Read Akha Ja ceuˬ 74 Bible Online

Ja ceuˬ 74 - Akha bible

Ja ceuˬ 74

¹(Aˬsaˆ-euˬ caˇ dawˬ) Miˬyehˇ-oˇ, aˬ jeˬ miˇ neh nga maꞈ-ahˇ heu loꞈ-ehˇ byehˇ dzeh nehˬ laꞈ te. Nawˬ-euˬ tsawˇ jeuˬ-ahˇ mˬ maˬ maˬ byaˆ zaˇ ziˇ nawˇ nui ma pehˇ-eu gʼeh te loˇ.

²Nawˬ-euˬ tsawˇ jeuˬ-ahˇ nawˇ noeˬ keuˆ nehˬ laꞈ-awˬ. Nawˬ-euˬ tsawˇ jeuˬ bi geuꞈ-eu lehˇ aˬ cawˬ zaˬ kʼaˆ geuꞈ luꞈ gaˇ sheuˬ doˆ laꞈ-euˬ, aˇ hu ba neh nawˬ neh tseˇ doˆ-euˬ tsawˇ jeuˬ-ahˇ noeˬ keuˆ nehˬ laꞈ-awˬ. Aˇ hu ba nawˬ neh jawˇ-euˬ jawˇ duˬ pyeuꞈ-eu, Ziˇoˬ gawˬ jawˬ-ahˇ noeˬ keuˆ nehˬ laꞈ-awˬ.

³Luˬ-iˇ seˇ-iˇ taˬ-euˬ kʼoeˇ taˆ cah haw le-awˬ. Uˬ duˬ tahˬ nymˇ nymˇ ma laꞈ kʼoeˇ kʼaˇ jaˆ-eu jeˬ dawˬ tawˆ luꞈ-ahˇ, nga maꞈ-ahˇ muiˇ-eu deuˬ neh laˆ cawˆ jiˇ taˬ-eu meh.

⁴Nawˬ-ahˇ muiˇ-eu deuˬ nawˬ-euˬ Uˬ duˬ tahˬ nymˇ nymˇ ma laꞈ kʼoeˇ guˇ-eu meh. Aˬ yawꞈ maꞈ-euˬ paˇ loˬ paˇ lehˇ kʼoeˇ gaˇ ka tuˇ-awˇ, aˬ yawꞈ maꞈ gʼaˬ leˇ-euˬ gaˇ kawˆ saˇ kiˇ bi geuꞈ-euˬ meh.

⁵Deuˆ haˬ baꞈ-awˇ aˇ baw tuˇ coˬ-eu, miˬ dzaˬ kʼehꞈ-eu tsawˇ haˬ-ahˇ aˬ yawꞈ maꞈ duˇ-eu meh.

⁶Deuˆ haˬ hawˇ-eu diˬ puˬ puˬ ma baꞈ-awˇ, daˇ kawˬ teˇ byaꞈ deuˬ-ahˇ aˬ yawꞈ maꞈ deuˆ kʼehꞈ deuˆ kʼoeˆ-eu meh.

⁷Nawˬ-euˬ Uˬ duˬ tahˬ nymˇ nymˇ ma-ahˇ aˬ yawꞈ maꞈ deh pyaˆ-awˇ, miˬ dzaˬ dzah puiˆ dzeh-eu laꞈ kʼoeˇ, nawˬ-ahˇ uˬ duˬ tahˬ-euˬ jawˇ duˬ-ahˇ laˆ jawꞈ-euˬ meh.

⁸Geuꞈ-eu jeˬ maˬ ahˇ-ehˇ pyeuꞈ-iˇ gaˇ keuˆ ni, nga maꞈ-ahˇ aˬ yawꞈ maꞈ laˆ cawˆ mawꞈ-awˇ, miˇ kʼahˬ laꞈ kʼoeˇ kʼaˇ jaˆ-eu muiˬ-eu shawˇ-eu jawˇ duˬ dawˬ tawˆ luꞈ-ahˇ, miˬ dzaˬ dzah puiˆ dzeh yaꞈ-euˬ meh.

⁹Nga maꞈ-euˬ muiˬ-eu shawˇ-eu mˇ myawˬ keu ka dawˬ tawˆ luꞈ bi laˆ byoˆ jiˇ-awˇ, Miˬyehˇ gʼaˇ duˬ ngehˬ dah-eu tsawˇ haˬ kʼawꞈ, tiˬ gʼaˬ-iˬ maˬ dzeˇ-a. Aˇ myah keuˆ ni heu loꞈ-ehˇ ya shaˬ-eu tiˬ gʼa-iˬ maˬ siˬ nya-a.

¹⁰Miˬyehˇ-oˇ, nga maꞈ-ahˇ muiˇ-eu tsawˇ haˬ deuˬ aˇ myah keuˆ ni nawˬ-ahˇ uiˇ uiˇ-ehˇ bi jawˇ-eu gʼeh te. Mˬ maˬ maˬ byaˆ zaˇ ziˇ nawˬ-euˬ tsawˇ myahˇ-ahˇ aˬ yawꞈ maꞈ bi ja doeˇ-eu lehˇ gʼeh te loˇ.

¹¹Aˬ jeˬ miˇ neh nawˇ nga maꞈ-ahˇ maˬ caw ba le ni jawˇ te. Aˬ jeˬ miˇ neh nawˬ-euˬ aˬ laꞈ naˇ kʼah paw cawˬ zaꞈ te.

¹²Ehˇ kʼawꞈ, Miˬyehˇ nawˇ-aˬ, aˇ dahˬ beh ngeh neh nga maꞈ-euˬ sahˬ paˬ pyeuꞈ-eu ma. Nga maꞈ-ahˇ nawˇ gʼawˬ mya poˆ ka kʼoꞈ nehˬ laꞈ-euˬ meh.

¹³Baoˬ huiˬ-eu nawˬ-euˬ gʼaˬ-ahˇ gʼoe-eu laꞈ kʼoeˇ, iˬ ma laˆ shaˆ-ahˇ nawˇ dehˬ paˆ-awˇ, laˆ shaˆ byaˆ yahˬ deuˬ-euˬ uˬ duˬ ngawˬ paˆ-euˬ meh.

¹⁴Leˬbeˇdaˬ lehˇ kuˇ-eu laˆ shaˆ byaˆ yahˬ yahˬ ma-euˬ uˬ duˬ-ahˇ nawˇ nawˬ pyehˆ-awˇ, aˬ yawꞈ-euˬ gʼawˇ mawˇ-ahˇ kʼaˇ shuiꞈ deh yaˇ-ahˇ jawˇ-eu bawˇ tsahˬ jeˬ zaˬ-ahˇ nawˇ bi dzaˬ-euˬ meh.

¹⁵Lawˇ kʼmˬ lawˇ gawˆ-ahˇ nawˇ iˇ cuꞈ bi yoeˇ-awˇ, Lawˇ baˬ baˬ ma deuˬ-ahˇ iˇ cuꞈ bi guiˇ-iˇ-eu meh.

¹⁶Nah hawˇ-eu miˇ-ahˇ nawˬ neh beh-awˇ, nahˇ ma hawˇ-eu ba la-ahˇ nawˇ ciꞈ tsaˬ taˬ-euˬ meh.

¹⁷Mˬ dzeˇ miˇ dzeˇ miˇ kaˬ nawˬ neh biˇ-awˇ, jawˇ la hawˇ-eu tsahˬ gaˆ nawˬ neh dehˬ paˆ taˬ-euˬ meh.

¹⁸Ehˇ kʼawꞈ, Sahˬpaˬ Miˬyehˇ-oˇ, muiˇ-eu deuˬ nawˬ-ahˇ uiˇ luꞈ gaˇ taˬ ngehˇ. Miˬyehˇ maˬ baw-eu tsawˇ haˬ deuˬ nawˬ-euˬ tsawˇ myahˇ-ahˇ yehˬ bawˬ sehˇ lu-ehˇ ehˇ luꞈ gaˇ taˬ ngehˇ.

¹⁹Laꞈ jeuˬ shaˇ kʼaˇ maˬ za-eu nawˬ-euˬ tsawˇ haˬ deuˬ-ahˇ, haiˬ dui dui-eu muiˇ-eu deuˬ-euˬ laꞈ-ahˇ taˬ byehˇ dzeh nehˬ laꞈ. Kʼehˬ-eu kʼaˆ-eu jeˬ-ahˇ ya daˬ luꞈ-eu nawˬ-euˬ tsawˇ haˬ deuˬ-ahˇ taˬ ngehˇ nehˬ laꞈ.

²⁰Nga maꞈ nehˬ-ehˇ dzaˬ taˬ-euˬ dawˬ ma saˇ jaˇ-ahˇ noeˬ keuˆ-awˬ. Miˇ kʼahˬ heu kʼahˬ laꞈ kʼoeˇ yaw zahˇ kʼaˇ jaˆ gaˇ yaw haiˬ jeˬ mˇ luꞈ meh.

²¹Aˬ cawˬ nawˬ dzaˬ kʼaˆ dzaˬ gaˇ ya daˬ luꞈ-eu deuˬ kʼoeˇ taˆ, shaꞈ dawˇ-eu jeˬ taˬ bi keuˆ le. Shaˬ-eu zahˬ-eu tsawˇ haˬ kʼoeˇ deuˬ nawˬ-ahˇ bi ja ceuˬ-awˬ.

²²Miˬyehˇ-oˇ, tuˇ laˇ-awˇ, nawˬ-euˬ gaˇ kawˆ shaˇ sawˇ geuꞈ-awˬ. Miˬyehˇ maˬ baw-eu tsawˇ haˬ deuˬ nah ga-ehˇ nawˬ-ahˇ uiˇ luꞈ gaˇ taˬ ngehˇ.

²³Nawˬ-ahˇ muiˇ-eu deuˬ nui ma pehˇ-awˇ guˇ gaˇ taˬ ngehˇ. Nawˬ-ahˇ muiˇ-eu kʼoeˇ deuˬ maˬ naˬ leˇ ni guˇ luꞈ gaˇ taˬ ngehˇ.