Read Akha Ja ceuˬ 90 Bible Online

Ja ceuˬ 90 - Akha bible

Ja ceuˬ 90

¹JA CEUˬ-EU SAHˬ BOꞈ OEˬ TAꞈ TIˬ TAꞈ (Moˇseˬ neh guiˬ lahˬ shaˇ-euˬ dawˬ) Sahˬpaˬ Miˬyehˇ-oˇ, tiˬ ziˇ saˇ-iˬ tiˬ ziˇ nawˇ nga maꞈ-euˬ nymˇ loꞈ-ehˇ pyeuꞈ-eu ma.

²Gawˬ jawˬ gawˬ duˇ deuˬ-ahˇ nawˇ maˬ beh mi naˆ-ehˇ, miˇ tsaˬ tahˬ kʼawˇ-ahˇ nawˇ maˬ beh mi naˆ-ehˇ, nawˇ Miˬyehˇ pyeuꞈ luꞈ-awˇ, mˬ maˬ maˬ byaˆ zaˇ ziˇ Miˬyehˇ pyeuꞈ tehꞈ-a.

³Aˬ yawꞈ pyeuꞈ doˆ laˇ duˬ-ahˇ gʼoꞈ-iˇ-awˬ lehˇ tsawˇ haˬ zaˬ-ahˇ nawˇ dawˬ biꞈ-awˇ, miˇ tsaˬ paˇ bi pyeuꞈ kʼoꞈ-iˇ-eu meh.

⁴Tiˬ heˇ kʼoꞈ nawˬ-euˬ mehˬ shi tiˬ nah tehꞈ meh. Aˇ yamˬ kʼoeˇ myah ni gʼeh-eu dzeuˇ yaꞈ-eu miˇ nah-ahˇ duˇ-awˇ, uˬ ciꞈ paw tiˬ kʼehˇ laˇ kʼehˬ buˬ-iˇ-euˬ loꞈ-ehˇ tehꞈ meh.

⁵Iˇ jeuˬ jeuˬ-eu loꞈ-ehˇ nga maꞈ-ahˇ nawˇ hehˇ byoˆ gʼeh-awˇ, ngaˬ maꞈ-euˬ ziˇ yuꞈ maˆ maˆ-eu loˆ ni tehꞈ meh. Nga maꞈ yaw dehꞈ dehꞈ-eu jeˬ-aˬ, uˬ shawˬ paw dehꞈ doˆ laˇ-awˇ,

⁶nah gʼahˇ paw loˆ laˇ-awˇ aˇ yehˆ yehˆ kʼawꞈ, uˬ ciꞈ uˬ taw paw nyoeˬ-iˇ koˆ-iˇ-eu yaˇ moꞈ loꞈ-ehˇ, tiˬ kʼehˇ kʼehˬ gmˬ-eu tehꞈ miˇ-a.

⁷Nawˬ-euˬ nui pehˇ nga maꞈ-ahˇ laˆ cawˆ-awˇ, nawˬ-euˬ nui kʼaˬ nga maꞈ-ahˇ laˆ guˆ laꞈ-eu meh.

⁸Nga maꞈ-euˬ iˬ baˇ-ahˇ nawˬ-euˬ mehˬ shi nawˇ yuˇ taˬ-awˇ, nga maꞈ neh mˇ kʼoeˬ-euˬ iˬ baˇ deuˬ nawˇ mawˇ gaˇ pah taˬ-euˬ meh.

⁹Nawˬ-euˬ nui pehˇ baˬ da neh nga maꞈ-euˬ ziˇ nymˇ le-awˇ, saꞈ gʼawˇ ka-eu loꞈ-ehˇ jiˇ le miˇ-a.

¹⁰Aˇ kʼoꞈ shiꞈ tseˇ tehꞈ-ehˇ ya dehꞈ byah-awˇ, ziˇ shehˇ-eu deuˬ yehꞈ tseˇ dehꞈ byah kʼawꞈ, guˆ-eu gaˆ-eu jeˬ hawˇ-eu noeˬ shaˬ noeˬ zahˬ-eu jeˬ tehꞈ-ehˇ puˬ le miˇ-a. Tiˬ kʼehˇ laˇ kʼehˬ laꞈ kʼoeˇ ziˇ dehꞈ jiˇ-awˇ, piˬ-iˇ byoˆ-iˇ miˇ-a.

¹¹Nawˇ nui ma pehˇ-eu baoˬ aˇ naˆ ni kʼaˆ-eu aˬ suˇ gʼaˬ yaw duˬ duˬ-ehˇ tahˬ puˬ haw-awˇ, nawˬ-euˬ nui pehˇ aˇ naˆ ni guˆ paˬ-ehˇ gʼeh-eu aˬ suˇ gʼaˬ siˬ duˬ ta.

¹²Nga maꞈ noeˬ gahˇ laˇ nya ni, nga maꞈ-euˬ ziˇ aˇ naˆ ni nymˇ-eu mehˬ nehˬ tsoˆ nehˬ laꞈ-awˬ.

¹³Nawˬ-euˬ nui pehˇ aˇ myah ni bi gmˬ-eu gʼeh te. Sahˬpaˬ Miˬyehˇ-oˇ, nawˬ-euˬ zaˬ kʼaˆ deuˬ-ahˇ gʼawˬ shaˬ gaˬ nehˬ laꞈ-awˬ.

¹⁴Nga maꞈ-euˬ tiˬ ziˇ laˬ kʼaˬ cehˇ-awˇ caˇ dawˬ caˇ nya ni, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ yawˬ shawˬ na luꞈ nga maꞈ laꞈ kʼoeˇ bi byah laˇ-awˬ.

¹⁵Nga maꞈ shaˬ zahˬ naꞈ dui dui-euˬ aˇ kʼoꞈ aˇ la deuˬ laꞈ kʼoeˇ, nawˬ neh nga maꞈ-ahˇ biꞈ laꞈ-euˬ noeˬ shaˬ-eu jeˬ myaˆ ni, laˬ kʼaˬ cehˇ-eu jeˬ paˇ biꞈ laꞈ-awˬ.

¹⁶Nawˬ-euˬ zaˬ kʼaˆ pyeuꞈ-eu nga maꞈ-ahˇ, kʼaˆ jeˬ-ehˇ gʼeh-eu jeˬ pah mehˬ nehˬ laꞈ-awˬ. Nga maꞈ-euˬ zaˬ deuˬ uˆ deuˬ-ahˇ kʼawꞈ, baoˬ huiˬ-eu nawˬ-euˬ yaw shehꞈ kʼahˬ sehˇ bi mawˇ-awˬ.

¹⁷Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ guiˬ lahˬ yaw dzahˇ bi keuˆ le-awˬ. Nga maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, guiˬ lahˬ bi baw le-awˬ.