Read Akha Ja ceuˬ 92 Bible Online

Ja ceuˬ 92 - Akha bible

Ja ceuˬ 92

¹Sahˬpaˬ Miˬyehˇ-oˇ, nawˬ-euˬ guiˬ lahˬ-ahˇ ja ceuˬ-eu jeˬ aˇ naˆ ni muiˬ-eu nga. Huiˬ dui mahˇ dui dui-eu Miˬyehˇ-oˇ, nawˬ-ahˇ taˬ huiˬ taˬ mahˇ-eu caˇ dawˬ caˇ-eu jeˬ aˇ naˆ ni jaˬ-eu nga.

²Maˬ tsehˆ leˇ-eu nawˬ-euˬ gʼoeˇ-eu gaˬ-eu jeˬ-ahˇ yawˬ shawˬ na luꞈ maˬ ehˇ, nawˇ saˇ jaˇ ziꞈ-eu jeˬ-ahˇ yawˬ miˇ na luꞈ maˬ ehˇ,

³deuˇ-mˬ di, bawˬ law baw-awˇ ja ceuˬ-eu jeˬ, aˇ naˆ ni muiˬ-eu nga.

⁴Sahˬpaˬ Miˬyehˇ-oˇ, nawˬ neh mˇ-euˬ huiˬ-eu gaˇ deuˬ, ngaˬ-ahˇ laˬ kʼaˬ bi cehˇ laꞈ-euˬ meh. Nawˬ neh mˇ-euˬ gaˇ baˬ da neh, ngaˇ laˬ kʼaˬ cehˇ-awˇ caˇ-eu ma.

⁵Sahˬpaˬ Miˬyehˇ-oˇ, nawˬ neh mˇ-euˬ gaˇ deuˬ aˇ naˆ ni huiˬ-eu nga. Nawˬ-euˬ nui noeˬ aˇ naˆ ni naꞈ-eu nga.

⁶Maˬ gahˇ-eu tsawˇ haˬ deuˬ gaˇ kʼoeˇ deuˬ-ahˇ maˬ siˬ nya-ehˇ, aˬ dzawˬ aˇ gah deuˬ maˬ noeˬ mawˇ nya-a.

⁷Haiˬ-eu tsawˇ haˬ deuˬ yaˇ moꞈ mehˇ laˇ gaˇ duˇ-awˇ, maˬ tsaˬ maˬ dawˇ-eu tsawˇ haˬ deuˬ baw le za le kʼawꞈ, dawˬ tawˆ luꞈ ya luˬ ya seˇ-iˇ jiˇ tehꞈ-a.

⁸Aˬ jeˬ miˇ neh ehˇ naˇ , Sahˬpaˬ Miˬyehˇ nawˇ mˬ maˬ maˬ byaˆ zaˇ ziˇ, dawˬ tawˆ luꞈ kʼoeˇ taˆ huiˬ dzehˬ-eu gʼaˬ meh.

⁹Nawˬ-ahˇ muiˇ-eu deuˬ ya shiˇ jiˇ-awˇ, haiˬ-eu tsawˇ haˬ dawˬ tawˆ luꞈ ya smˬ-iˇ jiˇ tehꞈ-a lehˇ nga maꞈ siˬ nya ma.

¹⁰Nawˇ ngaˬ-ahˇ nehꞈ nyoˬ loꞈ-ehˇ gʼaˬ bi ahˇ-awˇ, laˬ kʼaˬ ya cehˇ-eu guiˬ lahˬ biꞈ laꞈ-euˬ meh.

¹¹Ngaˬ-ahˇ muiˇ-eu deuˬ smˬ-iˇ gaˇ ngaˇ ya mawˇ-awˇ, haiˬ-eu tsawˇ haˬ deuˬ ngoeˇ-eu teˇ saˇ ya gaˬ-euˬ ma.

¹²Yaw tsaˬ yaw dawˇ tsawˇ haˬ deuˬ daoˇ aˇ bawˇ loꞈ-ehˇ mehˇ laˇ-awˇ, Leˬbaˬnoˬ gawˬ jawˬ-ahˇ dehꞈ-eu siˬ daˬ miˬ shuˬ aˇ bawˇ loꞈ-ehˇ goˇ leˇ tehꞈ-a. Yaw tsaˬ yaw dawˇ tsawˇ haˬ deuˬ-aˬ,

¹³Sahˬpaˬ Miˬyehˇ-euˬ nymˇ laꞈ kʼoeˇ ka taˬ-awˇ, aˬ dui-euˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ mehˇ laˇ-eu laꞈ kʼoeˇ,

¹⁴aˬ myah luꞈ nyoeˇ jawꞈ ni jaˆ-awˇ, bawˇ mawˬ mawˬ laˇ ngeh keuˆ ni aˇ siˬ siˬ-eu aˇ bawˇ kʼoeˇ deuˬ-ahˇ duˇ tehꞈ-a.

¹⁵Ngaˬ-ahˇ haw piˇ-eu gʼaˬ pyeuꞈ-eu Sahˬpaˬ Miˬyehˇ, tsaˬ dui dawˇ dui dui-awˇ yaw lehˬ jeˬ maˬ jaˆ gaˇ, gaˇ kawˆ heu pah mehˬ luꞈ meh.