Read Akha Dawˬ daˬ 20 Bible Online

Dawˬ daˬ 20 - Akha bible

Dawˬ daˬ 20

¹Jiˇ baˬ dawˬ oeˬ lahˬ. Dzaˬ yehꞈ dawˇ yehꞈ dawˬ ja dmˬ gahˬ. Jiˇ baˬ gʼaˬ zaˬ tsawˇ haˬ dawˇ ga.

²Sahˬ paˬ nui pehˇ dzoeˬ-eu kʼaˬ laˬ, sahˬ paˬ-ahˇ laˆ ca-euˬ tsawˇ shiˇ uˬ kʼawˇ.

³Iˬ dehˬ yahˇ-eu suˇ gahˇ. Iˬ ceh poˆ-euˬ suˇ dzawˬ.

⁴Nymˇ gawˬ, deh yaˇ yamˬ law maˬ tsehˬ yehˬ le cehˇ diꞈ laꞈ tuˆ maˬ byah.

⁵Tsawˇ haˬ nui noeˬ tmˬ naꞈ dawˬ dah pahˬ kʼawꞈ, zaˬ siˬ tsawˇ siˬ beuˬ doˆ laꞈ nya-eu meh.

⁶Mehˬ boeˬ saˇ jaˇ ziꞈ-eu tiˬ tahˇ tiˬ yaˇ, nui ma saˇ jaˇ ziꞈ-eu tiˬ gʼaˬ maˬ keuˬ.

⁷Aˬ da yaw sui yaw dawˇ, zaˬ oeˬ jeˬ biˇ guiˬ lahˬ.

⁸Yaˇ kʼaˬ daˇ-eu nuiˇ mahˬ kʼoeˇ taˆ sahˬ paˬ, myaˆ nuiˆ baw seu iˬ baˇ baw shawˇ doˆ-mˇ jeˇ.

⁹Yawˬ ha nui ma yaw shawˇ suˇ ehˇ nya nmˇ. Yawˬ ha yaw lehˬ maˬ jaˆ suˇ no nym nmˇ.

¹⁰Maˬ byah cehˇ pehˬ maˬ tsaˬ daˇ leuˇ, Sahˬpaˬ Miˬyehˇ bye-eu nyiˬ jeˬ.

¹¹Aˇ neˇ zaˬ nahˬ aˇ hui tehꞈ kʼawꞈ, pu ka aˬ mui mui gaˇ haw naˇ, tsawˇ muiˬ tsawˇ doeˇ siˬ laˇ-eu meh.

¹²Gaˬ-eu naˬ bawˇ mawˇ-eu myaˆ nuiˆ, nyiˬ jeˬ luꞈ Sahˬpaˬ Miˬyehˇ beh-euˬ meh.

¹³Yuꞈ gaˇ gaˬ-eu tsawˇ shaˬ. Mˇ gaˇ gaˬ-eu dzaˬ ngeh maˬ jiˇ.

¹⁴Zeuˇ ngeh ja doeˇ, geuꞈ ngeh ja poeˬ.

¹⁵Sehˇ hawˇ-eu shuiˇ poeˬ dui dui kʼawꞈ, zaˬ siˬ tsawˇ gahˇ mehˬ luˬ-ahˇ maˬ keuˆ-a.

¹⁶Maˬ siˬ boeˇ mi-euˬ dziˇ dzoˆ shaˇ pi naˇ, yawˬ ha pehˇ kʼahˬ ya lehˆ daˇ gaˇ keuˆ meh.

¹⁷Kʼoeˬ dzaˇ dzaˬ-eu aˇ naˆ kuiˇ kʼawꞈ, kʼaˇ shuiꞈ jehˆ luˆ gaˇ duˇ-eu meh.

¹⁸Bawˬ toˆ yaw muiˬ suˇ teˇ naˇ, suˇ dawˬ maˬ kuꞈ gaˇ guiˇ taˬ deuˆ.

¹⁹Duˬ peuˬ ngawˬ naˇ aˇ lawˇ doˆ-eu miˇ neh, dawˬ ja myaˬ-eu tsawˇ haˬ-ahˇ yahˇ-awˬ.

²⁰Aˬ ma aˬ da-ahˇ yaˬ kʼehˇ yaˬ-eu tsawˇ haˬ, zahˇ tsui ni gʼeh ngeh tsiˇ kʼmˬ miˆ-iˇ tehꞈ-a.

²¹Yaw awˬ yaw yaˇ-ehˇ za-euˬ jeˬ biˇ, tsawˇ haˬ-ahˇ guiˬ lahˬ maˬ biꞈ-a.

²²Laꞈ poˆ poˆ-eu dawˬ taˬ ngehˬ, Sahˬpaˬ Miˬyehˇ jahˇ jiˇ gaˇ dawˬ keuˆ-awˬ.

²³Maˬ byah-eu cehˇ pehˬ-ahˇ Sahˬpaˬ Miˬyehˇ nui daˆ daˆ-awˇ, maˬ tsaˬ-eu paˆ yawˬ-ahˇ aˬ yawꞈ bye-eu meh.

²⁴Tsawˇ haˬ zaˬ-euˬ kuiˇ toꞈ Sahˬpaˬ Miˬyehˇ laꞈ-ahˇ jaˆ-awˇ, yawˬ iˇ gaˇ ma siˬ-eu aˬ suˇ jawˇ ta.

²⁵Maˬ noeˬ duˬ ni lawˇ-eu shehˇ-eu lahˇ ju kʼmˇ gaˇ duˇ-awˇ, noeˬ paˇ-eu aˇ yamˬ maˬ jaˆ-a.

²⁶Tsawˇ gahˇ byah-eu sahˬ paˬ tsawˇ doeˇ baw shawˇ doˆ-awˇ, laˆ lawˬ aˇ beuˆ neh lehˬ-eu meh.

²⁷Sahˬpaˬ Miˬyehˇ-euˬ tsiˇ kʼmˬ tsawˇ haˬ zaˬ-euˬ nui ma-ahˇ keuˬ haw-awˇ, tiˬ jeˬ-iˬ zaꞈ taˬ-euˬ maˬ baw-a.

²⁸Sahˬ paˬ ziˇ baw saˇ jaˇ, dzoeˬ dzaˬ nuiˇ mahˬ ziꞈ-eu nui ma yaw sui yaw dawˇ.

²⁹Zaˬ guˬ kʼahˬ sehˇ aˬ lmˬ, tsawˇ kʼaˆ kʼahˬ sehˇ uˬ pyuˇ.

³⁰Tsawˇ haˬ zaˬ-euˬ nui ma laˆ paˇ-eu jeˬ, maˇ naˇ-ahˇ kawˆ shawˇ-eu loꞈ-ehˇ naˇ laˇ-eu meh.