Read Akha Ja ceuˬ 47 Bible Online

Ja ceuˬ 47 - Akha bible

Ja ceuˬ 47

¹(Kawˇlaˆ-euˬ aˬ li deuˬ-euˬ caˇ dawˬ) Tsawˇ jeuˬ dawˬ tawˆ luꞈ laˬ kʼaˬ cehˇ-eu laꞈ kʼoeˇ laꞈ kʼawˆ tehˆ-awˬ. Yaw kʼaˆ-ehˇ guˇ-eu laꞈ kʼoeˇ caˇ dawˬ caˇ-awˇ, Miˬyehˇ-ahˇ ja ceuˬ-awˬ.

²Huiˬ dui mahˇ dui dui-eu gʼaˬ pyeuꞈ-eu Sahˬpaˬ Miˬyehˇ-aˬ, guˆ paˬ-ehˇ gʼeh-eu tiˬ gʼaˬ meh. Aˬ yawꞈ-aˬ, miˇ kʼahˬ dawˬ tawˆ luꞈ kʼoeˇ taˆ uˆ lahˇ-eu huiˬ-eu sahˬ paˬ meh.

³Aˬ yawꞈ neh aˬ dui-ahˇ tsawˇ haˬ dawˬ tawˆ luꞈ kʼoeˇ taˆ bi gʼaˬ leˇ nehˬ laꞈ-awˇ, tsawˇ jeuˬ dawˬ tawˆ luꞈ kʼoeˇ taˆ bi uˆ lahˇ laꞈ-euˬ meh.

⁴Aˬ yawꞈ gaˬ-eu tsawˇ haˬ deuˬ nui kʼahˇ shiˇ dui dui-eu miˇ kʼahˬ pyeuꞈ-eu, aˬ yawꞈ jawˇ-eu miˇ kʼahˬ kʼoeˇ kʼahˬ-ahˇ, aˬ dui gʼaˇ duˬ aˬ yawꞈ tseˇ doˆ nehˬ laꞈ-euˬ meh.

⁵Miˬyehˇ aˬ yawꞈ-euˬ nuiˇ mahˬ-ahˇ gʼoꞈ daˆ leˇ-eu meh. Sahˬpaˬ Miˬyehˇ gʼoꞈ daˆ leˇ-eu nehˬ-ehˇ, laˬ kʼaˬ cehˇ-awˇ guˇ-eu teˇ saˇ hawˇ-eu, daˇ heh baw-eu teˇ saˇ mahˇ laˇ-eu meh.

⁶Miˬyehˇ-ahˇ caˇ-awˇ ja ceuˬ-awˬ. Aˬ dui-euˬ sahˬ paˬ-ahˇ caˇ-awˇ ja ceuˬ-awˬ.

⁷Miˬyehˇ-aˬ, miˇ kʼahˬ dawˬ tawˆ luꞈ kʼoeˇ taˆ uˆ lahˇ-eu sahˬ paˬ meh. Caˇ dawˬ caˇ-awˇ aˬ yawꞈ-ahˇ ja ceuˬ-awˬ.

⁸Miˬyehˇ-aˬ, aˬ yawꞈ-euˬ muiˬ-eu shawˇ-eu nuiˇ mahˬ kʼoeˇ taˆ nuiˇ-awˇ, tsawˇ jeuˬ dawˬ tawˆ luꞈ kʼoeˇ taˆ uˆ lahˇ-eu meh.

⁹Aˬbyaˬhaˬ-euˬ Miˬyehˇ-euˬ tsawˇ haˬ deuˬ nehˬ-ehˇ, tsawˇ jeuˬ kʼoeˇ taˆ uˆ lahˇ-eu deuˬ uiˬ laˇ-eu meh. Miˇ tsaˬ guiˇ maꞈ dawˬ tawˆ luꞈ naˆ maˬ tseˇ, aˬ yawꞈ baoˬ jaˆ dzehˬ-awˇ, huiˬ dui dui-eu uˆ lahˇ-eu gʼaˬ pyeuꞈ-eu meh.