Read Akha Ja ceuˬ 35 Bible Online

Ja ceuˬ 35 - Akha bible

Ja ceuˬ 35

¹(Daˬbiˇ-euˬ caˇ dawˬ) SahˬpaˬMiˬyehˇ-oˇ, ngaˬ-ahˇmuiˇ-eu deuˬ-ahˇ muiˇ-awˇ, ngaˬ-ahˇdeuˆ-eu deuˬ-ahˇdeuˆ-awˬ.

²Guiˇdeuˆ-eu dehˬdaˬduˬyuˇ-awˇ, keu ka baꞈ-awˇka kʼoꞈle-awˬ.

³Nawˬ-euˬgahˬgʼeu doˆ-awˇoe-awˇ, ngaˬ-ahˇteh-eu deuˬ-ahˇjoeˬ-awˬ. “Nawˬ-ahˇka kʼoꞈle-euˬma” lehˇ, ngaˬ-euˬsaꞈlaˇ-ahˇehˇle-awˬ.

⁴Ngaˬ-euˬuˬkʼawˇpoˆle-euˬdeuˬ, guiˇdeuˆsm-awˇdaˬga luꞈ-uˇ. Ngaˬ-ahˇyaw doeˇjahˇle-euˬdeuˬ, zeuˆpyawˇkʼoꞈ-awˇya shaˬluꞈ-uˇ.

⁵Jaˬlehˇgʼo yoeˬhehˇ-eu loꞈ-ehˇ, mˬtaˆgʼaˬkʼehˇneh teh luꞈ-uˇ.

⁶Mˬtaˆgʼaˬkʼehˇmehˬshi cehˆngeh, gaˇma kahˇli zahˇtsui jaˆ-awˇ, dawˬteˇteˇteˇ-ehˇshaˬluꞈ-uˇ.

⁷Ngaˬneh mˇbahˬ-euˬmaˬjaˆgaˇ, yaw zaꞈ-ahˇbaw gʼaꞈkʼmˇle-awˇ, ngaˇbi ga ahˇ-awˇnyehꞈ-eu lehˇ, yawꞈmaꞈshaˬduˬduˬtaˬ-euˬmeh.

⁸Yawꞈmaꞈmaˬnoeˬmaˬduˇ-euˬgaˇ, luˬ-eu seˇ-eu keuˆle luꞈ-uˇ. Yawˬha neh kʼmˇ-euˬbaw gʼaꞈ-ahˇ, yawꞈhaˇyawˬha coeˬsehꞈluꞈ-uˇ.

⁹Kʼoeˇnaˇ SahˬpaˬMiˬyehˇlaꞈkʼoeˇ, ngaˬ-euˬsaꞈlaˇlaˬkʼaˬcehˇ-awˇ, ka kʼoꞈlaꞈ-euˬgaˇja ceuˬma.

¹⁰Ngaˬ-euˬpuˇnmꞈlaꞈkʼoeˇkeuˆni, SahˬpaˬMiˬyehˇ-ahˇehˇ-eu ma. “Nawˬ-ahˇduˇ-eu aˬsuˇjawˇta. Gʼaˬkʼaˆaˬda laꞈoˆshaˬ-eu, gʼaˬbaˬ-eu deuˬ-ahˇka kʼoꞈ-awˇ, nawˬdzaˬkʼaˆdzaˬgaˇdaˬluꞈ-eu, shaˬzaˬ-ahˇnawˇka kʼoꞈ-eu meh.”

¹¹Haiˬ-eu tsawˇhaˬsaˇkiˇgeuꞈ-awˇ, maˬngeuˇgaˇkeuˆdehˬlehꞈ-eu meh.

¹²Maˬlehˬgaˇyaw lehˬciˬpi-awˇ, kʼahˬnaꞈ-ahˇdehˬahˇlaꞈ-euˬmeh.

¹³Ehˇkʼawꞈ yawꞈmaꞈnaˇngeh gawˇngeh, guˬdaˇpehˇzeuˇ-ahˇngaˇdm-awˇ, maˬdzaˬmaˬdawˇni lah daw-awˇ, awˆbyaˆ-awˇguiˬlahˬshaˇ-euˬma.

¹⁴Aˇdoˆhawˇ-eu cawˬdeuˬshiˇngeh, shaˬzahˬnaꞈ-awˇngoeˇgaˇduˇni, aˬma shiˇ-awˇngoeˇgaˇduˇni, yawꞈmaꞈgʼaˇduˬngaˇngoeˇ-euˬma.

¹⁵Ehˇkʼawꞈngaˇsahˬtiꞈtiꞈngeh nah, yawꞈmaꞈlaˬkʼaˬcehˇ-eu laꞈkʼoeˇ, ngaˬ-euˬtiˬjawˬga bymˇle-awˇ, ngaˬ-ahˇaˬjaꞈjaꞈhaw-eu meh. Maˬsiˬmaˬsuˇ-eu deuˬ oe-awˇ, maˬnaˬleˇni tehˆlaˇ-eu meh.

¹⁶Kuiˇkuˆ-ahˇ naˬgʼa-eu loꞈ-ehˇ, ngaˬ-ahˇ mˇziˇhaw laˇ-eu meh.

¹⁷SahˬpaˬMiˬyehˇ aˇmyah keuˆni, haw haw-ehˇjawˇ-eu lehˇgʼeh te. Aˇlaˬjaˬshiˇkʼoeˇdeuˬkʼaˆgaˇ, ngaˬ-euˬsaꞈlaˇka kʼoꞈnehˬlaꞈ.

¹⁸Tsawˇhaˬuiˬ-eu bymˇ-eu mehˬshi, nawˬ-euˬguiˬlahˬ-ahˇja ceuˬma. Tsawˇhaˬmyaˬdui dui-eu mehˬshi, nawˬ-ahˇngaˇja ceuˬdui dui ma.

¹⁹Ngaˬ-ahˇmuiˇ-eu mehˇshuiˇkʼoeˇdeuˬ ngaˇshaˬgaˇlaˬkʼaˬtaˬbi cehˇ. Diˇdaˬ-ehˇngaˬ-ahˇbye-eu deuˬ, myaˆtehˆtehˆ-awˇtaˬbi uiˇlaꞈ.

²⁰Tsaˬ-eu tsahˇ-eu dawˬmaˬngehˬ-ehˇ, nui ma muiˬ-eu tsawˇhaˬdeuˬ-ahˇ, jaˬmyawꞈmyawꞈ-awˇlaˆshaˬ-eu meh.

²¹Aˬyawꞈmaꞈkʼaˬmeh gʼawˇpaˆ-awˇ, “Nawˇmˇ-eu jeˬ mawˇjiˇmaˬ” lehˇ, ngaˬ-ahˇyaw lehˬpoˆlaˇ-eu meh.

²²Ehˇkʼawꞈ SahˬpaˬMiˬyehˇnawˇ-aˬ, siˬjiˇmawˇjiˇtaˬ-euˬmiˇneh, ciˬcuˇni jawˇbyoˆ-eu laꞈkʼoeˇ, ngaˬ-ahˇbyehˇ-awˇtaˬbi shaˬlaꞈ.

²³SahˬpaˬMiˬyehˇ tsawˬtuˇlaˇ-awˇ, ngaˇtsaˬmeh lehˇdaˇnehˬlaꞈ-awˬ. Ngaˬ-euˬMiˬyehˇnawˇtuˇlaˇ-awˇ, ngaˬ-euˬgaˇkawˆhaw piˇnehˬlaꞈ.

²⁴Tsaˬ-eu dawˇ-eu SahˬpaˬMiˬyehˇ, yawꞈmaꞈlaˬkʼaˬmaˬcehˇnya ni, ngaˬ-ahˇyaˇkʼaˬdaˇnehˬlaꞈ-awˬ.

²⁵“Nui kʼahˇshiˇtaˆni miˇ-a” lehˇ, muiˇ-eu deuˬneh taˬ bi ehˇlaꞈ. “Aˬyawꞈ-ahˇmyoꞈahˇ-euˬma” lehˇ, ngaˬ-ahˇ aˬjaꞈtaˬbi jaꞈlaꞈ.

²⁶Ngaˇshaˬgaˇlaˬkʼaˬcehˇ-eu deuˬ, daˬga-awˇshaˬzahˬnaꞈluꞈ-uˇ. Ngaˬ-ahˇjahˇgʼeh haw-eu kʼoeˇdeuˬ, shaꞈdawˇ-eu jeˬ ya dm luꞈ-uˇ.

²⁷Ngaˇ law-iˇgaˇmawˇmawꞈ-eu deuˬ, laˬkʼaˬcehˇ-eu laꞈkʼoeˇguˇ-awˇ, “SahˬpaˬMiˬyehˇhuiˬdui dui meh. Aˬyawꞈ-euˬzaˬkʼaˆgʼaˬleˇgaˇ, aˬyawꞈnui kʼahˇshiˇ-eu meh” lehˇ, maˬtsehˆleˇni ja ceuˬluꞈ-uˇ.

²⁸Nawˬ-euˬyaw tsaˬyaw dawˇgaˇkawˆ, ngaˬ-euˬmehˬlaˇneh tahˇkʼawˬ-awˇ, nawˬ-ahˇnah ga-ehˇja ceuˬma.