Read Akha Ja ceuˬ 33 Bible Online

Ja ceuˬ 33 - Akha bible

Ja ceuˬ 33

¹Yaw tsaˬyaw dawˇtsawˇhaˬdeuˬ-oˇ, SahˬpaˬMiˬyehˇlaꞈkʼoeˇcehˇ-awˬ. Yawꞈ-euˬdawˬnaˇhaˬ-eu tsawˇhaˬ, yawꞈ-ahˇja ceuˬnehˬ-eu geuˇmeh.

²Deuˇ-mˬdiˬ-awˇja ceuˬnehˬ-awˬ. Tseˇcaˆtsoꞈ-eu deuˇ-mˬ diˬ-awˇ, yawꞈ-euˬguiˬlahˬ-ahˇja ceuˬ-awˬ.

³Caˇdawˬyaw shuiꞈcaˇ-awˇceuˬ-awˬ. Naˇhaˬmuiˬ-eu deuˇ-mˬ diˬ-awˇ, laˬ kʼaˬ cehˇ-eu laꞈ kʼoeˇ guˇ-awˬ.

⁴SahˬpaˬMiˬyehˇ-euˬdawˬtsaˬmeh. Yawꞈneh kʼaˇmˇ-euˬjeˬdawˬtawˆ, saˇjaˇlaꞈkʼoeˇmˇtaˬ-euˬmeh.

⁵Tsaˬ-eu dawˇ-eu sui-eu jeˬ-ahˇ, SahˬpaˬMiˬyehˇnui gaˬ ahˇ-awˇ, maˬtsehˆleˇ-eu yawꞈgaˬ-eu jeˬ, miˇtsaˬkʼoeˇtaˆbyah luꞈ-eu meh.

⁶SahˬpaˬMiˬyehˇdawˬbiꞈnehˬ-awˇ, mˬdawˬtawˆ-ahˇbeh taˬ-euˬmeh. Mˬtaˆ aˬguiˇ ba la nahˇma, aˬyawꞈ-euˬsaꞈneh beh-euˬmeh.

⁷Maˇtsaꞈ-ahˇ kʼaˇahˇ-eu loꞈ-ehˇ, laˆshaˆiˇcuꞈlaˆuiˬjiˇ-awˇ, yaw naꞈ-ahˇpiˬlahˇtaˬ-euˬmeh.

⁸Miˇtsaˬdawˬtawˆyawꞈ-ahˇguˆ-awˇ, miˇtsaˬzaˬdeuˬyawꞈ-ahˇzeu-awˬ.

⁹Yawꞈneh kʼaˇehˇkʼaˇpyeuꞈpyeuꞈ-awˇ, dawˬkʼaˇbiꞈ-euˬkeuˆle-eu meh.

¹⁰Miˇkʼahˬtsawˇjeuˬmehˬbawˬmˇ-euˬ, SahˬpaˬMiˬyehˇlaˆngehꞈnehˬ-awˇ, tsawˇhaˬzaˬneh bawˬtoˆtoˆ-euˬ, aˬyawꞈlaˆcawˆjiˇnehˬ-eu meh.

¹¹SahˬpaˬMiˬyehˇ-euˬbawˬtoˆ-aˬ, mˬmaˬmaˬbyaˆzaˇziˇgmˬ-awˇ, aˬyawꞈneh shaˇnoeˬtaˬ-euˬjeˬ, mˬmaˬmaˬbyaˆzaˇziˇziꞈmeh.

¹²SahˬpaˬMiˬyehˇ-ahˇtsaˬgeuꞈ-awˇ, Miˬyehˇshaˇkuˇleˇ-euˬtsawˇjeuˬ, SahˬpaˬMiˬyehˇneh tseˇdoˆ-awˇ, yawꞈ-euˬzaˬbi geuꞈ-euˬtsawˇjeuˬ, aˇnaˆni guiˬlahˬhuiˬ-eu nga.

¹³SahˬpaˬMiˬyehˇ haw ka leꞈ-awˇ, tsawˇhaˬzaˬ-ahˇ mawˇjiˇluꞈmeh.

¹⁴Mˬtaˆdzoeˬdzaˬnuiˇmahˬ-ahˇneh, miˇtsaˬzaˬ-ahˇ haw luꞈ-eu meh.

¹⁵Nui noeˬdawˬtawˆyawꞈneh beh-awˇ, kʼaˇmˇ-eu jeˬ siˬjiˇluꞈmeh.

¹⁶Sahˬpaˬtiˬgʼaˬ guiˇmaꞈkʼaˆ-awˇ, guiˇdeuˆgʼaˬnya-eu maˬngeuˇ-a. Guiˇdzaˬaˬda gʼaˬkʼaˆshaˇ-awˇ, uˬkʼawˇdzeuˇni maˬmˇnya-a.

¹⁷Guiˇdeuˆdziˬmahˬnya gaˇgʼoe-awˇ, gʼaˬlehˇma lehˇ maˬlmˬnya-a. dziˬmahˬkʼaˆ-eu kawˇ-eu baˬda, yawˬhaˇyawˬha maˬlahˇdzeuˇ-a.

¹⁸SahˬpaˬMiˬyehˇ-euˬmyaˆnuiˆ-aˬ, yawꞈ-ahˇzeu-eu tsawˇhaˬhawˇ-eu, yawꞈgaˬgaˇgʼoe-eu tsawˇhaˬ-ahˇ, maˬtsehˆleˇni haw piˇ-eu meh.

¹⁹Shiˇ-eu laꞈkʼoeˇ ka kʼoꞈnehˬ-awˇ, mehꞈngeh shuꞈngeh maˬbi shiˇ-a.

²⁰Ngehˬgʼeh haw piˇ-eu gʼaˬpyeuꞈ-eu, aˬdui-euˬSahˬpaˬMiˬyehˇ-ahˇ, aˬdui saꞈlaˇnoeˬtmˬ-eu ma.

²¹Yawꞈ-euˬmuiˬ-eu shawˇ-eu tsawˇmyahˇ, aˬdui gʼoe duˬpyeuꞈ-eu miˇneh, aˬyawꞈlaꞈkʼoeˇ laˬkʼaˬcehˇma.

²²Sahˬpaˬ Miˬyehˇ-oˇ, nga maꞈnawˬ-ahˇ noeˬtmˬluꞈngeh, maˬtsehˆleˇ-eu nawˇgaˬ-eu jeˬ, nga maꞈkʼoeˇtaˆbi keuˆle laꞈ.