Read Akha Dawˬ daˬ 15 Bible Online

Dawˬ daˬ 15 - Akha bible

Dawˬ daˬ 15

¹Dawˬ nahˬ nui pehˇ laˆ awˆ-awˇ, dawˬ kʼaˆ nui pehˇ laˆ nyehˆ-eu meh.

²Zaˬ siˬ mehˬ laˇ tsawˇ gahˇ myahˬ-awˇ, aˇ gah kʼaˬ meh dawˬ doeˇ kʼaˇ-eu meh.

³Miˬyehˇ mehˬ shi baˇ zaꞈ maˬ jaˆ. Muiˬ muiˬ doeˇ doeˇ yehˇ mawˇ jiˇ meh.

⁴Dawˬ muiˬ maˬ shiˇ jaˆ gʼaˬ. Dawˬ doeˇ shaˆ shiˇ mehˬ dzaˬ.

⁵Da dawˬ maˬ naˇ zaˬ yo tsawˇ kʼawˇ. Da dawˬ naˇ-eu zaˬ yo tsawˇ gahˇ lahˬ-mˇ jeˇ.

⁶Tsawˇ muiˬ nymˇ jiˇ pyuˇ shuiˇ duˬ gahˬ maˬ byoˆ, tsawˇ doeˇ myawˬ gahˬ yaw sahˇ laˆ shaˬ mˇ jeˇ

⁷Zaˬ siˬ mehˬ laˇ tsawˇ gahˇ dzaˇ lahˬ, dawˇ ga nui ma jaˬ lehˇ kʼehˬ bahˬ.

⁸Tsawˇ muiˬ neh shaˇ-euˬ shaˇ dawˬ-ahˇ Sahˬpaˬ Miˬyehˇ nui kʼahˇ shiˇ-awˇ, tsawˇ doeˇ neh lawˇ-euˬ shehˇ-euˬ jeˬ-ahˇ aˬ yawꞈ bye-eu meh.

⁹Haiˬ-eu deuˬ neh mˇ-euˬ gaˇ-ahˇ, Sahˬpaˬ Miˬyehˇ nui daˆ daˆ-awˇ, yaw tsaˬ yaw dawˇ mˇ-eu tsawˇ haˬ deuˬ-ahˇ, aˬ yawꞈ gaˬ-eu meh.

¹⁰Dehꞈ bahˬ-eu tsawˇ haˬ-ahˇ yaw kʼaˆ-ehˇ kʼehˬ nehˬ-awˇ, maˬ mehˬ paˇ nya-eu deuˬ ya shiˇ tehꞈ-a.

¹¹Miˇ oˆ miˇ taˆ kʼaˇ pyeuꞈ luꞈ-eu dawˬ tawˆ luꞈ, Sahˬ paˬ Miˬ yehˇ siˬ jiˇ-eu-aˬ, tsawˇ haˬ zaˬ-euˬ nui noeˬ aˬ joˆ-ehˇ beuˬ zaꞈ nya nmˇ.

¹²Aˬ dzawˬ aˇ gah-ahˇ maˬ mehˬ paˇ nya-a. Siˬ dzehˬ nya dzehˬ gaˇ maˬ gʼoe-a.

¹³Laˬ kʼaˬ cehˇ-eu nui ma myaˆ pyawˬ bi shiˬ-awˇ, noeˬ shaˬ-eu nui ma myaˆ pyawˬ bi nyoeˬ-eu meh.

¹⁴Zaˬ siˬ zaˬ, tsawˇ gahˇ poˆ, aˇ gah zaˬ, aˬ jaꞈ jaꞈ.

¹⁵zaˬ coeˬ zaˬ shaˬ lehˆ-euˬ maˬ baw-eu loꞈ-ehˇ, nui saˇ oꞈ-eu deuˬ byawˬ saˬ byawˬ li-euˬ maˬ baw-a.

¹⁶Pyuˇ shuiˇ jaˆ myaˬ-awˇ noeˬ kʼahˇ mahˇ-eu deuˬ-aˬ, maˬ jaˆ kʼawꞈ Sahˬpaˬ Miˬyehˇ-ahˇ guˆ-eu deuˬ maˬ tawˬ-a.

¹⁷Bye-eu tsawˇ haˬ nehˬ-ehˇ mawˇ neˇ sehꞈ dzaˬ-eu-aˬ, gʼoeˇ-eu tsawˇ haˬ nehˬ-ehˇ dzaˇ nyoeˇ dzaˬ-euˬ maˬ tawˬ-a.

¹⁸Nui ma yaw suˬ deuˬ iˬ dehˬ iˬ ceh laˆ doˆ-awˇ, nui ma yaw mahˇ deuˬ nui jaˆ laˆ byoˆ-eu meh.

¹⁹Nymˇ gawˬ-euˬ gaˇ ma yaˇ moꞈ nawˆ byoˆ-awˇ, yaw sui yaw dawˇ deuˬ-euˬ gaˇ ma juˇ tsui ni jaˆ-eu meh.

²⁰Zaˬ yo yaw muiˬ aˬ da nui saˇ oꞈ-awˇ, zaˬ yo yaw lehˬ aˬ ma-ahˇ laˆ shaˬ-eu meh.

²¹Tsawˇ doeˇ yaw doeˇ jeˬ-ahˇ laˬ kʼaˬ cehˇ-awˇ, tsawˇ muiˬ yaw muiˬ jeˬ mˇ-eu meh.

²²Suˇ dawˬ maˬ naˇ-aˬ, yaw lehˬ myaˬ-awˇ, tseˇ dawˬ yaˇ dawˬ naˇ-eu guiˬ lahˬ baw-eu meh.

²³dawˬ tsaˬ tmˇ-eu nui saˇ bi oꞈ-awˇ, dawˬ muiˬ ngeh-eu laˬ kʼaˬ bi cehˇ-eu meh.

²⁴Zaˬ siˬ gaˇ ma dehꞈ-eu saꞈ laˇ, shiˇ-eu miˇ kʼahˬ jaw dzeuˇ-eu meh.

²⁵Nui ma huiˬ-eu gʼaˬ-euˬ nymˇ-ahˇ Sahˬpaˬ Miˬyehˇ deh pyaˆ kʼawꞈ, miˬ coeˬ miˬ ma-euˬ kʼmˇ cehˇ maˬ laˆ nyi nehˬ-a.

²⁶Yaw haiˬ deuˬ-euˬ nui noeˬ-ahˇ Sahˬpaˬ Miˬyehˇ nui daˆ daˆ-awˇ, yaw sui yaw dawˇ deuˬ-euˬ dawˬ aˬ yawꞈ-ahˇ laˬ kʼaˬ bi cehˇ-eu meh.

²⁷Myawꞈ dzaˬ shuiˇ dzaˬ-eu deuˬ yaw ha nymˇ jiˇ laˆ shaˬ-awˇ, laꞈ nmˬ maˬ yuˇ-eu deuˬ ziˇ baw-eu meh.

²⁸Yaw tsaˬ yaw dawˇ nui ma dawˬ muiˬ tseˇ-awˇ, yaw haiˬ kʼaˬ meh dawˬ doeˇ tahˬ kʼawˬ-eu meh.

²⁹Yaw haiˬ deuˬ-ahˇ Sahˬpaˬ Miˬyehˇ gaˇ mahˇ kaˬ-awˇ, tsawˇ muiˬ shaˇ dawˬ aˬ yawꞈ naˇ haˬ-eu meh.

³⁰Myaˆ pyawˬ yaw bya nui ma-ahˇ laˆ saˆ-awˇ, dawˬ muiˬ shaˬ yoeˬ-ahˇ laˆ saˆ-eu meh.

³¹Dawˬ mehˬ dawˬ tsoˆ gʼoˆ geuꞈ-eu tsawˇ haˬ, zaˬ siˬ tsawˇ gahˇ ahˇ-eu meh.

³²Dawˬ mehˬ maˬ naˇ haˬ-ehˇ-aˬ, yaw ha-ahˇ laˆ shaˬ-awˇ, dawˬ tsoˆ-ahˇ noeˬ poˆ-eu-aˬ, tsawˇ gahˇ lahˬ-mˇ jeˇ.

³³Sahˬpaˬ Miˬyehˇ-ahˇ guˆ-eu-aˬ, zaˬ siˬ tsawˇ gahˇ za-awˇ, nui nahˬ nui yu mehˬ hu aˬ cawˬ yaw zeu baw-eu jeˬ jaˆ-mˇ jeˇ.