Read Akha Ja ceuˬ 45 Bible Online

Ja ceuˬ 45 - Akha bible

Ja ceuˬ 45

¹(Kawˇlaˆ-euˬ aˬli deuˬ-euˬ caˇdawˬ) Sahˬ paˬ gʼaˇ duˬ caˇ dawˬ heu bymˇ ngaˇ yuˇ doˆ ngeh, naˇ haˬ muiˬ-eu dawˬ kawˬ deuˬ ngaˬ-euˬ nui ma laꞈ kʼoeˇ byah luꞈ meh. Sahˬ boꞈ boꞈ nya dui dui-eu gʼaˬ-euˬ sahˬ duˇ loꞈ-ehˇ, ngaˬ-euˬ mehˬ laˇ-ahˇ caˇ dawˬ yoeˇ le luꞈ meh.

²Kʼaˬ dzeˇ zaˬ dawˬ tawˆ luꞈ laꞈ kʼoeˇ, nawˇ aˬ cawˬ naˆ maˬ tseˇ seuˆ jeuꞈ aˇ gʼehˇ muiˬ-eu meh. Nawˇ dawˬ sahˇ dui dui-awˇ, Miˬyehˇ nawˬ-ahˇ aˬ myah luꞈ guiˬ lahˬ biꞈ-eu meh.

³Baoˬ huiˬ-eu sahˬ paˬ-oˇ, nawˬ-euˬ mi cehˇ shaꞈ-awˇ, baoˬ hawˇ-eu yaw shehꞈ kʼahˬ sehˇ-ahˇ dm-awˬ.

⁴Yaw shehꞈ kʼahˬ sehˇ huiˬ-eu laꞈ kʼoeˇ mahˬ-ahˇ dziˬ leˇ-awˇ, guiˇ deuˆ gʼaˬ ngeh keuˆ ni dziˬ-awˬ. Yaw tsaˬ yaw dawˇ jeˬ maˬ bi byoˆ-iˇ-eu gʼaˇ duˬ, nawˬ-euˬ gʼaˬ neh huiˬ-eu guiˇ deuˆ gʼaˬ tehꞈ-a.

⁵Nawˬ-euˬ kaˆ myaˬ taˆ dui dui-awˇ, muiˇ-eu deuˬ-euˬ nui ma-ahˇ beuˆ tsoˆ-eu laꞈ kʼoeˇ, aˬ cawˬ tsawˇ jeuˬ deuˬ nawˬ-euˬ aˬ kuiˇ dawˬ peh ya coˬ lah tehꞈ-a.

⁶Miˬyehˇ neh nawˬ-ahˇ biꞈ-euˬ miˇ kʼahˬ, mˬ maˬ maˬ byaˆ zaˇ ziˇ ziꞈ tehꞈ-a. Yaw tsaˬ yaw dawˇ laꞈ kʼoeˇ nawˬ-euˬ tsawˇ haˬ deuˬ-ahˇ nawˇ uˆ lahˇ-awˇ,

⁷yaw tsaˬ yaw dawˇ jeˬ-ahˇ gaˬ-awˇ, maˬ tsaˬ maˬ dawˇ-eu jeˬ-ahˇ nawˇ bye-eu meh. Kʼoeˇ miˇ neh, nawˬ-euˬ Miˬyehˇ pyeuꞈ-eu Miˬyehˇ, nawˬ-ahˇ tseˇ doˆ-eu laꞈ kʼoeˇ, sahˬ paˬ nui deuˬ-ahˇ naˆ maˬ tseˇ, laˬ kʼaˬ cehˇ nui saˇ za-eu guiˬ lahˬ nawˬ-euˬ kʼoeˇ taˆ shehˆ daˆ-euˬ meh.

⁸Muˇ laˬ hawˇ-eu aˇ jawˬ tsiˇ yaw saw jeˬ, nawˬ-euˬ mehˬ tsoeˬ kʼoeˇ taˆ saw luꞈ-eu meh. Ya ma juiˇ neh laˆ muiˬ taˬ-euˬ sahˬ paˬ-euˬ hawˇ nymˇ laꞈ kʼoeˇ, dawˬ caˇ caˇ-eu deuˬ nawˬ-euˬ mehˬ shi caˇ mehˬ tehꞈ-a.

⁹Nawˬ-euˬ nymˇ laꞈ kʼoeˇ jawˇ luꞈ-eu zaˬ miˬ deuˬ laꞈ kʼoeˇ, sahˬ paˬ zaˬ miˬ deuˬ kʼawꞈ ahˇ-awˇ, muiˬ dui dui-eu shuiˇ myawˬ guˇ deuˬ geuꞈ luꞈ-eu sahˬ paˬ-euˬ miˬ zaˬ gʼaˬ, nawˬ-euˬ nuiˇ mahˬ aˇ maˇ paw yawꞈ luꞈ meh.

¹⁰Sahˬ paˬ-euˬ miˬ shuiꞈ-oˇ, ngaˇ ehˇ gaˇ naˇ haˬ sheˇ. Nawˬ-euˬ aˇ jeuˬ aˇ ca hawˇ-eu aˬ yuiꞈ aˬ nyiˇ deuˬ-ahˇ, nawˇ ya ngehˇ byoˆ jiˇ meh.

¹¹Nawˇ seuˆ jeuꞈ aˇ gʼehˇ muiˬ-eu miˇ neh, sahˬ paˬ nawˬ-ahˇ mawꞈ-eu meh. Aˬ yawꞈ nawˬ-ahˇ uˆ lahˇ-eu gʼaˬ pyeuꞈ-awˇ, aˬ yawꞈ laꞈ oˆ nawˇ ya jawˇ meh.

¹²Duˇlu miˇ kʼahˬ-ahˇ jawˇ-eu tsawˇ haˬ deuˬ nawˬ-ahˇ laꞈ sawˬ yuˇ ha laˇ-awˇ, smˇ muiˬ aˬ da deuˬ nawˬ-ahˇ myaˆ pyawˬ pyuˇ ni leh jeh tehꞈ-a.

¹³Sahˬ paˬ-euˬ miˬ shuiꞈ gʼaˬ sahˬ paˬ-euˬ nymˇ-ahˇ jawˇ luꞈ meh. Aˬ yawꞈ aˇ naˆ ni muiˬ gaˇ haw sheˇ. Aˬ yawꞈ-euˬ pehˇ kʼahˬ pehˇ mahˇ shuiˇ neh zaꞈ taˬ-euˬ meh.

¹⁴Haw muiˬ dui dui-eu paˇ keuˬ ciˬ taˬ-euˬ pehˇ kʼahˬ pehˇ mahˇ aˬ yawꞈ dm-awˇ, aˬ yawꞈ-ahˇ sheuˬ ha-eu miˬ shuiꞈ deuˬ nehˬ-ehˇ tiˬ kawˆ loꞈ-ehˇ, sahˬ paˬ mehˬ shi sheuˬ gʼeh nehˬ-eu meh.

¹⁵Laˬ kʼaˬ cehˇ dui dui-eu laꞈ kʼoeˇ aˬ yawꞈ maꞈ laˇ-awˇ, sahˬ paˬ-euˬ nymˇ-ahˇ uˇ leˇ-eu meh.

¹⁶Ngaˬ-euˬ sahˬ paˬ-oˇ, nawˬ poeˬ nawˬ bawˇ-euˬ nuiˇ mahˬ-ahˇ nuiˇ-awˇ, sahˬ paˬ bi geuꞈ daˆ leꞈ-eu gʼaˇ duˬ, nawˇ aˬ li gʼawˬ mya li jawˇ le-awˇ, aˬ yawꞈ maꞈ-ahˇ miˇ kʼahˬ dawˬ tawˆ luꞈ kʼoeˇ taˆ, nawˇ bi uˆ lahˇ tehꞈ-a.

¹⁷Ngaˬ-euˬ caˇ dawˬ heu baˬ da neh nawˬ-euˬ tsawˇ myahˇ aˬ myah luꞈ kʼawˇ taꞈ kʼawˇ teˇ doˆ-awˇ, tsawˇ haˬ dawˬ tawˆ luꞈ mˬ maˬ maˬ byaˆ zaˇ ziˇ, nawˬ-ahˇ ja ceuˬ tehꞈ-a.