Read Akha Ja ceuˬ 135 Bible Online

Ja ceuˬ 135 - Akha bible

Ja ceuˬ 135

¹Sahˬpaˬ Miˬyehˇ-ahˇ ja ceuˬ-awˬ. Sahˬpaˬ Miˬyehˇ-euˬ zaˬ kʼaˆ deuˬ-oˇ, aˬ yawꞈ-euˬ tsawˇ myahˇ-ahˇ ja ceuˬ-awˬ.

²Sahˬpaˬ Miˬyehˇ-euˬ nymˇ-ahˇ yawꞈ luꞈ-eu, Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ yawꞈ luꞈ-eu, Sahˬpaˬ Miˬyehˇ-euˬ zaˬ kʼaˆ deuˬ-oˇ, aˬ yawꞈ-euˬ tsawˇ myahˇ-ahˇ ja ceuˬ-awˬ.

³Sahˬpaˬ Miˬyehˇ muiˬ-eu jaˬ-eu miˇ neh, aˬ yawꞈ-ahˇ ja ceuˬ-awˬ. Aˬ yawꞈ gʼawˬ shaˬ gaˬ nya-eu miˇ neh, aˬ yawꞈ-euˬ tsawˇ myahˇ-ahˇ caˇ-awˇ ja ceuˬ-awˬ.

⁴Aˬ yawꞈ-euˬ tsawˇ haˬ bi geuꞈ-eu gʼaˇ duˬ Yaˬkoˆ-ahˇ tseˇ doˆ-awˇ, aˬ yawꞈ-euˬ tsawˇ jeuˬ bi geuꞈ-eu gʼaˇ duˬ Iˇsaˬleˬlaˆ-ahˇ aˬ yawꞈ tseˇ doˆ-euˬ meh.

⁵Aˬ dui-euˬ Sahˬpaˬ Miˬyehˇ huiˬ dui mahˇ dui dui-eu ngaˇ siˬ nya ma. Miˬyehˇ dawˬ tawˆ luꞈ kʼoeˇ taˆ aˬ yawꞈ huiˬ dzehˬ mahˇ dzehˬ-eu meh.

⁶Mˬ hawˇ-eu miˇ kʼoeˇ taˆ maˬ ehˇ, iˬ ma laˆ shaˆ hawˇ-eu naꞈ dui dui-eu laˆ shaˆ dawˬ dah maˬ ehˇ, aˬ yawꞈ-euˬ nui noeˬ mˇ byah taˬ-euˬ meh.

⁷Mˬ dmˇ hawˇ-eu jaˬ lehˇ-ahˇ, Uˬ dzeˇ miˇ dzeˇ-ahˇ neh aˬ yawꞈ hehˇ ahˇ laꞈ-eu meh. Jaˬ lehˇ lehˇ ma-ahˇ mˬ jeˬ tsawˬ tehˆ bi tehˆ-awˇ, piˬ lahˇ taˬ-euˬ jaˬ lehˇ pyehˬ doˆ gʼeh leꞈ-eu meh.

⁸Iˇjiˇtuˆ miˇ kʼahˬ laꞈ kʼoeˇ dehꞈ beh beh le-euˬ zaˬ hawˇ-eu jeˬ zaˬ dawˬ tawˆ luꞈ-ahˇ, aˬ yawꞈ sehꞈ dzeh-euˬ meh.

⁹Iˇjiˇtuˆ sahˬ paˬ hawˇ-eu yaw huiˬ yaw mahˇ deuˬ-ahˇ kʼehˬ-eu gʼaˇ duˬ, kʼaˆ jeˬ-ehˇ gʼeh-eu jeˬ aˬ yawꞈ mˇ-euˬ meh.

¹⁰Tsawˇ jeuˬ gʼawˬ mya jeuˬ-ahˇ aˬ yawꞈ laˆ luˬ laˆ seˇ nehˬ-awˇ, baoˬ huiˬ-eu sahˬ paˬ gʼawˬ mya gʼaˬ-ahˇ sehꞈ-euˬ meh.

¹¹Aˬmawˇ liˆ sahˬ paˬ Siˇhoˬ, Baˬshaˬ sahˬ paˬ Awˇgaˆ hawˇ-eu, Kaˬnaˬ miˇ kʼahˬ-ahˇ jawˇ-eu sahˬ paˬ dawˬ tawˆ luꞈ-ahˇ, aˬ yawꞈ sehꞈ jiˇ-euˬ meh.

¹²Aˬ yawꞈ-euˬ tsawˇ haˬ Iˇsaˬleˬlaˆ tsawˇ jeuˬ-ahˇ, sahˬ paˬ kʼoeˇ deuˬ-euˬ miˇ kʼahˬ biꞈ nehˬ-euˬ meh.

¹³Sahˬpaˬ Miˬyehˇ-oˇ, nawˇ Miˬyehˇ pyeuꞈ-eu meh lehˇ, aˬ myah luꞈ aˬ cawˬ-ahˇ ja gaˬ-awˇ, tiˬ ziˇ saˇ-iˬ tiˬ ziˇ nawˬ-ahˇ maˬ ngehˇ ni noeˬ keuˆ tehꞈ-a.

¹⁴Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ haw piˇ-awˇ, aˬ yawꞈ-euˬ zaˬ kʼaˆ deuˬ-ahˇ aˬ yawꞈ gʼawˬ shaˬ gaˬ tehꞈ-a.

¹⁵Aˬ cawˬ tsawˇ jeuˬ-euˬ miˬ yehˇ deuˬ-aˬ, tsawˇ haˬ zaˬ-euˬ aˬ laꞈ neh pyuˇ hawˇ-eu shuiˇ yuˇ-awˇ tehˆ-euˬ miˬ yehˇ tehꞈ meh.

¹⁶Kʼaˬ meh tsoꞈ-awˇ maˬ dzaˬ nya-a. Myaˆ nuiˆ tsoꞈ kʼawꞈ maˬ mawˇ nya-a.

¹⁷Naˬ bawˇ tsoꞈ kʼawꞈ maˬ gaˬ nya-ehˇ, saꞈ maˬ gʼawˇ nya-eu miˬ yehˇ meh.

¹⁸Miˬ yehˇ kʼoeˇ deuˬ-ahˇ tehˆ-awˇ kʼaˇ jah-eu deuˬ dawˬ tawˆ luꞈ, yawˬ ha neh tehˆ-euˬ tahˬ pahˬ aˬ ma mawˇ kawˇ loꞈ-ehˇ pyeuꞈ jiˇ luꞈ-uˇ.

¹⁹Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ-ahˇ ja ceuˬ-awˬ. Miˬyehˇ-euˬ piˇ ma deuˬ-oˇ, aˬ yawꞈ-ahˇ ja ceuˬ-awˬ.

²⁰Leˬbiˇ tsawˇ haˬ deuˬ-oˇ, Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ-ahˇ uˬ duˬ kʼaˇ tahˬ-eu tsawˇ haˬ deuˬ, Sahˬpaˬ Miˬyehˇ-ahˇ ja ceuˬ-awˬ.

²¹Ziˇoˬ gawˬ jawˬ kʼoeˇ taˆ aˬ yawꞈ-ahˇ ja ceuˬ-awˬ. Aˬ yawꞈ-euˬ nymˇ pyeuꞈ-eu Yeˬluˇsaˬlehˬ meuˬ laꞈ kʼoeˇ, aˬ yawꞈ-ahˇ ja ceuˬ-awˬ. Sahˬpaˬ Miˬyehˇ-ahˇ ja ceuˬ-awˬ.