Read Akha Ja ceuˬ 91 Bible Online

Ja ceuˬ 91 - Akha bible

Ja ceuˬ 91

¹Miˬyehˇ-ahˇ kʼaˇ tahˬ shaˇ-eu tsawˇ haˬ deuˬ, Baoˬ huiˬ-eu Miˬyehˇ haw piˇ-eu uˬ moˆ kʼaˇ jawˇ-eu tsawˇ haˬ deuˬ

²aˬ yawꞈ-ahˇ heu loꞈ-ehˇ ehˇ nya meh. “Nawˇ-aˬ, ngaˬ-ahˇ ngehˬ gʼeh haw piˇ-eu gʼaˬ meh. Nawˇ-aˬ ngaˬ-euˬ Miˬyehˇ meh. Nawˬ-ahˇ ngaˇ gʼoe-eu ma.”

³Maˬ mawˇ nya-eu guˆ-eu gaˆ-eu jeˬ dawˬ tawˆ luꞈ hawˇ-eu, shiˇ-eu naˇ-eu jeˬ dawˬ tawˆ luꞈ laꞈ kʼoeˇ, aˬ yawꞈ nawˬ-ahˇ haw piˇ tehꞈ-a.

⁴Aˬ yawꞈ-euˬ aˬ dahˇ neh nawˬ-ahˇ kʼawˆ kaˬ-awˇ, aˬ yawꞈ bo saˆ ngehˬ gʼeh-eu laꞈ kʼoeˇ nawˇ nui saˇ oꞈ tehꞈ-a. Aˬ yawꞈ-euˬ saˇ jaˇ ziꞈ-eu jeˬ nawˬ-ahˇ haw piˇ nehˬ laꞈ tehꞈ-a.

⁵Uˬ ciꞈ paw nawˇ kʼahˬ lahˇ kʼaˇ maˬ za-ehˇ, nah gʼahˇ paw laˆ coeˬ laˆ ciˆ laˇ gaˇ maˬ ya guˆ-a.

⁶Yaw zahˇ ngeh keuˆ le-eu naˇ gawˇ gawˇ ma-ahˇ ya dzeuˇ-iˇ-awˇ, nah gʼahˇ paw sehꞈ laˇ nya-eu yaw haiˬ jeˬ-ahˇ ya buˬ-iˇ tehꞈ-a.

⁷Nawˬ-euˬ dawˬ peh tiˬ heˇ gʼaˬ ya shiˇ-awˇ, nawˬ-euˬ yaw taw tiˬ muiˇ gʼaˬ ya shiˇ kʼawꞈ, nawˬ-ahˇ tiˬ jeˬ-iˬ maˬ guˬ laˇ-a.

⁸Haiˬ-eu tsawˇ haˬ deuˬ-ahˇ aˬ joˆ-ehˇ kʼehˬ nehˬ gaˇ nawˇ ya haw mawˇ tehꞈ-a.

⁹Sahˬpaˬ Miˬyehˇ haw piˇ-eu uˬ moˆ nawˇ jawˇ-awˇ, Huiˬ dui mahˇ dui dui-eu gʼaˬ neh bi haw piˇ-euˬ miˇ neh,

¹⁰luˬ-iˇ seˇ-iˇ-eu jeˬ-ahˇ nawˇ ya dzeuˇ-iˇ-awˇ, guˆ-eu gaˆ-eu jeˬ nawˬ-euˬ nymˇ dawˬ peh maˬ oe keuˆ-a.

¹¹Nawˇ kʼaˇ iˇ kʼaˇ laˇ gaˇ bi haw piˇ-eu gʼaˇ duˬ, mˬ taˆ gʼaˬ kʼehˇ deuˬ-ahˇ Miˬ yehˇ dawˬ biꞈ tehꞈ-a.

¹²Kʼaˬ lo-ahˇ nawˇ maˬ ya tahˬ naˇ-eu gʼaˇ duˬ, mˬ taˆ gʼaˬ kʼehˇ kʼoeˇ deuˬ nawˬ-ahˇ ciˬ diˇ tehꞈ-a.

¹³Aˇ laˬ jaˬ shiˇ hawˇ-eu aˇ lawˇ-ahˇ nawˇ tsawˬ nawˬ nawˬ tehꞈ-a. Guˆ laˇ paˬ-ehˇ gʼeh-eu aˇ laˬ jaˬ shiˇ hawˇ-eu doꞈ kʼaˆ-eu aˇ lawˇ-ahˇ, nawˇ kʼoeˇ loꞈ-ehˇ tsawˬ nawˬ nawˬ tehꞈ-a.

¹⁴Miˬ yehˇ heu loꞈ-ehˇ ehˇ-eu meh. Ngaˬ-ahˇ gaˬ-eu deuˬ-ahˇ ngaˇ ka kʼoꞈ-awˇ, ngaˬ-ahˇ Sahˬpaˬ Miˬyehˇ meh lehˇ kʼaˇ siˬ nya-eu deuˬ-ahˇ ngaˇ haw piˇ ma.

¹⁵Aˬ yawꞈ maꞈ ngaˬ-ahˇ kuˇ ngeh ngaˇ naˇ haˬ nehˬ ma. Aˬ yawꞈ maꞈ shaˬ ngeh zahˬ ngeh ngaˇ aˬ yawꞈ maꞈ nehˬ-ehˇ jawˇ-awˇ, ka kʼoꞈ-awˇ ciˬ huiˬ ciˬ mahˇ nehˬ ma.

¹⁶Ziˇ baw za-eu guiˬ lahˬ biꞈ-awˇ, ngaˬ-euˬ ka kʼoꞈ-eu guiˬ lahˬ yaw dzahˇ biꞈma.