Read Akha Ja ceuˬ 96 Bible Online

Ja ceuˬ 96 - Akha bible

Ja ceuˬ 96

¹Sahˬpaˬ Miˬyehˇ-ahˇ caˇ dawˬ yaw shuiꞈ caˇ-awˇ ja ceuˬ-awˬ. Miˇ kʼahˬ dawˬ tawˆ luꞈ Sahˬpaˬ Miˬyehˇ-ahˇ caˇ-awˇ ja ceuˬ-awˬ.

²Sahˬpaˬ Miˬyehˇ-ahˇ ja ceuˬ-eu caˇ dawˬ caˇ-awˇ, aˬ yawꞈ-euˬ tsawˇ myahˇ-ahˇ ciˬ huiˬ ciˬ mahˇ-awˬ. Aˬ yawꞈ ka kʼoꞈ nehˬ laꞈ-euˬ laˬ kʼaˬ cehˇ-eu guiˬ lahˬ dawˬ, yawˬ nah na luꞈ ja gaˬ-awˬ.

³Aˬ yawꞈ-euˬ yaw shehꞈ kʼahˬ sehˇ gaˇ kawˆ, tsawˇ jeuˬ dawˬ tawˆ luꞈ-ahˇ dzawˇ nehˬ-awˇ, aˬ yawꞈ neh mˇ-euˬ huiˬ-eu gaˇ deuˬ, tsawˇ haˬ dawˬ tawˆ luꞈ-ahˇ dzawˇ nehˬ-awˬ.

⁴Sahˬpaˬ Miˬyehˇ huiˬ dui mahˇ dui dui-awˇ, ja ceuˬ dui dui paˬ-ehˇ gʼeh-eu meh. Miˬyehˇ dawˬ tawˆ luꞈ kʼoeˇ taˆ, aˬ yawꞈ-ahˇ yaw zeu baw-awˬ.

⁵Aˬ cawˬ tsawˇ jeuˬ-euˬ miˬyehˇ deuˬ-aˬ, tahˬ pahˬ aˬ ma mawˇ kawˇ tehꞈ meh. Ehˇ kʼawꞈ, aˬ dui-euˬ Sahˬpaˬ Miˬyehˇ-aˬ, mˬ beh-euˬ yaw sahˇ gʼaˬ meh.

⁶Baoˬ yaw shehꞈ kʼahˬ sehˇ aˬ yawꞈ-euˬ tiˬ jawˬ jaˆ-awˇ, aˬ yawꞈ-euˬ Uˬ duˬ tahˬ nymˇ nymˇ ma laꞈ kʼoeˇ, baoˬ hawˇ-eu haw muiˬ-eu jeˬ byah luꞈ-eu meh.

⁷Miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ, Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ-euˬ baoˬ yaw shehꞈ kʼahˬ sehˇ-ahˇ ciˬ huiˬ ciˬ mahˇ-awˬ.

⁸Yaw shehꞈ kʼahˬ sehˇ huiˬ-eu Sahˬpaˬ Miˬyehˇ-euˬ tsawˇ myahˇ-ahˇ ja ceuˬ-awˬ. Damˬ nehˬ-eu jeˬ yuˇ-awˇ, aˬ yawꞈ-euˬ Uˬ duˬ tahˬ nymˇ nymˇ ma-ahˇ laˇ-awˬ.

⁹Muiˬ-eu shawˇ-eu Gʼaˬ doˆ le ngeh, aˬ yawꞈ mehˬ shi awˆ byaˆ-awˬ. Miˇ tsaˬ dawˬ tawˆ luꞈ aˬ yawꞈ mehˬ shi yaw dzuˬ dzuˬ-awˬ.

¹⁰Sahˬpaˬ Miˬyehˇ uˆ lahˇ luꞈ-eu gaˇ kawˆ, miˇ tsaˬ tahˬ kʼawˇ-ahˇ aˬ yawꞈ ziꞈ dah ni ciˬ tsaˬ taˬ-awˇ, maˬ luˆ laˇ nya-eu gaˇ kawˆ hawˇ-eu, tsawˇ haˬ zaˬ-ahˇ aˬ yawꞈ dawˇ coe ni yaˇ kʼaˬ daˇ-eu gaˇ kawˆ deuˬ, tsawˇ jeuˬ dawˬ tawˆ luꞈ-ahˇ ja mehˬ nehˬ-awˬ.

¹¹Mˬ hawˇ-eu miˇ tsaˬ laˬ kʼaˬ cehˇ-awˬ. Iˬ ma laˆ shaˆ hawˇ-eu kʼoeˇ gaˇ kʼaˇ uˇ-eu yawˬ jeˬ na luꞈ, teˇ saˇ mahˇ doˆ laˇ-awˬ.

¹²Deh ga hawˇ-eu kʼoeˇ gaˇ kʼaˇ jaˆ kʼaˇ jawˇ-eu jeˬ, laˬ kʼaˬ cehˇ dui dui-awˬ. Sahˬ kʼaˆ-ahˇ dehꞈ-eu aˇ bawˇ deuˬ laˬ kʼaˬ cehˇ-awˇ guˇ tehꞈ-a.

¹³Sahˬpaˬ Miˬyehˇ miˇ tsaˬ-ahˇ uˆ lahˇ le ngeh, kʼoeˇ loꞈ-ehˇ guˇ tehꞈ-a. Miˇ tsaˬ zaˬ dawˬ tawˆ luꞈ-ahˇ yaw tsaˬ yaw dawˇ laꞈ kʼoeˇ uˆ lahˇ-awˇ, dawˇ coe ni yaˇ kʼaˬ daˇ nehˬ tehꞈ-a.