Read Akha Ja ceuˬ 140 Bible Online

Ja ceuˬ 140 - Akha bible

Ja ceuˬ 140

¹(Daˬbiˇ-euˬ caˇ dawˬ) Sahˬpaˬ Miˬyehˇ-oˇ, huiˬ-eu tsawˇ haˬ deuˬ-euˬ aˬ laꞈ laꞈ kʼoeˇ ngaˬ-ahˇ ka kʼoꞈ nehˬ laꞈ. Tsawˇ haˬ-ahˇ sehꞈ-eu deuˬ-euˬ aˬ laꞈ laꞈ kʼoeˇ, ngaˬ-ahˇ taˬ bi cawˆ-iˇ laꞈ.

²Aˬ yawꞈ maꞈ aˬ myah luꞈ yaw haiˬ jeˬ mˇ-eu gaˇ kawˆ kawˆ-awˇ, iˬ dehˬ iˬ ceh laˆ doˆ-eu meh.

³Aˬ yawꞈ maꞈ-euˬ mehˬ laˇ aˇ lawˇ mehˬ laˇ loꞈ-ehˇ taˆ-awˇ, aˬ yawꞈ maꞈ-euˬ dawˬ aˇ lawˇ uiˇ naˆ-euˬ doꞈ-ahˇ duˇ-eu meh.

⁴Sahˬpaˬ Miˬyehˇ-oˇ, haiˬ-euˬ tsawˇ haˬ deuˬ-euˬ aˬ laꞈ laꞈ kʼoeˇ ngaˬ-ahˇ haw piˇ nehˬ laꞈ. Ngaˇ ya luˬ ya seˇ-iˇ ni gaˇ kawˆ kawˆ luꞈ-eu, tsawˇ haˬ-ahˇ sehꞈ-eu deuˬ-euˬ laꞈ-ahˇ, ngaˬ-ahˇ ka kʼoꞈ nehˬ laꞈ.

⁵Nui ma huiˬ-eu tsawˇ haˬ deuˬ ngaˬ-ahˇ lahˇ ju kʼmˇ-euˬ meh. Aˬ yawꞈ maꞈ caˆ pyeuˆ daˬ zaꞈ taˬ-awˇ, gaˇ ma-ahˇ ngaˬ-ahˇ caˆ kʼmˇ kʼmˇ taˬ-euˬ meh.

⁶“Nawˇ ngaˬ-euˬ Miˬyehˇ ma” lehˇ, Sahˬpaˬ Miˬyehˇ-ahˇ ngaˇ ehˇ-eu ma. Sahˬpaˬ Miˬyehˇ-oˇ, ngaˬ-euˬ shaˇ dawˬ-ahˇ naˇ haˬ nehˬ laꞈ.

⁷Ngaˬ-euˬ Miˬyehˇ pyeuꞈ-eu ngaˬ-ahˇ haw piˇ-eu gʼaˬ kʼaˆ-eu Sahˬpaˬ Miˬyehˇ-oˇ, guiˇ deuˆ ngeh nawˇ ngaˬ-ahˇ haw piˇ nehˬ laꞈ-euˬ meh.

⁸Sahˬpaˬ Miˬyehˇ-oˇ, haiˬ-eu tsawˇ haˬ deuˬ-euˬ nui kʼahˇ taˬ bi byah leˇ. Aˬ yawꞈ maꞈ-euˬ nui noeˬ taˬ bi mˇ pyeuꞈ.

⁹Ngaˬ-ahˇ muiˇ-eu deuˬ ngaˬ-euˬ kʼoeˇ taˆ taˬ bi gʼaˬ laˇ. Aˬ yawꞈ maꞈ neh ngaˬ-ahˇ yaw doeˇ jahˇ-euˬ jeˬ, aˬ yawꞈ maꞈ kʼoeˇ taˆ paˇ bi keuˆ le-awˬ.

¹⁰Neˇ hoˬ ni doꞈ luꞈ-eu miˬ jiˆ aˬ yawꞈ maꞈ kʼoeˇ taˆ bi ga le-awˬ. Tiˬ jawˇ-iˬ maˬ gʼoꞈ doˆ laˇ nya-eu duˬ kʼahˬ-ahˇ, aˬ yawꞈ maꞈ-ahˇ bi ga ahˇ-awˬ.

¹¹Aˬ cawˬ-ahˇ yaw doeˇ jahˇ-euˬ tsawˇ haˬ deuˬ, miˇ kʼahˬ heu kʼahˬ laꞈ kʼoeˇ taˬ bi dehꞈ dzaˬ laˇ. Aˬ cawˬ-ahˇ sehꞈ-eu tsawˇ haˬ deuˬ kʼoeˇ taˆ yaw haiˬ jeˬ bi keuˆ le-awˇ, bi luˬ bi seˇ-iˇ-awˬ.

¹²Sahˬpaˬ Miˬyehˇ-oˇ, shaˬ-eu zahˬ-eu deuˬ-ahˇ nawˇ haw piˇ-awˇ, mehꞈ-eu shuꞈ-eu deuˬ-ahˇ nawˇ ngehˬ gʼeh-eu gaˇ kawˆ ngaˇ siˬ nya ma.

¹³Yaw tsaˬ yaw dawˇ tsawˇ haˬ deuˬ nawˬ-ahˇ aˬ diˇ ja ceuˬ-awˇ, nawˬ-euˬ mehˬ shi aˬ yawꞈ maꞈ ya dehꞈ tehꞈ-a.