Read Akha Ja ceuˬ 97 Bible Online

Ja ceuˬ 97 - Akha bible

Ja ceuˬ 97

¹Sahˬpaˬ Miˬyehˇ sahˬ paˬ pyeuꞈ-eu meh. miˇ tsaˬ tahˬ kʼawˇ laˬ kʼaˬ cehˇ-awˬ. Iˬ ma laˆ shaˆ iˇ jaw lahˇ deuˬ kʼawꞈ laˬ kʼaˬ cehˇ-awˬ.

²Mˬ dmˇ hawˇ-eu zahˇ tsui ni gʼeh-eu jeˬ, aˬ yawꞈ-ahˇ jawˬ lahˇ taˬ-euˬ meh. Yaw tsaˬ yaw dawˇ yaw muiˬ yaw jaˬ laꞈ kʼoeˇ, aˬ yawꞈ uˆ lahˇ luꞈ-eu meh.

³Aˬ yawꞈ-euˬ mehˬ shi miˬ dzaˬ cah-awˇ, tiˬ jawˬ jawˇ-eu muiˇ-eu deuˬ-ahˇ puiˆ sehꞈ-eu meh.

⁴Aˬ yawꞈ-euˬ mˬ jeˬ tsawˬ tehˆ miˇ tsaˬ-ahˇ yaw shehꞈ bya-awˇ, miˇ tsaˬ yaw dzuˬ dzuˬ-eu meh.

⁵Gawˬ jawˬ deuˬ Sahˬpaˬ Miˬyehˇ mehˬ shi, miˇ tsaˬ dawˬ tawˆ luꞈ-euˬ Sahˬpaˬ Miˬyehˇ mehˬ shi, byaˬ shahˬ loꞈ-ehˇ guiˇ ka-eu meh.

⁶Aˬ yawꞈ-euˬ yaw tsaˬ yaw dawˇ gaˇ kawˆ mˬ neh ja mehˬ nehˬ-awˇ, tsawˇ jeuˬ dawˬ tawˆ luꞈ aˬ yawꞈ-euˬ yaw shehꞈ kʼahˬ sehˇ ya mawˇ-eu meh.

⁷Miˬyehˇ dawˬ tawˆ luꞈ Sahˬpaˬ Miˬyehˇ mehˬ shi ya awˆ byaˆ-awˇ, tahˬ pahˬ aˬ ma mawˇ kawˇ-ahˇ uˬ duˬ kʼaˇ tahˬ-eu deuˬ, ya shaꞈ dawˇ dui dui meh.

⁸Sahˬpaˬ Miˬyehˇ nawˇ yaˇ kʼaˬ daˇ-eu baˬ da neh, Ziˇoˬ meuˬ-ahˇ jawˇ-eu tsawˇ haˬ deuˬ laˬ kʼaˬ ya cehˇ-awˇ, Yuˇdaˆ miˇ kʼahˬ-ahˇ jaˆ-eu meuˬ deuˬ byawˬ dui dui meh.

⁹Baoˬ huiˬ-eu Sahˬpaˬ Miˬyehˇ-oˇ, nawˇ-aˬ, miˇ tsaˬ dawˬ tawˆ luꞈ kʼoeˇ taˆ uˆ lahˇ-eu gʼaˬ meh. Miˬyehˇ dawˬ tawˆ luꞈ naˆ maˬ tseˇ, nawˇ huiˬ dui mahˇ dui dui-eu meh.

¹⁰Yaw haiˬ jeˬ-ahˇ bye-eu tsawˇ haˬ deuˬ-ahˇ Sahˬpaˬ Miˬyehˇ gaˬ-eu meh. Aˬ yawꞈ-euˬ tsawˇ haˬ deuˬ maˬ ya luˬ ma ya seˇ-iˇ ni, aˬ yawꞈ haw piˇ-eu meh. Haiˬ-eu tsawˇ haˬ deuˬ-euˬ laꞈ-ahˇ, aˬ yawꞈ maꞈ-ahˇ ka kʼoꞈ nehˬ-eu meh.

¹¹Yaw tsaˬ yaw dawˇ tsawˇ haˬ kʼoeˇ taˆ yaw shehꞈ bya-awˇ, muiˬ-eu jaˬ-eu tsawˇ haˬ deuˬ laˬ kʼaˬ ya cehˇ-eu meh.

¹²Sahˬpaˬ Miˬyehˇ neh mˇ-euˬ gaˇ baˬ da neh, yaw tsaˬ yaw dawˇ tsawˇ haˬ dawˬ tawˆ luꞈ laˬ kʼaˬ cehˇ-awˬ. Muiˬ-eu shawˇ-eu Miˬyehˇ neh mˇ-euˬ gaˇ-ahˇ noeˬ keuˆ-awˇ, aˬ yawꞈ-euˬ guiˬ lahˬ-ahˇ ja ceuˬ-awˬ.