Read Akha Ja ceuˬ 58 Bible Online

Ja ceuˬ 58 - Akha bible

Ja ceuˬ 58

¹(Daˬbiˇ-euˬ caˇ dawˬ) Naw maꞈ miˇ kʼahˬ-ahˇ uˆ lahˇ-eu tsawˇ haˬ deuˬ dawˇ coe ni ngehˬ tsehˆ ehˇ tsehˆ luꞈ ma loˇ. Tsawˇ haˬ dawˬ tawˆ luꞈ-ahˇ dawˇ coe ni yaˇ kʼaˬ daˇ nehˬ luꞈ ma loˇ.

²Maˬ ngeuˇ-a. Yaw haiˬ jeˬ mˇ-eu gʼaˇ duˬ tehꞈ-ehˇ naw maꞈ shaˇ noeˬ luꞈ-awˇ, yaw haiˬ jeˬ hawˇ-eu yaw lehˬ jeˬ tehꞈ-ehˇ miˇ tsaˬ kʼoeˇ taˆ naw maꞈ mˇ luꞈ meh.

³Haiˬ-eu tsawˇ haˬ ziˇ jiˇ ngeh keuˆ ni lehˬ-awˇ, dehꞈ le ngeh nah neh jaˬ myawꞈ myawꞈ-eu meh.

⁴Aˬ yawꞈ maꞈ aˇ lawˇ loꞈ-ehˇ doꞈ ahˇ-awˇ, aˇ lawˇ uiˇ naˆ naˬ bawˬ loꞈ-ehˇ, naˬ bawˇ paꞈ tsoeˬ tsoeˬ taˬ-euˬ meh.

⁵Aˇ lawˇ-ahˇ kuˇ nya-eu deuˬ-euˬ teˇ saˇ hawˇ-eu mah loˬ nya-eu deuˬ-euˬ dawˬ-ahˇ maˬ gaˬ nya-eu aˇ lawˇ uiˇ naˆ loꞈ-ehˇ, aˬ yawꞈ maꞈ naˬ bawˇ tsoeˬ leˇ taˬ-euˬ meh.

⁶Miˬyehˇ-oˇ, guˆ laˇ paˬ-ehˇ gʼeh-eu aˇ laˬ jaˬ shiˇ heu deuˬ-euˬ juiˇ ngawˬ kʼehꞈ nehˬ-awˬ.

⁷Iˇ cuꞈ dzeˇ byoˆ-eu loꞈ-ehˇ aˬ yawꞈ maꞈ byoˆ-iˇ luꞈ-uˇ. Gaˇ ma-ahˇ dehꞈ-eu yaˇ moꞈ loꞈ-ehˇ, aˬ cawˬ neh bi nawˬ pyehˆ luꞈ-uˇ.

⁸Guiˇ byoˆ jiˇ-euˬ aˬ nyoˆ loꞈ-ehˇ pyeuꞈ-iˇ luꞈ-uˇ. Yaw shiˇ-ehˇ dehꞈ doˆ le-awˇ, yaw shehꞈ-ahˇ maˬ ya mawˇ-euˬ zaˬ nahˬ-ahˇ duˇ luꞈ-uˇ.

⁹Aˬ yawꞈ maꞈ-ahˇ maˬ siˬ leˇ mi naˆ-ehˇ, yaˇ moꞈ loꞈ-ehˇ bi myaˬ dzeh jiˇ tehꞈ-a. Miˬyehˇ nui ma pehˇ-eu laꞈ kʼoeˇ, aˬ yawꞈ maꞈ yaw dehꞈ-ehˇ jawˇ gaˇ myaˬ dzeh nehˬ tehꞈ-a.

¹⁰Haiˬ-eu tsawˇ haˬ deuˬ-ahˇ kʼehˬ nehˬ kʼaˆ nehˬ gaˇ ya mawˇ ngeh, yaw tsaˬ yaw dawˇ tsawˇ haˬ laˬ kʼaˬ cehˇ-awˇ, haiˬ-eu tsawˇ haˬ deuˬ-euˬ shiˬ laꞈ kʼoeˇ, aˬ kuiˇ tsawˬ puꞈ-awˇ cah tehꞈ-a.

¹¹Kʼoeˇ ngeh, tsawˇ haˬ zaˬ deuˬ heu loꞈ-ehˇ ehˇ tehꞈ-a. “Yaw tsaˬ yaw dawˇ tsawˇ haˬ deuˬ aˬ diˇ aˬ maˇ laꞈ sawˬ za-eu ngaˇ. Miˇ tsaˬ-ahˇ yaˇ kʼaˬ daˇ-eu Miˬyehˇ aˬ diˇ jawˇ law hawˇ nga.”