Read Akha Dawˬ daˬ 11 Bible Online

Dawˬ daˬ 11 - Akha bible

Dawˬ daˬ 11

¹Mehˇ shuiˇ shuiˇ dzaˬ-eu paˆ yawˬ-ahˇ Sahˬpaˬ Miˬyehˇ bye-awˇ, tsaˬ-eu byah-eu paˆ yawˬ-ahˇ aˬ yawꞈ nui kʼahˇ shiˇ-eu meh.

²Nui ma huiˬ-eu mahˇ-eu mehˬ nah, nui ma cawˆ-eu jeˬ caw-awˇ, nui ma nahˬ yu ni gʼeh-eu mehˬ nah, zaˬ siˬ tsawˇ gahˇ caw-eu meh.

³Muiˬ-eu jaˬ-eu tsawˇ haˬ deuˬ yawˬ ha-euˬ yaw sui yaw dawˇ jeˬ neh bi haw piˇ-awˇ, saˇ jaˇ maˬ ziꞈ-eu tsawˇ haˬ deuˬ yawˬ ha-euˬ nui gʼoꞈ neh bi laˆ sehꞈ-eu meh.

⁴Dehꞈ-eu shiˇ-eu jeˬ puˬ le ngeh, pyuˇ shuiˇ myawˬ gahˬ nawˬ-ahˇ ngehˬ maˬ gʼeh nehˬ nya-a. Yaw tsaˬ yaw dawˇ jeˬ tehꞈ-ehˇ nawˬ-ahˇ ka kʼoꞈ nya meh.

⁵Yaw tsaˬ yaw dawˇ jeˬ tsawˇ muiˬ-ahˇ gaˇ ma laˆ saˆ nehˬ kʼawꞈ, tsawˇ doeˇ deuˬ yawˬ ha neh mˇ-euˬ yaw haiˬ jeˬ neh bi deh coˬ-eu meh.

⁶Yaw sui yaw dawˇ deuˬ yawˬ ha neh mˇ-euˬ yaw tsaˬ yaw dawˇ jeˬ neh bi ka kʼoꞈ-awˇ, saˇ jaˇ maˬ jawˇ-eu deuˬ yawˬ ha-euˬ nui kʼahˇ neh bi paꞈ cuꞈ-eu meh.

⁷Haiˬ-eu tsawˇ haˬ shiˇ ngeh, aˬ yawꞈ neh noeˬ tmˬ-euˬ jeˬ guiˇ byoˆ jiˇ-eu meh. Pyuˇ shuiˇ myawˬ gahˬ-ahˇ nui ma huiˬ-eu jeˬ, aˇ saˬ saˬ laˇ ngeh yawꞈ ngehꞈ meh.

⁸Yaw tsaˬ yaw dawˇ deuˬ guˆ-eu gaˆ-eu jeˬ-ahˇ ya dzeuˇ-iˇ kʼawꞈ, haiˬ-eu tsawˇ haˬ deuˬ maˬ dzeuˇ-iˇ nya-a.

⁹Miˬyehˇ-ahˇ maˬ gʼoe-eu tsawˇ haˬ-euˬ kʼaˬ meh. aˬ cawˬ-ahˇ laˆ cawˆ nya kʼawꞈ, yaw tsaˬ yaw dawˇ deuˬ-euˬ zaˬ siˬ tsawˇ gahˇ aˬ cawˬ-ahˇ ka kʼoꞈ nya-eu meh.

¹⁰Yaw tsaˬ yaw dawˇ tsawˇ haˬ guiˬ lahˬ za ngeh, meuˬ meuˬ lah-ehˇ laˬ kʼaˬ cehˇ-awˇ, haiˬ-eu tsawˇ haˬ deuˬ shiˇ ngeh, laˬ kʼaˬ cehˇ-awˇ guˇ-eu meh.

¹¹Yaw sui yaw dawˇ deuˬ dawˬ ngehˬ gʼeh nehˬ ngeh, meuˬ meuˬ lah-ehˇ poeˬ dui dui leˇ-eu meh. Ehˇ kʼawꞈ, haiˬ-eu tsawˇ haˬ-euˬ kʼaˬ meh baˬ da neh, meuˬ kʼoeˇ meuˬ cawˆ-iˇ nya-eu meh.

¹²Aˬ cawˬ-ahˇ ja bu ja doeˇ-eu tsawˇ haˬ gaˇ dahˇ maˬ tsoeˬ-a. Tsawˇ gahˇ ahˇ-eu tsawˇ haˬ ciˬ cuˇ ni jawˇ-eu meh.

¹³Mehˬ boeˬ myaˬ-eu tsawˇ haˬ zaꞈ taˬ-euˬ jeˬ ja doˆ-awˇ, jah coeˇ-eu tsawˇ haˬ maˬ ja paˬ-ehˇ gʼeh-eu jeˬ zaꞈ taˬ nya-eu meh.

¹⁴Sheuˬ gʼeh-eu gʼaˬ maˬ jawˇ ngeh, tsawˇ jeuˬ byoˆ le-awˇ, mehˬ-eu tsoˆ-eu tsawˇ haˬ myaˬ ngeh, guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za-a.

¹⁵Aˬ cawˬ-euˬ dziˇ dzoˆ kamˬ nehˬ-eu gʼaˬ, yaw duˬ baw ni ya shaˬ-awˇ, ciˬ cuˇ ni jawˇ-eu gʼaˬ yaw saˇ tehꞈ-a.

¹⁶Gʼawˬ shaˬ gaˬ nya-eu zaˬ miˬ zaˬ-ahˇ aˬ cawˬ yaw zeu baw-awˇ, aˇ poeˬ maˬ baw-eu zaˬ miˬ zaˬ-aˬ, aˬ cawˬ-euˬ dawˬ doeˇ daˬ duˬ meh. Nymˇ gawˬ gawˬ-eu kʼaˬ dzeˇ zaˬ pyuˇ maˬ ahˇ-a. Ehˇ kʼawꞈ, maˬ naˬ leˇ ni mˇ-eu kʼaˬ dzeˇ zaˬ-aˬ, smˇ muiˬ muiˬ laˇ-eu meh.

¹⁷Gʼawˬ shaˬ gaˬ nya-eu tsawˇ haˬ-aˬ, yawˬ ha-ahˇ muiˬ laˇ duˬ jaˆ-awˇ, gʼawˬ shaˬ maˬ gaˬ nya-eu tsawˇ haˬ-aˬ, yawˬ ha-ahˇ coeˬ laˇ duˬ jaˆ-eu meh.

¹⁸Haiˬ-eu tsawˇ haˬ deuˬ mˇ poeˬ shaˇ poeˬ maˬ baw-ehˇ, yaw tsaˬ yaw dawˇ tsawˇ haˬ neh mˇ-euˬ jeˬ guiˬ lahˬ za-eu yaw duˬ baw meh.

¹⁹Yaw tsaˬ yaw dawˇ jeˬ-ahˇ tsuˆ tehˬ taˬ-euˬ deuˬ ya dehꞈ-awˇ, yaw haiˬ jeˬ mehˬ nah caw teh-eu deuˬ ya shiˇ tehꞈ-a.

²⁰Nui ma maˬ shawˇ-eu deuˬ-ahˇ Sahˬpaˬ Miˬyehˇ nui daˆ daˆ-awˇ, shawˇ jehˆ ni dehꞈ-eu deuˬ-ahˇ aˬ yawꞈ nui kʼahˇ shiˇ-eu meh.

²¹Haiˬ-eu tsawˇ haˬ kʼehˬ-eu kʼaˆ-eu jeˬ-ahˇ maˬ dzeuˇ-iˇ nya-ehˇ, yaw tsaˬ yaw dawˇ tsawˇ haˬ ka kʼoꞈ-eu jeˬ za meh lehˇ siˬ duˬ-awˬ.

²²Aˇ gʼehˇ muiˬ-awˇ yehˬ bawˬ sehˇ lu-ehˇ dehꞈ-eu zaˬ miˬ zaˬ-aˬ, aˬ zaꞈ-euˬ mehˬ law-ahˇ duꞈ taˬ-euˬ shuiˇ laꞈ duꞈ-ahˇ duˇ-eu meh.

²³Yaw tsaˬ yaw dawˇ tsawˇ haˬ-euˬ nui kʼahˇ-aˬ, yaw muiˬ jeˬ-ahˇ aˇ saˬ saˬ-awˇ, haiˬ-eu tsawˇ haˬ-euˬ noeˬ tmˬ duˬ-aˬ, nui ma laˆ jaˆ-eu jeˬ-ahˇ aˇ saˬ saˬ-eu meh.

²⁴Tsawˇ haˬ tiˬ gʼaˬ na, tsawˇ tsiˇ maˬ tsiˇ ni gamꞈ nehˬ kʼawꞈ, smˇ muiˬ paˇ muiˬ dzehˬ laˇ-eu meh. Tiˬ gʼaˬ na tsawˇ tsiˇ tsiˇ-awˇ laꞈ tuˆ tsiˇ kʼawꞈ, iˇ shaˬ shaˬ le-eu meh.

²⁵Aˬ cawˬ-ahˇ biꞈ-eu tsawˇ haˬ baw le za le tehꞈ-a. Aˬ cawˬ-ahˇ caw ba-eu tsawˇ haˬ, yawˬ ha-ahˇ paˇ bi caw ba kʼoꞈ tehꞈ-a.

²⁶Cehˇ poeˬ kʼaˆ laˇ gaˇ dawˬ-awˇ cehˇ maˬ ahˬ-eu gʼaˬ-ahˇ aˬ cawˬ yaˬ kʼehˇ yaˬ-awˇ, cehˇ ahˬ nehˬ-eu gʼaˬ-ahˇ aˬ cawˬ ja ceuˬ-eu meh.

²⁷Yaw muiˬ jeˬ toˆ-eu tsawˇ haˬ myaˆ pyawˬ naˇ mehˇ jaˆ-awˇ, yaw doeˇ jeˬ toˆ-eu gʼaˬ ya shaˬ ya zahˬ tehꞈ-a.

²⁸Yawˬ ha-euˬ pyuˇ shuiˇ myawˬ gahˬ-ahˇ nui ma huiˬ-eu tsawˇ haˬ, aˇ paꞈ paꞈ kuˬ ga-iˇ gaˇ duˇ-awˇ, yaw tsaˬ yaw dawˇ tsawˇ haˬ baw nmˬ nmˬ laˇ tehꞈ-a.

²⁹Yawˬ ha-euˬ nymˇ jiˇ-ahˇ laˆ shaˬ-eu tsawˇ haˬ uˆ kʼawꞈ kʼawꞈ-iˇ-awˇ, aˬ dzawˬ aˇ gah deuˬ tsawˇ gahˇ ahˇ-eu deuˬ-euˬ zaˬ kʼaˆ ya geuꞈ tehꞈ-a.

³⁰Yaw tsaˬ yaw dawˇ jeˬ-euˬ aˇ siˬ-aˬ, dehꞈ-eu saˬ laˇ aˇ bawˇ pyeuꞈ-awˇ, aˬ dzawˬ aˇ gah gah-eu jeˬ-euˬ aˇ siˬ-aˬ, shiˇ-eu jeˬ pyeuꞈ-eu meh.

³¹Yaw tsaˬ yaw dawˇ tsawˇ haˬ deuˬ, miˇ tsaˬ kʼoeˇ taˆ dehꞈ ngeh guiˬ lahˬ za naˇ, haiˬ-eu tsawˇ haˬ deuˬ kʼehˬ-eu kʼaˆ-eu jeˬ-ahˇ maˬ ya daˬ-ehˇ aˬ gaˇ iˇ nmˇ.