Read Akha Ja ceuˬ 138 Bible Online

Ja ceuˬ 138 - Akha bible

Ja ceuˬ 138

¹(Daˬbiˇ-euˬ shaˇ dawˬ) Sahˬpaˬ Miˬyehˇ-oˇ, ngaˬ-euˬ nui ma gʼawˇ mawˇ dawˬ tawˆ luꞈ, nawˬ-ahˇ ja ceuˬ-eu ma. Miˬ yehˇ nui deuˬ dawˬ tawˆ luꞈ mehˬ shi, nawˬ-ahˇ ngaˇ caˇ-awˇ ja ceuˬ-eu ma.

²Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ hawˇ-eu nawˬ-euˬ saˇ jaˇ ziꞈ-eu jeˬ baˬ da neh, nawˬ-euˬ tsawˇ myahˇ hawˇ-eu nawˬ-eu zahˇ dawˬ kʼoꞈ dawˬ deuˬ dawˬ tawˆ luꞈ kʼoeˇ taˆ huiˬ-eu nawˇ bi siˬ laꞈ-euˬ baˬ da neh, nawˬ-euˬ Uˬ duˬ tahˬ nymˇ nymˇ ma jaˆ-eu paw ciˬ pyawˇ-awˇ awˆ byaˆ-eu laꞈ kʼoeˇ, nawˬ-euˬ tsawˇ myahˇ-ahˇ ja ceuˬ-eu ma.

³Nawˬ-ahˇ ngaˇ kuˇ ngeh, ngaˬ-euˬ dawˬ-ahˇ naˇ haˬ nehˬ laꞈ-awˇ, nawˬ-euˬ gʼaˬ neh ngaˬ-ahˇ gʼaˬ lahˬ lahˬ nehˬ laꞈ-euˬ meh.

⁴Sahˬpaˬ Miˬyehˇ-oˇ, nawˬ-euˬ saˇ jaˇ dawˬ-ahˇ ya gaˬ-euˬ miˇ neh, miˇ kʼahˬ sahˬ paˬ dawˬ tawˆ luꞈ nawˬ-ahˇ ja ceuˬ tehꞈ-a.

⁵Huiˬ dui dui-eu nawˬ-euˬ yaw shehꞈ kʼahˬ sehˇ hawˇ-eu, nawˬ neh mˇ taˬ-euˬ gaˇ deuˬ-ahˇ, aˬ yawꞈ maꞈ caˇ-awˇ ja ceuˬ tehꞈ-a.

⁶Goˇ dui dui gaˇ nawˇ jawˇ luꞈ kʼawꞈ, yaw awˆ-ahˇ jawˇ-eu deuˬ-ahˇ nawˇ ngehˬ gʼeh-awˇ, nui ma huiˬ-eu mahˇ-eu deuˬ nawˬ-euˬ mehˬ shi cehˆ zaꞈ kʼaˇ maˬ za-a.

⁷Shaˬ-eu zahˬ-eu jeˬ ngaˬ-euˬ tiˬ jawˬ keuˆ le ngeh, nawˇ ngaˬ-ahˇ dah teˬ-euˬ meh. Ngaˬ-ahˇ nui ma pehˇ-eu muiˇ-eu deuˬ-euˬ mehˬ shi nawˇ aˬ laꞈ cawˬ doˆ-awˇ, nawˬ-euˬ baoˬ neh ngaˬ-ahˇ ka kʼoꞈ-euˬ meh.

⁸Sahˬpaˬ Miˬyehˇ-oˇ, nawˬ neh saˇ jaˇ kʼaˇ dzaˬ taˬ-euˬ jeˬ-ahˇ nawˇ mˇ byah tehꞈ-a. Nawˬ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh. Nawˬ neh dahˬ beh-euˬ jeˬ maˬ mˇ byah ni taˬ byehˇ nehˬ laꞈ.