Read Akha Ja ceuˬ 76 Bible Online

Ja ceuˬ 76 - Akha bible

Ja ceuˬ 76

¹(Aˬsaˆ-euˬ caˇ dawˬ) Yuˇdaˆ miˇ kʼahˬ Miˬyehˇ-ahˇ siˬ nya-awˇ, Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ tsawˇ myahˇ huiˬ-eu meh.

²Aˬ yawꞈ-euˬ nymˇ Yeˬluˇsaˬlehˬ meuˬ-ahˇ jaˆ-awˇ, Ziˇoˬ gawˬ jawˬ kʼoeˇ taˆ aˬ yawꞈ jawˇ-eu meh.

³Muiˇ-eu deuˬ-euˬ kaˆ myaˬ-ahˇ, kʼoeˇ gaˇ aˬ yawꞈ ngawˬ kʼehꞈ-awˇ, aˬ yawꞈ maꞈ-euˬ mi cehˇ hawˇ-eu dehˬ daˬ duˬ maˬ ehˇ, guiˇ deuˆ-eu keu ka dawˬ tawˆ luꞈ maˬ ehˇ, aˬ yawꞈ laˆ kʼehꞈ laˆ kʼoeˆ nehˬ jiˇ-euˬ meh.

⁴Miˬyehˇ-oˇ, nawˇ aˇ naˆ ni yaw shehꞈ kʼahꞈ sehˇ huiˬ-eu nga. Muiˇ-eu deuˬ-ahˇ nawˇ deuˆ gʼaˬ-awˇ, gawˬ jawˬ-ahˇ gʼoꞈ ka le ngeh, aˇ naˆ ni kʼahˬ sehˇ jaˆ-eu nga.

⁵Kʼaˬ dui dui-eu aˬ yawꞈ maꞈ-euˬ yehˇ deuˬ, myawˬ dawˬ tawˆ luꞈ smˬ-iˇ jiˇ-awˇ, tiˬ jawˇ-iˬ maˬ paˇ dehꞈ laˇ nya ni yuꞈ kʼaˆ byoˆ jiˇ-euˬ meh. Aˬ yawꞈ maꞈ-euˬ gʼaˬ hawˇ-eu guiˇ deuˆ-eu tsawˇ gahˇ tiˬ jeˬ-iˬ gaˇ dahˇ maˬ tsoeˬ-a.

⁶Yaˬkoˆ-euˬ Miˬyehˇ-oˇ, aˬ yawꞈ maꞈ-ahˇ nawˇ laˆ guˆ nehˬ ngeh, mahˬ hawˇ-eu mahˬ dziˬ-eu tsawˇ haˬ deuˬ coˬ sehꞈ jiˇ-euˬ meh.

⁷Sahˬpaˬ Miˬyehˇ-oˇ, tsawˇ haˬ dawˬ tawˆ luꞈ nawˬ-ahˇ guˆ-awˇ, nawˇ nui ma pehˇ ngeh nawˬ-eu mehˬ shi tiˬ gʼaˬ-iˬ maˬ jawˇ tehˬ peuˬ-a.

⁸Nawˇ mˬ kʼoeˇ taˆ neh yaˇ kʼaˬ daˇ-awˇ, miˇ tsaˬ zaˬ dawˬ tawˆ luꞈ guˆ-awˇ ciˬ cuˇ ni jawˇ-eu meh.

⁹Miˇ tsaˬ kʼoeˇ taˆ aˬ cawˬ nawˬ dzaˬ kʼaˆ dzaˬ-eu deuˬ-ahˇ ka kʼoꞈ-eu gʼaˇ duˬ, nawˇ yaˇ kʼaˬ daˇ-eu lehˇ tsawˬ tuˇ laˇ ngeh, miˇ tsaˬ zaˬ dawˬ tawˆ luꞈ guˆ-awˇ ciˬ cuˇ ni jawˇ-eu meh.

¹⁰Tsawˇ haˬ zaˬ-euˬ nui pehˇ-aˬ, nawˬ-ahˇ ja ceuˬ-eu gaˇ kawˆ bi doˆ laˇ-eu tehꞈ meh. Guiˇ deuˆ gaˇ maˬ ya shiˇ-ehˇ dzeuˇ-iˇ-euˬ deuˬ, nawˬ-ahˇ ja ceuˬ-eu bawˬ-iˬ gʼeh tehꞈ-a.

¹¹Yawˬ ha saˇ jaˇ dzaˬ taˬ-euˬ jeˬ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ biꞈ-awˬ. Dawˬ peh jawˇ-eu tsawˇ jeuˬ dawˬ tawˆ luꞈ, aˬ yawꞈ-ahˇ laꞈ sawˬ biꞈ ha laˇ-awˬ. Tsawˇ haˬ zaˬ aˬ yawꞈ-ahˇ guˆ ni Miˬyehˇ jahˇ-eu meh.

¹²Miˇ kʼahˬ-ahˇ uˆ lahˇ-eu deuˬ nui ma baˬ-iˇ ni aˬ yawꞈ jahˇ-awˇ, sahˬ paˬ deuˬ-ahˇ aˬ yawꞈ laˆ guˆ-eu meh.