Read Akha Ja ceuˬ 37 Bible Online

Ja ceuˬ 37 - Akha bible

Ja ceuˬ 37

¹(Daˬbiˇ-euˬ caˇ dawˬ) Yaw haiˬdeuˬneh mˇ-euˬgaˇ-ahˇ, nawˬ-euˬnui ma shaˬzahˬtaˬmˇ. Yaw lehˬmˇgaˇnawˇmyaˆtaˬnaˆ.

²Jaˆgaˆloꞈ-ehˇkoˆ-iˇjiˇ-awˇ, yaˆmoꞈloꞈ-ehˇ shiˇjiˇtehꞈ-a.

³SahˬpaˬMiˬyehˇ-ahˇnawˇgʼoe-awˇ, yaw muiˬjeˬ-ahˇmˇ-awˬshaˇ-awˬ. Miˇkʼahˬheu kʼahˬnawˇya jawˇ-awˇ, nui saˇ oꞈ-awˇya dehꞈtehꞈ-a.

⁴SahˬpaˬMiˬyehˇlaꞈkʼoeˇ cehˇ-awˬ. Nawˇkʼaˇmawꞈ-eu yawˬjeˬna luꞈ, aˬyawꞈnawˬ-ahˇbiꞈlaꞈtehꞈ-a.

⁵Nawˬ-euˬdehꞈjeˬdehꞈkawˆdawˬtawˆ, SahˬpaˬMiˬyehˇ-ahˇ a nehˬ-awˬ. Aˬyawꞈ-ahˇgʼoe-awˇdehꞈgʼeh naˇ, aˬyawꞈnawˬ-ahˇngehˬgʼeh tehꞈ-a.

⁶Nawˬ-euˬyaw tsaˬyaw dawˇjeˬ-ahˇ, nah gʼahˇloꞈ-ehˇbi bya tehꞈ-a.

⁷Nawˇnui ma gʼawˬmahˇni taˬ-awˇ, SahˬpaˬMiˬyehˇ-ahˇdawˬtawˬ-awˬ. Aˬcawˬdehꞈdzaˬgaˇtaˬnoeˬshaˬ. Yaw haiˬjeˬmˇgaˇmyaˆtaˬnaˆ.

⁸Nui ma pehˇ-eu jeˬbiˬdzeh-awˇ, nui ma huiˬ-eu jeˬlaˆbyoˆ-awˇ, kʼahˬlahˇ-eu jeˬtaˬpaˇbi ahˇ. Nawˬ-ahˇlaˆshaˬ-eu jeˬtehꞈmeh.

⁹Haiˬ-eu tsawˇhaˬbi teh dzeh kʼawꞈ, SahˬpaˬMiˬyehˇ-ahˇdawˬ-eu deuˬ, miˇkʼahˬza-eu yaw duˬbaw meh.

¹⁰Aˇyamˬtiˬkʼehˇlaˇkʼehˬlaꞈkʼoeˇ, haiˬ-eu tsawˇhaˬbyoˆjiˇtehꞈ-a. aˬyawꞈmaꞈ-ahˇnawˇpoˆdoe kʼawꞈ, iˇzaˇlaˇzaˇ maˬpaˇsiˬmeh.

¹¹Nui nahˬnui yu ahˇ-eu deuˬ-aˬ, miˇkʼahˬjeˬbiˇ oꞈ-eu laꞈkʼoeˇ, baw dui za dui dui le tehꞈ-a.

¹²Tsawˇmuiˬ-ahˇyaw doeˇmˇ-eu lehˇ, yaw haiˬdeuˬseuˬtsehꞈtehˬ-eu meh.

¹³Ehˇkʼawꞈhaiˬ-eu tsawˇhaˬdeuˬ-ahˇ, SahˬpaˬMiˬyehˇuiˇhaw-eu meh. Aˬyawꞈmaꞈcawˆ-iˇ-eu aˇ nah, keuˆle-eu aˬyawꞈsiˬnya meh.

¹⁴Yaw tsaˬyaw dawˇtsawˇhaˬhawˇ-eu, shaˬzaˬzahˬzaˬ-ahˇ sehꞈ-eu lehˇ, yaw haiˬdeuˬ mi cehˇgʼawˇdoˆ-awˇ, kaˆngoꞈdaˆ-awˇ lehˬhmˬ-eu meh.

¹⁵Ehˇkʼawꞈ yawˬha-euˬmi cehˇneh, yawˬha nui ma bi tsawˆpaˆ-awˇ, kaˆmyaˬkʼehꞈjiˇkʼoeˆjiˇtehꞈ-a.

¹⁶Yaw haiˬdeuˬ-euˬpyuˇshuiˇduˬgahˬ, tsawˇmuiˬdeuˬshaˬ-eu maˬtawˬ-a.

¹⁷Yaw haiˬaˬlaꞈkʼehꞈ-iˇtehꞈ-a. Ehˇkʼawꞈtsawˇmuiˬmaˬya shaˬni, SahˬpaˬMiˬyehˇhaw piˇtehꞈ-a.

¹⁸Tsawˇmuiˬ-euˬaˇnah aˇyamˬ-ahˇ, SahˬpaˬMiˬyehˇsiˬnya luꞈ-awˇ, aˬyawꞈmaꞈ-euˬmiˇkʼahˬjeˬbiˇ, mˬmaˬmaˬbyaˆ bi ziꞈtehꞈ-a.

¹⁹Haiˬ-eu aˇnah aˇyamˬ keuˆkʼawꞈ, aˬyawꞈmaꞈ maˬya shaꞈdawˇ-ehˇ, mehꞈ-eu shuꞈ-eu aˇnah oe kʼawꞈ, maˬdzaˬjiˇcoeˇni jaˆtehꞈ-a.

²⁰Ehˇkʼawꞈ haiˬ-eu deuˬya shiˇmeh. SahˬpaˬMiˬyehˇ-ahˇmuiˇ-eu deuˬ, aˇyehˆloꞈ-ehˇya juˬ-iˇ-awˇ, uˬkʼoeˬloꞈ-ehˇya byoˆ-iˇmeh.

²¹Haiˬ-eu deuˬshaˇngaˬshaˇpaˇngeh, biꞈkʼoꞈtsoeˬkʼoꞈ-eu maˬbaw-a. Ehˇkʼawꞈmuiˬ-eu tsawˇhaˬdeuˬ-aˬ, nui ma keuˆ-awˇ biꞈnehˬ-eu meh.

²²SahˬpaˬMiˬyehˇgʼawˬshaˬgaˬ-awˇ, guiˬlahˬbiꞈ-euˬtsawˇhaˬdeuˬ-aˬ, miˇkʼahˬza-awˇya dehꞈtehꞈ-a. SahˬpaˬMiˬyehˇmaˬhaw nahˇ-ehˇ, yaˬkʼehˇyaˬnehˬ-euˬtsawˇhaˬ-aˬ, teh dzeh nehˬgaˇya daˬtehꞈ-a.

²³Tsawˇhaˬzaˬciˬ-eu kuiˇtoꞈ-aˬ, SahˬpaˬMiˬyehˇlaꞈ-ahˇjaˆ-awˇ, aˬyawꞈnui ma tsaˬ-eu gʼaˬ-ahˇ, ziꞈdah ni laˆziꞈnehˬ-eu meh.

²⁴Aˬyawꞈya coˬ-iˇ-eu baw kʼawꞈ, moꞈjaˆ-ehˇmaˬya ga-iˇni, SahˬpaˬMiˬyehˇtsahˇtuˇtehꞈ-a.

²⁵Ngaˬ-euˬtiˬziˇdehꞈmawˬlaꞈ-euˬ, tsawˇmuiˬ-ahˇSahˬpaˬMiˬyehˇneh, byehˇdzeh nehˬ-euˬmaˬya mawˇ-ehˇ, aˬyawꞈmaꞈ-euˬzaˬdeuˬuˆdeuˬ, hawˬshaˇshaˇ-eu maˬmawˇhaw-aˬ.

²⁶Aˬyawꞈ aˬcawˬ-ahˇcaw ba-awˇ, yawꞈngehꞈ-ehˇbiꞈnehˬ-eu miˇneh, zaˬdeuˬkʼoeˇtaˆguiˬlahˬjaˆmeh.

²⁷Yaw haiˬbyehˇ-awˇ yaw muiˬmˇ-awˬ. mˬmaˬmaˬbyaˆzaˇziˇjiˇni, miˇkʼahˬheu kʼahˬnawˬ-ahˇoꞈmeh.

²⁸Yaw tsaˬyaw dawˇjeˬkeuˆle ni, SahˬpaˬMiˬyehˇgaˬ-eu miˇneh, muiˬ-eu shawˇ-eu tsawˇhaˬdeuˬ-ahˇ, aˬyawꞈbyehˇdzeh-eu maˬbaw-ehˇ, mˬmaˬmaˬbyaˆdah teˬ-eu meh. Ehˇkʼawꞈyaw haiˬ-euˬzaˬdeuˬ-ahˇ, teh dzeh nehˬ-awˇbi shaˬtehꞈ-a.

²⁹Tsawˇmuiˬdeuˬ-ahˇmiˇkʼahˬoꞈ-awˇ, mˬmaˬmaˬbyaˆya jawˇtehꞈ-a.

³⁰Tsawˇmuiˬtiˬgʼaˬ-euˬkʼaˬmeh-ahˇ, tsawˇgahˇahˇ-eu dawˬdoˆle-awˇ, mehˬlaˇneh kʼaˇngehˬ-euˬdawˬdeuˬ, tsaˬ-eu dawˇ-eu dawˬ pyeuꞈ-eu meh.

³¹Aˬyawꞈ-euˬMiˬyehˇ-euˬzahˇdawˬ, nui ma laꞈkʼoeˇahˇ-eu miˇneh, kuiˇtoꞈciˬlehˬ-eu maˬbaw-a.

³²Tsawˇmuiˬtiˬgʼaˬ-ahˇsehꞈ-eu lehˇ, haiˬ-eu tsawˇhaˬnawˬjawˬ-eu meh.

³³Ehˇkʼawꞈtsawˇmuiˬkʼoeˇtiˬgʼaˬ-ahˇ, SahˬpaˬMiˬyehˇmaˬbyehˇdzeh-ehˇ, muiˇ-eu deuˬneh maˬbi kʼehˬ-a. Yaˇkʼaˬdaˇ-eu jeˬkeuˆle ngeh, shaˬgaˇzahˬgaˇmaˬbi keuˆ-a.

³⁴SahˬpaˬMiˬyehˇ-ahˇ noeˬtmˬ-awˇ, aˬyawꞈ-euˬ ehˇdawˬnaˇhaˬ-awˬ. Aˬyawꞈnawˬ-ahˇ miˇkʼahˬbiꞈ-awˇ, taˬhuiˬtaˬmahˇnehˬ-eu uˬtaꞈ, haiˬ-eu tsawˇhaˬbi teh dzeh gaˇ, nawˬ-euˬmyaˆnuiˆya mawˇtehꞈ-a.

³⁵Leˬbaˬnoˬgawˬjawˬ-ahˇuˆ-eu, shuˬliˇbawˇma yaw goˇloꞈ-ehˇ, aˬcawˬ-ahˇnawˬdzaˬkʼaˆdzaˬ-eu, yaw haiˬtiˬgʼaˬmawˇhaw-euˬma.

³⁶Ehˇkʼawꞈngaˇtiˬpoˆpaˇle ngeh, aˬyawꞈkʼoeˇgaˇmaˬpaˇjawˇ-a. Aˬyawꞈ-ahˇngaˇpoˆdoe jiˇkʼawꞈ, maˬmawˇlaˇni byoˆtsehˆ-euˬmeh.

³⁷Tsawˇshawˇtiˬgʼaˬ-ahˇnoeˬtaˬ-awˇ, tsawˇmuiˬtiˬgʼaˬ-ahˇhaw taˬ-awˬ. tsaˬleˇdzoeˇleˇ-eu tsawˇhaˬdeuˬ, zaˬoeˬsahˇgaˇya mawˇtehꞈ-a.

³⁸Ehˇkʼawꞈ iˬbaˇ mˇ-eu tsawˇhaˬ, tiˬsaˬtiˬli ya cawˆ-iˇ-awˇ, tsuiꞈdahˬdahˬ-iˇgaˇkeuˆtehꞈ-a.

³⁹Yaw tsaˬyaw dawˇtsawˇhaˬdeuˬ-ahˇ, SahˬpaˬMiˬyehˇ ka kʼoꞈnehˬ-awˇ, shaˬ-eu zahˬ-eu jeˬkeuˆle ngeh, maˬbyehˇdzeh ni haw piˇ-eu meh.

⁴⁰Aˬyawꞈmaꞈ-ahˇngehˬgʼeh nehˬ-awˇ, shaˬzahˬoe ngeh haw teˬ-eu meh. Aˬyawꞈ-ahˇtahˬshaˇ-eu miˇneh, haiˬ-eu deuˬ-euˬaˬlaꞈlaꞈkʼoeˇ, aˬyawꞈka kʼoꞈdoˆnehˬ-eu meh.