Read Akha Ja ceuˬ 144 Bible Online

Ja ceuˬ 144 - Akha bible

Ja ceuˬ 144

¹(Daˬbiˇ-euˬ caˇ dawˬ) Ngaˬ-ahˇ haw piˇ-eu gʼaˬ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ ngaˬ-ahˇ guiˇ deuˆ-eu tsawˇ gahˇ mehˬ nehˬ laꞈ-awˇ, guiˇ deuˆ-eu gʼaˇ duˬ lehˬ hmˬ nehˬ laꞈ-euˬ meh.

²Aˬ yawꞈ-aˬ, ngaˬ-euˬ gʼoe duˬ ngaˬ-euˬ lo guˇ ma. Ngaˬ-ahˇ haw piˇ-awˇ ka kʼoꞈ-eu gʼaˬ pyeuꞈ-eu ma. Aˬ yawꞈ-ahˇ ngaˇ gʼoe-awˇ ngaˇ nui saˇ za-eu ma. Tsawˇ jeuˬ dawˬ tawˆ luꞈ ngaˬ-euˬ laꞈ oꞈ ya awꞈ ni aˬ yawꞈ jahˇ-eu meh.

³Sahˬpaˬ Miˬyehˇ-oˇ, tsawˇ haˬ zaˬ-ahˇ nawˇ haw cawˬ paˬ-ehˇ aˬ jeˬ gaˇ dahˇ tsoeˬ ta. Tsawˇ haˬ zaˬ loˆ ni gʼeh gaˇ nawˇ ka kʼoꞈ-eu meh.

⁴Aˬ yawꞈ-aˬ, saꞈ tiˬ poˆ gʼawˇ dah-euˬ myah ni gmˬ-eu tehꞈ meh. Aˬ yawꞈ-euˬ ziˇ-aˬ, naˇ shmˇ shmˇ-iˇ-eu naˆ ni tehꞈ meh.

⁵Sahˬpaˬ Miˬyehˇ-oˇ, mˬ dehˬ paˆ-awˇ zaꞈ ka le-awˬ. Gawˬ jawˬ-ahˇ toeˬ ciˆ-awˇ uˬ kʼoeˬ bi du doˆ laˇ-awˬ.

⁶Mˬ jeˬ tsawˬ tehˆ bi tehˆ-awˇ nawˬ-ahˇ muiˇ-eu deuˬ-ahˇ teh byaˆ-awˬ. Nawˬ-euˬ kaˆ myaˬ neh beuˆ-awˇ bi cehˆ-awˬ.

⁷Yaw goˇ-ahˇ neh nawˬ-euˬ aˬ laꞈ cawˬ ka leꞈ-awˇ, iˇ cuꞈ naꞈ gaˇ ngaˬ-ahˇ gʼeu doˆ-awˇ ka kʼoꞈ nehˬ laꞈ-awˬ. Aˬ cawˬ tsawˇ jeuˬ deuˬ-euˬ aˬ laꞈ laꞈ kʼoeˇ ka kʼoꞈ nehˬ laꞈ-awˬ.

⁸Aˬ yawꞈ maꞈ yaw tsaˬ yaw dawˇ jeˬ tiˬ jawˇ-iˬ maˬ ngehˬ-ehˇ, jaˬ myawꞈ myawꞈ-awˇ kamˬ tsehˆ peuˬ-eu meh.

⁹Miˬyehˇ-oˇ, caˇ dawˬ yaw shuiꞈ caˇ-awˇ, nawˬ-ahˇ ngaˇ ja ceuˬ ma. Deuˇ-mˬ diˬ-awˇ ja ceuˬ ma.

¹⁰Miˇ kʼahˬ sahˬ paˬ deuˬ-ahˇ gʼaˬ leˇ-eu jeˬ biꞈ-eu gʼaˬ nawˇ pyeuꞈ-awˇ, nawˬ-euˬ zaˬ kʼaˆ Daˬbiˇ-ahˇ nawˇ ka kʼoꞈ-eu meh.

¹¹Gʼawˬ shaˬ gaˬ-eu maˬ siˬ nya-eu muiˇ-eu deuˬ-euˬ aˬ laꞈ laꞈ kʼoeˇ, ngaˬ-ahˇ ka kʼoꞈ nehˬ laꞈ. Tiˬ jawˇ-iˬ yaw tsaˬ yaw dawˇ jeˬ maˬ ngehˬ-ehˇ, jaˬ myawꞈ myawꞈ-awˇ kamˬ tsehˆ peuˬ-eu, aˬ cawˬ tsawˇ jeuˬ-euˬ laꞈ-ahˇ ka kʼoꞈ nehˬ laꞈ.

¹²Nga maꞈ-euˬ aˬ li zaˬ guˬ deuˬ, mehˇ laˇ luꞈ-eu sahˬ lahˬ aˇ bawˇ loꞈ-ehˇ bi pyeuꞈ laꞈ. Nga maꞈ-euˬ aˬ buˇ deuˬ-aˬ, sahˬ paˬ-euˬ nymˇ laꞈ coeˇ-ahˇ toˆ tehˬ taˬ-euˬ, kʼawˇ zeuˇ loꞈ-ehˇ bi pyeuꞈ laꞈ.

¹³Nga maꞈ-euˬ cehˇ jiˇ laꞈ kʼoeˇ, dzaˬ la gʼo cehˇ bi byah laꞈ. Deh ga-ahˇ gaˆ luꞈ-eu nga maꞈ-euˬ yawˇ deuˬ aˇ muiˇ aˇ seh mawˇ puˬ dehꞈ luꞈ-uˇ.

¹⁴Nga maꞈ-euˬ mawˇ nyoˬ jeˬ kaˇ deuˬ maˬ byoˆ maˬ laˆ ni myaˬ laˇ behˇ laˇ luꞈ-uˇ. Nga maꞈ-euˬ meuˬ jawˇ zaˇ laꞈ kʼoeˇ, noeˬ shaˬ-awˇ ngoeˇ-eu teˇ saˇ maˬ ya gaˬ ni pyeuꞈ-iˇ luꞈ-uˇ.

¹⁵Kʼoeˇ loꞈ-ehˇ muiˬ-eu guiˬ lahˬ za-euˬ tsawˇ jeuˬ, laˬ kʼaˬ cehˇ-eu jeˬ byah luꞈ-uˇ. Sahˬpaˬ Miˬyehˇ-ahˇ Miˬyehˇ kʼaˇ gʼoe-eu tsawˇ haˬ deuˬ, laˬ kʼaˬ cehˇ-eu jeˬ byah luꞈ-uˇ.