˬ zahˇ dawˬ kʼoꞈ dawˬ gaˇ kawˆ caˇ dawˬ boꞈ doˆ-eu ma.

⁵⁵Sahˬpaˬ Miˬyehˇ-oˇ, uˬ ciꞈ paw nawˬ-ahˇ ngaˇ noeˬ mawˇ-awˇ, nawˬ-euˬ zahˇ dawˬ kʼoꞈ dawˬ gaˇ kawˆ shaˇ noeˬ-eu ma.

⁵⁶Nawˬ-euˬ dawˬ-ahˇ naˇ haˬ geuꞈ-eu jeˬ laꞈ kʼoeˇ, ngaˇ laˬ kʼaˬ cehˇ nui saˇ za-eu ma.

⁵⁷Sahˬpaˬ Miˬyehˇ-oˇ, nawˬ-ahˇ ngaˇ mawꞈ-eu ma. Nawˬ-euˬ zahˇ dawˬ kʼoꞈ dawˬ-ahˇ naˇ haˬ geuꞈ ma lehˇ, ngaˇ saˇ jaˇ dzaˬ-eu ma.

⁵⁸Nawˬ neh saˇ jaˇ dzaˬ taˬ-euˬ loꞈ-ehˇ ngaˬ-ahˇ gʼawˬ shaˬ gaˬ nehˬ laꞈ-eu gʼaˇ duˬ, nui ma laꞈ kʼoeˇ keuˆ ni ngaˇ shaˇ-eu ma.

⁵⁹Ngaˬ-euˬ dehꞈ jeˬ dehꞈ kawˆ-ahˇ ngaˇ pyehˆ tseˇ duˬ gʼaˬ-awˇ, nawˬ neh mehˬ nehˬ tsoˆ nehˬ laꞈ-euˬ loꞈ-ehˇ dehꞈ ma lehˇ, ngaˇ saˇ jaˇ dzaˬ-eu ma.

⁶⁰Nawˬ-euˬ zahˇ dawˬ kʼoꞈ dawˬ deuˬ-ahˇ, ngaˇ maˬ nyi naˬ ni caw teh ma.

⁶¹Haiˬ-eu tsawˇ haˬ deuˬ ngaˬ-ahˇ lahˇ ju kʼmˇ kʼawꞈ, nawˬ-euˬ zahˇ dawˬ kʼoꞈ dawˬ-ahˇ ngaˇ maˬ byehˇ,

⁶²Tsaˬ dui dawˇ dui dui-eu nawˬ neh yaˇ kʼaˬ daˇ-euˬ jeˬ-ahˇ, uˬ ciꞈ sehˇ gʼahˇ tuˇ-awˇ ja ceuˬ-eu ma.

⁶³Nawˬ-euˬ zahˇ dawˬ kʼoꞈ dawˬ-ahˇ caw teh-eu deuˬ dawˬ tawˆ luꞈ hawˇ-eu, Nawˬ-euˬ gaˇ mˇ-eu deuˬ dawˬ tawˆ luꞈ-ahˇ ngaˇ gʼoeˇ-eu ma.

⁶⁴Sahˬpaˬ Miˬyehˇ-oˇ, nawˬ-euˬ maˬ tsehˆ leˇ nya-eu gʼoeˇ-eu gaˬ-eu jeˬ miˇ tsaˬ heu kʼoeˇ taˆ byah-eu meh. Nawˬ-euˬ zahˇ dawˬ kʼoꞈ dawˬ ngaˬ-ahˇ mehˬ nehˬ laꞈ-awˬ.

⁶⁵Sahˬpaˬ Miˬyehˇ-oˇ, nawˬ-euˬ saˇ jaˇ-ahˇ nawˇ ziꞈ-awˇ, nawˬ-euˬ zaˬ kʼaˆ pyeuꞈ-eu ngaˬ-ahˇ nawˇ muiˬ-eu meh.

⁶⁶Nawˬ-euˬ dawˬ-ahˇ ngaˇ gʼoe-eu miˇ neh, zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ biꞈ laꞈ.

⁶⁷Nawˇ ngaˬ-ahˇ maˬ kʼehˬ mi naˆ-ehˇ ngaˇ dehꞈ lehˬ-euˬ kʼawꞈ, nymˬ-mˇ ngaˇ nawˬ-euˬ dawˬ-ahˇ naˇ haˬ-eu ma.

⁶⁸Nawˇ aˇ naˆ ni muiˬ-awˇ, aˇ naˆ ni gʼawˬ shaˬ gaˬ nya-eu nga. Nawˬ-euˬ zahˇ dawˬ kʼoꞈ dawˬ ngaˬ-ahˇ mehˬ nehˬ laꞈ.

⁶⁹Nui ma huiˬ-eu mahˇ-eu deuˬ ngaˬ-ahˇ ja bu ja doeˇ kʼawꞈ, nawˇ mehˬ nehˬ tsoˆ nehˬ laꞈ-euˬ dawˬ-ahˇ, nui ma laꞈ kʼoeˇ keuˆ ni ngaˇ naˇ haˬ geuꞈ-eu ma.

⁷⁰Tsawˇ haˬ kʼoeˇ deuˬ zahˇ sahˇ kʼoꞈ maˬ baw kʼawꞈ, nawˬ-euˬ zahˇ dawˬ kʼoꞈ dawˬ laꞈ kʼoeˇ ngaˇ laˬ kʼaˬ cehˇ-eu ma.

⁷¹Ngaˬ-ahˇ kʼehˬ nehˬ kʼaˆ nehˬ laꞈ-euˬ jeˬ muiˬ-eu meh. Aˬ jeˬ miˇ neh ehˇ naˇ, nawˬ-euˬ dawˬ-ahˇ ngaˇ siˬ nya laˇ ni jahˇ nehˬ laꞈ-euˬ meh.

⁷²Miˇ tsaˬ kʼoeˇ taˆ kʼaˇ jaˆ-eu pyuˇ shuiˇ dawˬ tawˆ luꞈ naˆ maˬ tseˇ, nawˬ neh biꞈ laꞈ-eu zahˇ dawˬ kʼoꞈ dawˬ aˇ poeˬ kʼaˆ dzehˬ nya.

⁷³Nawˇ ngaˬ-ahˇ beh-awˇ haw piˇ nehˬ laꞈ-euˬ meh. Nawˬ-euˬ zahˇ dawˬ kʼoꞈ dawˬ deuˬ-ahˇ ngaˇ dzaw geuꞈ nya ni, noeˬ siˬ noeˬ mawˇ nya-eu jeˬ biꞈ nehˬ laꞈ.

⁷⁴Nawˬ-euˬ saˇ jaˇ-ahˇ ngaˇ gʼoe-eu miˇ neh, nawˬ-ahˇ taˬ huiˬ-eu tsawˇ haˬ deuˬ ngaˬ-ahˇ mawˇ ngeh, laˬ kʼaˬ cehˇ nui kʼahˇ shiˇ tehꞈ-a.

⁷⁵Sahˬpaˬ Miˬyehˇ-oˇ, nawˇ yaˇ kʼaˬ daˇ-eu jeˬ yaw tsaˬ yaw dawˇ meh lehˇ ngaˇ siˬ nya ma. Nawˇ saˇ jaˇ ziꞈ-eu miˇ neh ngaˬ-ahˇ kʼehˬ nehˬ laꞈ-euˬ meh lehˇ ngaˇ siˬ nya ma.

⁷⁶Nawˬ-euˬ zaˬ kʼaˆ pyeuꞈ-eu nawˬ neh saˇ jaˇ biꞈ taˬ-euˬ loꞈ-ehˇ, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ neh, ngaˬ-ahˇ nui ma bi saˇ laˇ-awˬ.

⁷⁷Nawˬ-euˬ zahˇ dawˬ kʼoꞈ dawˬ laꞈ kʼoeˇ ngaˇ laˬ kʼaˬ cehˇ-eu miˇ neh, ngaˇ yaw dehꞈ ya dehꞈ ni gʼawˬ shaˬ gaˬ nehˬ laꞈ-awˬ.

⁷⁸Nui ma huiˬ-eu mahˇ-eu deuˬ ngaˬ-euˬ gaˇ kawˆ maˬ ngeuˇ gaˇ keuˆ ni ja bu-eu miˇ neh ya shaꞈ dawˇ-iˇ luꞈ-uˇ. Ngaˇ-aˬ, nawˬ neh mehˬ nehˬ tsoˆ nehˬ laꞈ-euˬ jeˬ-ahˇ gʼaˬ shaˇ ma.

⁷⁹Nawˬ-euˬ zahˇ dawˬ kʼoꞈ dawˬ-ahˇ siˬ nya-eu, nawˬ-ahˇ taˬ huiˬ taˬ mahˇ-eu tsawˇ haˬ deuˬ, ngaˇ jawˇ gaˇ oe luꞈ-uˇ.

⁸⁰Nawˬ-euˬ zahˇ dawˬ kʼoꞈ dawˬ-ahˇ ngaˇ tiˬ byah tiˬ loꞈ naˇ haˬ geuꞈ-eu miˇ neh, daˬ maˬ ga ni bi dehꞈ laꞈ luꞈ-uˇ.

⁸¹Sahˬpaˬ Miˬyehˇ-oˇ, nawˇ ka kʼoꞈ le gaˇ maˬ dawˬ coeˇ laˇ miˇ-a. Nawˬ-euˬ dawˬ-ahˇ ngaˇ jah-eu ma.

⁸²Nawˬ neh saˇ jaˇ dzaˬ-euˬ jeˬ-ahˇ ngaˇ myaˆ nuiˆ haw doˆ shaw-iˬ miˇ-a. Nawˇ ngaˬ-ahˇ aˬ myah caw ba le-eu gʼeh ta lehˇ ngaˇ ehˇ luꞈ-eu ma.

⁸³Biˬ dzeh taˬ-euˬ shaˬ kʼoˆ iˇ puˬ tiˬ siˬ loꞈ-ehˇ, tiˬ jeˬ-iˬ gaˇ dahˇ maˬ paˇ tsoeˬ miˇ-a. Ehˇ kʼawꞈ, nawˬ-euˬ dawˬ ma saˇ jaˇ-ahˇ ngaˇ maˬ ngehˇ.

⁸⁴Ngaˇ nawˬ-ahˇ aˇ myah ni paˇ ya dawˬ ta. Ngaˬ-ahˇ kʼehˬ-eu tsawˇ haˬ deuˬ-ahˇ nawˇ aˬ myah kʼehˬ nehˬ-eu gʼeh te.

⁸⁵Nawˬ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ-eu, nui ma huiˬ-eu mahˇ-eu tsawˇ haˬ deuˬ, ngaˬ-ahˇ lahˇ ju kʼmˇ-eu lehˇ shaˬ duˬ duˬ luꞈ meh.

⁸⁶Nawˬ-euˬ zahˇ dawˬ kʼoꞈ dawˬ dawˬ tawˆ luꞈ tsaˬ dui dui meh. Ngaˇ maˬ lehˬ gaˇ aˬ cawˬ ngaˬ-ahˇ kʼehˬ luꞈ meh. Ngaˬ-ahˇ caw ba le-awˬ.

⁸⁷Aˬ cawˬ ngaˬ-ahˇ sehꞈ-eu keuˆ laˇ taˬ-euˬ meh. Ehˇ kʼawꞈ, nawˬ-euˬ zahˇ dawˬ kʼoꞈ dawˬ-ahˇ ngaˇ maˬ byehˇ dzeh.

⁸⁸Nawˬ-euˬ zahˇ dawˬ kʼoꞈ dawˬ-ahˇ ngaˇ naˇ haˬ geuꞈ nya ni, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ baˬ da neh, shiˇ-euˬ jeˬ-ahˇ bi dzeuˇ-iˇ laꞈ-awˬ.

⁸⁹Sahˬpaˬ Miˬyehˇ-oˇ, nawˬ-euˬ dawˬ tiˬ jawˇ-iˬ maˬ byoˆ-iˇ-ehˇ, mˬ maˬ maˬ byaˆ zaˇ ziˇ mˬ kʼoeˇ taˆ jaˆ tehꞈ-a.

⁹⁰Nawˇ saˇ jaˇ ziꞈ-eu jeˬ tiˬ ziˇ saˇ-iˬ tiˬ ziˇ ziꞈ-awˇ, nawˬ neh ciˬ tsaˬ taˬ-euˬ miˇ tsaˬ tahˬ kʼawˇ, maˬ poˆ maˬ paˇ ni jaˆ tehꞈ-a.

⁹¹Yawˬ jeˬ na luꞈ nawˬ-euˬ myawˬ kʼehˇ gʼoˆ-awˇ, nawˬ-euˬ dawˬ baˬ da neh iˬ nah keuˆ ni ziꞈ luꞈ-eu meh.

⁹²Nawˬ-euˬ zahˇ dawˬ kʼoꞈ dawˬ laꞈ kʼoeˇ ngaˇ laˬ kʼaˬ maˬ cehˇ law nmˇ-aˬ, shaˬ zahˬ mˇ-awˇ shiˇ dzeuˇ-euˬ ma.

⁹³Nawˇ mehˬ-eu tsoˆ-eu dawˬ baˬ da neh ngaˇ dehꞈ luꞈ-awˇ, dawˬ kʼoeˇ deuˬ-ahˇ ngaˇ maˬ byehˇ dzeh.

⁹⁴Ngaˇ nawˬ-euˬ ma. Ngaˬ-ahˇ ka kʼoꞈ nehˬ laꞈ-awˬ. Nawˬ-euˬ zahˇ dawˬ kʼoꞈ dawˬ-ahˇ ngaˇ leh jeh-awˇ caw teh luꞈ ma.

⁹⁵Haiˬ-euˬ tsawˇ haˬ deuˬ ngaˬ-ahˇ sehꞈ-eu lehˇ loꞈ luꞈ kʼawꞈ, nawˬ-euˬ zahˇ dawˬ kʼoꞈ dawˬ-ahˇ ngaˇ gʼaˬ shaˇ ma.

⁹⁶Yawˬ jeˬ na luꞈ maˬ byah maˬ loꞈ-eu jeˬ pyeuꞈ kʼawꞈ, nawˬ-euˬ zahˇ dawˬ kʼoꞈ dawˬ ehˇ kʼaˇ maˬ za ni byah-eu ngaˇ siˬ duˬ ma.

⁹⁷Nawˬ-euˬ zahˇ dawˬ kʼoꞈ dawˬ-ahˇ ngaˇ aˇ naˆ ni gaˬ-eu nga. Nah ga-ehˇ zahˇ dawˬ kʼoꞈ dawˬ-ahˇ shaˇ noeˬ luꞈ-eu ma.

⁹⁸Nawˬ-euˬ zahˇ dawˬ kʼoꞈ dawˬ ngaˬ nehˬ-ehˇ aˬ myah luꞈ jaˆ-awˇ, ngaˬ-ahˇ muiˇ-eu deuˬ naˆ maˬ tseˇ tsawˇ gahˇ bi ahˇ laꞈ-eu meh.

⁹⁹Nawˇ mehˬ nehˬ tsoˆ nehˬ laꞈ-euˬ dawˬ-ahˇ ngaˇ shaˇ sawˇ geuꞈ-eu miˇ neh, ngaˬ-ahˇ mehˬ-eu tsoˆ-eu deuˬ naˆ maˬ tseˇ ngaˇ noeˬ siˬ noeˬ mawˇ nya-eu ma.

¹⁰⁰Nawˬ-euˬ zahˇ dawˬ kʼoꞈ dawˬ-ahˇ ngaˇ naˇ haˬ geuꞈ-eu miˇ neh, tsawˇ mawˬ deuˬ naˆ maˬ tseˇ ngaˇ zaˬ siˬ nui gahˇ byah-eu ma.

¹⁰¹Nawˬ-euˬ dawˬ-ahˇ ngaˇ naˇ haˬ geuꞈ mawꞈ-eu miˇ neh, yaw haiˬ jeˬ-ahˇ ngaˇ gaˇ jaw jaw-euˬ ma.

¹⁰²Nawˬ-euˬ gʼawˇ mawˇ ngaˬ-ahˇ mehˬ nehˬ tsoˆ nehˬ laꞈ-euˬ miˇ neh, nawˬ neh mehˬ-euˬ dawˬ-ahˇ ngaˇ maˬ byehˇ dzeh.

¹⁰³Nawˬ neh mehˬ nehˬ tsoˆ nehˬ-euˬ jeˬ aˇ naˆ ni coeˇ-eu nga. Byaˬ byaˬ uiˇ naˆ maˬ tseˇ coeˇ-eu meh.

¹⁰⁴Nawˬ-euˬ zahˇ dawˬ kʼoꞈ dawˬ laꞈ kʼoeˇ ngaˇ zaˬ siˬ nui gahˇ za-euˬ miˇ neh, maˬ muiˬ-eu jeˬ-ahˇ ngaˇ bye-eu ma.

¹⁰⁵Nawˬ-euˬ dawˬ-aˬ, ngaˬ-euˬ aˬ kuiˇ-ahˇ bya nehˬ-eu ciˇ kʼmˬ pyeuꞈ-awˇ, ngaˬ-euˬ gaˇ ma-ahˇ bya-eu yaw shehꞈ pyeuꞈ-eu meh.

¹⁰⁶Nawˇ mehˬ-eu tsoˆ-eu yaw tsaˬ yaw dawˇ jeˬ-ahˇ naˇ haˬ geuꞈ-eu gʼaˇ duˬ, ngaˇ saˇ jaˇ ziꞈ dah ni dzaˬ-eu ma.

¹⁰⁷Sahˬpaˬ Miˬyehˇ-oˇ, ngaˇ shiˇ taw tehˬ ni ya daˬ luꞈ-eu ma. Nawˬ neh saˇ jaˇ dzaˬ taˬ-euˬ loꞈ-ehˇ ngaˬ-ahˇ bi dehꞈ laꞈ-awˬ.

¹⁰⁸Sahˬpaˬ Miˬyehˇ-oˇ, nawˬ-euˬ guiˬ lahˬ-ahˇ ngaˇ ja ceuˬ gaˇ ha geuꞈ laꞈ-awˇ, nawˬ-euˬ zahˇ dawˬ kʼoꞈ dawˬ ngaˬ-ahˇ mehˬ nehˬ laꞈ-awˬ.

¹⁰⁹Aˬ myah ya shiˇ kawꞈ, shiˇ gaˇ ngaˇ maˬ guˆ. Nawˬ-euˬ zahˇ dawˬ kʼoꞈ dawˬ-ahˇ ngaˇ maˬ byehˇ.

¹¹⁰Haiˬ-eu tsawˇ haˬ deuˬ ngaˬ-ahˇ lahˇ ju kʼmˇ kʼawꞈ, nawˬ-euˬ zahˇ dawˬ kʼoꞈ dawˬ-ahˇ maˬ caw teh ni ngaˇ maˬ byehˇ.

¹¹¹Nawˬ-euˬ zahˇ dawˬ kʼoꞈ dawˬ-ahˇ mˬ maˬ maˬ byaˆ zaˇ ziˇ ngaˇ za gʼaˬ-awˇ, ngaˬ-euˬ nui ma-ahˇ laˬ kʼaˬ bi cehˇ-eu meh.

¹¹²Ngaˇ shiˇ ngeh keuˆ ni nawˬ-euˬ zahˇ dawˬ-ahˇ naˇ haˬ geuꞈ-eu gʼaˇ duˬ, noeˬ tsehˆ gʼaˬ taˬ-euˬ ma.

¹¹³Nawˬ-ahˇ yaw muiˬ paˬ-ehˇ saˇ jaˇ maˬ ziꞈ-eu deuˬ-ahˇ ngaˇ bye kʼawꞈ, nawˬ-euˬ zahˇ dawˬ kʼoꞈ dawˬ-ahˇ ngaˇ gaˬ-eu ma.

¹¹⁴Nawˇ ngaˬ-ahˇ ngehˬ gʼeh haw piˇ-eu gʼaˬ pyeuꞈ-awˇ, nawˬ-euˬ saˇ jaˇ laꞈ kʼoeˇ ngaˇ noeˬ tmˬ kʼaˇ za-eu ma.

¹¹⁵Yaw haiˬ jeˬ mˇ-eu tsawˇ haˬ deuˬ-oˇ, ngaˬ-euˬ dawˬ peh taˬ jawˇ. Ngaˬ-euˬ Miˬyehˇ-euˬ zahˇ dawˬ kʼoꞈ dawˬ-ahˇ ngaˇ naˇ haˬ geuꞈ ma.

¹¹⁶Ngaˇ yaw dehꞈ ya dehꞈ ni, nawˇ saˇ jaˇ dzaˬ taˬ-euˬ loꞈ-ehˇ, ngaˬ-ahˇ gʼaˬ biꞈ nehˬ laꞈ. Ngaˬ neh noeˬ tmˬ-euˬ jeˬ laꞈ kʼoeˇ nui ma taˬ bi cawˆ laꞈ.

¹¹⁷Ngaˇ guˆ kʼaˇ maˬ za-ehˇ nawˬ-euˬ zahˇ dawˬ kʼoꞈ dawˬ-ahˇ tuˆ tehˬ taˬ nya ni, ngaˬ-ahˇ ciˬ tuˇ nehˬ laꞈ.

¹¹⁸Nawˬ-euˬ zahˇ dawˬ kʼoꞈ dawˬ-ahˇ maˬ caw teh-eu deuˬ-ahˇ nawˇ byehˇ dzeh-awˇ, aˬ yawꞈ maꞈ-euˬ nui gʼoꞈ gaˇ dahˇ maˬ tsoeˬ leˇ-a.

¹¹⁹Haiˬ-eu tsawˇ haˬ deuˬ-ahˇ pawꞈ lawꞈ pawꞈ kuˬ loꞈ-ehˇ nawˇ sawˇ dzeh nehˬ-eu miˇ neh, nawˇ mehˬ-eu tsoˆ-eu dawˬ-ahˇ ngaˇ gaˬ-eu ma.

¹²⁰Nawˬ-ahˇ ngaˇ guˆ-awˇ yaw dzuˬ dzuˬ-eu ma. Nawˇ yaˇ kʼaˬ daˇ gaˇ ngaˇ guˆ dui dui-eu ma.

¹²¹Yaw tsaˬ yaw dawˇ jeˬ hawˇ-eu yaw muiˬ yaw jaˬ jeˬ ngaˇ mˇ-euˬ ma. Muiˇ-eu deuˬ-euˬ laꞈ-ahˇ ngaˬ-ahˇ taˬ byehˇ dzeh nehˬ laꞈ.

¹²²Nawˬ-euˬ zaˬ kʼaˆ-ahˇ caw ba ma lehˇ saˇ jaˇ dzaˬ nehˬ laꞈ-awˬ. Miˬyehˇ maˬ baw-eu deuˬ neh taˬ bi kʼehˬ nehˬ laꞈ.

¹²³Nawˬ neh saˇ jaˇ dzaˬ taˬ-eu ka kʼoꞈ-eu jeˬ-ahˇ ngaˇ noeˬ tmˬ-awˇ, myaˆ nuiˆ haw doˆ shaw-iˬ miˇ-a.

¹²⁴Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ neh ngaˬ-ahˇ ngehˬ gʼeh dah teˬ-awˇ, nawˬ-euˬ zahˇ dawˬ kʼoꞈ dawˬ mehˬ nehˬ laꞈ.

¹²⁵Ngaˇ-aˬ, nawˬ-euˬ zaˬ kʼaˆ pyeuꞈ-eu ma. Nawˬ neh mehˬ nehˬ tsoˆ nehˬ-euˬ jeˬ-ahˇ ngaˇ gʼoˆ shaw nya ni, noeˬ siˬ noeˬ mawˇ nya-eu jeˬ biꞈ nehˬ laꞈ.

¹²⁶Sahˬpaˬ Miˬyehˇ-oˇ, tsawˇ haˬ zaˬ nawˬ-euˬ zahˇ dawˬ kʼoꞈ dawˬ-ahˇ maˬ naˇ haˬ-eu miˇ neh, nawˬ-euˬ nui ma bi mawˇ yamˬ tsaˬ laˇ-euˬ meh.

¹²⁷Shuiˇ naˆ maˬ tseˇ nawˬ-euˬ zahˇ dawˬ kʼoꞈ dawˬ-ahˇ ngaˇ gaˬ-eu ma. Muiˬ dui dui-eu shuiˇ naˆ maˬ tseˇ gaˬ-euˬ ma.

¹²⁸Kʼoeˇ miˇ neh, nawˬ neh mehˬ nehˬ tsoˆ nehˬ laꞈ-euˬ loꞈ-ehˇ ngaˇ dehꞈ-awˇ, maˬ tsaˬ maˬ dawˇ-eu jeˬ-ahˇ ngaˇ bye-eu ma.

¹²⁹Nawˬ neh mehˬ nehˬ tsoˆ nehˬ-euˬ dawˬ zahˬ leˇ paˬ-ehˇ gʼeh-awˇ, nui ma keuˆ-awˇ naˇ haˬ geuꞈ luꞈ-eu ma.

¹³⁰Nawˇ mehˬ-eu dawˬ yaw shehꞈ biꞈ-eu miˇ neh, maˬ gahˇ-eu deuˬ-ahˇ bi gahˇ laˇ-eu meh.

¹³¹Nawˬ-euˬ dawˬ-ahˇ ngaˇ mawꞈ dui dui-eu laꞈ kʼoeˇ, saꞈ maˬ gʼawˇ dah coeˇ ni pyeuꞈ luꞈ-eu ma.

¹³²Nawˬ-ahˇ gaˬ-eu tsawˇ haˬ deuˬ-ahˇ nawˇ ngehˬ gʼeh nehˬ-eu loꞈ-ehˇ, ngaˬ-ahˇ haw-awˇ gʼawˬ shaˬ gaˬ nehˬ laꞈ.

¹³³Nawˬ neh saˇ jaˇ dzaˬ taˬ-eu loꞈ-ehˇ ngaˬ-ahˇ taˬ bi coˬ-iˇ laꞈ. Yaw haiˬ jeˬ ngaˬ-ahˇ taˬ bi gʼaˬ leˇ laꞈ.

¹³⁴Nawˬ-euˬ dawˬ-ahˇ ngaˇ naˇ haˬ geuꞈ nya ni, ngaˬ-ahˇ kʼehˬ-eu deuˬ-euˬ laꞈ-ahˇ ka kʼoꞈ nehˬ laꞈ.

¹³⁵Ngaˬ nehˬ-ehˇ jawˇ-awˇ guiˬ lahˬ biꞈ laꞈ-eu laꞈ kʼoeˇ, nawˬ-euˬ zahˇ dawˬ kʼoꞈ dawˬ mehˬ nehˬ laꞈ.

¹³⁶Tsawˇ haˬ heu deuˬ nawˬ-euˬ zahˇ dawˬ kʼoꞈ dawˬ-ahˇ byehˇ-euˬ miˇ neh, ngaˬ-euˬ myaˆ biˇ lawˇ baˬ yoeˇ le miˇ-a.

¹³⁷Sahˬpaˬ Miˬyehˇ-oˇ, nawˇ tsaˬ dui dawˇ dui dui-awˇ, nawˬ-euˬ zahˇ dawˬ kʼoꞈ dawˬ yaw sui yaw dawˇ meh.

¹³⁸nawˬ neh biꞈ-euˬ zahˇ sahˇ kʼoꞈ deuˬ, ehˇ kʼaˇ maˬ za ni dawˇ-eu meh.

¹³⁹Ngaˬ-ahˇ muiˇ-eu deuˬ nawˬ-euˬ dawˬ-ahˇ yaw zeu maˬ baw-eu miˇ neh, ngaˇ nui ma pehˇ-eu jeˬ miˬ dzaˬ doꞈ luꞈ-eu ma.

¹⁴⁰Nawˬ-euˬ saˇ jaˇ dawˬ tiˬ dawˬ-iˬ maˬ lehˬ ni tsaˬ-eu meh. Dawˬ kʼoeˇ deuˬ-ahˇ ngaˇ gaˬ dui dui-eu ma.

¹⁴¹Ngaˬ-ahˇ aˬ cawˬ taˬ nyiˇ-awˇ sawˇ dzeh kʼawꞈ, nawˬ neh mehˬ-euˬ dawˬ-ahˇ ngaˇ maˬ byehˇ dzeh.

¹⁴²Nawˬ-euˬ yaw tsaˬ yaw dawˇ jeˬ mˬ maˬ maˬ byaˆ zaˇ ziˇ gmˬ-awˇ, nawˬ-euˬ zahˇ dawˬ kʼoꞈ dawˬ aˬ myah luꞈ tsaˬ-eu meh.

¹⁴³Noeˬ shaˬ noeˬ zahˬ-awˇ nui ma cawˆ-eu jeˬ byah luꞈ kʼawꞈ, nawˬ-euˬ dawˬ ngaˬ-ahˇ laˬ kʼaˬ bi cehˇ-eu meh.

¹⁴⁴Nawˬ neh mehˬ nehˬ laꞈ-euˬ dawˬ aˬ myah luꞈ tsaˬ-eu meh. Ngaˇ yaw dehꞈ ya dehꞈ ni noeˬ siˬ noeˬ mawˇ nya-eu jeˬ biꞈ nehˬ laꞈ.

¹⁴⁵Nui ma laꞈ kʼoeˇ keuˆ ni nawˬ-ahˇ ngaˇ kuˇ-eu ma. Sahˬpaˬ Miˬyehˇ-oˇ, ngaˬ-euˬ dawˬ-ahˇ naˇ haˬ nehˬ laꞈ. Nawˬ-euˬ dawˬ-ahˇ ngaˇ naˇ haˬ-eu ma.

¹⁴⁶Nawˬ-ahˇ ngaˇ guˇ-awˇ shaˇ-eu ma. Ngaˬ-ahˇ ka kʼoꞈ nehˬ laꞈ. Nawˬ-euˬ dawˬ-ahˇ ngaˇ naˇ haˬ geuꞈ ma.

¹⁴⁷Nahˇ ma maˬ doˆ laˇ mi naˆ-ehˇ nawˬ-ahˇ ngaˇ shaˇ-eu ma. Nawˬ-euˬ saˇ jaˇ-ahˇ ngaˇ noeˬ tmˬ-eu ma.

¹⁴⁸Uˬ ciꞈ miˇ lah-ehˇ ngaˇ yaw noeˬ-ehˇ yuꞈ-awˇ, nawˬ neh mehˬ nehˬ tsoˆ nehˬ laꞈ-euˬ dawˬ-ahˇ shaˇ noeˬ-euˬ ma.

¹⁴⁹Sahˬpaˬ Miˬyehˇ-oˇ, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ baˬ da neh, ngaˬ-euˬ shaˇ dawˬ-ahˇ naˇ haˬ nehˬ laꞈ. Nawˇ gʼawˬ shaˬ gaˬ-eu jeˬ bi mawˇ laꞈ-awˇ, maˬ bi shiˇ ni ka kʼoꞈ nehˬ laꞈ.

¹⁵⁰Nawˬ-euˬ zahˇ dawˬ kʼoꞈ dawˬ mehˬ nah maˬ caw teh-eu, ngaˬ-ahˇ kʼehˬ-eu haiˬ dui dui-eu tsawˇ haˬ kʼoeˇ deuˬ, ngaˬ-euˬ dawˬ peh oe luꞈ meh.

¹⁵¹Ehˇ kʼawꞈ, Sahˬpaˬ Miˬyehˇ nawˇ ngaˬ nehˬ-ehˇ jawˇ-awˇ, nawˬ-euˬ dawˬ aˬ myah luꞈ ziꞈ-eu meh.

¹⁵²Nawˇ mehˬ-eu tsoˆ-eu dawˬ-ahˇ aˇ hu ba neh ngaˇ ya siˬ-euˬ ma. Dawˬ kʼoeˇ deuˬ mˬ maˬ maˬ byaˆ zaˇ ziˇ maˬ paˇ laˇ-a.

¹⁵³Nawˬ-euˬ zahˇ dawˬ kʼoꞈ dawˬ-ahˇ ngaˇ maˬ byehˇ dzeh-euˬ miˇ neh, ngaˇ ya daˬ luꞈ-eu jeˬ-ahˇ haw-awˇ ka kʼoꞈ nehˬ laꞈ.

¹⁵⁴Ngaˬ-ahˇ haw piˇ-awˇ bi buˬ bi law-iˇ laꞈ. Nawˬ neh saˇ jaˇ dzaˬ taˬ-euˬ loꞈ-ehˇ ngaˬ-ahˇ ka kʼoꞈ nehˬ laꞈ.

¹⁵⁵Haiˬ-eu tsawˇ haˬ deuˬ nawˬ-euˬ zahˇ dawˬ kʼoꞈ dawˬ-ahˇ maˬ naˇ haˬ-eu miˇ neh, ka kʼoꞈ-eu jeˬ maˬ za nya-a.

¹⁵⁶Sahˬpaˬ Miˬyehˇ-oˇ, nawˇ gʼawˬ shaˬ gaˬ-eu jeˬ huiˬ dui dui meh. Nawˇ gʼawˬ shaˬ gaˬ-eu jeˬ bi mawˇ laꞈ-awˇ ka kʼoꞈ nehˬ laꞈ.

¹⁵⁷Ngaˬ-ahˇ muiˇ-eu deuˬ hawˇ-eu kʼehˬ nehˬ laꞈ-eu deuˬ myaˬ dui dui kʼawꞈ, nawˬ-euˬ zahˇ dawˬ kʼoꞈ dawˬ-ahˇ maˬ caw teh ni maˬ byehˇ.

¹⁵⁸Saˇ jaˇ puiˬ-eu tsawˇ haˬ kʼoeˇ deuˬ nawˬ-euˬ dawˬ-ahˇ maˬ naˇ haˬ-eu miˇ neh, aˬ yawꞈ maꞈ-ahˇ haw-awˇ nui ma daˆ dui dui nya.

¹⁵⁹Nawˬ neh mehˬ nehˬ tsoˆ nehˬ-euˬ dawˬ-ahˇ ngaˇ aˇ naˆ ni gaˬ-eu nga lehˇ haw sheˇ. Nawˬ-euˬ gʼoeˇ-eu gaˬ-eu jeˬ maˬ paˇ laˇ-eu miˇ neh, ngaˬ-ahˇ ka kʼoꞈ nehˬ laꞈ.

¹⁶⁰Nawˬ-euˬ zahˇ dawˬ kʼoꞈ dawˬ-euˬ puˇ nmꞈ-aˬ, yaw tsaˬ yaw dawˇ jeˬ meh. nawˬ neh yaˇ kʼaˬ daˇ-eu jeˬ-aˬ, mˬ maˬ maˬ byaˆ zaˇ ziˇ gmˬ meh.

¹⁶¹Sahˬ paˬ sahˬ ma deuˬ ngaˇ maˬ lehˬ gaˇ ngaˬ-ahˇ kʼehˬ kʼawꞈ, nawˬ-euˬ zahˇ dawˬ kʼoꞈ dawˬ-ahˇ yaw zeu baw-eu ma.

¹⁶²Nawˬ-euˬ saˇ jaˇ baˬ da neh ngaˇ aˇ naˆ ni laˬ kʼaˬ ya cehˇ-eu nga. Pyuˇ pahˬ shuiˇ pahˬ mawˇ-euˬ deuˬ naˆ ni laˬ kʼaˬ cehˇ-eu ma.

¹⁶³Jaˬ myawꞈ myawꞈ-eu jeˬ-ahˇ ngaˇ nui daˆ daˆ-awˇ bye-eu ma. Ehˇ kʼawꞈ, nawˬ-euˬ zahˇ dawˬ kʼoꞈ dawˬ-ahˇ ngaˇ gaˬ-eu ma.

¹⁶⁴Nawˇ yaw tsaˬ yaw dawˇ dawˇ-ehˇ yaˇ kʼaˬ daˇ-euˬ miˇ neh, tiˬ nah shiꞈ poˆ nawˬ-ahˇ ja ceuˬ-eu ma.

¹⁶⁵Nawˬ-euˬ zahˇ dawˬ kʼoꞈ dawˬ-ahˇ gaˬ-eu deuˬ guˆ kʼaˇ maˬ za-ehˇ, aˬ yawꞈ maꞈ coˬ-iˇ ni maˬ jahˇ nya-a.

¹⁶⁶Sahˬpaˬ Miˬyehˇ-oˇ, nawˇ ka kʼoꞈ laꞈ gaˇ ngaˇ dawˬ luꞈ-awˇ, nawˬ neh mehˬ-euˬ loꞈ-ehˇ dehꞈ luꞈ-eu ma.

¹⁶⁷Nawˬ neh mehˬ nehˬ tsoˆ nehˬ laꞈ-euˬ dawˬ-ahˇ ngaˇ naˇ haˬ-awˇ, nui ma laꞈ kʼoeˇ keuˆ ni dawˬ kʼoeˇ deuˬ-ahˇ gaˬ-eu ma.

¹⁶⁸Nawˬ neh mehˬ-euˬ jeˬ hawˇ-eu nawˬ-euˬ zahˇ dawˬ kʼoꞈ dawˬ-ahˇ ngaˇ naˇ haˬ geuꞈ-eu ma. Ngaˇ kʼaˇ mˇ kʼaˇ shaˇ-eu jeˬ nawˇ mawˇ luꞈ meh.

¹⁶⁹Sahˬpaˬ Miˬyehˇ-oˇ, ngaˬ-euˬ shaˇ dawˬ nawˇ jawˇ gaˇ bi le keuˆ laꞈ. Nawˬ neh saˇ jaˇ dzaˬ taˬ-euˬ loꞈ-ehˇ, noeˬ siˬ noeˬ mawˇ nya-eu jeˬ biꞈ nehˬ laꞈ.

¹⁷⁰Ngaˬ-euˬ shaˇ dawˬ-ahˇ naˇ haˬ-awˇ, nawˬ neh saˇ jaˇ dzaˬ taˬ-euˬ loꞈ-ehˇ ka kʼoꞈ nehˬ laꞈ.

¹⁷¹Nawˬ-euˬ zahˇ dawˬ kʼoꞈ dawˬ ngaˬ-ahˇ mehˬ nehˬ laꞈ-euˬ miˇ neh, nawˬ-ahˇ aˬ myah luꞈ ja ceuˬ ma.

¹⁷²Nawˬ-euˬ zahˇ dawˬ kʼoꞈ dawˬ tsaˬ-eu dawˇ-eu miˇ neh, nawˬ-euˬ dawˬ-ahˇ caˇ-awˇ ja ceuˬ-eu ma.

¹⁷³Nawˬ-euˬ dawˬ-ahˇ ngaˇ aˬ myah luꞈ naˇ haˬ geuꞈ-eu miˇ neh, aˬ myah luꞈ ngaˬ-ahˇ caw ba nehˬ laꞈ.

¹⁷⁴Sahˬpaˬ Miˬyehˇ-oˇ, nawˇ ka kʼoꞈ nehˬ laꞈ gaˇ ngaˇ noeˬ tmˬ dui dui-eu ma. Nawˬ-euˬ zahˇ dawˬ kʼoꞈ dawˬ laꞈ kʼoeˇ ngaˇ laˬ kʼaˬ cehˇ-eu ma.

¹⁷⁵Nawˬ-ahˇ ngaˇ ja ceuˬ nya ni, ngaˬ-ahˇ yaw dehꞈ bi dehꞈ laꞈ. Nawˬ-euˬ zahˇ sahˇ kʼoꞈ dawˬ ngaˬ-ahˇ caw ba nehˬ laꞈ.

¹⁷⁶Nawˬ-euˬ zahˇ dawˬ kʼoꞈ dawˬ-ahˇ ngaˇ maˬ byehˇ dzeh-euˬ miˇ neh, byoˆ-iˇ-euˬ yawˇ zaˬ loꞈ-ehˇ gaˇ ma cah bahˬ-euˬ nawˬ-euˬ zaˬ kʼaˆ-ahˇ gʼawˬ shaˬ gaˬ-awˇ poˆ kʼoꞈ le nehˬ laꞈ.

Read Akha Ja ceuˬ 119 Bible Online

Ja ceuˬ 119 - Akha bible

Ja ceuˬ 119