Read Akha Ja ceuˬ 86 Bible Online

Ja ceuˬ 86 - Akha bible

Ja ceuˬ 86

¹(Daˬbiˇ-euˬ caˇ dawˬ) Sahˬpaˬ Miˬyehˇ-oˇ, ngaˬ-euˬ shaˇ dawˬ-ahˇ naˇ haˬ-awˇ ngaˬ-ahˇ ngehˬ cawˬ nehˬ laꞈ. Ngaˇ gʼaˬ baˬ-awˇ gʼoe kʼaˇ maˬ za nya.

²Ngaˇ nawˬ-ahˇ saˇ jaˇ ziꞈ-eu miˇ neh, shiˇ-eu jeˬ laꞈ kʼoeˇ ka kʼoꞈ nehˬ laꞈ. Ngaˇ nawˬ-euˬ zaˬ kʼaˆ pyeuꞈ-awˇ nawˬ-ahˇ gʼoe-eu miˇ neh, ngaˬ-ahˇ ka kʼoꞈ nehˬ laꞈ.

³Nawˇ ngaˬ-euˬ Miˬyehˇ pyeuꞈ-eu miˇ neh, ngaˬ-ahˇ gʼawˬ shaˬ gaˬ nehˬ laꞈ lehˇ, nah ga-ehˇ ngaˇ shaˇ-eu ma.

⁴Sahˬpaˬ Miˬyehˇ-oˇ, Ngaˬ-euˬ shaˇ dawˬ nawˇ jawˇ gaˇ le keuˆ-eu miˇ neh, ngaˬ-euˬ nui ma-ahˇ laˬ kʼaˬ bi cehˇ nehˬ laꞈ.

⁵Nawˇ nga maꞈ kʼoeˇ taˆ muiˬ-awˇ iˬ baˇ pyehˬ-eu laꞈ kʼoeˇ, nawˬ-ahˇ guiˬ lahˬ shaˇ-eu tsawˇ haˬ deuˬ-ahˇ, maˬ tsehˆ leˇ ni gaˬ-eu meh.

⁶Sahˬpaˬ Miˬyehˇ-oˇ, ngaˬ-euˬ shaˇ dawˬ-ahˇ naˇ haˬ nehˬ laꞈ. Ngehˬ gʼeh le-awˬ lehˇ guˇ gaˇ naˇ haˬ nehˬ laꞈ.

⁷Ngaˬ-euˬ shaˇ dawˬ-ahˇ nawˇ naˇ haˬ nehˬ laꞈ-eu miˇ neh, shaˬ ngeh zahˬ ngeh nawˬ-ahˇ ngaˇ kuˇ-eu ma.

⁸Sahˬpaˬ Miˬyehˇ-oˇ, nawˬ-ahˇ duˇ-eu Miˬyehˇ maˬ jawˇ-a. Nawˬ neh mˇ-euˬ jeˬ tiˬ gʼaˬ-iˬ mˇ taˬ-euˬ maˬ jaˆ-a.

⁹Nawˬ neh beh taˬ-euˬ tsawˇ jeuˬ dawˬ tawˆ luꞈ, nawˬ-euˬ mehˬ shi laˇ-awˇ awˆ byaˆ tehꞈ-a. Nawˇ huiˬ-eu mahˇ-eu gaˇ kawˆ aˬ yawꞈ maꞈ caˇ-awˇ ja ceuˬ tehꞈ-a.

¹⁰Nawˇ-aˬ, baoˬ huiˬ-awˇ zahˬ leˇ paˬ-ehˇ gʼeh-eu jeˬ mˇ nya-eu meh. Nawˇ tiˬ gʼaˬ tehꞈ-ehˇ Miˬyehˇ pyeuꞈ-eu meh.

¹¹Sahˬpaˬ Miˬyehˇ-oˇ, nawˇ bi mˇ mawꞈ-eu jeˬ mˇ nya ni, ngaˬ-ahˇ mehˬ nehˬ tsoˆ nehˬ laꞈ-awˬ. Nawˬ-euˬ dawˬ-ahˇ saˇ jaˇ ziꞈ-eu laꞈ kʼoeˇ naˇ haˬ geuꞈ ma. Nawˬ-ahˇ nui ma gʼawˇ mawˇ a nehˬ nya ni mehˬ nehˬ tsoˆ nehˬ laꞈ-awˬ.

¹²Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nui ma gʼawˇ mawˇ dawˬ tawˆ luꞈ nawˬ-ahˇ ja ceuˬ ma. Nawˇ huiˬ dui mahˇ dui dui-eu gaˇ kawˆ mˬ maˬ maˬ byaˆ zaˇ ziˇ ngaˇ ja gaˬ ma.

¹³Nawˇ ngaˬ-ahˇ maˬ tsehˆ leˇ ni gaˬ-eu jeˬ huiˬ dui dui meh. Lmˬ bymˇ laꞈ kʼoeˇ ngaˬ-ahˇ nawˇ ka kʼoꞈ doˆ nehˬ laꞈ-euˬ meh.

¹⁴Miˬyehˇ-oˇ, nui ma huiˬ-eu tsawˇ haˬ deuˬ ngaˬ-ahˇ ceh le-eu lehˇ oe luꞈ meh. Haiˬ-eu tsawˇ haˬ tiˬ muˇ ngaˬ-ahˇ sehꞈ-eu lehˇ leh jeh luꞈ meh. Aˬ yawꞈ maꞈ nawˬ-ahˇ yaw zeu maˬ baw-a.

¹⁵Ehˇ kʼawꞈ Sahˬpaˬ Miˬyehˇ-oˇ, nawˇ-aˬ gʼawˬ shaˬ gaˬ nya-awˇ, gʼoeˇ-eu gaˬ-eu jeˬ byah-eu Miˬyehˇ pyeuꞈ-eu uˬ taꞈ, nui ma gʼawˬ mahˇ ni taˬ nya-awˇ gʼawˬ shaˬ gaˬ-eu laꞈ kʼoeˇ, saˇ jaˇ ziꞈ-eu meh.

¹⁶Ngaˇ jawˇ gaˇ oe-awˇ gʼawˬ shaˬ gaˬ nehˬ laꞈ. Ngaˇ nawˬ-euˬ zaˬ kʼaˆ pyeuꞈ-eu loꞈ-ehˇ, ngaˬ-ahˇ gʼaˬ biꞈ le-awˇ ka kʼoꞈ nehˬ laꞈ.

¹⁷Sahˬpaˬ Miˬyehˇ-oˇ, nawˇ muiˬ-eu gaˇ kawˆ bi siˬ bi mawˇ laꞈ. Nawˇ ngaˬ-ahˇ nui saˇ oꞈ-eu jeˬ biꞈ laꞈ-awˇ ngehˬ gʼeh luꞈ gaˇ ya mawˇ ngeh, ngaˬ-ahˇ bye-eu tsawˇ haˬ deuˬ ya shaꞈ dawˇ tehꞈ-a.