Read Akha Ja ceuˬ 89 Bible Online

Ja ceuˬ 89 - Akha bible

Ja ceuˬ 89

¹(Eˇzaˬlahˬ tsawˇ haˬ Eˇdaˬnamˬ-euˬ caˇ dawˬ) Sahˬpaˬ Miˬyehˇ-oˇ, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ-ahˇ ngaˇ aˬ myah luꞈ caˇ-awˇ ja ceuˬ ma. Nawˇ saˇ jaˇ ziꞈ-eu gaˇ kawˆ aˬ myah luꞈ ja gaˬ ma.

²Nawˬ-euˬ gʼoeˇ-eu gaˬ-eu jeˬ byoˆ-iˇ-eu maˬ baw-ehˇ, nawˇ saˇ jaˇ ziꞈ-eu jeˬ mˬ maˬ maˬ byaˆ zaˇ ziˇ ziꞈ-eu gaˇ kawˆ ngaˇ siˬ nya ma.

³Nawˬ neh ehˇ taˬ-euˬ dawˬ heu loꞈ-ehˇ jaˆ meh. “Ngaˬ neh tseˇ doˆ-euˬ gʼaˬ nehˬ-ehˇ ngaˇ dawˬ ma saˇ jaˇ dzaˬ taˬ-euˬ ma. Ngaˬ-euˬ zaˬ kʼaˆ Daˬbiˇ-ahˇ ngaˇ heu loꞈ-ehˇ saˇ jaˇ dzaˬ-euˬ ma.

⁴‘Nawˬ-euˬ zaˬ nawˬ-euˬ uˆ aˬ myah luꞈ sahˬ paˬ ya geuꞈ tehꞈ-a. Nawˬ-eu dzoeˬ dzaˬ mˬ maˬ maˬ byaˆ zaˇ ziˇ bi ziꞈ ma.”’

⁵Sahˬ paˬ Miˬ yehˇ-oˇ, nawˬ neh mˇ-euˬ zahˬ leˇ paˬ-ehˇ gʼeh-eu gaˇ deuˬ-ahˇ, mˬ kʼoeˇ taˆ caˇ-awˇ ja ceuˬ luꞈ meh. Nawˇ saˇ jaˇ ziꞈ-eu gaˇ kawˆ caˇ-awˇ ja ceuˬ luꞈ meh.

⁶Sahˬpaˬ Miˬyehˇ-oˇ, mˬ kʼoeˇ taˆ nawˬ-ahˇ duˇ-eu tiˬ gʼaˬ-iˬ maˬ jawˇ-a. Mˬ taˆ zaˬ deuˬ nawˇ loꞈ-ehˇ tiˬ gʼaˬ-iˬ maˬ bym-a.

⁷Muiˬ-eu shawˇ-eu deuˬ-euˬ baꞈ dzah laꞈ kʼoeˇ, nawˬ-ahˇ yaw zeu ya baw-awˇ, dawˬ tawˆ luꞈ nawˬ-euˬ mehˬ shi tsoˆ leˇ-awˇ yawꞈ-eu meh.

⁸Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ loꞈ-ehˇ baoˬ huiˬ-eu tiˬ gʼaˬ-iˬ maˬ jawˇ-a. Sahˬ paˬ Miˬ yehˇ-oˇ, yawˬ jeˬ na luꞈ laꞈ kʼoeˇ nawˇ saˇ jaˇ ziꞈ-eu meh.

⁹Baoˬ huiˬ-eu iˬ ma laˆ shaˆ-ahˇ nawˇ uˆ lahˇ-awˇ, guˆ laˇ paˬ-ehˇ iˇ luˆ dzeh gaˇ nawˇ bi naˬ leˇ nya-eu meh.

¹⁰Iˬ ma laˆ shaˆ byaˆ yahˬ Laˬhaˇ-ahˇ nawˇ nawˬ pyehˆ-awˇ sehꞈ-euˬ meh. Nawˬ-euˬ baoˬ huiˬ-eu gʼaˬ-ahˇ gʼoe-awˇ, muiˇ-eu deuˬ-ahˇ nawˇ deuˆ gʼaˬ-euˬ meh.

¹¹Mˬ hawˇ-eu miˇ dawˬ tawˆ luꞈ nawˬ-euˬ meh. Miˇ tsaˬ tahˬ kʼawˇ hawˇ-eu miˇ tsaˬ kʼoeˇ taˆ kʼaˇ jaˆ-eu jeˬ dawˬ tawˆ luꞈ nawˬ neh beh-euˬ meh.

¹²Miˇ tsaˬ tahˬ kʼawˇ laꞈ oˆ pyawˬ laꞈ taˆ pyawˬ baw ni nawˬ neh beh taˬ-euˬ meh. Taˬbawˬ gawˬ jawˬ hawˇ-eu Heˬlaˬmoˬ gawˬ jawˬ, laˬ kʼaˬ tiˬ cehˇ nawˬ-ahˇ ja ceuˬ luꞈ meh.

¹³Nawˇ aˇ naˆ ni baoˬ huiˬ-eu nga. Nawˇ aˇ naˆ ni gʼaˬ kʼaˆ-eu nga.

¹⁴Yaw tsaˬ yaw dawˇ jeˬ kʼoeˇ taˆ, nawˬ-euˬ miˇ kʼahˬ nawˇ bi ziꞈ-euˬ meh. Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ, gʼoeˇ-eu gaˬ-eu jeˬ hawˇ-eu saˇ jaˇ ziꞈ-eu jeˬ ya mawˇ-eu meh.

¹⁵Caˇ dawˬ caˇ-awˇ nawˬ-ahˇ uˬ duˬ tahˬ-eu tsawˇ haˬ deuˬ, nawˇ gʼawˬ shaˬ gaˬ-eu yaw shehꞈ laꞈ kʼoeˇ dehꞈ-eu deuˬ, aˇ naˆ ni laˬ kʼaˬ cehˇ paˬ-ehˇ gʼeh-eu nga.

¹⁶Nawˬ-euˬ guiˬ lahˬ baˬ da neh aˬ yawꞈ maꞈ nah ga-ehˇ laˬ kʼaˬ ya cehˇ-awˇ, nawˬ-euˬ yaw tsaˬ yaw dawˇ jeˬ baˬ da neh, aˬ yawꞈ maꞈ nawˬ-ahˇ ja ceuˬ-eu meh.

¹⁷Nawˇ nga maꞈ-ahˇ aˬ cawˬ tsawˇ jeuˬ kʼoeˇ taˆ bi gʼaˬ leˇ laꞈ-euˬ meh. Nawˬ-euˬ gʼoeˇ-eu gaˬ-eu jeˬ laꞈ kʼoeˇ, nga maꞈ-ahˇ ciˬ tuˇ nehˬ laꞈ-euˬ meh.

¹⁸Sahˬpaˬ Miˬyehˇ-oˇ, nga maꞈ-ahˇ bi haw piˇ-eu gʼaˬ nawˇ tseˇ doˆ nehˬ laꞈ-euˬ meh. Iˇsaˬleˬlaˆ-euˬ Muiˬ-eu shawˇ-eu Miˬyehˇ-oˇ, nawˇ nga maꞈ-ahˇ sahˬ paˬ biꞈ laꞈ-euˬ meh.

¹⁹Aˇ hu ba yaw sahˇ laꞈ kʼoeˇ bi siˬ bi mawˇ-eu jeˬ laꞈ kʼoeˇ, nawˬ-ahˇ saˇ jaˇ ziꞈ-eu zaˬ kʼaˆ-ahˇ nawˇ heu loꞈ-ehˇ ehˇ-euˬ meh. “Tsawˇ myahˇ doˆ-eu yehˇ tiˬ gʼaˬ-ahˇ ngaˇ caw ba nehˬ-euˬ ma. Ngaˬ neh tseˇ doˆ-euˬ gʼaˬ-ahˇ sahˬ paˬ-euˬ nuiˇ mahˬ kʼoeˇ taˆ bi nuiˇ-euˬ ma.

²⁰Muiˬ-eu shawˇ-eu tsiˇ shehˆ daˆ nehˬ-awˇ, ngaˬ-euˬ zaˬ kʼaˆ Daˬbiˇ-ahˇ sahˬ paˬ ka nehˬ-euˬ ma.

²¹Ngaˬ-euˬ gʼaˬ aˬ yawꞈ nehˬ-ehˇ aˬ myah luꞈ bi jaˆ-awˇ, ngaˬ-euˬ baoˬ aˬ yawꞈ-ahˇ gʼaˬ biꞈ ma.

²²Muiˇ-eu deuˬ aˬ yawꞈ-ahˇ tiˬ jawˇ-iˬ maˬ gʼaˬ leˇ-aˇ. Haiˬ-eu deuˬ aˬ yawꞈ-ahˇ maˬ deuˆ gʼaˬ nya-aˇ.

²³Aˬ yawꞈ-ahˇ muiˇ-eu deuˬ-ahˇ ngaˇ kʼehˬ nehˬ-awˇ, aˬ yawꞈ-ahˇ bye-eu deuˬ-ahˇ ngaˇ sehꞈ ma.

²⁴Ngaˇ aˬ yawꞈ-ahˇ gaˬ-awˇ saˇ jaˇ ziꞈ ma. Aˬ myah luꞈ aˬ cawˬ kʼoeˇ taˆ gʼaˬ leˇ-eu gʼaˬ bi pyeuꞈ ma.

²⁵Aˬ yawꞈ-euˬ miˇ kʼahˬ bi huiˬ bi jeˇ laˇ-awˇ, Gʼahˇ ceh-euˬ iˬ ma laˆ shaˆ-ahˇ neh Uˇpaˬlaˇ lawˇ baˬ-ahˇ keuˆ ni bi jaˆ ma.

²⁶Aˬ yawꞈ ngaˬ-ahˇ heu loꞈ-ehˇ ehˇ tehꞈ-a. ‘Nawˇ-aˬ, ngaˬ-euˬ aˬ da hawˇ-eu ngaˬ-euˬ Miˬyehˇ ma. Ngaˬ-ahˇ haw piˇ-awˇ ka kʼoꞈ nehˬ laꞈ-eu gʼaˬ ma.’

²⁷Aˬ yawꞈ-ahˇ ngaˬ-euˬ aˬ li aˬ yuiꞈ yuiꞈ saˬ gʼaˬ bi geuꞈ-awˇ, sahˬ paˬ dawˬ tawˆ kʼoeˇ taˆ huiˬ dzehˬ-eu gʼaˬ bi geuꞈ ma.

²⁸Aˬ yawꞈ nehˬ-ehˇ dzaˬ taˬ-euˬ saˇ jaˇ-ahˇ ngaˇ aˬ myah luꞈ ziꞈ-awˇ, ngaˬ-euˬ dawˬ ma saˇ jaˇ aˬ yawꞈ gʼaˇ duˬ mˬ maˬ maˬ byaˆ zaˇ ziˇ bi ziꞈ ma.

²⁹Aˬ yawꞈ-euˬ dzoeˬ dzaˬ mˬ maˬ maˬ byaˆ zaˇ ziˇ ziꞈ-awˇ, aˬ yawꞈ-euˬ zaˬ deuˬ uˆ deuˬ aˬ myah luꞈ sahˬ paˬ geuꞈ tehꞈ-a.

³⁰Ehˇ kʼawꞈ aˬ yawꞈ-euˬ zaˬ deuˬ uˆ deuˬ ngaˬ-euˬ zahˇ dawˬ kʼoꞈ dawˬ-ahˇ maˬ caw teh-ehˇ, ngaˬ-euˬ ehˇ dawˬ maˬ naˇ haˬ ni dehꞈ naˇ,

³¹ngaˬ neh mehˬ nehˬ tsoˆ nehˬ-euˬ jeˬ-ahˇ aˬ yawꞈ maꞈ maˬ naˇ haˬ-ehˇ, ngaˬ-euˬ zahˇ sahˇ kʼoꞈ dawˬ kawˬ-ahˇ maˬ naˇ haˬ naˇ,

³²aˬ yawꞈ maꞈ-euˬ iˬ baˇ baˬ da neh ngaˇ kʼehˬ nehˬ-awˇ, aˬ yawꞈ maꞈ mˇ lehˬ-euˬ loꞈ-ehˇ bi daˬ ma.

³³Ehˇ kʼawꞈ Daˬbiˇ-ahˇ ngaˇ gaˬ-eu maˬ bi byoˆ-iˇ lehˇ, aˬ yawꞈ-ahˇ saˇ jaˇ ziꞈ ma.

³⁴Dzaˬ taˬ-euˬ dawˬ ma saˇ jaˇ-ahˇ maˬ puiˬ-ehˇ, kʼaˇ dzaˬ taˬ-euˬ tiˬ jeˬ-iˬ maˬ yuˇ kʼoꞈ.

³⁵Ngaˬ-euˬ muiˬ-eu shawˇ-eu tsawˇ myahˇ-ahˇ gʼoeˇ-awˇ mˬ maˬ maˬ byaˆ zaˇ ziˇ saˇ jaˇ dzaˬ tsehˆ gʼaˬ-euˬ loꞈ-ehˇ, Daˬbiˇ-ahˇ ngaˇ jaˬ myawꞈ maˬ myawꞈ.

³⁶Nahˇ ma maˬ byoˆ tsehˆ kʼoeˇ keuˆ ni, aˬ yawꞈ-euˬ zaˬ deuˬ uˆ deuˬ aˬ myah luꞈ dehꞈ-awˇ jawˇ-awˇ, aˬ yawꞈ-euˬ miˇ kʼahˬ-ahˇ ngaˇ haw piˇ ma.

³⁷Aˬ yawꞈ-euˬ miˇ kʼahˬ tiˬ jawˇ-iˬ maˬ byoˆ-iˇ-eu gaˇ kawˆ, mˬ taˆ tsehˬ-eu ba la kʼoeˇ siˬ, saˇ jaˇ ziꞈ-eu saˇ kiˇ ma.”

³⁸Ehˇ kʼawꞈ nawˬ neh tseˇ doˆ-euˬ sahˬ paˬ-ahˇ nawˇ nui ma pehˇ-eu meh. Aˬ yawꞈ-ahˇ nawˇ byehˇ dzeh nehˬ-euˬ meh.

³⁹Nawˬ-euˬ zaˬ kʼaˆ nehˬ-ehˇ dzaˬ taˬ-euˬ dawˬ ma saˇ jaˇ-ahˇ nawˇ byehˇ-awˇ, aˬ yawꞈ-euˬ shuiˇ uˬ kʼoˆ lah yaˬ-ahˇ biˬ pahˬ nehˬ-euˬ meh.

⁴⁰Aˬ yawꞈ-euˬ meuˬ lahˇ-ahˇ nawˇ laˆ byaˆ-awˇ, aˬ yawꞈ-euˬ taˆ-ahˇ laˆ cawˆ nehˬ-euˬ meh.

⁴¹Kʼaˇ iˇ kʼaˇ laˇ tsehˆ-eu deuˬ aˬ yawꞈ-euˬ myawˬ kʼoeˬ geuꞈ-awˇ, dawˬ peh jawˇ-eu deuˬ aˬ yawꞈ-ahˇ uiˇ-eu meh.

⁴²Muiˇ-eu deuˬ neh aˬ yawꞈ-ahˇ nawˇ bi gʼaˬ leˇ-awˇ, kʼoeˇ deuˬ-ahˇ nawˇ laˬ kʼaˬ bi cehˇ-euˬ meh.

⁴³Aˬ yawꞈ-euˬ guiˇ deuˆ-eu keu ka gaˇ dahˇ maˬ tsoeˬ ni bi pyeuꞈ-iˇ-awˇ, guiˇ deuˆ gaˇ bi smˬ-iˇ-euˬ meh.

⁴⁴Aˬ yawꞈ tuˆ tehˬ luꞈ-eu dzoeˬ dzaˬ gawˬ yoeˬ nawˇ yuˇ kʼoꞈ-awˇ, aˬ yawꞈ-euˬ nuiˇ mahˬ-ahˇ miˇ tsa ngawˬ coˬ nehˬ-euˬ meh.

⁴⁵Tsawˇ kʼaˆ maˬ kʼaˆ laˇ mi naˆ-ehˇ aˬ yawꞈ-ahˇ nawˇ bi mawˬ-iˇ-awˇ, nui saˇ maˬ oꞈ ni bi dehꞈ-euˬ meh.

⁴⁶Sahˬpaˬ Miˬyehˇ-oˇ, aˇ myah keuˆ ni dzuˇ zaꞈ-eu gʼeh te. Aˇ myah keuˆ ni nawˇ nui ma pehˇ-eu miˬ dzaˬ bi doꞈ-eu gʼeh te.

⁴⁷Ngaˬ-euˬ ziˇ aˇ naˆ ni nymˇ gaˇ noeˬ keuˆ nehˬ laꞈ-awˬ. Tsawˇ haˬ dawˬ tawˆ luꞈ nawˬ neh beh taˬ-euˬ gʼawˬ myahˇ ni maˬ gmˬ-eu shiˬ shaˬ jiˇ gʼawˇ mawˇ pyeuꞈ gaˇ noeˬ keuˆ nehˬ laꞈ-awˬ.

⁴⁸Tiˬ jawˇ-iˬ shiˇ-eu maˬ baw ni aˬ suˇ gʼaˬ dehꞈ nya ta. Tsawˇ haˬ zaˬ lmˬ bymˇ-ahˇ maˬ ya uˇ-iˇ ni yawˬ haˇ yawˬ ha aˬ suˇ gʼaˬ ziˇ lahˬ ka nya ta.

⁴⁹Sahˬpaˬ Miˬyehˇ-oˇ, yaw beh nawˬ neh bi mawˇ-euˬ nawˬ-euˬ gʼoeˇ-eu gaˬ-eu jeˬ aˬ gaˇ iˇ taˬ. Nawˬ neh Daˬbiˇ-ahˇ saˇ jaˇ dzaˬ taˬ-euˬ aˬ gaˇ jaˆ ta.

⁵⁰Nawˬ-euˬ zaˬ kʼaˆ pyeuꞈ-eu ngaˬ-ahˇ aˬ cawˬ yehˬ bawˬ-ehˇ jahˇ nehˬ laꞈ gaˇ taˬ ngehˇ nehˬ laꞈ. Miˬyehˇ maˬ baw-eu deuˬ neh yaˬ kʼehˇ yaˬ-euˬ dawˬ-ahˇ ya daˬ luꞈ gaˇ taˬ ngehˇ nehˬ laꞈ.

⁵¹Sahˬpaˬ Miˬyehˇ-oˇ, nawˬ-ahˇ muiˇ-eu deuˬ nawˬ neh tseˇ doˆ-euˬ sahˬ paˬ-ahˇ dawˬ doeˇ ngehˬ luꞈ meh. Aˬ yawꞈ kʼaˇ iˇ gaˇ ngehˬ doeˇ ehˇ doeˇ luꞈ meh.

⁵²Sahˬpaˬ Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ-awˬ. Aˬmiˬ. Aˬmiˬ.