Read Akha Ja ceuˬ 73 Bible Online

Ja ceuˬ 73 - Akha bible

Ja ceuˬ 73

¹JA CEUˬ-EU SAHˬ BOꞈ SMˇ TAꞈ TIꞈ TAˬ (Aˬsaˆ-euˬ caˇ dawˬ) Miˬyehˇ-aˬ, Iˇsaˬleˬlaˆ tsawˇ jeuˬ kʼoeˇ taˆ aˬ diˇ aˬ maˇ muiˬ-eu meh. Nui ma shawˇ jehˆ ni gʼeh-eu tsawˇ haˬ deuˬ kʼoeˇ taˆ muiˬ-eu meh.

²Ehˇ kʼawꞈ ngaˇ sahˬ tiꞈ tiꞈ-iˬ law miˇ-a. Ngaˬ-euˬ jah-eu nui ma byoˆ shaw-iˬ law miˇ-a.

³Haiˬ-eu tsawˇ haˬ deuˬ dehꞈ dzaˬ gaˇ ya mawˇ ngeh, nui ma huiˬ gaˇ mahˇ gaˇ myaˆ naˆ-euˬ ma.

⁴Aˬ yawꞈ maꞈ maˬ shaˬ maˬ zahˬ-ehˇ, gʼaˬ kʼaˆ-awˇ jawˇ saˇ doˆ luꞈ-eu meh.

⁵Aˬ cawˬ loꞈ-ehˇ aˬ yawꞈ maꞈ maˬ ya naˇ maˬ ya gawˇ-ehˇ, aˬ cawˬ loꞈ-ehˇ shaˬ zahˬ maˬ puˬ-a.

⁶Kʼoeˇ miˇ neh nui ma huiˬ-eu jeˬ lahˇ dah dah-awˇ yaw haiˬ mˇ-eu jeˬ dm-eu meh.

⁷Nui ma laꞈ kʼoeˇ yaw haiˬ yoeˇ doˆ le-awˇ, yaw haiˬ jeˬ mˇ-eu gʼaˇ duˬ shaˇ sawˇ-eu maˬ naˬ leˇ-a.

⁸Aˬ cawˬ-ahˇ aˬ yawꞈ maꞈ uiˇ-awˇ dawˬ kʼaˆ ngehˬ-eu meh. Aˬ yawꞈ maꞈ nui ma huiˬ-eu mahˇ-eu laꞈ kʼoeˇ, smˇ kʼaˆ kʼaˆ dzaˬ-eu gaˇ kawˆ kawˆ luꞈ-eu meh.

⁹Mˬ taˆ Miˬyehˇ-ahˇ dawˬ doeˇ ngehˬ-awˇ, miˇ tsaˬ zaˬ deuˬ-ahˇ lmˬ-eu meh.

¹⁰Kʼoeˇ miˇ neh Miˬyehˇ-euˬ tsawˇ haˬ deuˬ kʼawꞈ aˬ yawꞈ maꞈ jawˇ paw pyawˬ-awˇ, aˬ yawꞈ maꞈ-euˬ dawˬ-ahˇ nui ma laꞈ kʼoeˇ keuˆ ni jah-eu meh.

¹¹“Miˬyehˇ aˬ jeˬ siˬ nya ta. Huiˬ-eu mahˇ-eu Miˬyehˇ aˬ jeˬ tsawˇ gahˇ ahˇ ta” lehˇ, aˬ yawꞈ maꞈ ehˇ-eu meh.

¹²Haiˬ-eu tsawˇ haˬ deuˬ kʼoeˇ loꞈ-ehˇ dehꞈ-eu meh. Aˬ yawꞈ maꞈ jaˆ-eu uˬ taꞈ jaˆ le tehˇ tehˬ-eu meh.

¹³Toˆ-ehˇ ngeuˇ naˇ, ngaˇ iˬ baˇ maˬ pi yaw muiˬ yaw shawˇ shawˇ-ehˇ dehꞈ-eu, aˬ jeˬ gaˇ dahˇ tsoeˬ ta.

¹⁴Miˬyehˇ-oˇ, nawˇ ngaˬ-ahˇ nah ga-ehˇ bi shaˬ bi zahˬ laꞈ-awˇ, yawˬ shawˬ na luꞈ nawˇ ngaˬ-ahˇ kʼehˬ nehˬ laꞈ-euˬ meh.

¹⁵Gaˇ kawˆ kʼoeˇ ngaˇ ngehˬ dzeuˇ-euˬ law nmˇ-aˬ, ngaˇ nawˬ-euˬ tsawˇ haˬ geuꞈ geuꞈ-ehˇ maˬ paˇ jawˇ ma.

¹⁶Gaˇ kawˆ kʼoeˇ ngaˇ shaˇ noeˬ dui dui kʼawꞈ, ngaˇ maˬ noeˬ duˬ nya nya.

¹⁷Nawˬ-euˬ Uˬ duˬ tahˬ nymˇ nymˇ ma-ahˇ ngaˇ uˇ leˇ ngeh hawˇ-eu, haiˬ-eu tsawˇ haˬ deuˬ kʼoeˇ taˆ keuˆ le-eu lehˇ gʼeh-eu, gaˇ kawˆ-ahˇ ngaˇ siˬ duˬ-euˬ ma.

¹⁸Aˬ kuiˇ maˬ nawˬ tehˬ ziꞈ nya-eu juˇ dui dui-eu jawˇ duˬ-ahˇ, aˬ yawꞈ maꞈ-ahˇ nawˇ sheuˬ taˬ-awˇ, bi luˬ bi seˇ-iˇ tehꞈ-a.

¹⁹Aˬ yawꞈ maꞈ ja pyuˬ ni ya dehꞈ byoˆ leꞈ-awˇ, aˇ saˬ saˬ laˇ jawˬ-ehˇ ya noeˬ shaˬ dui dui tehꞈ-a.

²⁰Aˬ yawꞈ maꞈ yaw dehꞈ dehꞈ-eu jeˬ-aˬ, uˬ shawˬ paw ya ngehˇ byoˆ-eu yuꞈ maˆ maˆ gaˇ duˇ tehꞈ-a. Sahˬpaˬ Miˬyehˇ-oˇ, nawˇ uˬ tuˇ tuˇ laˇ ngeh, aˬ yawꞈ maꞈ piˬ-iˇ byoˆ-iˇ jiˇ tehꞈ-a.

²¹Ngaˇ nui ma naˇ-awˇ nui kʼahˇ maˬ shiˇ-ehˇ shaˬ ngeh,

²²jeˬ zaˬ tiˬ mawˇ loˆ ni tehꞈ-ehˇ pyeuꞈ-awˇ, nawˬ-ahˇ maˬ siˬ duˬ nya nya.

²³Ehˇ kʼawꞈ, aˬ myah luꞈ nawˬ-euˬ dawˬ peh ngaˇ jawˇ-awˇ, ngaˬ-euˬ aˬ laꞈ-ahˇ nawˇ tuˆ tehꞈ nehˬ laꞈ-euˬ meh.

²⁴Nawˇ ngaˬ-ahˇ mehˬ-awˇ tsoˆ-awˇ sheuˬ gʼeh-eu laꞈ kʼoeˇ, aˇ saˬ saˬ laˇ ngeh nawˇ ngaˬ-ahˇ ciˬ huiˬ ciˬ mahˇ nehˬ laꞈ tehꞈ-a.

²⁵Nawˇ maˬ ngeuˇ ngaˬ-euˬ gʼaˇ duˬ mˬ kʼoeˇ taˆ aˬ suˇ gʼaˬ paˇ jawˇ ta. Nawˇ maˬ ngeuˇ miˇ tsaˬ kʼoeˇ taˆ aˬ suˇ gʼaˬ-ahˇ ngaˇ paˇ loˬ ta.

²⁶Ngaˬ-euˬ nui ma gʼawˇ mawˇ gʼaˬ baˬ-iˇ kʼawꞈ, Miˬyehˇ ngaˬ-euˬ gʼaˬ pyeuꞈ-eu ma. Aˬ yawꞈ-ahˇ za naˇ dawˬ tawˆ luꞈ byah jiˇ-eu ma.

²⁷Nawˬ-ahˇ byehˇ dzeh-eu tsawˇ haˬ deuˬ aˬ diˇ aˬ maˇ ya luˬ ya seˇ-iˇ tehꞈ-a. Nawˬ-ahˇ saˇ jaˇ maˬ ziꞈ-eu tsawˇ haˬ deuˬ-ahˇ nawˇ laˆ luˬ laˆ seˇ nehˬ tehꞈ-a.

²⁸Ehˇ kʼawꞈ, Miˬyehˇ-euˬ dawˬ peh ya jawˇ-eu jeˬ ngaˬ-euˬ gʼaˇ duˬ muiˬ dui dui nya. Ngaˬ-euˬ ziꞈ duˬ gʼoe duˬ-aˬ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ma. Aˬ yawꞈ neh kʼaˇ mˇ-euˬ jeˬ dawˬ tawˆ luꞈ ngaˇ ja gaˬ ma.