Read Akha Ja ceuˬ 53 Bible Online

Ja ceuˬ 53 - Akha bible

Ja ceuˬ 53

¹(Daˬbiˇ-euˬ caˇ dawˬ) Aˬ dzawˬ deuˬ-euˬ nui ma laꞈ kʼoeˇ, “Miˬyehˇ maˬ jawˇ-a” lehˇ ehˇ luꞈ meh. Aˬ yawꞈ maꞈ dehꞈ bahˬ jiˇ-awˇ, guˆ dui dui paˬ-ehˇ gʼeh-eu jeˬ mˇ luꞈ meh. Yaw tsaˬ yaw dawˇ jeˬ mˇ-eu tiˬ gʼaˬ-iˬ maˬ jawˇ-a.

²Tsawˇ gahˇ ahˇ-awˇ aˬ yawꞈ-ahˇ uˬ duˬ tahˬ-eu tsawˇ haˬ jawˇ ngaˇ loˇ lehˇ, mˬ taˆ Miˬyehˇ miˇ tsaˬ zaˬ-ahˇ haw luꞈ meh.

³Aˬ yawꞈ maꞈ dawˬ tawˆ luꞈ gaˇ mahˇ dehꞈ kaˬ-awˇ, tiˬ kawˆ loꞈ-ehˇ dehꞈ doeˇ taˬ-euˬ meh. Yaw tsaˬ yaw dawˇ jeˬ mˇ-eu tsawˇ haˬ maˬ jawˇ-a. Tiˬ gʼaˬ-iˬ maˬ jawˇ-a.

⁴Ngaˬ-euˬ tsawˇ haˬ deuˬ-ahˇ deh dzaˬ nawˬ dzaˬ-awˇ, ngaˬ-ahˇ guiˬ lahˬ maˬ shaˇ ni dehꞈ luꞈ-eu, haiˬ-eu tsawˇ haˬ teu deuˬ noeˬ siˬ noeˬ mawˇ nya-eu nui ma maˬ ahˇ ta loˇ lehˇ, Miˬyehˇ naˇ haˬ luꞈ meh.

⁵Aˬ yawꞈ-euˬ tsawˇ haˬ-ahˇ muiˇ-eu deuˬ-euˬ shaˬ yoeˬ-ahˇ, Miˬyehˇ ngawˬ kʼehꞈ ngawˬ kʼoeˆ-awˇ byaˆ dzeh ngeh, tiˬ jawˇ-iˬ maˬ puˬ maˬ mawˇ haw-euˬ guˆ-eu gaˆ-eu jeˬ, aˬ yawꞈ maꞈ tahˬ puˬ-awˇ laˇ baˇ-iˇ tehꞈ-a. Aˬ yawꞈ maꞈ-ahˇ Miˬyehˇ byehˇ dzeh nehˬ-euˬ miˇ neh Iˇsaˬleˬlaˆ tsawˇ jeuˬ aˬ yawꞈ maꞈ-ahˇ nui kʼahˇ tiˬ shiˇ gʼaˬ leˇ tehꞈ-a.

⁶Iˇsaˬleˬlaˆ tsawˇ jeuˬ aˬ cawˬ-ahˇ gʼaˬ leˇ-eu jeˬ, Ziˇoˬ gawˬ jawˬ-ahˇ neh doˆ le tehꞈ-a. Iˇsaˬleˬlaˆ tsawˇ jeuˬ-ahˇ caw ba-awˇ, baw le za le-awˇ baoˬ ahˇ laˇ ngeh, aˇ naˆ ni laˬ kʼaˬ cehˇ paˬ-ehˇ gʼeh-eu nga.