Read Akha Ja ceuˬ 141 Bible Online

Ja ceuˬ 141 - Akha bible

Ja ceuˬ 141

¹(Daˬbiˇ-euˬ caˇ dawˬ) Sahˬpaˬ Miˬyehˇ-oˇ, nawˬ-ahˇ ngaˇ kuˇ-eu ma. Nymˬ-mˇ caw ba nehˬ laꞈ-awˬ. Ngaˇ nawˬ-ahˇ kuˇ ngeh, ngaˬ-euˬ dawˬ-ahˇ naˇ haˬ nehˬ laꞈ-awˬ.

²Tsiˇ yaw saw doꞈ damˬ-euˬ gaˇ ha geuꞈ-eu loꞈ-ehˇ, ngaˬ-euˬ shaˇ dawˬ-ahˇ ha geuꞈ nehˬ laꞈ-awˬ. Uˬ ciꞈ uˬ taw paw lawˇ-euˬ jeˬ-ahˇ ha geuꞈ-eu loꞈ-ehˇ, ngaˇ aˬ laꞈ baꞈ diˇ taˬ gaˇ ha geuꞈ nehˬ laꞈ.

³Sahˬpaˬ Miˬyehˇ-oˇ, ngaˬ-euˬ kʼaˬ meh-ahˇ haw piˇ nehˬ laꞈ-awˇ, ngaˬ-euˬ mehˬ luˬ-ahˇ haw piˇ nehˬ laꞈ.

⁴Maˬ muiˬ-eu jeˬ mˇ mawꞈ-eu nui ma taˬ bi ahˇ laꞈ. Haiˬ-eu tsawˇ haˬ deuˬ nehˬ-ehˇ yaw haiˬ jeˬ maˬ ya mˇ ni haw piˇ nehˬ laꞈ. Tsawˇ haˬ kʼoeˇ deuˬ nehˬ-ehˇ maˬ ya dzaˬ maˬ ya dawˇ taꞈ ni dah teˬ nehˬ laꞈ.

⁵Tsawˇ muiˬ deuˬ neh gʼawˬ shaˬ gaˬ-awˇ dehˬ-euˬ dawˬ doeˇ-ahˇ ya daˬ kʼawꞈ, haiˬ-eu tsawˇ haˬ deuˬ neh taˬ bi taˬ huiˬ nehˬ laꞈ. Aˬ jeˬ miˇ neh ehˇ naˇ, aˬ yawꞈ maꞈ neh mˇ-euˬ yaw haiˬ jeˬ piˬ-iˇ byoˆ-iˇ nya ni, aˬ myah luꞈ ngaˇ guiˬ lahˬ shaˇ luꞈ-eu ma.

⁶Aˬ yawꞈ maꞈ kʼoeˇ taˆ aˬ yuiꞈ geuꞈ-eu deuˬ lo guˇ-ahˇ neh biˬ ka nehˬ gaˇ ya daˬ ngeh nah, ngaˬ neh ehˇ-euˬ dawˬ tsaˬ gaˇ aˬ yawꞈ maꞈ ya mawˇ tehꞈ-a.

⁷Miˬ dzaˬ ceuꞈ kʼawˬ taˬ-awˇ ga-eu loꞈ-ehˇ, aˬ yawꞈ maꞈ-euˬ shaˬ yoeˬ lmˬ bymˇ gaˇ dzeˇ ga tehꞈ-a.

⁸Ehˇ kʼawꞈ, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-ahˇ ngaˇ gʼoe luꞈ-eu ma. Nawˇ haw piˇ nehˬ laꞈ-eu jeˬ-ahˇ ngaˇ poˆ-eu loꞈ-ehˇ, ngaˬ-ahˇ taˬ bi shiˇ laꞈ.

⁹Aˬ cawˬ neh kʼmˇ-euˬ lahˇ ju-ahˇ, ngaˬ-ahˇ taˬ bi paꞈ leˇ laꞈ. Yaw haiˬ jeˬ mˇ-eu deuˬ-euˬ caˆ kʼmˇ-ahˇ bi dzeuˇ-iˇ laꞈ.

¹⁰Ngaˇ ya buˬ ya law-iˇ luꞈ ngeh, haiˬ-euˬ tsawˇ haˬ deuˬ yawˬ ha neh kʼmˇ taˬ-euˬ lahˇ ju-ahˇ paꞈ leˇ jiˇ luꞈ-uˇ.