Read Akha Ja ceuˬ 69 Bible Online

Ja ceuˬ 69 - Akha bible

Ja ceuˬ 69

¹(Daˬbiˇ-euˬ caˇ dawˬ) Miˬyehˇ-oˇ, ngaˬ-ahˇ ka kʼoꞈ nehˬ laꞈ-awˬ. Ngaˬ-euˬ kawˬ lahˇ-ahˇ keuˆ ni iˇ cuꞈ dahˬ keuˆ taˬ-euˬ meh.

²Naꞈ dui dui-eu lah siˇ laꞈ kʼoeˇ ngaˇ ga nuiꞈ-iˇ luꞈ-awˇ, aˬ kuiˇ nawˬ tehˬ duˬ miˇ tsaˬ yaw gʼahˇ maˬ jaˆ nya. Naꞈ dui dui-eu iˇ cuꞈ kʼoeˇ taˆ ngaˇ jawˇ luꞈ-awˇ, iˇ cuꞈ iˇ luˆ dzeh-eu miˇ neh ga nuiꞈ byoˆ shaw-iˬ miˇ-a.

³Caw ba nehˬ laꞈ-awˬ lehˇ guˇ doeˇ guˇ gʼa-awˇ, kuˬ byahˬ kuˬ shuˇ guˇ shuˇ-euˬ ma. Nawˇ caw ba le gaˇ haw luꞈ-eu, myaˆ nui haw gʼah laꞈ-euˬ ma.

⁴Gaˇ kawˆ maˬ jaˆ gaˇ ngaˬ-ahˇ bye-eu tsawˇ haˬ deuˬ, ngaˬ-euˬ uˬ duˬ tsehˇ kahˇ myaˆ maˬ tseˇ myaˬ-eu meh. Ngaˬ-ahˇ muiˇ-eu deuˬ ngaˬ-euˬ gaˇ kawˆ jaˬ myawꞈ myawꞈ-awˇ, aˬ yawꞈ maꞈ gʼaˬ kʼaˆ-eu miˇ neh ngaˬ-ahˇ sehꞈ mawꞈ-eu meh. Ngaˬ neh maˬ kʼoeˬ-euˬ jeˬ, ngaˬ-ahˇ bi tsoeˬ laꞈ-euˬ meh.

⁵Miˬyehˇ-oˇ, nawˬ-euˬ mehˬ shi ngaˬ-euˬ iˬ baˇ maˬ zaꞈ taˬ nya-a. Ngaˬ-euˬ yaw lehˬ dawˬ tawˆ luꞈ nawˇ siˬ luꞈ mawˇ luꞈ meh.

⁶Dawˬ tawˆ kʼoeˇ taˆ uˆ lahˇ-eu baoˬ huiˬ-eu Sahˬpaˬ Miˬyehˇ-oˇ, ngaˇ baˬ da neh nawˬ-ahˇ gʼoe-eu tsawˇ haˬ deuˬ kʼoeˇ taˆ, shaꞈ dawˇ-eu jeˬ taˬ bi keuˆ le nehˬ laꞈ. Iˇsaˬleˬlaˆ tsawˇ jeuˬ-euˬ Miˬyehˇ-oˇ, ngaˇ baˬ da neh nawˬ-ahˇ uˬ duˬ tahˬ-eu tsawˇ haˬ deuˬ kʼoeˇ taˆ, myaˆ pyawˬ naˇ mehˇ cawˆ-eu jeˬ taˬ bi keuˆ le nehˬ laꞈ.

⁷Nawˬ-euˬ dah zaˇ dawˬ doeˇ ngaˇ daˬ-awˇ, myaˆ pyawˬ naˇ mehˇ maˬ jaˆ ni shaˬ luꞈ-eu ma.

⁸Ngaˬ-euˬ mehˇ nmˇ deuˬ mehˬ shi boeˇ miˬ shi kʼaˬ loꞈ-ehˇ ngaˇ jawˇ-awˇ, ngaˬ-euˬ aˬ yuiꞈ aˬ nyiˇ deuˬ mehˬ shi boeˇ miˬ shi kʼaˬ loꞈ-ehˇ dehꞈ luꞈ-eu ma.

⁹Nawˬ-euˬ Uˬ duˬ tahˬ nymˇ nymˇ ma-ahˇ nui ma keuˆ-awˇ uˬ duˬ tahˬ-eu jeˬ, ngaˬ-euˬ nui ma laꞈ kʼoeˇ miˬ dzaˬ doꞈ-eu loꞈ-ehˇ jaˆ-awˇ, nawˬ-euˬ dah zaˇ ngaˇ dawˬ doeˇ daˬ luꞈ-eu ma.

¹⁰Dzaˇ dzaˬ sheuˬ-awˇ nui ma nahˬ yu ni taˬ ngeh, aˬ cawˬ yaˬ kʼehˇ yaˬ gaˇ ya daˬ luꞈ-eu ma.

¹¹Noeˬ shaˬ-eu deuˬ dm-eu guˬ daˇ pehˇ zeuˇ mehˬ tsoeˬ ngaˇ dm ngeh, aˬ yawꞈ maꞈ ngaˬ-ahˇ uiˇ-eu meh.

¹²Aˬ yawꞈ maꞈ meuˬ doe ni ngaˬ-eu gaˇ kawˆ ja bu-awˇ, jiˇ baˬ yehꞈ-eu deuˬ ngaˬ-ahˇ caˇ niˇ gʼa-eu meh.

¹³Ehˇ kʼawꞈ, Sahˬpaˬ Miˬyehˇ-oˇ, ngaˇ nawˬ-ahˇ guiˬ lahˬ shaˇ-eu ma. Miˬyehˇ-oˇ, nawˇ naˇ haˬ mawꞈ-eu aˇ yamˬ-ahˇ, ngaˬ-euˬ shaˇ dawˬ naˇ haˬ nehˬ laꞈ-awˬ. Nawˇ-aˬ, gʼoeˇ-eu gaˬ-eu jeˬ huiˬ dui dui-awˇ, ka kʼoꞈ-eu gʼaˇ duˬ dzaˬ taˬ-euˬ nawˬ-euˬ dawˬ ma saˇ jaˇ-ahˇ nawˇ ziꞈ-eu miˇ neh, ngaˬ-euˬ shaˇ dawˬ-ahˇ naˇ haˬ nehˬ laꞈ-awˬ.

¹⁴Lah yaˬ-ahˇ maˬ ya ga nuiꞈ-iˇ ni ka kʼoꞈ nehˬ laꞈ. Muiˇ-eu deuˬ-euˬ aˬ laꞈ laꞈ kʼoeˇ ngaˬ-ahˇ haw piˇ nehˬ laꞈ. Iˇ cuꞈ naꞈ gaˇ ngaˬ-ahˇ taˬ bi ga uˇ nehˬ laꞈ.

¹⁵Ngaˬ-euˬ kʼoeˇ taˆ iˇ jeuˬ taˬ bi oe laꞈ. Iˇ cuꞈ naꞈ gaˇ ngaˬ-ahˇ taˬ bi dehˬ nuiꞈ nehˬ laꞈ. Miˇ tsaˬ duˬ kʼahˬ neh taˬ bi myoꞈ ahˇ nehˬ laꞈ.

¹⁶Sahˬpaˬ Miˬyehˇ-oˇ, maˬ tsehˆ leˇ nya-eu muiˬ dui dui-eu nawˬ-euˬ gʼoeˇ-eu gaˬ-eu jeˬ baˬ da neh, ngaˬ-euˬ shaˇ dawˬ-ahˇ naˇ haˬ nehˬ laꞈ. Huiˬ dui dui-eu nawˬ-euˬ gʼawˬ shaˬ gaˬ-eu jeˬ baˬ da neh, ngaˬ-ahˇ haw cawˬ nehˬ laꞈ.

¹⁷Nawˬ-euˬ zaˬ kʼaˆ-ahˇ nawˬ-euˬ myaˆ pyawˬ taˬ ciˬ zaꞈ nehˬ laꞈ. Ngaˇ shaˬ dui zahˬ dui dui luꞈ-eu miˇ neh, ngaˬ-euˬ shaˇ dawˬ-ahˇ nymˬ-mˇ naˇ haˬ nehˬ laꞈ.

¹⁸Ngaˇ jawˇ gaˇ oe-awˇ ka kʼoꞈ nehˬ laꞈ. Muiˇ-eu deuˬ-euˬ laꞈ-ahˇ ka kʼoꞈ nehˬ laꞈ.

¹⁹Aˬ cawˬ ngaˬ-ahˇ ngehˬ doeˇ ehˇ doeˇ dui dui-awˇ, ngaˇ aˇ naˆ ni daˬ ya ga-eu nawˇ siˬ nya luꞈ meh. Ngaˬ-ahˇ muiˇ-eu deuˬ dawˬ tawˆ luꞈ-ahˇ nawˇ mawˇ luꞈmeh.

²⁰Aˬ cawˬ-euˬ dawˬ doeˇ ngaˬ-euˬ nui ma-ahˇ zaw dui dui laˇ-awˇ, nui ma cawˆ dui dui luꞈ-eu ma. Ngaˬ-ahˇ gʼawˬ shaˬ gaˬ nehˬ laꞈ gaˇ noeˬ tmˬ kʼawꞈ, gʼawˬ shaˬ gaˬ nehˬ laꞈ-eu tiˬ gʼaˬ-iˬ maˬ jawˇ-a. Gʼaˬ biꞈ nehˬ laꞈ gaˇ noeˬ tmˬ kʼawꞈ, gʼaˬ biꞈ nehˬ laꞈ-eu tiˬ gʼaˬ-iˬ maˬ jawˇ-a.

²¹Ngaˇ hawˬ mehꞈ ngeh aˬ yawꞈ maꞈ dzaˇ doꞈ biꞈ laꞈ-awˇ, ngaˇ iˇ cuꞈ mehꞈ ngeh doꞈ ahˇ-eu iˇ cuꞈ ciˬ nehˬ laꞈ-eu meh.

²²Aˬ yawꞈ maꞈ-euˬ mehˬ shi shaˇ dahˇ taˬ-euˬ dzaˬ kʼmˬ dawˇ gʼawˆ deuˬ, aˬ yawꞈ maꞈ ya luˬ ya seˇ-iˇ-eu gaˇ kawˆ pyeuꞈ luꞈ-uˇ. Aˬ yawꞈ maꞈ neh gʼeh-euˬ muiˬ-eu shawˇ-eu bawˬ-iˬ deuˬ, aˬ yawꞈ maꞈ teˬ le byoˆ le-eu gaˇ kawˆ pyeuꞈ luꞈ-uˇ.

²³Aˬ yawꞈ maꞈ-ahˇ myaˆ behꞈ bi behꞈ-iˇ-awˇ, aˬ yawꞈ maꞈ-euˬ daˇ tsuiꞈ bi gʼahˬ-iˇ-awˬ.

²⁴Aˬ yawꞈ maꞈ kʼoeˇ taˆ nawˬ-euˬ nui pehˇ tahˬ daˆ nehˬ-awˇ, guˆ laˇ paˬ-ehˇ gʼeh-eu nawˬ-euˬ nui ma bi mawˇ-awˬ.

²⁵Aˬ yawꞈ maꞈ-euˬ sehˬ gʼawˆ deuˬ laꞈ kʼoeˇ tiˬ gʼaˬ-iˬ maˬ paˇ bi dehꞈ ni, ciˬ cuˇ ni bi pyeuꞈ-iˇ-awˬ.

²⁶Nawˬ neh kʼehˬ nehˬ-euˬ tsawˇ haˬ-ahˇ aˬ yawꞈ maꞈ paˇ kʼehˬ poˆ-awˇ, nawˬ neh laˆ tahˬ laˆ naˇ nehˬ-euˬ tsawˇ haˬ deuˬ-ahˇ aˬ yawꞈ maꞈ dawˬ doeˇ paˇ ciˬ pi nehˬ-eu meh.

²⁷Aˬ yawꞈ maꞈ-ahˇ kʼehˬ nehˬ-eu uˬ taꞈ-ehˇ paˇ kʼehˬ nehˬ-awˇ, nawˬ-euˬ ka kʼoꞈ-eu jeˬ laꞈ kʼoeˇ aˬ yawꞈ maꞈ-ahˇ taˬ sawˇ ahˇ.

²⁸Dehꞈ-eu saꞈ laˇ sahˬ boꞈ laꞈ kʼoeˇ aˬ yawꞈ maꞈ-euˬ tsawˇ myahˇ bi shiˆ byoˆ-awˇ, nawˬ-euˬ tsawˇ haˬ jaˇ laˇ laꞈ kʼoeˇ aˬ yawꞈ maꞈ maˬ ahˇ ni ya shaˬ luꞈ-uˇ.

²⁹Ehˇ kʼawꞈ, ngaˇ shaˬ zahˬ naꞈ-awˇ nui ma cawˆ dui dui nya. Miˬyehˇ-oˇ, ngaˬ-ahˇ ciˬ tuˇ-awˇ, ka kʼoꞈ nehˬ laꞈ-awˬ.

³⁰Ngaˇ caˇ dawˬ caˇ-awˇ Miˬyehˇ-ahˇ ja ceuˬ ma. Aˬ yawꞈ-euˬ guiˬ lahˬ-ahˇ ja ceuˬ-eu laꞈ kʼoeˇ, aˬ yawꞈ huiˬ dui mahˇ dui dui-eu gaˇ kawˆ ja gaˬ ma.

³¹Jeˬ zaˬ lawˇ nehˬ-eu naˆ maˬ tseˇ kʼoeˇ loꞈ-ehˇ jahˇ gaˇ, Sahˬpaˬ Miˬyehˇ nui kʼahˇ shiˇ dzehˬ tehꞈ-a. Huiˬ loˆ laˇ-euˬ mawˇ neˇ mawˇ gaw lawˇ nehˬ-eu naˆ maˬ tseˇ nui kʼahˇ shiˇ dzehˬ tehꞈ-a.

³²Aˬ cawˬ nawˬ dzaˬ kʼaˆ dzaˬ-eu uˬ moˆ ya jawˇ-eu tsawˇ haˬ deuˬ, kʼoeˇ gaˇ ya mawˇ ngeh nui kʼahˇ shiˇ tehꞈ-a. Miˬyehˇ-ahˇ uˬ duˬ tahˬ-eu tsawˇ haˬ deuˬ, nui ma shiˬ keuˇ ni pyeuꞈ laˇ tehꞈ-a.

³³Shaˬ-eu zahˬ-eu tsawˇ haˬ deuˬ-euˬ dawˬ-ahˇ Miˬyehˇ naˇ haˬ-awˇ, paꞈ kuˆ laꞈ kʼoeˇ uˇ luꞈ-eu aˬ yawꞈ-euˬ tsawˇ haˬ deuˬ-ahˇ aˬ yawꞈ maˬ ngehˇ-a.

³⁴Mˬ hawˇ-eu miˇ tsaˬ tahˬ kʼawˇ-oˇ, Miˬyehˇ-ahˇ ja ceuˬ-awˬ. Iˬ ma laˆ shaˆ hawˇ-eu kʼoeˇ gaˇ kʼaˇ uˇ-eu jeˬ dawˬ tawˆ luꞈ aˬ yawꞈ-ahˇ ja ceuˬ-awˬ.

³⁵Yeˬluˇsaˬlehˬ meuˬ-ahˇ aˬ yawꞈ maꞈ ka kʼoꞈ-awˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ aˬ yawꞈ tsoˆ muiˬ tehꞈ-a. Aˬ yawꞈ-euˬ tsawˇ haˬ deuˬ kʼoeˇ gaˇ ya jawˇ-awˇ, miˇ kʼahˬ kʼoeˇ aˬ yawꞈ maꞈ-ahˇ oꞈ tehꞈ-a.

³⁶Aˬ yawꞈ-euˬ zaˬ kʼaˆ deuˬ-euˬ zaˬ deuˬ uˆ deuˬ, miˇ kʼahˬ kʼoeˇ kʼahˬ jeˬ biˇ za-awˇ, aˬ yawꞈ-ahˇ gaˬ-eu tsawˇ haˬ deuˬ kʼoeˇ gaˇ ya jawˇ tehꞈ-a.