Read Akha Ja ceuˬ 24 Bible Online

Ja ceuˬ 24 - Akha bible

Ja ceuˬ 24

¹(Daˬbiˇ-euˬ caˇdawˬ) Miˇtsaˬtahˬkʼawˇboeˬboeˬluˆluˆ, kʼaˇdehꞈkʼaˇjawˇ-eu dawˬtawˆluꞈ, SahˬpaˬMiˬyehˇ-euˬpyeuꞈ-eu meh.

²Laˆshaˆkʼoeˇtaˆmiˇmaˬciˬ-awˇ, laˆshaˆdawˬdah naꞈdui dui gaˇ, zeuˇka ziꞈdah ni jaˆ-eu meh.

³SahˬpaˬMiˬyehˇ-euˬgawˬjawˬ-ahˇ, ya daˆleˇ-eu aˬsuˇ jawˇ-awˇ, Muiˬ-eu shawˇ-eu jawˇduˬlaꞈkʼoeˇ, ya yawꞈleˇ-eu aˬsuˇ jawˇta.

⁴Aˬlaꞈhawˇ-eu nui ma shawˇ-awˇ, tahˬpaˬaˬma-ahˇmaˬtahˬ-eu, maˬtsaˬ-eu saˇkiˇmaˬkamˬ-eu,

⁵kʼoeˇloꞈ-ehˇgʼeh-eu tsawˇhaˬ-ahˇ, SahˬpaˬMiˬyehˇguiˬlahˬbiꞈ-awˇ, iˬbaˇlaw meh lehˇ daˇnehˬ-awˇ, Miˬyehˇka kʼoꞈnehˬle tehꞈ-a.

⁶Kʼoeˇloꞈ-ehˇgʼeh-eu tsawˇhaˬdeuˬ, Miˬyehˇ-ahˇpoˆ-eu deuˬpyeuꞈ-awˇ, Yaˬkoˆ-euˬMiˬyehˇjawˇduˬ-ahˇ, ya uˇkeuˆleˇ-eu tsawˇhaˬmeh.

⁷Gʼoˆ kʼehˬ deuˬ-oˇ, pah dzeh taˬ-awˬ. aˇhu-euˬ laˇgʼoˆdeuˬ pah-awˬ. Huiˬ-eu Sahˬpaˬ bi uˇ le law.

⁸Huiˬ-eu Sahˬpaˬ aˬsuˇgʼaˬ-a. Kʼaˆdui dui-awˇ guiˇdeuˆgʼaˬ-euˬ, Baoˬhuiˬ-eu SahˬpaˬMiˬyehˇmeh.

⁹Gʼoˆkʼehˬdeuˬ-oˇ, pah dzeh taˬ-awˬ. aˇhu-euˬ laˇgʼoˆdeuˬ pah-awˬ. Huiˬ-eu Sahˬpaˬ bi uˇ le law.

¹⁰Huiˬ-eu Sahˬpaˬ aˬsuˇ gʼaˬ-a. Dawˬtawˆkʼoeˇtaˆuˆlahˇluꞈ-eu, Baoˬhuiˬ-eu SahˬpaˬMiˬyehˇmeh.