Read Akha Dawˬ daˬ 14 Bible Online

Dawˬ daˬ 14 - Akha bible

Dawˬ daˬ 14

¹Nymˇ jiˇ-ahˇ zaˬ miˬ zaˬ-euˬ tsawˇ gahˇ neh tsoˆ doˆ-awˇ, aˬ byahˬ deuˬ neh bi deh pyaˆ-eu meh.

²Yaw sui yaw dawˇ deuˬ Sahˬpaˬ Miˬyehˇ-ahˇ guˆ-awˇ, maˬ sui maˬ dawˇ-eu deuˬ aˬ yawꞈ-ahˇ yaw zeu maˬ baw-a.

³Aˬ dzawˬ aˇ gah-euˬ dawˬ daˇ cuiˇ shaˇ diˬ-awˇ, tsawˇ gahˇ ahˇ-eu deuˬ neh ngehˬ-euˬ dawˬ yawˬ ha-ahˇ mˇ cu-eu meh.

⁴Deh ma mˇ-eu aˬ nyoˬ maˬ jawˇ naˇ cehˇ jiˇ yawꞈ ngehꞈ meh. Aˬ nyoˬ-euˬ gʼaˬ baˬ da neh cehˇ jaˆ le-eu meh.

⁵Saˇ jaˇ jawˇ-eu tsawˇ kaˬ jaˬ myawꞈ maˬ myawꞈ-a. Saˇ jaˇ maˬ jawˇ-eu tsawˇ kaˬ saꞈ gʼawˇ gaˇ jaˬ myawꞈ ahˇ-eu meh.

⁶Kʼahˬ sehˇ jehˆ-eu tsawˇ haˬ tsawˇ gahˇ maˬ ahˇ laˇ-a. Noeˬ mawˇ nya-eu tsawˇ haˬ tsawˇ gahˇ ahˇ laˇ-eu yaw awˬ meh.

⁷Aˬ dzawˬ aˇ gah-ahˇ gaˇ jaw jaw-awˬ. Nawˬ-euˬ gʼaˇ duˬ lahˬ laˇ duˬ maˬ jaˆ-a.

⁸Nui gahˇ ahˇ-eu deuˬ-euˬ tsawˇ gahˇ, dehꞈ jeˬ dehꞈ kawˆ tseˇ paˆ nya-awˇ, aˬ dzawˬ aˇ gah bym-eu jaˬ myawꞈ mehˇ shuiˇ meh.

⁹Aˬ dzawˬ aˇ gah iˬ baˇ-ahˇ maˬ yahˇ-ehˇ, yaw sui yaw dawˇ deuˬ iˬ baˇ-ahˇ yahˇ pawˇ-eu meh.

¹⁰Noeˬ shaˬ kʼawꞈ yawˬ ha kʼaˆ behˆ, noeˬ saˇ kʼawꞈ yawˬ ha shaˬ bymˇ meh. Suˇ ngehˬ gʼeh-ehˇ yawˬ kʼawˇ maˬ piˇ-a.

¹¹Tsawˇ doeˇ-euˬ nymˇ muiˬ coˬ-iˇ kʼawꞈ, tsawˇ muiˬ-euˬ sehˬ gʼawˆ maˬ pyaˆ-iˇ-a.

¹²Dehꞈ-eu gaˇ ma duˇ-euˬ gaˇ muiˬ, shiˇ-eu gaˇ ma ngeuˇ law ma jeˇ.

¹³Kʼaˇ uiˇ ngeh laˬ kʼaˬ cehˇ-eu maˬ ngeuˇ-a. Nui cehˇ mehˬ nah myaˆ biˇ caw-eu meh.

¹⁴Tsawˇ doeˇ laꞈ taꞈ yaw cawˆ jeˬ keuˆ le-awˇ, tsawˇ muiˬ mehˬ shi guiˬ lahˬ jaˆ tehꞈ-a.

¹⁵Dawˇ ga deuˬ kʼaˇ ehˇ kʼaˇ jah jah-awˇ, yaw gahˇ deuˬ kuiˇ toꞈ shaˇ noeˬ-awˇ ciˬ-eu meh.

¹⁶Tsawˇ gahˇ ahˇ-eu deuˬ yaw haiˬ jeˬ yahˇ dzeuˇ nya kʼawꞈ, dawˇ ga deuˬ maˬ noeˬ duˬ mi naˆ-ehˇ aˬ laꞈ keuˆ leˇ-eu meh.

¹⁷Nui ma yaw suˬ deuˬ aˬ laꞈ kawˇ-awˇ, tsawˇ gahˇ byah-eu deuˬ nui ma yaw mahˇ meh.

¹⁸Dawˇ ga deuˬ yawˬ ha-euˬ lawˇ behˇ ya baꞈ-awˇ, noeˬ siˬ nya-eu deuˬ tsawˇ gahˇ guiˬ lahˬ za tehꞈ-a.

¹⁹Tsawˇ doeˇ deuˬ tsawˇ muiˬ-ahˇ ya tahˬ shaˇ-awˇ, yaw haiˬ deuˬ yaw tsaˬ yaw dawˇ-euˬ gʼoˆ kʼehˬ-ahˇ ya shaˇ ju leˇ tehꞈ-a.

²⁰Iˇ shaˬ zaˬ-ahˇ aˬ yuiꞈ aˬ nyiˇ maˬ haw nahˇ-ehˇ, smˇ muiˬ zaˬ cawˬ maˬ cawˬ jiˇ coeˇ-a.

²¹Yawˬ ha-ahˇ taꞈ-eu deuˬ-ahˇ maˬ haw nahˇ-eu tsawˇ haˬ iˬ baˇ mˇ gaˇ duˇ-awˇ, iˇ shaˬ zaˬ-ahˇ gʼawˬ shaˬ gaˬ-eu tsawˇ haˬ guiˬ lahˬ huiˬ-eu meh.

²²Yaw haiˬ jeˬ poˆ-eu tsawˇ haˬ yaw lehˬ toˆ gaˇ duˇ-awˇ, yaw muiˬ jeˬ mˇ-eu tsawˇ haˬ-ahˇ aˬ cawˬ gʼoeˇ tehꞈ-a.

²³Leh jeh-awˇ mˇ-eu mehˬ shi guiˬ lahˬ keuˆ-awˇ, nymˇ gawˬ mehˬ lawꞈ mehˬ shi dzaˬ-eu maˬ jaˆ-a.

²⁴Zaˬ siˬ tsawˇ gahˇ ahˇ-eu deuˬ shuiˇ uˬ kʼoˆ za-awˇ, aˬ dzawˬ aˇ gah-euˬ shaˬ bymˇ yaw lehˬ yaw ca tehꞈ meh.

²⁵Muiˬ-eu tsawˇ kaˬ aˬ cawˬ-ahˇ ka kʼoꞈ-awˇ, nui gʼoꞈ ahˇ-eu tsawˇ kaˬ, jaˬ myawꞈ mehˇ shuiˇ meh.

²⁶Sahˬpaˬ Miˬyehˇ-ahˇ guˆ-eu jeˬ-aˬ, nymˇ tsoˆ ziꞈ gaˇ duˇ-awˇ, zaˬ ziˇ keuˆ ni gmˬ-eu meh.

²⁷Sahˬpaˬ Miˬyehˇ-ahˇ guˆ-eu jeˬ-aˬ, dehꞈ-eu saꞈ laˇ lawˇ gawˆ pyeuꞈ-awˇ, shiˇ-eu lahˇ ju-ahˇ gaˇ jaw jaw nya-eu meh.

²⁸Sahˬ paˬ-euˬ kʼahˬ sehˇ miˇ kʼahˬ zaˬ kʼoeˇ taˆ jaˆ-awˇ, miˇ kʼahˬ zaˬ maˬ jawˇ-eu sahˬ paˬ yawꞈ ngehꞈ meh.

²⁹Oˇ dzeuˇ nya-eu tsawˇ haˬ zaˬ siˬ tsawˇ gahˇ byah-awˇ, nui ma yaw suˬ deuˬ yawˬ ha-euˬ yaw lehˬ pah pyehˬ-eu meh.

³⁰Nui saˇ oꞈ-eu jeˬ jawˇ saˇ bi doˆ-awˇ, myaˆ naˆ-eu jeˬ shaˬ yoeˬ peuˬ-iˇ-eu naˇ gawˇ meh.

³¹Yaw shaˬ zaˬ-ahˇ kʼehˬ-eu jeˬ, Beh-euˬ yaw sahˇ-ahˇ coeˬ leˇ-awˇ, yaw shaˬ zaˬ-ahˇ ngehˬ gʼeh-eu jeˬ, aˬ yawꞈ-ahˇ uˬ duˬ tahˬ gaˇ duˇ-eu meh.

³²Yaw haiˬ deuˬ-euˬ bawˬ toˆ yawˬ haˇ yawˬ ha paꞈ lah-awˇ, yaw tsaˬ yaw dawˇ mˇ-eu guiˬ lahˬ, tsawˇ shiˇ uˬ kʼawˇ dzeuˇ-iˇ-eu meh.

³³Noeˬ siˬ noeˬ mawˇ nya-eu deuˬ-euˬ nui ma laꞈ kʼoeˇ, zaˬ siˬ tsawˇ gahˇ jawˇ kʼaˇ za-awˇ, aˬ dzawˬ aˇ gah deuˬ-euˬ nui ma laꞈ kʼoeˇ, zaˬ siˬ tsawˇ gahˇ maˬ jawˇ nya-a.

³⁴Tsawˇ jeuˬ bi huiˬ bi mahˇ laˇ-eu zaˬ siˬ tsawˇ gahˇ pyeuꞈ-awˇ, tsawˇ jeuˬ byoˆ le ni mˇ-eu gʼaˬ iˬ baˇ meh.

³⁵Tsawˇ gahˇ ahˇ-eu zaˬ kʼaˆ-ahˇ sahˬ paˬ laˬ kʼaˬ cehˇ-awˇ, daˬ ga-eu zaˬ kʼaˆ-ahˇ sahˬ paˬ kʼehˬ-eu meh.