Read Akha Ja ceuˬ 83 Bible Online

Ja ceuˬ 83 - Akha bible

Ja ceuˬ 83

¹(Aˬsaˆ-euˬ caˇ dawˬ) Miˬyehˇ-oˇ, ciˬ cuˇ ni taˬ jawˇ nehˬ laꞈ. Maˬ luˆ maˬ laˆ, maˬ ngehˬ maˬ tmˇ ni taˬ jawˇ nehˬ laꞈ.

²Haw sheˇ, nawˬ-ahˇ muiˇ-eu deuˬ tsawˬ tuˇ laˇ-awˇ, nawˬ-ahˇ bye-eu deuˬ puiˬ luꞈ meh.

³Nawˬ-euˬ tsawˇ jeuˬ-ahˇ laˆ cawˆ-eu lehˇ aˬ yawꞈ maꞈ bawˬ dzaˬ kʼoeˬ luꞈ meh. Nawˬ neh haw piˇ-euˬ tsawˇ haˬ-ahˇ, laˆ cawˆ-eu lehˇ ja sawˇ luꞈ meh.

⁴“Iˇsaˬleˬlaˆ tsawˇ myahˇ byoˆ-iˇ ni, miˇ kʼahˬ laˆ cawˆ nehˬ kaˇ-euˇ” lehˇ, aˬ yawꞈ maꞈ bawˬ luꞈ meh.

⁵Aˬ yawꞈ maꞈ nui ma tiˬ gaˇ taꞈ-awˇ, nawˬ-ahˇ deuˆ-eu gʼaˇ duˬ gm leˇ-euˬ meh.

⁶Eˬdoˬ tsawˇ jeuˬ hawˇ-eu Iˇshaˬmeˬlaˇ tsawˇ jeuˬ maˬ ehˇ, Mawˇbaˆ tsawˇ jeuˬ hawˇ-eu Haˬgaˬlaˇ tsawˇ jeuˬ maˬ ehˇ,

⁷Geˬbaˬlaˆ tsawˇ jeuˬ, Aˬmoˬ tsawˇ jeuˬ, Aˬmaˬlehˇ tsawˇ jeuˬ, Piˇtiˇtiˆ tsawˇ jeuˬ hawˇ-eu Duˇlu tsawˇ jeuˬ maˬ ehˇ,

⁸Aˬshuˇliˆ tsawˇ jeuˬ maˬ ehˇ, dawˬ tawˆ luꞈ gm leˇ-awˇ, Lawˇtaˬ-euˬ zaˬ deuˬ uˆ deuˬ pyeuꞈ-euˬ aˬ yawꞈ maꞈ dawˬ tawˆ luꞈ nui ma taꞈ leˇ jiˇ-awˇ, tsawˇ haˬ myaˬ-awˇ gʼaˬ kʼaˆ dui dui-eu meh.

⁹Miˇdiˬyaˬ tsawˇ jeuˬ-ahˇ nawˬ neh jahˇ nehˬ-euˬ loꞈ-ehˇ, Siˇseˬlaˇ hawˇ-eu Yaˬbiˬ aˬ nyaꞈ-ahˇ, Giˇshoˬ lawˇ baˬ dawˬ peh jahˇ nehˬ-euˬ loꞈ-ehˇ, aˬ yawꞈ maꞈ-ahˇ nawˇ jahˇ nehˬ-awˬ.

¹⁰Eˬdawˇlaˆ meuˬ dawˬ peh aˬ yawꞈ maꞈ-ahˇ nawˇ deuˆ gʼaˬ-awˇ, aˬ yawꞈ maꞈ-euˬ gʼawˇ mawˇ miˇ tsa ga buꞈ-euˬ meh.

¹¹Awˇleˇbaˆ hawˇ-eu Ziˇoˬ aˬ nyaꞈ-ahˇ jahˇ nehˬ-euˬ loꞈ-ehˇ, aˬ yawꞈ maꞈ kʼoeˇ taˆ aˬ yuiꞈ aˬ tsu geuꞈ-eu deuˬ-ahˇ jahˇ nehˬ-awˬ. Zeˬbah hawˇ-eu Zaˬlaˬmuˇnaˬ aˬ ha nyaꞈ-ahˇ nawˬ neh jahˇ nehˬ-euˬ loꞈ-ehˇ, aˬ yawꞈ maꞈ kʼoeˇ taˆ uˆ lahˇ-eu deuˬ dawˬ tawˆ luꞈ-ahˇ deuˆ gʼaˬ nehˬ-awˬ.

¹²Miˬyehˇ-euˬ miˇ kʼahˬ deuˆ geuꞈ ma lehˇ ehˇ-eu tsawˇ haˬ kʼoeˇ deuˬ-ahˇ, nawˇ kʼoeˇ loꞈ-ehˇ jahˇ nehˬ-awˬ.

¹³Miˬ yehˇ-oˇ, kʼaˬ lehˇ byaˆ dzeh-eu loꞈ-ehˇ aˬ yawꞈ maꞈ-ahˇ byaˆ dzeh nehˬ-awˬ. Jaˬ lehˇ neh bi baw byoˆ gʼeh-euˬ gʼo yoeˬ loꞈ-ehˇ jahˇ nehˬ-awˬ.

¹⁴Yaˇ saˬ-ahˇ miˬ dzaˬ puiˆ-eu loꞈ-ehˇ maˬ ehˇ, gawˬ jawˬ-ahˇ miˬ dzaˬ puiˆ daˆ leꞈ-eu loꞈ-ehˇ maˬ ehˇ,

¹⁵Nawˬ-euˬ mˬ jeˬ jaˬ lehˇ neh aˬ yawꞈ maꞈ-ahˇ teh byoˆ-awˇ, guˆ laˇ paˬ-ehˇ gʼeh-eu jaˬ lehˇ lehˇ ma neh laˆ guˆ nehˬ-awˬ.

¹⁶Sahˬpaˬ Miˬyehˇ-oˇ, shaꞈ dawˇ-eu jeˬ aˬ yawꞈ maꞈ-euˬ myaˆ kʼeh bi keuˆ le-awˇ, nawˬ-euˬ baoˬ aˬ yawꞈ maꞈ-ahˇ siˬ leˇ ni jahˇ nehˬ-awˬ.

¹⁷Aˬ yawꞈ maꞈ mˬ maˬ maˬ byaˆ zaˇ ziˇ daˬ ga luꞈ-uˇ. Nui ma cawˆ-eu laꞈ kʼoeˇ piˬ-iˇ byoˆ-iˇ luꞈ-uˇ.

¹⁸Nawˇ tiˬ gʼaˬ tehꞈ-ehˇ Sahˬpaˬ Miˬyehˇ pyeuꞈ-awˇ, miˇ tsaˬ dawˬ tawˆ luꞈ kʼoeˇ taˆ huiˬ dzehˬ-eu uˆ lahˇ-eu gʼaˬ pyeuꞈ-eu gaˇ kawˆ, aˬ yawꞈ maꞈ siˬ nya leˇ luꞈ-uˇ.