Read Akha Ja ceuˬ 49 Bible Online

Ja ceuˬ 49 - Akha bible

Ja ceuˬ 49

¹(Kawˇlaˆ-euˬ aˬ li deuˬ-euˬ caˇ dawˬ) Tsawˇ haˬ dawˬ tawˆ luꞈ naˇ haˬ sheˇ. Miˇ tsaˬ zaˬ dawˬ tawˆ luꞈ naˬ bawˇ ciˬ kʼmˇ sheˇ.

²Zaˬ huiˬ zaˬ nyiˇ maˬ tseˇ paˆ ni, smˇ muiˬ zaˬ tsoeˬ maˬ tseˇ paˆ ni, dawˬ tawˆ luꞈ naˇ haˬ sheˇ.

³Ngaˬ-euˬ nui noeˬ ciˇ tahˬ naꞈ-awˇ, nui gahˇ byah-eu dawˬ ngaˇ ngehˬ ma.

⁴Tsawˇ mawˬ dawˬ daˬ-ahˇ ngaˇ shaˇ noeˬ-awˇ, deuˇ-mˬ diˬ-awˇ dawˬ tsuiꞈ yuˇ doˆ ma.

⁵Guˆ-eu gaˆ-eu jeˬ keuˆ le ngeh ngaˇ maˬ guˆ. Ngaˬ-ahˇ jawˬ lahˇ laˇ-eu muiˇ-eu deuˬ pyeuꞈ-eu,

⁶pyuˇ shuiˇ myawˬ gahˬ-ahˇ gʼoe-eu tsawˇ haˬ deuˬ, smˇ muiˬ muiˬ gaˇ kʼahˬ sehˇ jehˆ-eu tsawˇ haˬ deuˬ, haiˬ-eu tsawˇ haˬ kʼoeˇ deuˬ-ahˇ ngaˇ maˬ guˆ.

⁷Tsawˇ haˬ tiˬ gʼaˬ-iˬ yawˬ haˇ yawˬ ha maˬ ka kʼoꞈ nya-a. Aˬ yawꞈ-euˬ saꞈ laˇ aˇ poeˬ Miˬyehˇ-ahˇ maˬ biꞈ tsehˆ nya-a.

⁸Tsawˇ haˬ-euˬ saꞈ laˇ aˇ poeˬ kʼaˆ dui dui-eu miˇ neh, aˬ yawꞈ maˬ zeuˇ tsehˆ coeˇ-a.

⁹Lmˬ bymˇ-ahˇ maˬ ya uˇ-iˇ ni mˬ maˬ maˬ byaˆ zaˇ ziˇ ya dehꞈ-eu gʼaˇ duˬ, yawˬ haˇ yawˬ ha maˬ zeuˇ tsehˆ nya-a.

¹⁰Aˬ dzawˬ aˇ gah deuˬ ziˇ dehꞈ jiˇ-eu loꞈ-ehˇ, tsawˇ gahˇ ahˇ-eu deuˬ kʼawꞈ ziˇ jiˇ luꞈ gaˇ, yawˬ gʼaˬ na luꞈ ya mawˇ luꞈ meh. Yawˬ gʼaˬ na luꞈ yawˬ ha-eu pyuˇ shuiˇ myawˬ gahˬ-ahˇ, nahˬ zaˬ laꞈ-ahˇ ya taˬ nehˬ yaꞈ-eu meh.

¹¹Aˬ yawꞈ maꞈ deh ma baw-awˇ dehꞈ yaꞈ-euˬ kʼawꞈ, lmˬ bymˇ aˬ yawꞈ maꞈ-euˬ nymˇ pyeuꞈ-awˇ, mˬ maˬ maˬ byaˆ zaˇ ziˇ kʼoeˇ gaˇ ya jawˇ-eu meh.

¹²Tsawˇ haˬ zaˬ-euˬ huiˬ-eu mahˇ-eu jeˬ, shiˇ gaˇ maˬ ka kʼoꞈ nehˬ nya-ehˇ, bawˇ tsahˬ jeˬ zaˬ loꞈ-ehˇ ya shiˇ tehꞈ-a.

¹³Yawˬ haˇ yawˬ ha nui kʼaˬ tsmˬ-eu tsawˇ haˬ deuˬ, aˬ joˆ-ehˇ pyeuꞈ laˇ nga lehˇ haw sheˇ. Pyuˇ shuiˇ myawˬ gahˬ-ahˇ nui ma huiˬ-eu deuˬ kʼoeˇ taˆ, aˬ jeˬ keuˆ le nga lehˇ haw sheˇ.

¹⁴Yawˇ loꞈ-ehˇ aˬ yawꞈ maꞈ ya shiˇ cawˆ-awˇ, shiˇ-eu jeˬ aˬ yawꞈ maꞈ-ahˇ bo tehꞈ-a. Gaˇ mahˇ kaˬ-eu shiˇ-eu miˇ kʼahˬ-ahˇ, aˬ yawꞈ maꞈ buꞈ-iˇ shoˆ-iˇ ngeh, yaw tsaˬ yaw dawˇ tsawˇ haˬ deuˬ aˬ yawꞈ maꞈ-ahˇ gʼaˬ leˇ tehꞈ-a.

¹⁵Ehˇ kʼawꞈ Miˬyehˇ ngaˬ-ahˇ ka kʼoꞈ le-awˇ, shiˇ-eu jeˬ-euˬ baoˬ laꞈ kʼoeˇ, ngaˬ-ahˇ bi dzeuˇ-iˇ laꞈ tehꞈ-a.

¹⁶Tsawˇ haˬ tiˬ gʼaˬ smˇ muiˬ muiˬ laˇ luꞈ-awˇ, pyuˇ shuiˇ myawˬ gahˬ myaˬ laˇ gaˇ ya mawˇ ngeh nui ma taˬ cawˆ.

¹⁷Aˬ yawꞈ shiˇ ngeh kʼoeˇ deuˬ maˬ yuˇ kʼoꞈ gʼeh nya-a. Lmˬ bymˇ laꞈ kʼoeˇ aˬ yawꞈ nehˬ-ehˇ maˬ hehˇ ahˇ gʼeh nya-a.

¹⁸Tsawˇ haˬ tiˬ gʼaˬ heu ziˇ laꞈ kʼoeˇ nui kʼahˇ shiˇ duˬ byah-awˇ, dehꞈ bym nya-eu miˇ neh aˬ cawˬ ja ceuˬ nehˬ kʼawꞈ,

¹⁹yaw shehꞈ-ahˇ tiˬ jawˇ-iˬ maˬ ya mawˇ-eu miˇ kʼahˬ-ahˇ, shiˇ dzeuˇ-euˬ deuˬ jawˇ gaˇ aˬ yawꞈ ya iˇ byoˆ meh.

²⁰Tsawˇ haˬ zaˬ huiˬ-eu mahˇ-eu jeˬ shiˇ gaˇ maˬ ka kʼoꞈ nehˬ nya-ehˇ, bawˇ tsahˬ jeˬ zaˬ loꞈ-ehˇ ya shiˇ tehꞈ-a.