Read Akha Ja ceuˬ 139 Bible Online

Ja ceuˬ 139 - Akha bible

Ja ceuˬ 139

¹(Daˬbiˇ-eu caˇ dawˬ) Sahˬpaˬ Miˬyehˇ-oˇ, nawˇ ngaˬ-ahˇ pyehˆ tseˇ duˬ-awˇ, ngaˬ-ahˇ siˬ duˬ-eu meh.

²Ngaˇ kʼaˇ mˇ kʼaˇ shaˇ-eu jeˬ nawˇ siˬ nya-eu meh. Gaˇ mahˇ kaˬ gaˇ jawˇ kʼawꞈ ngaˬ-euˬ nui noeˬ nui duˇ dawˬ tawˆ luꞈ nawˇ siˬ nya meh.

³Ngaˇ gaˇ mˇ-eu maˬ ehˇ, gʼaˬ naˬ naˬ-euˬ maˬ ehˇ, nawˇ mawˇ luꞈ-eu meh. Ngaˇ kʼaˇ luˆ kʼaˇ laˆ-eu jeˬ dawˬ tawˆ luꞈ, nawˇ siˬ nya jiˇ-eu meh.

⁴Ngaˇ dawˬ maˬ ngehˬ doˆ mi naˆ-ehˇ, kʼaˇ ngehˬ kʼaˇ tmˇ mawꞈ-eu jeˬ nawˇ siˬ jiˇ taˬ-euˬ meh.

⁵Ngaˬ-euˬ tiˬ jawˬ yawˬ pyawˬ na luꞈ nawˇ jawˇ-awˇ, nawˬ-euˬ baoˬ ngaˬ-ahˇ haw piˇ-eu meh.

⁶Nawˇ ngaˬ-euˬ gaˇ kawˆ siˬ nya-eu naꞈ dui dui-awˇ, ngaˇ maˬ noeˬ keuˆ coeˇ gaˇ keuˆ ni siˬ nya-eu meh.

⁷Nawˬ-ahˇ buˬ-iˇ ni ngaˇ aˬ gaˇ cehˆ nya nmˇ. Nawˇ maˬ bi mawˇ ni aˬ geu paw cehˆ zaꞈ nya nmˇ.

⁸Mˬ-ahˇ ngaˇ cehˆ daˆ kʼawꞈ, nawˇ kʼoeˇ gaˇ jawˇ tehꞈ-a. Shiˇ-eu miˇ oˆ kʼahˬ-ahˇ yuꞈ-iˇ kʼawꞈ, nawˇ kʼoeˇ gaˇ jawˇ tehꞈ-a.

⁹Ngaˇ nahˇ ma doˆ kʼehˬ zaw dzeuˇ byoˆ gʼeh-eu maˬ ehˇ, nahˇ ma ga kʼehˬ paw kaˬ dui dui gaˇ jawˇ-iˇ-eu maˬ ehˇ,

¹⁰Ngaˬ-ahˇ sheuˬ gʼeh-eu gʼaˇ duˬ nawˇ kʼoeˇ gaˇ jawˇ tehꞈ-a. Ngaˬ-ahˇ ngehˬ gʼeh-eu gʼaˇ duˬ nawˇ kʼoeˇ gaˇ jawˇ tehꞈ-a.

¹¹Zahˇ tsui ni gʼeh-eu jeˬ ngaˬ-ahˇ dehˬ kaˬ le-awˬ lehˇ ngaˇ ehˇ-awˇ, ngaˬ-euˬ dawˬ peh bya-eu yaw shehꞈ-ahˇ uˬ ciꞈ loꞈ-ehˇ bi zahˇ iˇ nya law hawˇ kʼawꞈ,

¹²nawˬ-euˬ gʼaˇ duˬ yaw zahˇ maˬ baw-ehˇ, uˬ ciꞈ kʼawꞈ nah gʼahˇ loꞈ-ehˇ bya-eu meh. Nawˬ-euˬ mehˬ shi yaw bya hawˇ-eu yaw zahˇ tiˬ kawˆ meh.

¹³Ngaˬ-euˬ gʼawˇ mawˇ keu ka dawˬ tawˆ luꞈ nawˬ neh beh-awˇ, ngaˬ ma-euˬ uˬ maˆ laꞈ kʼoeˇ gʼoˆ tsoꞈ nehˬ laꞈ-euˬ meh.

¹⁴Nawˬ-ahˇ guˆ paˬ-ehˇ gʼeh-eu miˇ neh, nawˬ-ahˇ ngaˇ ja ceuˬ-eu ma. Nawˬ neh kʼaˇ mˇ-euˬ jeˬ zahˬ dui dui leˇ paˬ-ehˇ gʼeh-awˇ, nui ma laꞈ kʼoeˇ maˬ ngehˇ leˇ coeˇ nya.

¹⁵Ngaˬ-euˬ shaˬ yoeˬ shaˬ laꞈ bymˬ doˆ laˇ-awˇ, ngaˬ ma-euˬ uˬ maˆ laꞈ kʼoeˇ yaw muiˬ paˬ-ehˇ tsoꞈ tawꞈ leˇ-awˇ, ciˬ cuˇ ni huiˬ laˇ gʼahˇ laˇ luꞈ ngeh neh, ngaˇ kʼoeˇ gaˇ uˇ-eu nawˇ siˬ nya-euˬ meh.

¹⁶Ngaˇ maˬ dehꞈ doˆ le mi naˆ ehˇ ngaˬ-ahˇ nawˇ siˬ nya-euˬ meh. Aˇ nah aˇ yamˬ-ahˇ nawˇ maˬ beh mi naˆ ehˇ, ngaˇ aˇ myaˆ nah ya dehꞈ-eu gaˇ kawˆ, nawˬ-euˬ sahˬ boꞈ laꞈ kʼoeˇ nawˇ boꞈ ahˇ gʼaˬ taˬ-euˬ meh.

¹⁷Miˬyehˇ-oˇ, nawˬ-euˬ nui noeˬ poˆ mawˇ-eu gʼaˇ duˬ ngaˇ aˇ naˆ ni ya shaˬ-eu nga. Nawˬ-euˬ nui noeˬ aˇ naˆ ni byah-eu kuꞈ-eu nga.

¹⁸Nawˬ-euˬ nui noeˬ-ahˇ ngaˇ gui haw naˇ, kʼaˇ shuiꞈ myaˆ maˬ tseˇ myaˬ gaˇ ya mawˇ tehꞈ-a. Ngaˇ uˬ noeˬ noeˬ laˇ kʼawꞈ, nawˬ nehˬ-ehˇ jawˇ luꞈ nya siˬ.

¹⁹Miˬyehˇ-oˇ, haiˬ-eu tsawˇ haˬ deuˬ-ahˇ, nawˬ neh bi sehꞈ mawꞈ dui dui nya. Aˬ cawˬ-ahˇ sehꞈ-eu tsawˇ haˬ deuˬ-ahˇ, ngaˇ jawˇ gaˇ neh bi doˆ-iˇ dui dui mawꞈ nya.

²⁰Nawˬ-euˬ gaˇ kawˆ maˬ muiˬ-eu jeˬ aˬ yawꞈ maꞈ ja-awˇ, nawˬ-euˬ tsawˇ myahˇ-ahˇ ja bu ja doeˇ-eu meh.

²¹Sahˬpaˬ Miˬyehˇ-oˇ, nawˬ-ahˇ bye-eu tsawˇ haˬ deuˬ-ahˇ ngaˇ bye dui dui-awˇ, nawˬ-ahˇ puiˬ-eu tsawˇ haˬ deuˬ-ahˇ ngaˇ nui daˆ daˆ dui dui nya.

²²Aˬ yawꞈ maꞈ-ahˇ ngaˇ ehˇ kʼaˇ maˬ za ni bye-awˇ, ngaˬ-ahˇ muiˇ-eu tsawˇ haˬ loꞈ-ehˇ sawˇ taˬ-euˬ ma.

²³Miˬyehˇ-oˇ, ngaˬ-ahˇ pyehˆ tseˇ-awˇ ngaˬ-euˬ nui ma poˆ duˬ-awˬ. Ngaˬ-ahˇ lawˬ haw-awˇ ngaˬ-euˬ nui noeˬ nui duˇ tseˇ duˬ-awˬ.

²⁴Ngaˬ-euˬ laꞈ kʼoeˇ yaw haiˬ jeˬ ahˇ nga loˇ lehˇ haw duˬ-awˇ, mˬ maˬ maˬ byaˆ zaˇ ziˇ ziꞈ-eu gaˇ ma-ahˇ ngaˬ-ahˇ sheuˬ gʼeh nehˬ laꞈ.