Read Akha Dawˬ daˬ 2 Bible Online

Dawˬ daˬ 2 - Akha bible

Dawˬ daˬ 2

¹Ngaˬ li-oˇ, ngaˇ mehˬ-eu tsoˆ-eu dawˬ-ahˇ naˇ haˬ geuꞈ-awˇ, ngaˬ neh mehˬ-euˬ jeˬ maˬ ngehˇ ni mˇ-awˬ.

²Zaˬ siˬ tsawˇ gahˇ-ahˇ naˬ bawˇ ciˬ kʼmˇ taˬ-awˇ, siˬ laˇ nya laˇ ni leh jeh-awˬ.

³Tsawˇ gahˇ hawˇ-eu noeˬ siˬ noeˬ mawˇ nya-eu jeˬ-ahˇ za ni, yaw kʼaˆ-ehˇ shaˇ-awˬ.

⁴Pyuˇ shuiˇ myawˬ gahˬ-ahˇ poˆ-eu loꞈ-ehˇ, kʼoeˇ deuˬ-ahˇ nawˇ poˆ-awˬ.

⁵Nawˇ kʼoeˇ loꞈ-ehˇ jahˇ naˇ, Sahˬpaˬ Miˬyehˇ-ahˇ ya guˆ-eu gaˇ kawˆ siˬ nya laˇ-awˇ, Miˬyehˇ neh beh taˬ-euˬ zaˬ siˬ tsawˇ gahˇ nawˇ ya mawˇ tehꞈ-a.

⁶Sahˬpaˬ Miˬyehˇ-aˬ, zaˬ siˬ tsawˇ gahˇ biꞈ-eu gʼaˬ meh. Tsawˇ gahˇ hawˇ-eu noeˬ siˬ noeˬ mawˇ nya-eu jeˬ, aˬ yawꞈ-euˬ kʼaˬ meh-ahˇ neh doˆ le-euˬ meh.

⁷Yaw sui yaw dawˇ deuˬ gʼaˇ duˬ muiˬ-eu zaˬ siˬ tsawˇ gahˇ aˬ yawꞈ jeˬ hmˬ taˬ-awˇ, yaw tsaˬ yaw dawˇ tsawˇ haˬ deuˬ-ahˇ aˬ yawꞈ haw piˇ-eu meh.

⁸Tsaˬ leˇ tsahˇ leˇ-eu tsawˇ haˬ-euˬ gaˇ ma-ahˇ aˬ yawꞈ loꞈ piˇ-awˇ, muiˬ-eu jaˬ-eu deuˬ-ahˇ haw piˇ-eu meh.

⁹Ngaˬ-euˬ dawˬ-ahˇ nawˇ naˇ haˬ geuꞈ naˇ, muiˬ-eu jaˬ-eu jeˬ hawˇ-eu tsaˬ-eu dawˇ-eu jeˬ-ahˇ siˬ nya laˇ-awˇ, aˬ joˆ-ehˇ yaˬ dehꞈ ya jawˇ-eu gaˇ kawˆ siˬ duˬ laˇ tehꞈ-a.

¹⁰Nawˬ-euˬ nui ma laꞈ kʼoeˇ zaˬ siˬ tsawˇ gahˇ ahˇ le-awˇ, nawˬ-ahˇ laˬ kʼaˬ bi cehˇ laˇ tehꞈ-a.

¹¹Yaw muiˬ yaw doeˇ tseˇ paˆ nya-eu tsawˇ gahˇ nawˬ-ahˇ haw piˇ-awˇ, noeˬ siˬ noeˬ mawˇ nya-eu jeˬ nawˬ-ahˇ loꞈ piˇ-eu laꞈ kʼoeˇ,

¹²haiˬ-eu gaˇ ma-ahˇ nawˬ-ahˇ ka kʼoꞈ-awˇ, maˬ muiˬ-eu dawˬ ngehˬ-eu deuˬ-euˬ baꞈ dzah-ahˇ, nawˬ-ahˇ bi dzeuˇ-iˇ laꞈ tehꞈ-a.

¹³Yaw tsaˬ yaw dawˇ gaˇ ma-ahˇ byehˇ dzeh-awˇ, yaw zahˇ laꞈ kʼoeˇ cah-eu tsawˇ haˬ kʼoeˇ deuˬ,

¹⁴Maˬ muiˬ maˬ jaˬ-eu jeˬ mˇ gaˇ laˬ kʼaˬ cehˇ-awˇ, yaw haiˬ jeˬ laꞈ kʼoeˇ byawˬ gʼa mo gʼa-eu tsawˇ haˬ kʼoeˇ deuˬ,

¹⁵Gaˇ ma yaw dawˇ-ahˇ byehˇ dzeh-awˇ, gaˇ bahˬ iˇ luꞈ-eu tsawˇ haˬ kʼoeˇ deuˬ-euˬ laꞈ-ahˇ, (zaˬ siˬ tsawˇ gahˇ nawˬ-ahˇ ka kʼoꞈ nehˬ laꞈ tehꞈ-a.)

¹⁶Dawˬ ja nya-awˇ mehˇ shuiˇ bym-eu, haiˬ-eu zaˬ miˬ-euˬ tsawˇ gahˇ-ahˇ, nawˇ dehꞈ dzeuˇ nya tehꞈ-a.

¹⁷Yo zaˬ-ahˇ saˇ jaˇ maˬ ziꞈ-ehˇ, saˇ jaˇ dzaˬ-euˬ dawˬ-ahˇ ngehˇ-eu, zaˬ miˬ yaw haiˬ-euˬ mehˇ shuiˇ-ahˇ, nawˇ jaw dzeuˇ nya tehꞈ-a.

¹⁸Aˬ yawꞈ-euˬ nymˇ-ahˇ nawˇ iˇ naˇ, shiˇ-eu gaˇ ma-ahˇ cah gaˇ duˇ tehꞈ-a.

¹⁹Aˬ yawꞈ jawˇ gaˇ kʼaˇ iˇ-euˬ deuˬ gʼoꞈ doˆ laˇ nah maˬ baw-ehˇ, dehꞈ-eu gaˇ ma-ahˇ ya byehˇ tsehˆ-eu meh.

²⁰Kʼoeˇ miˇ neh muiˬ-eu jaˬ-eu deuˬ-euˬ mehˬ nah caw teh-awˇ, tsaˬ-eu dawˇ-eu gaˇ ma-ahˇ nawˇ cah-awˬ.

²¹Aˬ jeˬ miˇ neh ehˇ naˇ, yaw tsaˬ yaw dawˇ tsawˇ haˬ deuˬ-ahˇ miˇ kʼahˬ heu kʼahˬ oꞈ-awˇ, sui-eu dawˇ-eu deuˬ heu gaˇ ya jawˇ tehꞈ-a.

²²Ehˇ kʼawꞈ, haiˬ-eu tsawˇ haˬ deuˬ miˇ kʼahˬ heu kʼahˬ laꞈ nyiˇ bi sheuˬ dzeh-awˇ, saˇ jaˇ maˬ ziꞈ-eu deuˬ duˬ puˇ bi gʼeu lehˆ doˆ tehꞈ-a.