Read Akha Ja ceuˬ 40 Bible Online

Ja ceuˬ 40 - Akha bible

Ja ceuˬ 40

¹(Daˬbiˇ-euˬ caˇdawˬ) SahˬpaˬMiˬyehˇ caw ba le gaˇ, ngaˇoˇoˬ-awˇ dawˬluꞈ-eu ma. Aˬyawꞈngaˬ-ahˇhaw cawˬle-awˇ, ngaˬ-euˬngoeˇdawˬya gaˬ-euˬmeh.

²Shaˬzahˬguˆgaˆmyaˬdui dui-eu, lah yaˬlah shiˇkʼahˬnaꞈlaꞈkʼoeˇ, aˬyawꞈngaˬ-ahˇgʼeu doˆle-awˇ, kʼaˬlo kʼoeˇtaˆciˬdaˆlaꞈ-awˇ, ziꞈdah ni bi yawꞈlaꞈ-euˬmeh.

³Yawꞈ-ahˇceuˬ-eu caˇdawˬyaw shuiꞈ, yawꞈngaˬ-ahˇmehˬnehˬlaꞈ-euˬmeh. Ya gaˬya mawˇ-eu tsawˇhaˬdeuˬ, guˆ-eu nui ma ahˇ-eu laꞈkʼoeˇ, SahˬpaˬMiˬyehˇ-ahˇgʼoe tehꞈ-a.

⁴Tahˬpahˬaˬma-ahˇmaˬgʼoe-ehˇ, miˬyehˇnui deuˬ-ahˇmaˬtahˬ-ehˇ, SahˬpaˬMiˬyehˇ-ahˇgʼoe-eu deuˬ, guiˬlahˬhuiˬ-eu tsawˇhaˬdeuˬmeh.

⁵Nga maꞈjah-eu Miˬyehˇpyeuꞈ-eu, nga maꞈ-euˬSahˬpaˬMiˬyehˇ-oˇ, kʼaˆjeˬ-ehˇgʼeh-eu gʼawˬmya jeˬ, nga maꞈgʼaˇduˬnawˇmˇ-euˬmeh. Nawˇloꞈ-ehˇgaˇkawˆkawˆnya-eu, nawˬ-ahˇduˇ-eu gʼaˬmaˬjawˇ-a. Nawˬneh mˇnehˬlaꞈ-euˬgaˇdeuˬ, kʼaˬmeh neh maˬja jiˇcoeˇnya.

⁶Lawˇ-eu shehˇ-eu nawˇmaˬmawꞈ-a. Miˬdzaˬdzah-awˇlawˇ-eu maˬehˇ, iˬbaˇshawˇ-eu lawˇ-eu maˬehˇ, nawˇgeuꞈmawꞈ-eu jeˬmaˬngeuˇ-a. Ehˇkʼawꞈnaˇhaˬgeuꞈ-eu naˬbawˇ, nawˇngaˬ-ahˇbiꞈnehˬlaꞈ-euˬmeh.

⁷Kʼoeˇbaˬda neh ngaˇoˬtoˬ-awˇ, nawˬ-ahˇheu loꞈ-ehˇ ehˇ-eu ma. “Nawˬneh biꞈ-euˬdawˬmehˬdawˬtsoˆ, Zahˇdawˬpaˇyoˆ laꞈkʼoeˇ ahˇma.”

⁸Miˬyehˇnawˬ-euˬnui kʼahˇbyah ni, ngaˇmˇmawꞈ-eu nui ma ahˇma. nawˬneh mehˬ-euˬtsoˆ-euˬdawˬdeuˬ, nui ma laꞈkʼoeˇboꞈtaˬ-euˬma.

⁹SahˬpaˬMiˬyehˇ-oˇ, nawˬ-euˬtsawˇhaˬuiˬle-euˬgaˇ, yaw tsaˬyaw dawˇjeˬmehˬ-eu ma. Ngaˬ-euˬkʼaˬmeh maˬtsoeˬtaˬ-euˬ, nawˇsiˬjiˇmawˇjiˇluꞈ-eu meh.

¹⁰Nawˬ-euˬyaw tsaˬyaw dawˇkʼoeˇ-ahˇ, nui ma laꞈkʼoeˇmaˬzaꞈtaˬ-ehˇ, nawˇsaˇjaˇziꞈ-eu jeˬhawˇ-eu, nawˬ-euˬka kʼoꞈ-eu jeˬgaˇkawˆ, maˬtsehˆleˇni ja mehˬ-eu ma. Nawˬ-euˬgʼoeˇ-eu gaˬ-eu hawˇ-eu, nawˬ-euˬyaw tsaˬyaw dawˇgaˇkawˆ, tsawˇhaˬaˇmaꞈkʼoeˇdeuˬmehˬshi, ngaˬneh laˆzaꞈtaˬ-euˬmaˬjaˆ.

¹¹Sahˬpaˬ Miˬyehˇ-oˇ, nawˬ-euˬgʼawˬshaˬgaˬ-eu guiˬlahˬ, ngaˬ-euˬmehˬshi taˬdehˬkaˬlaꞈ. Nawˬ-euˬgʼoeˇ-eu gaˬ-eu hawˇ-eu, nawˬ-euˬsaˇjaˇziꞈ-eu jeˬneh, ngaˬ-ahˇhaw teˬhaw piˇnehˬlaꞈ.

¹²Maˬehˇjiˇcoeˇ-eu shaˬzahˬdeuˬ, ngaˬ-ahˇjawˬlahˇjiˇtaˬ-euˬmeh. Iˬbaˇneh bi uˆtehˬtaˬ-awˇ, myaˆnuiˆmaˬhaw mawˇnya miˇ-a. Tsehˇkahˇmaˬtseˇiˬbaˇmyaˬ-awˇ, nui ma gʼaˬbaˬdui dui miˇ-a.

¹³SahˬpaˬMiˬyehˇka kʼoꞈnehˬlaꞈ. Yaw kawˇkawˇ-ehˇcaw ba nehˬlaꞈ.

¹⁴Ngaˬ-euˬuˬkʼawˇpoˆ-eu kʼoeˇdeuˬ, daˬya ga-awˇ zahˬleˇluꞈ-uˇ. Ngaˇshaˬgaˇnui kʼahˇshiˇ-eu deuˬ, ya shaꞈdawˇ-awˇzeuˆpyawˇluꞈ-uˇ.

¹⁵Ngaˬ-ahˇcehꞈlehꞈka laˇ-eu deuˬ, yawˬha lawˇbehˇya baꞈluꞈ-uˇ.

¹⁶Ehˇkʼawꞈnawˬ-ahˇpoˆluꞈ-eu deuˬ, laˬkʼaˬcehˇ nui saˇza luꞈ-uˇ. Nawˇka kʼoꞈnehˬ-eu baˬda neh, nawˬ-ahˇguiˬlahˬhuiˬluꞈ-eu deuˬ, “SahˬpaˬMiˬyehˇhuiˬ-eu meh”lehˇ, maˬtsehˆleˇni ja ceuˬluꞈ-uˇ.

¹⁷Ngaˇshaˬdui zahˬdui dui-eu gaˇ, SahˬpaˬMiˬyehˇhaw mawˇluꞈ-uˇ. Ngaˬ-ahˇka kʼoꞈnehˬ-eu yaw sahˇ, ngaˬ-euˬMiˬyehˇnawˇpyeuꞈ-eu ma. Maˬnyi naˬni ngehˬgʼeh nehˬlaꞈ.