Read Akha Ja ceuˬ 88 Bible Online

Ja ceuˬ 88 - Akha bible

Ja ceuˬ 88

¹(Kawˇlaˆ-euˬ aˬ li deuˬ-euˬ caˇ dawˬ) Sahˬpaˬ Miˬyehˇ pyeuꞈ-eu Miˬyehˇ-oˇ, caw ba nehˬ laꞈ lehˇ nah ga-ehˇ ngaˇ guˇ-awˇ, uˬ ciꞈ paw nawˬ-euˬ mehˬ shi ngaˇ laˇ-eu ma.

²Ngaˬ-euˬ shaˇ dawˬ-ahˇ gaˬ-awˇ, caw ba nehˬ laꞈ lehˇ guˇ gaˇ naˇ haˬ nehˬ laꞈ.

³Ngaˬ-euˬ kʼoeˇ taˆ shaˬ-eu zahˬ-eu jeˬ kaꞈ dzahˬ-awˇ keuˆ le-euˬ miˇ neh, shiˇ taw tehˬ ni ya daˬ luꞈ-eu ma.

⁴Shiˇ-eu miˇ kʼahˬ-ahˇ iˇ luꞈ-eu tsawˇ haˬ deuˬ-ahˇ duˇ leˇ-awˇ, gʼaˬ tiˬ pawꞈ-iˬ maˬ paˇ ahˇ miˇ-a.

⁵Shiˇ-euˬ tsawˇ haˬ deuˬ-euˬ baꞈ dzah laꞈ kʼoeˇ ngaˬ-ahˇ sawˇ ahˇ taˬ-euˬ meh. Lmˬ bymˇ laꞈ kʼoeˇ bi sehꞈ ahˇ dzeuˇ-awˇ, nawˇ maˬ paˇ ka kʼoꞈ nehˬ nya-eu, nawˬ neh byehˇ dzeh-euˬ tsawˇ haˬ-ahˇ duˇ miˇ-a.

⁶Naꞈ dui dui-eu lmˬ bymˇ lo kʼahˬ laꞈ kʼoeˇ, zahˇ tsui ni gʼeh-eu duˬ kʼahˬ laꞈ kʼoeˇ, ngaˬ-ahˇ nawˇ biˬ ahˇ-euˬ meh.

⁷Nawˇ nui ma pehˇ-eu jeˬ ngaˬ-euˬ kʼoeˇ taˆ kah suiˇ ni ciˬ tehˬ taˬ-awˇ, iˇ luˆ dzeh-eu loꞈ-ehˇ ciˬ tahˬ ciˬ tuˆ nehˬ laꞈ-eu meh.

⁸Ngaˬ-euˬ cawˬ deuˬ ngaˬ-ahˇ byehˇ dzeh ni nawˇ jahˇ-euˬ meh. Aˬ yawꞈ maꞈ ngaˬ-ahˇ nui ma naˇ ni nawˇ jahˇ-euˬ meh. Ngaˇ laꞈ coeˇ-ahˇ tehˬ leˇ taˬ-awˇ, buˬ-iˇ-eu gaˇ ma maˬ dahˇ nya. Shaˬ zahˬ naꞈ-eu miˇ neh myaˆ nuiˆ maˬ paˇ gahˇ miˇ-a.

⁹Sahˬpaˬ Miˬyehˇ-oˇ, yawˬ nah na luꞈ nawˬ-ahˇ ngaˇ kuˇ luꞈ-awˇ, aˬ laꞈ cawˬ ja-eu laꞈ kʼoeˇ nawˬ-ahˇ guiˬ lahˬ shaˇ luꞈ-eu ma.

¹⁰Shiˇ dzeuˇ-euˬ tsawˇ haˬ deuˬ gʼaˇ duˬ kʼaˆ jeˬ-ehˇ gʼeh-eu jeˬ nawˇ mˇ nya te loˇ. Aˬ yawꞈ maꞈ paˇ tuˇ laˇ-awˇ nawˬ-ahˇ ja ceuˬ nya ta loˇ.

¹¹Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ gaˇ kawˆ, lmˬ bymˇ laꞈ kʼoeˇ ja nya ta loˇ. Ya luˬ-iˇ ya seˇ-iˇ-eu jawˇ duˬ laꞈ kʼoeˇ nawˇ saˇ jaˇ ziꞈ-eu gaˇ kawˆ ja nya ta loˇ.

¹²Zahˇ tsui ni gʼeh-eu jawˇ duˬ laꞈ kʼoeˇ nawˬ neh mˇ-euˬ zahˬ leˇ paˬ-ehˇ gʼeh-eu jeˬ-ahˇ mawˇ nya ta loˇ. Ngehˇ dzeuˇ jiˇ-euˬ miˇ kʼahˬ laꞈ kʼoeˇ nawˬ-euˬ ka kʼoꞈ-eu guiˬ lahˬ-ahˇ paˇ mawˇ kʼoꞈ nya ta loˇ.

¹³Sahˬpaˬ Miˬyehˇ-oˇ, caw ba nehˬ laꞈ lehˇ nawˬ-ahˇ ngaˇ kuˇ-eu ma. Yawˬ shawˬ na luꞈ ngaˇ nawˬ-ahˇ guiˬ lahˬ shaˇ-eu ma.

¹⁴Sahˬpaˬ Miˬyehˇ-oˇ, nawˇ ngaˬ-ahˇ aˬ jeˬ miˇ neh byehˇ dzeh te. Aˬ jeˬ miˇ neh ngaˇ maˬ mawˇ gaˇ cah te.

¹⁵Nyiˇ ngeh neh shaˬ-eu zahˬ-eu jeˬ-ahˇ shiˇ taw tehˬ ni ngaˇ ya daˬ-euˬ ma. Nawˬ neh kʼehˬ nehˬ kʼaˆ nehˬ laꞈ-euˬ jeˬ-ahˇ, ngaˇ maˬ paˇ daˬ coeˇ miˇ-a.

¹⁶Nawˇ nui ma pehˇ-eu jeˬ ngaˬ-ahˇ ciˬ tahˬ ci tuˆ laˇ-awˇ, nawˇ laˆ coeˬ laˆ ciˆ-eu baˬ da neh ngaˇ ya cawˆ-iˇ miˇ-a.

¹⁷Nawˇ kʼehˬ-eu kʼaˆ-eu jeˬ iˇ jeuˬ oe-eu loꞈ-ehˇ, nah ga-ehˇ ngaˬ-euˬ kʼoeˇ taˆ keuˆ le-awˇ, yawˬ paw na luꞈ tiˬ gʼoeˬ teuˇ le luꞈ meh.

¹⁸Gʼoeˇ dui dui-eu cawˬ deuˬ ngaˬ-ahˇ byehˇ dzeh ni nawˇ jahˇ-awˇ, ngaˬ-euˬ gʼaˇ duˬ dzeˇ luꞈ-eu cawˬ-aˬ, zahˇ tsui ni gʼeh-eu jeˬ tehꞈ ma.