Read Akha Dawˬ daˬ 17 Bible Online

Dawˬ daˬ 17 - Akha bible

Dawˬ daˬ 17

¹Nui saˇ maˬ oꞈ-eu nymˇ jiˇ-ahˇ dzaˬ byawˬ dawˇ byawˬ-eu naˆ maˬ tseˇ, ciˬ cuˇ ni gʼeh-eu nymˇ jiˇ-ahˇ hawˬ tahˬ puiˆ dzaˬ-eu zaˬ dzehˬ meh.

²Tsawˇ gahˇ ahˇ-eu zaˬ kʼaˆ, daˬ ga-eu aˬ li maˬ tseˇ tawˬ-awˇ, jeˬ biˇ tiˬ paˆ za-eu yaw duˬ baw meh.

³Shuiˇ hawˇ-eu pyuˇ-ahˇ miˬ dzaˬ neh lawˬ haw-awˇ, tsawˇ haˬ zaˬ-euˬ nui ma-ahˇ Sahˬpaˬ Miˬyehˇ lawˬ haw-eu meh.

⁴Yaw haiˬ deuˬ dawˬ doeˇ-ahˇ jah-awˇ, jaˬ myawꞈ deuˬ mehˇ shuiˇ tawˆ leˇ-eu meh.

⁵Iˇ shaˬ zaˬ-ahˇ dawˬ doeˇ ngehˬ-eu jeˬ, beh-euˬ yaw sahˇ-ahˇ coeˬ leˇ-awˇ, tsawˬ toeˬ iˇ gaˇ kʼaˬ lo lahˬ nehˬ-eu deuˬ, kʼehˬ-eu kʼaˆ-eu jeˬ-ahˇ maˬ dzeuˇ-iˇ-a.

⁶Tsawˇ mawˬ-euˬ kʼahˬ sehˇ oeˬ paˬ oeˬ ma pyeuꞈ-awˇ, zaˬ-euˬ kʼahˬ sehˇ aˬ da meh.

⁷Tsawˇ doeˇ kʼaˬ meh dawˬ muiˬ maˬ doˆ-ehˇ, tsawˇ muiˬ kʼaˬ meh dawˬ lehˬ maˬ tmˇ-a.

⁸Laˬ nmꞈ nmꞈ-eu jeˬ maw loˬ loˬ gaˇ duˇ-awˇ, kʼaˇ jahˇ kʼaˇ pyeuꞈ pyeuꞈ-eu meh.

⁹Yaw lehˬ jeˬ-ahˇ iˬ baˇ pyehˬ nya-eu tsawˇ haˬ, gʼoeˇ-eu tsawˇ haˬ bi myaˬ laˇ-awˇ, yaw lehˬ ja poˆ poˆ-eu tsawˇ haˬ, gʼawˬ-iˇ gʼehˇ-iˇ ni mˇ-eu meh.

¹⁰Aˬ dzawˬ aˇ gah-ahˇ tiˬ yaˇ laꞈ diˬ-eu naˆ maˬ tseˇ, zaˬ siˬ tsawˇ gahˇ ahˇ-eu gʼaˬ-ahˇ mehˬ-eu tiˬ dawˬ, nui ma bi paˇ laˇ nya-eu meh.

¹¹Haiˬ-eu tsawˇ haˬ yaw cawˆ jeˬ tehꞈ-ehˇ mˇ-eu miˇ neh, haiˬ dui dui-eu tsawˇ kaˬ-ahˇ, aˬ yawꞈ jawˇ gaˇ pyehˬ gʼeh tehꞈ-a.

¹²Aˬ dzawˬ aˇ gah yaw haiˬ jeˬ mˇ gaˇ tahˬ puˬ leˇ-eu-aˬ, zaˬ bi nyehꞈ byoˆ-euˬ kʼaˬ hmˇ aˬ ma-ahˇ tahˬ pu-eu naˆ maˬ tseˇ doeˇ-eu meh.

¹³Yawˬ muiˬ jeˬ-ahˇ yaw doeˇ jahˇ kʼoꞈ-eu deuˬ-euˬ nymˇ jiˇ laꞈ kʼoeˇ yaw haiˬ jeˬ keuˆ le-eu maˬ tsehˆ leˇ-a.

¹⁴Yaˇ kʼaˬ mehˬ dzaˬ iˇ tsahˇ daˬ paˆ gaˇ duˇ-eu miˇ neh, naꞈ ngeh neh ya dehˬ tsoeˬ-eu meh.

¹⁵Yaw lehˬ deuˬ-ahˇ laˆ law nehˬ-eu jeˬ hawˇ-eu, yaw tsaˬ yaw dawˇ deuˬ-ahˇ yaw lehˬ no-eu jeˬ, nyiˬ jeˬ luꞈ-ahˇ Sahˬpaˬ Miˬyehˇ maˬ haw nahˇ-a.

¹⁶Nui ma-ahˇ maˬ noeˬ-eu aˬ dzawˬ aˇ gah deuˬ, zaˬ siˬ tsawˇ gahˇ poˆ-eu pyuˇ laˆ jiˇ kʼawꞈ, tiˬ jeˬ-iˬ gaˇ dahˇ maˬ tsoeˬ-a.

¹⁷Cawˬ yaw muiˬ yamˬ maˬ tseˇ ni gʼoeˇ-awˇ, mehˇ nmˇ-aˬ, shaˬ zahˬ caw pi-eu gʼaˇ duˬ meh.

¹⁸Aˬ cawˬ-euˬ dziˇ dzoˆ shaˇ baꞈ-eu tsawˇ haˬ, nui ma-ahˇ maˬ noeˬ-eu tsawˇ haˬ meh.

¹⁹Iˬ baˇ-ahˇ gaˬ-eu tsawˇ haˬ yaˇ kʼaˬ laˆ doˆ gaˇ duˇ-awˇ, kʼahˬ sehˇ jehˆ-eu tsawˇ haˬ shaˬ zahˬ shaˇ naꞈ gaˇ duˇ-eu meh.

²⁰Nui gʼoꞈ ahˇ-eu deuˬ maˬ dehꞈ dzaˬ laˇ-ehˇ, jaˬ myawꞈ mehˇ shuiˇ deuˬ duˬ kʼahˬ-ahˇ ga ahˇ-eu meh.

²¹Aˬ dzawˬ dzawˬ-eu aˬ li, aˬ da-ahˇ shaˬ zahˬ laˆ naꞈ-awˇ, aˇ gah-euˬ aˬ da nui saˇ maˬ oꞈ-a.

²²Nui ma saˇ-eu jeˬ jaˆ gʼaˬ gʼaˬ ma pyeuꞈ-awˇ, nui ma cawˆ-eu jeˬ puˇ nmꞈ gui-iˇ-eu naˇ gawˇ meh.

²³Maˬ dawˇ-eu tsawˇ haˬ laꞈ nmꞈ nmꞈ gaˇ ha geuꞈ-awˇ, yaw tsaˬ yaw dawˇ gaˇ ma laˆ gʼahˬ-eu meh.

²⁴Noeˬ siˬ noeˬ mawˇ nya-eu gʼaˬ zaˬ siˬ tsawˇ gahˇ-ahˇ haw tsoˆ taˬ-awˇ, dawˇ ga gʼaˬ mˬ dzeˇ miˇ dzeˇ-ahˇ baꞈ leuˇ haw-eu meh.

²⁵Aˬ dzawˬ dzawˬ-eu aˬ li aˬ da-ahˇ laˆ shaˬ-awˇ, aˬ ma shaˬ zahˬ bi naꞈ-eu ma.

²⁶Maˬ lehˬ maˬ ca gaˇ guiˇ oꞈ tiꞈ-eu jeˬ lehˬ dui dui-awˇ, tsawˇ muiˬ-ahˇ kʼehˬ-eu jeˬ doeˇ dui dui meh.

²⁷Dawˬ kʼaˇ ngeuˇ-eu maˬ ngehˬ-eu deuˬ tsawˇ gahˇ byah-awˇ, nui ma yaw coꞈ deuˬ noeˬ siˬ noeˬ mawˇ nya-eu meh.

²⁸Ciˬ cuˇ ni jawˇ bya-eu aˬ dzawˬ tsawˇ gahˇ ahˇ gaˇ duˇ-awˇ, dawˬ maˬ ngehˬ ni jawˇ-eu aˇ gah, noeˬ siˬ noeˬ mawˇ nya gaˇ duˇ-eu meh.