Read Akha Ja ceuˬ 146 Bible Online

Ja ceuˬ 146 - Akha bible

Ja ceuˬ 146

¹Sahˬpaˬ Miˬyehˇ-ahˇ ja ceuˬ-awˬ. Ngaˬ-euˬ nui ma-oˇ, Sahˬpaˬ Miˬyehˇ-ahˇ ja ceuˬ-awˬ.

²Ngaˇ yaw dehꞈ kʼaˇ dehꞈ kʼoeˇ keuˆ ni, Sahˬpaˬ Miˬyehˇ-ahˇ ja ceuˬ ma. Ngaˬ-euˬ Miˬyehˇ-ahˇ tiˬ ziˇ caˇ-awˇ ja ceuˬ ma.

³Miˇ kʼahˬ sahˬ paˬ sahˬ ma deuˬ-ahˇ nui kʼaˬ taˬ tsmˬ. Tsawˇ haˬ zaˬ nawˬ-ahˇ maˬ ka kʼoꞈ nya-a.

⁴Aˬ yawꞈ maꞈ shiˇ ngeh miˇ tsaˬ-ahˇ paˇ ya gʼoꞈ uˇ-iˇ-awˇ, aˬ yawꞈ maꞈ neh kʼaˇ noeˬ tmˬ-euˬ jeˬ, shiˇ ngeh nah byoˆ jiˇ-eu meh.

⁵Yaˬkoˆ-euˬ Miˬyehˇ neh caw ba nehˬ-euˬ gʼaˬ guiˬ lahˬ huiˬ-eu meh. Aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gʼoe-eu gʼaˬ guiˬ lahˬ huiˬ-eu meh.

⁶Aˬ yawꞈ-euˬ Miˬyehˇ-aˬ, mˬ, miˇ hawˇ-eu iˬ ma laˆ shaˆ-ahˇ maˬ ehˇ, kʼoeˇ gaˇ kʼaˇ jaˆ kʼaˇ jawˇ-eu jeˬ-ahˇ maˬ ehˇ, beh-euˬ yaw sahˇ pyeuꞈ-eu meh. Aˬ yawꞈ neh dzaˬ taˬ-euˬ dawˬ ma saˇ jaˇ-ahˇ aˬ myah luꞈ ziꞈ-eu meh.

⁷Kʼehˬ-eu kʼaˆ-eu jeˬ-ahˇ ya daˬ-eu tsawˇ haˬ deuˬ-euˬ myaˆ pyawˬ-ahˇ haw-awˇ yaˇ kʼaˬ daˇ-awˇ, mehꞈ-eu shuꞈ-eu deuˬ-ahˇ bi dzaˬ bi dawˇ-eu meh. Paꞈ kuˆ-ahˇ uˇ-eu tsawˇ haˬ deuˬ-ahˇ Sahˬpaˬ Miˬyehˇ pyehˬ nehˬ-awˇ,

⁸myaˆ behꞈ-ahˇ bi dahˇ laˇ-eu meh. Coˬ-iˇ-euˬ tsawˇ haˬ deuˬ-ahˇ aˬ yawꞈ ciˬ tuˇ nehˬ-awˇ, tsaˬ-eu dawˇ-eu aˬ yawꞈ-euˬ tsawˇ haˬ deuˬ-ahˇ, aˬ yawꞈ gʼawˬ shaˬ gaˬ-eu meh.

⁹Aˬ dui-euˬ miˇ kʼahˬ laꞈ kʼoeˇ jawˇ-eu boeˇ miˬ siˬ kʼaˬ deuˬ-ahˇ aˬ yawꞈ haw piˇ nehˬ-awˇ, muˇ coe aˬ nmˇ hawˇ-eu miˬ coeˬ miˬ ma deuˬ-ahˇ caw ba nehˬ-euˬ meh. Ehˇ kʼawꞈ, haiˬ-eu tsawˇ haˬ deuˬ-euˬ nui kʼahˇ-ahˇ aˬ yawꞈ laˆ cawˆ nehˬ-euˬ meh.

¹⁰Sahˬpaˬ Miˬyehˇ-aˬ, mˬ maˬ maˬ byaˆ zaˇ ziˇ sahˬ paˬ pyeuꞈ-eu meh. Ziˇoˬ meuˬ-oˇ, nawˬ-euˬ Miˬyehˇ uˆ lahˇ-eu jeˬ, mˬ maˬ maˬ byaˆ zaˇ ziˇ ziꞈ tehꞈ-a. Sahˬpaˬ Miˬyehˇ-ahˇ ja ceuˬ-awˬ.