Read Akha Ja ceuˬ 60 Bible Online

Ja ceuˬ 60 - Akha bible

Ja ceuˬ 60

¹(Daˬbiˇ-euˬ caˇ dawˬ) Miˬyehˇ-oˇ, nawˇ nga maꞈ-ahˇ byehˇ dzeh-awˇ, nga maꞈ-euˬ taˆ bi byaˆ-iˇ-euˬ meh. Nawˇ nga maꞈ-ahˇ nui ma pehˇ-eu meh. Ehˇ kʼawꞈ nymˬ-mˇ nga maꞈ-ahˇ haw cawˬ nehˬ laꞈ-awˬ.

²Miˇ kʼahˬ luˆ laˇ nyeh laˇ ni nawˇ jahˇ-awˇ, miˇ tsaˬ bi tsawˬ paˆ jiˇ-euˬ meh. Miˇ kʼahˬ byaˆ-iˇ luꞈ-eu miˇ neh, nymˬ-mˇ paˇ laˆ muiˬ kʼoꞈ-awˬ.

³Nawˬ-euˬ tsawˇ haˬ deuˬ ya shaˬ ya zahˬ dui dui ni, nawˇ jahˇ nehˬ laꞈ-euˬ meh. Jiˇ baˬ dawˇ yehꞈ-awˇ shaˬ-eu loꞈ-ehˇ, nga maꞈ coˬ coˬ-ehˇ cah-eu ma.

⁴Yaˬ kʼehˇ yaˬ nehˬ-eu jeˬ-ahˇ ya buˬ ya law-iˇ ni, nawˬ-ahˇ guˆ-eu tsawˇ haˬ deuˬ-ahˇ nawˇ ehˇ kʼmˬ taˬ-euˬ meh.

⁵Nawˇ gaˬ-eu tsawˇ haˬ deuˬ ya buˬ ya law-iˇ ni, nga maꞈ-euˬ shaˇ dawˬ naˇ haˬ nehˬ laꞈ-awˇ nawˬ-euˬ baoˬ neh nga maꞈ-ahˇ ka kʼoꞈ nehˬ laꞈ.

⁶Aˬ yawꞈ-euˬ muiˬ-eu shawˇ-eu jawˇ duˬ-ahˇ jawˇ-awˇ, Miˬyehˇ heu loꞈ-ehˇ ehˇ-eu meh. “Sheˬkmˬ meuˬ-ahˇ ngaˇ nui kʼahˇ tiˬ shiˇ deuˆ biˇ-awˇ, ngaˬ-euˬ tsawˇ haˬ deuˬ-ahˇ Suˇkoˆ deh ga biˇ nehˬ ma.

⁷Giˇlaˆ miˇ kʼahˬ ngaˬ-euˬ ma. Maˬnaˇseˬ miˇ kʼahˬ kʼawꞈ ngaˬ-euˬ ma. Eˇpaˬleˬ miˇ kʼahˬ ngaˬ-euˬ guiˇ deuˆ uˬ kʼoˆ pyeuꞈ-awˇ, Yuˇdaˆ miˇ kʼahˬ ngaˇ tuˆ tehˬ luꞈ-eu dzoeˬ dzaˬ gawˬ yoeˬ ma.

⁸Ehˇ kʼawꞈ, Mawˇbaˆ miˇ kʼahˬ-aˬ, ngaˇ iˇ cuꞈ dzuiꞈ-eu shehˇ byehˇ geuꞈ ma. Eˬdoˬ miˇ kʼahˬ-ahˇ ngaˬ-euˬ sehˬ nawˆ dzeh taˬ-awˇ, ngaˬ-euˬ miˇ kʼahˬ pyeuꞈ-eu gaˇ kawˆ tsaˬ tsoˆ nehˬ ma. Piˇliˇtiˆ miˇ kʼahˬ kʼoeˇ taˆ, ngaˇ gʼaˬ leˇ-eu gʼaˬ pyeuꞈ-eu gaˇ kawˆ kʼaˬ duˬ ni guˇ ma.”

⁹Miˬyehˇ-oˇ, ziꞈ dah ni gawˬ ziꞈ taˬ-euˬ meuˬ-ahˇ aˬ suˇ gʼaˬ ngaˬ-ahˇ sheuˬ gʼeh nehˬ laꞈ nmˇ. Eˬdoˬ miˇ kʼahˬ-ahˇ aˬ suˇ gʼaˬ ngaˬ-ahˇ sheuˬ gʼeh nmˇ.

¹⁰Nawˇ nga maꞈ-ahˇ aˬ diˇ aˬ maˇ byehˇ dzeh-euˬ ma loˇ. Nga maꞈ-euˬ guiˇ maꞈ nehˬ-ehˇ guiˇ deuˆ gaˇ nawˇ maˬ paˇ iˇ ma loˇ.

¹¹Muiˇ-eu deuˬ-ahˇ nga maꞈ guiˇ deuˆ gaˇ caw ba nehˬ laꞈ. Tsawˇ haˬ zaˬ caw ba-eu gaˇ dahˇ maˬ tsoeˬ-a.

¹²Miˬyehˇ nga maꞈ nehˬ-ehˇ jawˇ naˇ nga maꞈ gʼaˬ leˇ ma. Muiˇ-eu deuˬ-ahˇ aˬ yawꞈ deuˆ gʼaˬ tehꞈ-a.