Read Akha Ja ceuˬ 50 Bible Online

Ja ceuˬ 50 - Akha bible

Ja ceuˬ 50

¹(Aˬsaˆ-euˬ caˇ dawˬ) Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ dawˬ ngehˬ-awˇ, mˬ dzeˇ miˇ dzeˇ keuˆ ni keuˆ-eu meh.

²Haw muiˬ dui dui-eu Ziˇoˬ meuˬ-ahˇ neh, Miˬyehˇ-euˬ yaw shehꞈ bya doˆ laˇ-eu meh.

³Aˬ dui-euˬ Miˬyehˇ oe luꞈ meh. Ciˬ cuˇ ni aˬ yawꞈ maˬ oe-a. Nyehˆ dui dui-eu miˬ dzaˬ jehˆ bymˇ aˬ yawꞈ mehˬ shi oe-awˇ, mˬ jeˬ jaˬ lehˇ gʼahˇ ceh aˬ yawꞈ oe luꞈ-eu meh.

⁴Aˬ yawꞈ-euˬ tsawˇ haˬ deuˬ-ahˇ aˬ yawꞈ yaˇ kʼaˬ daˇ gaˇ, mˬ hawˇ-eu miˇ-ahˇ saˇ kiˇ bi geuꞈ-euˬ meh.

⁵Lawˇ-eu shehˇ-eu laꞈ kʼoeˇ ngaˬ nehˬ-ehˇ dawˬ ma saˇ jaˇ dzaˬ taꞈ-euˬ, ngaˬ-ahˇ saˇ jaˇ ziꞈ-eu ngaˬ-euˬ tsawˇ haˬ deuˬ ngaˇ jawˇ gaˇ uiˬ laˇ-awˬ lehˇ aˬ yawꞈ ehˇ-eu meh.

⁶Miˬyehˇ tsaˬ-eu dawˇ-eu gaˇ kawˆ hawˇ-eu, yaˇ kʼaˬ daˇ-eu gʼaˬ pyeuꞈ-eu gaˇ kawˆ, mˬ saˇ kiˇ kamˬ luꞈ-eu meh.

⁷“Ngaˬ-euˬ tsawˇ haˬ deuˬ-oˇ, ngaˇ dawˬ ngehˬ gaˇ naˇ haˬ-awˬ. Iˇsaˬleˬlaˆ-oˇ, nawˬ-euˬ gaˇ kawˆ ngaˇ heu loꞈ-ehˇ saˇ kiˇ kamˬ ma. Ngaˇ-aˬ, naw maꞈ-euˬ Miˬyehˇ pyeuꞈ-eu Miˬyehˇ ma.

⁸Naw maꞈ ngaˬ-ahˇ lawˇ-eu shehˇ-eu jeˬ mˇ-awˇ, miˬ dzaˬ dzah puiˆ-awˇ lawˇ-eu jeˬ aˬ myah luꞈ lawˇ luꞈ-eu miˇ neh, naw maꞈ-ahˇ iˬ baˇ maˬ taˬ.

⁹Ehˇ kʼawꞈ, nawˬ-euˬ mawˇ neˇ mawˇ kuˆ-ahˇ uˇ-eu mawˇ neˇ ngaˇ maˬ loˬ. Nawˬ-euˬ ciꞈ myehꞈ ciꞈ maꞈ laꞈ kʼoeˇ uˇ-eu ciꞈ myehꞈ ngaˇ maˬ loˬ.

¹⁰Sahˬ kʼaˆ doe ni jawˇ-eu bawˇ tsahˬ jeˬ zaˬ deuˬ hawˇ-eu, gawˬ jawˬ tiˬ tahˇ tiˬ yaˇ-ahˇ gaˆ luꞈ-eu jeˬ zaˬ deuˬ, dawˬ tawˆ luꞈ ngaˬ-euˬ ma.

¹¹Bawˇ tsahˬ aˇ jiˇ dawˬ tawˆ luꞈ hawˇ-eu, deh ga-ahˇ kʼaˇ jawˇ-eu jeˬ dawˬ tawˆ luꞈ ngaˬ-euˬ ma.

¹²“Ngaˇ hawˬ mehꞈ mehꞈ laˇ kʼawꞈ naw maꞈ-ahˇ maˬ ehˇ nehˬ. Aˬ jeˬ miˇ neh ehˇ naˇ, miˇ tsaˬ tahˬ kʼawˇ hawˇ-eu kʼoeˇ-euˬ kʼoeˇ taˆ kʼaˇ jaˆ-eu jeˬ dawˬ tawˆ luꞈ ngaˬ-euˬ ma.

¹³Ngaˇ mawˇ neˇ shaˬ jiˇ dzaˬ ta loˇ. Ciꞈ myehꞈ-euˬ shiˬ ngaˇ dawˇ ta loˇ.

¹⁴Guiˬ lahˬ-ahˇ noeˬ keuˆ-eu jeˬ naw maꞈ neh Miˬyehˇ-ahˇ lawˇ nehˬ-euˬ jeˬ bi pyeuꞈ-awˇ, naw maꞈ neh saˇ jaˇ kʼaˇ dzaˬ taˬ-euˬ loꞈ-ehˇ, Baoˬ huiˬ-eu gʼaˬ-ahˇ biꞈ-awˬ.

¹⁵Shaˬ-eu zahˬ-eu jeˬ keuˆ le ngeh ngaˬ-ahˇ kuˇ-awˬ. Ngaˇ naw maꞈ-ahˇ ka kʼoꞈ nehˬ-awˇ, naw maꞈ ngaˬ-ahˇ ja ceuˬ tehꞈ-a.”

¹⁶Ehˇ kʼawꞈ, haiˬ-eu tsawˇ haˬ deuˬ-ahˇ Miˬyehˇ heu loꞈ-ehˇ ehˇ-eu meh. “Aˬ jeˬ miˇ neh ngaˬ-euˬ zahˇ dawˬ kʼoꞈ dawˬ-ahˇ naw maꞈ ya juiˇ gui ta. Aˬ jeˬ miˇ neh ngaˬ-euˬ dawˬ ma saˇ jaˇ gaˇ kawˆ naw maꞈ ya ja sawˇ ta.

¹⁷Ngaˬ neh mehˬ nehˬ tsoˆ nehˬ-euˬ jeˬ-ahˇ naw maꞈ maˬ naˇ haˬ geuꞈ-ehˇ, ngaˬ-euˬ zahˇ sahˇ kʼoꞈ-ahˇ naw maꞈ bye-eu meh.

¹⁸Smˇ kʼoeˬ kʼaˇ tahˬ puˬ le gaˇ naw maꞈ cawˬ cawˬ taꞈ-awˇ, aˬ cawˬ-euˬ miˬ zaˬ yo zaˬ-ahˇ bahˬ-eu deuˬ nehˬ-ehˇ, naw maꞈ mehˬ bawˬ gm-eu meh.

¹⁹“Naw maꞈ dawˬ yaw haiˬ kʼaˇ ngehˬ mawꞈ-eu ngehˬ-awˇ, jaˬ myawꞈ myawꞈ-eu gʼaˇ duˬ mehˬ laˇ yaw pyaˇ meh.

²⁰Yawˬ ha mehˇ nmˇ tsi tsi ni gʼeh gaˇ dawˬ doeˇ ngehˬ-awˇ, yaw lehˬ jeˬ kʼeuꞈ doˆ nehˬ-eu meh.

²¹Naw maꞈ kʼoeˇ loꞈ-ehˇ dehꞈ doeˇ kʼawꞈ ngaˇ dawˬ maˬ tmˇ-eu miˇ neh, ngaˇ naw maꞈ-ahˇ nui kʼahˇ shiˇ meh lehˇ naw maꞈ noeˬ luꞈ meh. Ehˇ kʼawꞈ naw maꞈ maˬ muiˬ-eu gaˇ kawˆ ngaˇ ja doˆ-awˇ, naw maꞈ-euˬ yaw lehˬ bya cehˆ ni bi doˆ laˇ ma.

²²“Miˬyehˇ-ahˇ maˬ taˬ huiˬ-eu tsawˇ haˬ deuˬ-oˇ, gaˇ kawˆ heu naˇ haˬ-awˇ nui ma laꞈ kʼoeˇ juiˇ taˬ-awˬ. Maˬ ngeuˇ naˇ, ngaˬ neh laˆ cawˆ nehˬ-euˬ jeˬ-ahˇ naw maꞈ ya daˬ-awˇ, ka kʼoꞈ nehˬ-eu gʼaˬ maˬ jawˇ ni ya shaˬ tehꞈ-a.

²³Guiˬ lahˬ noeˬ keuˆ-awˇ, ja ceuˬ-eu jeˬ-aˬ, ngaˬ-ahˇ taˬ huiˬ-eu lawˇ-eu jeˬ pyeuꞈ-eu meh. Ngaˬ-euˬ ehˇ dawˬ kʼaˇ naˇ haˬ geuꞈ-eu deuˬ-ahˇ, ngaˇ aˬ diˇ ka kʼoꞈ nehˬ ma.”