Read Akha Dawˬ daˬ 10 Bible Online

Dawˬ daˬ 10 - Akha bible

Dawˬ daˬ 10

¹Heu-aˬ, Sawˇlaˬmoˬ-euˬ dawˬ daˬ deuˬ meh. Nui ma-ahˇ noeˬ-eu aˬ li-aˬ, aˬ da-ahˇ nui saˇ bi oꞈ-awˇ, aˬ dzawˬ dzawˬ-eu aˬ li-aˬ, aˬ ma-ahˇ shaˬ zahˬ ciˬ pi-eu meh.

²Maˬ tsaˬ maˬ dawˇ-eu laꞈ kʼoeˇ laˆ za-euˬ pyuˇ shuiˇ gaˇ dahˇ maˬ tsoeˬ-a. Ehˇ kʼawꞈ, yaw tsaˬ yaw dawˇ jeˬ-aˬ, shiˇ gaˇ ka kʼoꞈ nya-eu meh.

³Yaw tsaˬ yaw dawˇ tsawˇ haˬ-ahˇ Sahˬpaˬ Miˬ yehˇ maˬ bi mehꞈ-a. Ehˇ kʼawꞈ, haiˬ-eu tsawˇ haˬ deuˬ loˬ-eu jeˬ aˬ yawꞈ maˬ biꞈ nehˬ-a.

⁴Yaw doeˇ doeˇ-eu nymˇ gawˬ aˬ laꞈ, iˇ shaˬ shaˬ-eu jeˬ beuˬ doˆ-awˇ, maˬ naˬ leˇ ni mˇ-eu aˬ laꞈ smˇ muiˬ gaˇ ma beuˬ dahˇ-eu meh.

⁵Yaw naꞈ-ehˇ cehˇ laˆ luiˆ-eu gʼaˬ dehꞈ dzaˬ-awˇ, cehˇ laˆ luiˆ yamˬ-ahˇ yuꞈ-eu gʼaˬ daˬ ga-eu meh.

⁶Yaw tsaˬ yaw dawˇ tsawˇ haˬ-euˬ uˬ duˬ-ahˇ guiˬ lahˬ keuˆ-awˇ, maˬ tsaˬ ma dawˇ-eu tsawˇ haˬ-euˬ kʼaˬ meh-ahˇ, yaw haiˬ jeˬ myuˇ luꞈ-eu meh.

⁷Yaw tsaˬ yaw dawˇ tsawˇ haˬ-ahˇ noeˬ keuˆ-eu jeˬ guiˬ lahˬ baw-eu meh. Ehˇ kʼawꞈ, haiˬ-eu tsawˇ haˬ-euˬ tsawˇ myahˇ buꞈ-iˇ tehꞈ-a.

⁸Tsawˇ gahˇ ahˇ-eu deuˬ dawˬ mehˬ dawˬ tsoˆ-ahˇ naˇ haˬ geuꞈ-eu meh. Ehˇ kʼawꞈ, kʼahˬ sehˇ jehˆ-eu tsawˇ haˬ deuˬ ya cawˆ-iˇ tehꞈ-a.

⁹Yaw sui yaw dawˇ deuˬ kʼahˬ lahˇ kʼaˇ maˬ za-a. Ehˇ kʼawꞈ dehꞈ bahˬ dehꞈ lahˇ-eu deuˬ dzuˇ zaꞈ kʼaˇ maˬ za-a.

¹⁰Yaw tsaˬ yaw dawˇ jeˬ yuˇ zaꞈ-eu deuˬ iˬ dehꞈ iˬ ceh laˆ doˆ-awˇ, bya cehˆ ni ngehˬ-eu tmˇ-eu deuˬ tsaˬ leˇ tsahˇ leˇ tehꞈ-a.

¹¹Yaw tsaˬ yaw dawˇ tsawˇ haˬ-euˬ dawˬ, dehꞈ-eu saꞈ laˇ lawˇ gawˆ pyeuꞈ-awˇ, maˬ tsaˬ maˬ dawˇ-eu tsawˇ haˬ-euˬ dawˬ laꞈ kʼoeˇ, yaw haiˬ jeˬ toeˆ ahˇ taˬ-euˬ meh.

¹²Bye-eu jeˬ iˬ dehˬ iˬ ceh bi doˆ laˇ-awˇ, gʼoeˇ-eu gaˬ-eu jeˬ yaw lehˬ dawˬ tawˆ luꞈ-ahˇ dehˬ kaˬ nya-eu meh.

¹³Noeˬ dahˇ doe-eu deuˬ-euˬ mehˬ luˬ, tsawˇ gahˇ ahˇ-eu dawˬ doˆ le-awˇ, aˬ dzawˬ aˇ gah dahˇ teˇ daˇ cuiˇ oꞈ meh.

¹⁴Nui gahˇ ahˇ-eu deuˬ zaˬ siˬ tsawˇ gahˇ poˆ uiˬ-awˇ, aˬ dzawˬ aˇ gah dawˬ ngehˬ ngeh, yaw cawˆ jeˬ kuˇ uiˬ gaˇ duˇ-eu meh.

¹⁵Smˇ muiˬ zaˬ-euˬ myawˬ gahˬ-aˬ, ziꞈ dah ni tsoˆ taˬ-euˬ meuˬ-ahˇ duˇ-awˇ, iˇ shaˬ zaˬ-euˬ myawˬ kuˬ-aˬ, cawˆ-iˇ-euˬ meuˬ-ahˇ duˇ-eu meh.

¹⁶Yaw tsaˬ yaw dawˇ tsawˇ haˬ-euˬ gʼaˬ mahˇ poeˬ-aˬ, aˬ yawꞈ-ahˇ bi dehꞈ dzaˬ laˇ-awˇ, haiˬ-eu tsawˇ haˬ deuˬ neh laˆ za-euˬ pyuˇ shuiˇ-aˬ, iˬ baˇ bi doˆ laˇ-eu meh.

¹⁷Mehˬ-eu tsoˆ-eu jeˬ-ahˇ naˇ haˬ-eu tsawˇ haˬ-aˬ, dehꞈ-eu gaˇ ma-ahˇ cah luꞈ-awˇ, maˬ mehˬ maˬ tsoˆ paˇ nya-eu tsawˇ haˬ-aˬ, gaˇ bahˬ iˇ luꞈ-eu meh.

¹⁸Bye-eu jeˬ yuˇ zaꞈ taˬ-euˬ tsawˇ haˬ jaˬ myawꞈ myawꞈ-awˇ, yaw doeˇ ja byah-eu tsawˇ haˬ aˬ dzawˬ meh.

¹⁹Dawˬ ja myaˬ gaˇ, iˬ baˇ doˆ laˇ-awˇ, dawˬ tmˇ cuiˆ-eu tsawˇ haˬ yaw gahˇ meh.

²⁰Tsawˇ muiˬ-euˬ dawˬ pyuˇ naˆ maˬ tseˇ poeˬ-awˇ, tsawˇ doeˇ-euˬ nui ma aˇ poeˬ maˬ baw-a.

²¹Tsawˇ jaˬ-euˬ dawˬ pu-ahˇ mˇ cu-awˇ, aˬ dzawˬ aˇ gah bawˬ toˆ yawˬ haˇ yawˬ ha laˆ sehꞈ-eu meh.

²²Sahˬpaˬ Miˬyehˇ-euˬ guiˬ lahˬ baˬ da neh baw le za le-eu meh. Kʼaˇ mˇ kʼaˇ za za nya-eu maˬ ngeuˇ-a.

²³Aˬ dzawˬ deuˬ yaw lehˬ jeˬ-ahˇ cehˇ gʼa-awˇ, yaw gahˇ deuˬ zaˬ siˬ tsawˇ gahˇ-ahˇ byawˬ gʼa-eu meh.

²⁴Tsawˇ doeˇ deuˬ kʼoeˇ taˆ yawˬ ha guˆ dzehˬ-eu jeˬ keuˆ le-awˇ, tsawˇ muiˬ deuˬ yawˬ ha geuꞈ mawꞈ dzehˬ-eu jeˬ za-eu meh.

²⁵Jaˬ lehˇ lehˇ ma oe-awˇ haiˬ-eu deuˬ-ahˇ hehˇ dzaˬ gʼeh kʼawꞈ, yaw tsaˬ yaw dawˇ deuˬ ziꞈ dah ni jawˇ-eu meh.

²⁶Nymˇ gawˬ-ahˇ gʼoe dzaˬ naˇ, nawˬ-ahˇ seuˬ kmˬ kmˬ-awˇ, myaˆ nuiˆ-ahˇ uˬ kʼoeˬ kʼoeˬ-eu loꞈ-ehˇ, nawˇ maˬ jawˇ tehˬ coeˇ-a.

²⁷Sahˬpaˬ Miˬyehˇ-ahˇ guˆ-eu tsawˇ haˬ ziˇ baw-awˇ, haiˬ-eu tsawˇ haˬ deuˬ ziˇ maˬ ya dehꞈ jiˇ-a.

²⁸Yaw tsaˬ yaw dawˇ deuˬ noeˬ tmˬ-eu laˬ kʼaˬ cehˇ-eu jeˬ keuˆ le-awˇ, haiˬ-eu tsawˇ haˬ noeˬ tmˬ-eu jeˬ yawꞈ ngehꞈ meh.

²⁹Yaw sui yaw dawˇ deuˬ-ahˇ Sahˬpaˬ Miˬyehˇ haw piˇ-awˇ, yaw haiˬ jeˬ mˇ-eu deuˬ-ahˇ aˬ yawꞈ laˆ cawˆ-eu meh.

³⁰Yaw tsaˬ yaw dawˇ deuˬ ziꞈ dah ni ya jawˇ kʼawꞈ, yaw haiˬ deuˬ jawˇ duˬ dah kʼaˇ maˬ za-a.

³¹Yaw tsaˬ yaw dawˇ deuˬ-euˬ kʼaˬ meh-ahˇ zaˬ siˬ tsawˇ gahˇ ahˇ-eu dawˬ doˆ le tehꞈ-a. Ehˇ kʼawꞈ, haiˬ-eu dawˬ ngehˬ-eu mehˬ laˇ bi toˆ tsehˆ dzeh tehꞈ-a.

³²Tsawˇ muiˬ-euˬ kʼaˬ meh-ahˇ dawˬ muiˬ doˆ le kʼawꞈ, tsawˇ doeˇ-euˬ mehˬ luˬ-ahˇ dawˬ doeˇ ga gʼeu-eu meh.