Read Akha Ja ceuˬ 145 Bible Online

Ja ceuˬ 145 - Akha bible

Ja ceuˬ 145

¹(Daˬbiˇ-euˬ caˇ dawˬ) Ngaˬ-euˬ sahˬ paˬ pyeuꞈ-eu ngaˬ-euˬ Miˬyehˇ-oˇ, Nawˇ huiˬ dui mahˇ dui dui-eu gaˇ kawˆ ngaˇ ja gaˬ ma. Mˬ maˬ maˬ byaˆ zaˇ ziˇ nawˬ-euˬ guiˬ lahˬ-ahˇ ngaˇ ja ceuˬ ma.

²Yawˬ nah na luꞈ nawˬ-euˬ guiˬ lahˬ-ahˇ ngaˇ ja ceuˬ ma. Mˬ maˬ maˬ byaˆ zaˇ ziˇ nawˬ-ahˇ ngaˇ ja ceuˬ ma.

³Sahˬpaˬ Miˬyehˇ huiˬ dui mahˇ dui dui-awˇ, ja ceuˬ dui dui paˬ-ehˇ gʼeh-eu meh. Aˬ yawꞈ huiˬ dui mahˇ dui dui-eu gaˇ kawˆ, aˬ dui maˬ noeˬ miˇ coeˇ-a.

⁴Nawˬ neh mˇ-euˬ gaˇ deuˬ-ahˇ, tiˬ ziˇ saˇ-iˬ tiˬ ziˇ ja ceuˬ tehꞈ-a. Nawˬ neh mˇ-euˬ huiˬ-eu gaˇ deuˬ-ahˇ ja gaˬ tehꞈ-a.

⁵Nawˬ-euˬ yaw shehꞈ kʼahˬ sehˇ gaˇ kawˆ aˬ yawꞈ maꞈ ja-awˇ, Nawˬ neh mˇ-euˬ zahˬ dui dui leˇ paˬ-ehˇ gʼeh-eu gaˇ deuˬ-ahˇ ngaˇ shaˇ noeˬ shaˇ sawˇ-eu ma.

⁶Nawˬ neh mˇ-euˬ huiˬ-eu gaˇ deuˬ-ahˇ miˇ tsaˬ zaˬ deuˬ ja-awˇ, nawˇ huiˬ dui mahˇ dui dui-eu gaˇ kawˆ ngaˇ ja gaˬ ma.

⁷Nawˬ-euˬ muiˬ-eu guiˬ lahˬ gaˇ kawˆ aˬ yawꞈ maꞈ ja-awˇ, nawˇ gʼawˬ shaˬ gaˬ nya-eu gaˇ kawˆ caˇ-eu meh.

⁸Sahˬpaˬ Miˬyehˇ-aˬ, gʼoeˇ-eu gaˬ-eu jeˬ byah-awˇ, gʼawˬ shaˬ gaˬ nya-eu uˬ taꞈ, yaw awˇ laꞈ-ehˇ nui ma maˬ pehˇ-ehˇ, gʼoeˇ-eu gaˬ-eu jeˬ maˬ tsehˆ leˇ-a.

⁹Aˬ yawꞈ-aˬ, yawˬ gʼaˬ na luꞈ kʼoeˇ taˆ muiˬ-awˇ, aˬ yawꞈ neh kʼaˇ beh taˬ-euˬ jeˬ dawˬ tawˆ luꞈ kʼoeˇ taˆ, gʼawˬ shaˬ gaˬ-eu nui ma jaˆ-eu meh.

¹⁰Sahˬpaˬ Miˬyehˇ-oˇ, nawˬ neh kʼaˇ beh taˬ-euˬ yawˬ jeˬ na luꞈ nawˬ-ahˇ ja ceuˬ-awˇ, nawˬ-euˬ tsawˇ haˬ dawˬ tawˆ luꞈ nawˬ-euˬ guiˬ lahˬ-ahˇ ja ceuˬ tehꞈ-a.

¹¹Nawˇ uˆ lahˇ-eu jeˬ baoˬ yaw shehꞈ kʼahˬ sehˇ huiˬ-eu gaˇ kawˆ aˬ yawꞈ maꞈ ja-awˇ, nawˬ-euˬ baoˬ gaˇ kawˆ ja tehꞈ-a.

¹²Kʼoeˇ miˇ neh tsawˇ haˬ yawˬ gʼaˬ na luꞈ nawˬ neh mˇ-euˬ huiˬ-euˬ gaˇ deuˬ gaˇ kawˆ siˬ nya-awˇ, nawˇ uˆ lahˇ-eu jeˬ baoˬ yaw shehꞈ kʼahˬ sehˇ huiˬ-eu gaˇ kawˆ siˬ nya tehꞈ-a.

¹³Nawˇ uˆ lahˇ-eu jeˬ mˬ maˬ maˬ byaˆ zaˇ ziˇ ziꞈ-awˇ, nawˬ-euˬ dzoeˬ dzaˬ maˬ cawˆ-iˇ nya-a. Sahˬpaˬ Miˬyehˇ-aˬ, aˬ yawꞈ neh dzaˬ taˬ-euˬ dawˬ ma saˇ jaˇ deuˬ-ahˇ ziꞈ-awˇ, aˬ yawꞈ neh kʼaˇ mˇ kʼaˇ shaˇ-euˬ jeˬ muiˬ dui dui-eu meh.

¹⁴Noeˬ shaˬ noeˬ zahˬ-eu tsawˇ haˬ deuˬ-ahˇ aˬ yawꞈ ngehˬ gʼeh nehˬ-awˇ, coˬ-iˇ-euˬ tsawˇ haˬ-ahˇ ciˬ tuˇ nehˬ-eu meh.

¹⁵Yaw dehꞈ kʼaˇ dehꞈ-eu jeˬ dawˬ tawˆ luꞈ nawˬ-ahˇ noeˬ tmˬ luꞈ-awˇ, aˬ yawꞈ maꞈ kʼaˇ mehꞈ ngeh nawˇ bi dzaˬ bi dawˇ-eu meh.

¹⁶Nawˇ aˬ yawꞈ maꞈ-ahˇ bi dzaˬ bi dawˇ dehˆ-awˇ, dawˬ tawˆ luꞈ-ahˇ kʼaˇ loˬ-eu jeˬ biꞈ nehˬ-eu meh.

¹⁷Sahˬpaˬ Miˬyehˇ neh kʼaˇ mˇ kʼaˇ shaˇ-euˬ jeˬ laꞈ kʼoeˇ, yaw tsaˬ yaw dawˇ jeˬ hawˇ-eu gʼawˬ shaˬ gaˬ-eu jeˬ ahˇ-eu meh.

¹⁸Aˬ yawꞈ-ahˇ nui ma keuˆ-awˇ kʼaˇ kuˇ-eu deuˬ dawˬ peh, aˬ yawꞈ aˬ myah luꞈ jawˇ-eu meh.

¹⁹Aˬ yawꞈ-ahˇ taˬ huiˬ taˬ mahˇ-eu tsawˇ haˬ deuˬ kʼaˇ loˬ-eu jeˬ, aˬ yawꞈ tiˬ loꞈ biꞈ nehˬ-awˇ, aˬ yawꞈ maꞈ aˬ yawꞈ-ahˇ kuˇ ngeh ka kʼoꞈ nehˬ-eu meh.

²⁰Aˬ yawꞈ-ahˇ kʼaˇ gaˬ-eu tsawˇ haˬ-ahˇ aˬ yawꞈ haw piˇ-eu meh. Ehˇ kʼawꞈ, huiˬ-eu tsawˇ haˬ deuˬ-ahˇ aˬ yawꞈ laˆ luˬ laˆ seˇ nehˬ tehꞈ-a.

²¹Sahˬpaˬ Miˬyehˇ-ahˇ aˬ myah luꞈ ngaˇ ja ceuˬ ma. Aˬ yawꞈ neh kʼaˇ beh dehꞈ taˬ-euˬ jeˬ dawˬ tawˆ luꞈ, muiˬ-eu shawˇ-eu aˬ yawꞈ-euˬ tsawˇ myahˇ-ahˇ ja ceuˬ luꞈ-uˇ.